Դու խճճվել ես լաբիրինթոսում, ընկեր. ՔՊ վարչության անդամը` «Ժառանգության» փոխնախագահին

«Քաղաքացիական պայմանագիր» կուսակցության վարչության անդամ Արարատ Միրզոյանը ֆեյսբուքյան իր էջում բաց նամակով դիմել է «Ժառանգություն» կուսակցության փոխնախագահ Արմեն Մարտիրոսյանին՝ անդրադառնալով 2008 թվականի մարտի 1-ի ողբերգական իրադարձություններում արտաքին գործերի նախկին նախարար Վարդան Օսկանյանի մասնակցությանը:

Հիշեցնենք, որ «Ա1+»-ի հետ զրույցում Արմեն Մարտիրոսյանը խոսելով Օսկանյանի հիմնադրած «Համախմբում» կուսակցության հետ հնարավոր համագործակցության եւ Մարտի 1-ին վերջինիս մասնակցությանը, հայտարարել էր. «Վարդան Օսկանյանը կրակելու հրաման, բարեբախտաբար, չի տվել, նա իշխանության մաս է եղել, իր հայտարարությունը միանշանակ չի ընդունվել: Իշխանական թիմերում գտնված մարդիկ կատարել են քայլեր, արել են խոսքեր, որոնք հանրության կողմից ընդունելի չեն եղել: Նրան կոռուպցիայի մեջ չեն մեղադրել: Ակնհայտ է, որ Վարդան Օսկանյանն իր կրթությամբ, ինտելեկտով, իր աշխատանքային փորձով առանձնանում է որոշակիորեն»:

Արարատ Միրզոյանի բաց նամակում, մասնավորապես, ասված է.

«Սիրելի Արմեն,

Շնորհավոր անցած տոներդ։

Որպիսությունդ չեմ հարցնում․ տեսնում եմ, որ լավ ես եւ շարունակում ես Հայաստանը մահաբեր ճահճից հանելու ուղիների փնտրտուքներդ։ Տեսա վերջին հարցազրույցներդ, հիշեցի քո բազմամյա պայքարը, մտաբերեցի քո պատվաբեր պահվածքը Մարտի մեկին։ Եվ որոշեցի քո թույլտվությամբ իմ եղբայրական եւ գործընկերական դիտարկումը հայտնել այդ փնտրտուքներիդ կապակցությամբ։ Ելքը չգտնելով, իմ տպավորությամբ, դու խճճվել ես լաբիրինթոսում, ընկեր (կներես կոպիտ ձեւակերպման համար, ավելի դիպուկ, բայց մեղմը չգտա)։

«Հայաստանում քաղաքական դաշտում, ցավոք սրտի, սրբեր գոյություն չունեն»,- ասում ես։ Քաղաքականությունը կրոնական համակարգ չէ, եղբայր, եւ սրբերի ներկայությունն այստեղ պարտադիր չի, իհարկե։ Բայց քաղաքականությունն այն ճանապարհն է, որով, պարզեցված ձեւակերպմամբ, մարդիկ պետք է շարունակաբար լավացնեն իրենց երկիրը, միջավայրը, համակեցության նորմերը՝ օրենքները, լավացնեն իրենց կյանքը։ Ակնհայտորեն որեւէ բան լավացնել կարող են միայն այդ լավը երազողները, լավ մղումներ ունեցողները, վատի հետ չհաշտվողները, չհամակերպվողները, այդ լավի համար իրենց անձնական ժամանակը, էներգիան, բարօրությունը զոհաբերելու պատրաստակամություն ունեցողները։

Վարդան Օսկանյանը, որի հետ դաշինքի հնարավորություն ես քննարկում ու բանակցում, այդպիսինների թվին չի պատկանում, ինքդ էլ գիտես։ Քոչարյանի բազմամյա արտգործնախարարի մարտիմեկյան ելույթը հիշում ես հաստատ։ Կարծում ես՝ զղջու՞մ է եւ ուզում է քավե՞լ մեղքերը։ Սա վերջերս է ասել՝ հուլիսին․ «Եթե իշխանությունում լինեի, կանեի նույնը, ինչ մարտի 1-ին»։

Ավելին ասեմ՝ խնդիրն ավելի խորությամբ դիտարկելիս հասկանում ես, որ հենց Վարդան Օսկանյանի ու նրա նման ռեժիմի հազարավոր սպասարկուների, մեծուփոքր պետական պաշտոնյաների, համատիրության ղեկավարների, դասատուների ու այլոց շնորհիվ է, որ հետադիմական, ռեպրեսիվ, ուզուրպատորական ռեժիմը շարունակում է գոյություն ունենալ։ Եթե կուզես՝ իմ համար նրանք անգամ ավելի վատն են, քան անձամբ Քոչարյանն ու Սերժը։

Հասարակական-քաղաքական շրջանակներում էս վերջին տարիներին շատ է քննարկվում՝ ո՞րն է խնդիրը, ինչու՞ մեր մոտ չի ստացվում «աղբյուրից հեռացնել սեւ դեւին»։ Պատասխանն այնքան պարզ ու ակնհայտ է, որ հրաժարվում ենք նկատել։ Որովհետեւ մեր հեքիաթի «արքայազնները» դեւ հեռացնող արքայազն չեն եղել, մեր «հերոսները» մեր առջեւից գնացող ու մեր ճանապարհը լուսավորող Դանկո չեն եղել, որովհետև էդ դեւը նաեւ ․․․իրենց մեջ է եղել։ Որովհետեւ նույնիսկ մաքուրներն ու անվախները կարող են ընկրկել էդ հսկայական պատասխանատվության առաջ, էլ չասած նրանք, որոնք ժամանակին դեւի մասն են եղել։ ․․․Թե բա՝ Օսկանյան։

«Քիչ ենք»,- ասում ես,- «ուստի մեզ անհրաժեշտ է համագործակցություն»։ Այո, լավ կլիներ, որ առաջնագծում շատ լինեինք, ավելի հեշտ կլիներ, ինչ խոսք։ Իրականում մաքուրները, լավ Հայաստանի մասին երազ ունեցողները շատ-շատ են, բայց նրանք ուզում են տեսնել իրենց Դանկոներին իրենցից առջեւ, որովհետեւ մի քանի անգամ արդեն գնացել են դեւի մոտ, բայց թուր ունեցող արքայազնները, պարզվել է, տեղում չեն եղել։

Ընդունում եմ, Արմեն ջան, քիչ ենք։ Բայց ախր դա բոլորովին կարեւոր չի, երբ դու ճիշտ ես ու հաստատակամ, երբ պայքարում ես քո արժանապատվության համար, երբ կանգնած ես շեքսպիրյան երկընտրանքի առջեւ։ Քանակը լավ բան է, այո, բայց համոզված եմ՝ հաղթանակի գրավականն առաջնագծում գտնվողների մաքրությունն է, ճիշտը, լավի մասին երազը, երազի հետեւից գնալու ու երազի համար անհաշտ կռիվ տալու պատրաստակամությունը․․․

Սա է իմ հավատամքը եւ ճանապարհը, եղբայր, դու, բնականաբար, ազատ ես որոշելու՝ Օսկանյանի կողքին ես, թե քո հին տեղում՝ իմ եւ մյուս ընկերների կողքին։

Քո նկատմամբ սիրով ու հավատով՝

Արարատ Միրզոյան
«Քաղաքացիական պայմանագիր» կուսակցության վարչության անդամ Թիվ 3 ընտրատարածքում «Ելք» դաշինքի պատգամավորի թեկնածու»:

Տպել
4410 դիտում

Ջուլիետտա Ստեփանյանը եւ Ալինա Մարտիրոսյանն ամուսնու հետ այսօրվա հանրահավաքին (լուսանկար)

Նոր շոր ու կոշիկ առնեմ, էս շորերը հանեք, մեր կողքը կանգնեք. մոլի աշխատակիցը՝ ոստիկաններին

Հանրային ռադիոյում խիստ վերահսկողություն է. աշխատակիցներին ժամով են թողնում

Ցուցարարները արգելափակել են Վիգեն Սարգսյանի մեքենան եւ փորձել բացել դուռը

Թատերականի նախկին ուսանողը ամոթանք է տալիս ռեկտորին եւ դիմում փոխքաղաքապետին. տեսանյութ

Հասարակությունը փոխվել է, ոստիկանությունը՝ ոչ

Այստեղ աղբարկղ կդնենք, բերեք շպրտեք այդտեղ այդ աղբը՝ ձեր ՀՀԿ անդամատոմսերը. թարմացվող

ԱՄՆ-ում պատռել են Սերժ Սարգսյանի նկարը. դերասանուհի Անժելա Սարգսյանը մասնակցել է ցույցին

Արմեն Սարգսյանը հրաժեշտի հանդիպում է ունեցել Էրիկաս Պետրիկասի հետ

Ինչո՞ւ է Ռուսաստանը վախենում գունավոր հեղափոխություններից

Վանաձորում կրկին միացել են երեւանյան ցույցերին

Սերժ Սարգսյանը շնորհավորանքներ է ստանում Ղրղզստանից, Վիետնամից եւ Տիգրան Սարգսյանից

Հայկ Բարսեղյանն ազատ է արձակվել. ոստիկանները վնասել են նրա մեքենան (լուսանկար)

Ժամը 17:00-ի դրությամբ՝ ոստիկանություն է բերվել 217 քաղաքացի. ոստիկանություն

Ոստիկանության քրեական հետախուզության բաժնի աշխատակիցների նկատմամբ բռնություն է գործադրվել

Հայաստանի ոչ պոպուլյար նախագահն իրեն վարչապետ է կարգել. The Economist-ի անդրադարձը

Դերասան Արման Նշանյանը կոչ է անում միանալ #ԻմՔայլին (լուսանկար)

«Առաքելություն» կուսակցությունը համերաշխություն է հայտնում ցուցարարներին

Գյումրիում առաջին անգամ Նիկոլ Փաշինյանի Թավշյա հեղափոխությանը միանալու կոչ է հնչել

Ծեծի է ենթարկվել Աժ նախկին պատգամավոր Գարեգին Նուշիկյանի որդին. նա տեղափոխվել է հիվանդանոց