Շիրխանյանին կբերե՞ն այսօրվա նիստին. նա դատարան կգա միայն պատգարակով

2015 թ.-ին Նորքում ԱԱԾ-ի կողմից վնասազերծված զինված խմբի գործով մեղադրյալ, ՀՀ պաշտպանության նախկին փոխնախարար Վահան Շիրխանյանը ցանկություն է հայտնել ներկայանալ այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում կայանալիք դատական նիստին:

Այս մասին երեկ մեր զրույցում ասաց նրա պաշտպան Հայկ Ալումյանը:

Նշենք, որ սույն գործով առաջին դատական նիստին (2016թ. դեկտեմբերի 25-ին) Վահան Շիրխանյանը չէր ներկայացվել դատարան, ինչի վերաբերյալ նրա պաշտպան Հայկ Ալումյանը լրագրողներին տեղեկացրել էր, որ Շիրխանյանը չի կարողանում ոտքի վրա կանգնել, իսկ նստելիս 20 րոպեից ավելի չի կարողանում նստած մնալ:

Ալումյանը երեկ մեր զրույցում հավելեց, որ Վահան Շիրխանյանը ցանկություն ունի ներկայանալ եւ որոշակի հայտարարություններ անել, որոնք ժամանակին ուզում էր մամուլի միջոցով անել, բայց չստացվեց. ԶԼՄ-ներին թույլ չտվեցին տեսակցել ՊՆ նախկին փոխնախարարին: «Այն, ինչ ցանկանում էր հայտնել ԶԼՄ-ներին, կհայտնի դատավարության ընթացքում, բայց կարծում եմ մյուս կողմը, որը պարոն Շիրխանյանին պահում է բանտում, ամեն ինչ անելու է, որպեսզի իմ պաշտպանյալը դատավարությանը ներկա չլինի ու հայտարարությունը չհնչի: Մենք մի պարզ պահանջ ենք ներկայացրել՝ ապահովել որպեսզի Վահան Շիրխանյանին պատգարակով բերեն դատարան, պատգարակ չեն տրամադրելու, իսկ այդ պարագայում Շիրխանյանը պարզապես հնարավորություն չունի ներկայանալու դատարան»,- մանրամասնեց Ալումյանը:

Բացի դա պաշտպանը պարզել է, որ այն դեղերը, որոնք արդեն մի քանի ամիս է Շիրխանյանն ընդունում է, անհամատեղելի են մեկը մյուսի հետ: Նշենք, որ Շիրխանյանը 14 տարբեր դեղեր է ընդունում: «Մենք ուսումնասիրեցինք իրեն նշանակած դեղերի օգտագործման կանոնները եւ պարզվեց, որ այդ դեղերից մի քանիսն անհամատեղելի են, այսինքն՝ բժիշկները դեղեր նշանակելիս հաշվի չեն առել, թե ուրիշ բժիշկներ մյուս հիվանդությունների համար ինչ դեղեր են նշանակել:

Պարզվեց, որ ամիսներ շարունակ պարոն Շիրխանյանին տրվել են այնպիսի դեղամիջոցներ, որոնք ոչ միայն անհամատեղելի են, այլ վնասում են օրգանիզմին եւ ավելի վատթարացնում նրա վիճակը»,- մանրամասնեց Ալումյանը: Վերջինս նշեց, որ այժմ դրա վերաբերյալ բողոք է կազմում, որը ներկայացնելու է Մարդու իրավունքների պաշտպանին, ՔԿՎ պետին եւ Արդարադատության նախարարությանը:

«Արդարադատության նախարարի հետ մեր գրագրությունները ցույց տվեցին, որ ինքը ոչ միայն ոչ մի բան չի որոշում, այլ չի ուզում խառնվել: Այնուամենայնիվ, բողոքն իրեն էլ կգրենք: Այս կարեւոր փաստը պետք է քննարկման առարկա դառնա եւ պարզվի՝ սա դիտավորությո՞ւն էր, թե՞ անփութություն. երկու դեպքում էլ իհարկե պետք է պատասխանատվություն կրողներ լինեն, ես վախենամ դիտավորյալ է եղել»,- մեր հարցին ի պատասխան ասաց նա: Մեր դիտարկմանը, թե ե՞րբ է դա պարզվել եւ որքան ժամանակ է, որ այդ դեղերը Շիրխանյանը չի ընդունում, պաշտպանը պատասխանեց, որ վերջերս էլ ընդունել է, մինչեւ որ իրենք չեն պարզել, որ չի թույլատրվում:

«Փաստն այն է, որ անընդհատ նրա վիճակը վատանում է, սրտի ցավեր ունեցել է ժամանակին, հետո պարզվեց, որ դա թոքերի ինֆարկտի նախանշան է: Մենք հիմա այլ մտավախություն էլ ունենք. զարկերակի վրա պողպատյա ֆիլտր են տեղադրել, որպեսզի տրոմբ չառաջանա, սիրտ, թոքեր չթափանցեն, ֆիլտրն արդեն մի քանի ամիս է, խրվել է արյունատար անոթի մեջ, մեծ է ներքին արյունահոսության վտանգը»,- ասաց նա: Հարցին, թե այնուամենայնիվ, «Երեւան-Կենտրոն» ՔԿՀ-ն Վահան Շիրխանյանին սալյակ տրամադրել է, պաշտպանն ասաց, որ ՔԿՀ-ից «խնդրանքը» գրավոր են պահանջել, հետեւաբար, գրավոր էլ պատասխանելու են, այժմ սպասում են պատասխանի:

Երեկ ՀՀ ԱՆ ՔԿՎ հանրային կապերի բաժնի պետ Գոռ Ղլեչյանից հետաքրքրվեցինք, թե ի վերջո այսօր պատգարակ կհատկացվի՞ Վահան Շիրխանյանին դատարան ներկայացնելու համար: Ղլեչյանը խոստացավ հարցին պատասխանել ավելի ուշ, իսկ արդեն ավելի ուշ նա մեր հեռախոսազանգերին չպատասխանեց:

Նշենք, որ պաշտպանական կողմն արդեն մի քանի ամիս է բարձրաձայնում է Վահան Շիրխանյանի առողջական վատ վիճակի մասին, սակայն անօգուտ: Ավելին՝ ՄԻՊ-ը որոշում է կայացրել, որով ճանաչել է, որ խախտվել է Վահան Շիրխանյանի առողջության պահպանման իրավունքը, ինչպես նաեւ՝ առաջարկել նրան անհապաղ տեղափոխել մասնագիտացված հիվանդանոց, սակայն ի պատասխան որեւէ գործողություն չի արվել:

Շիրխանյանի առողջական վիճակի հետ կապված նաեւ գանգատ է ներկայացվել ՄԻԵԴ, որը քննվելու է առաջնահերթության կարգով:

Վահան Շիրխանյանին մեղադրանք է առաջադրվել ՀՀ քրեական օրենսգրքի 300 հոդվածով (իշխանությունը յուրացնելուն նախապատրաստվելը) ինչպես նաեւ Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն եւ դերակատարություն ունենալու մեջ, նախատեսված` ՀՀ քրեական օրենսգրքի 223-րդ հոդվածի 2-րդ մասով (պատժվում է ազատազրկմամբ՝ վեցից տաս տարի ժամկետով) եւ ՀՀ քրեական օրենսգրքի 235 հոդվածով (ապօրինի կերպով զենք պահելը ձեռք բերելը կամ փոխադրելը՝ պատժվում է ազատազրկմամբ՝ առավելագույնը երեք տարի ժամկետով):

Այս գործով նիստը տեղի կունենա այսօր, ժամը 14:30-ին: