Կեղծ ցուցմուքներ տվածները դրսում են, մեզ տանում-բերում են. ազատամարտիկը սպառնաց. ՖՈՏՈ

Ամբաստանյալ Հայր Անտոնը

Ամբաստանյալ Նելլի Մինասյանը

Խաչիկ Ավետիսյանն ու նրա պաշտպանը

Խմբի պարագլուխ համարվող Արթուր Վարդանյանն ու նրա պաշտպանը

Խաչիկ Ավետիսյանը

2015թ. նոյեմբերին Նորքում ԱԱԾ-ի կողմից մեծ աղմուկով վնասազերծված զինված խմբի գործով դատական նիստն այսօր մի քանի րոպե տեւեց. այն ավարտվեց ազատամարտիկ Խաչիկ Ավետիսյանի եւ խմբի պարագլուխ համարվող Արթուր Վարդանյանի բղավոցներով ու դժգոհություններով:

Բանն այն է, որ սույն գործով նույնիսկ դատաքննություն չի սկսվել. արդեն երկրորդ անգամ հետաձգվում է նիստը՝ նույն պատճառաբանությամբ. դատարան չի ներկայացվում ՀՀ պաշտպանության նախարարի նախկին տեղակալ Վահան Շիրխանյանը: Դատական նիստերի հետաձգումը դժգոհություն է առաջացնում ինչպես ամբաստանյալների, այնպես էլ՝ պաշտպանների մոտ:

Նախագահող դատավոր Արմեն Բեկթաշյանը դատավարության մասնակիցներին տեղեկացրեց, որ քրեակատարողական հիմնարկից դատարան գրություն է ուղարկվել այն մասին, որ Շիրխանյանը հրաժարվել է դուրս գալ խցից եւ ուղեկցությամբ ներկայանալ դատարան: Ըստ ՔԿՀ-ի կողմից կազմված եւ դատարան ուղարկված արձանագրության՝ Շիրխանյանը հայտարարել է, որ  դատարան կարող է ներկայանալ միայն պառկած վիճակում՝ պատգարակով, քանի որ առողջական խնդիրների՝ ոտքերի, մեջքի, սրտի ցավի, գլխապտույտի պատճառով ի վիճակի չէ նստած կամ կանգնած վիճակում մասնակցել նիստին:

Դատարան էր ուղարկվել նաեւ քրեակատարողական հիմնարկի բժշկական սպասարկում իրականացնող խմբի ղեկավար Սաֆարյանի կազմած տեղեկանքն այն մասին, որ Շիրխանյանի առողջական վիճակը բավարար է՝ դատական նիստին մասնակցելու համար: Տեղեկանքը կազմած բժիշկը գրել էր նաեւ, որ անհրաժեշտություն չի տեսնում՝ Շիրխանյանին դատարան ներկայացնել պատգարակով՝ պառկած վիճակում:

Շիրխանյանի պաշտպան Հայկ Ալումյանը, սակայն դատարանում հայտարարեց, որ իր պաշտպանյալի առողջական վիճակի վերաբերյալ վերը նշված տեղեկանքը կեղծ է: «Տեղեկանքը կազմած նույն բժիշկը՝ Սաֆարյանը, հենց ինքն է Շիրխանյանի համար արդեն ամիսներ շարունակ անկողնային ռեժիմ սահմանել: Հենց հիմա Շիրխանյանը անկողնային ռեժիմի հիվանդ է, եւ դրա համար եմ ես հայտարարում, որ այս տեղեկանքը կեղծ է»,- ասաց Ալումյանը: Նա դատարանին հորդորեց հետագա նիստերը եւս չձախողելու համար քայլեր ձեռնարկել, որպեսզի Վահան Շիրխանյանը դատարան ներկայացվի պատգարակով:

Դատավոր Բեկթաշյանն ի պատասխան նշեց, որ այս պահին դատարանին հայտնի չէ որեւէ ապացույց, որ Շիրխանյանն անկողնային ռեժիմի հիվանդ է:

«Նման փաստաթուղթ պիտի տա մեկը, ով կեղծ տեղեկանքի տակ է ստորագրել»,- հակադարձեց Ալումյանը:

Գործում ներգրավված պաշտպաններից Ինեսսա Պետրոսյանը հայտարարեց, որ հերթական դատական նիստն արհեստականորեն հետաձգվում է: 

«Իր առողջական վիճակից ելնելով՝ Շիրխանյանը պատգարակ է պահանջել, եւ ՔԿՀ-ն, այո՛, պարտավոր էր նրան դատարան ներկայացնել պատգարակով, հատկապես որ նման նախադեպ մենք ունենք»,- ասաց Պետրոսյանը՝ բարձրաձայնելով նաեւ այն մասին, որ պատկան մարմինների քմահաճույքի պատճառով այսօր խախտվում է նաեւ մյուս ամբաստանյալների արդար դատաքննության իրավունքը: 

Փաստաբան Հովիկ Արսենյանն էլ միջնորդեց հանձնաժողովային դատաբժշկական փորձաքննություն նշանակել եւ մեկ հարց առաջադրել՝ արդյո՞ք Վահան Շիրխանյանը կարող է մասնակցել դատական նիստին, թե՞ ոչ:

Դատավոր Բեկթաշյանը նշեց, որ չի կարող քննարկվել որեւէ միջնորդություն այն դեպքում, երբ դատական նիստը հետաձգվում է, ապա նկատեց, որ նիստերը հետաձգվում են, քանի որ Շիրխանյանը խոչընդոտում է դրանց անցկացմանը: 

Ամբաստանյալ Վահան Շիրխանյանի բացակայության պայմաններում նիստը շարունակվել չէր կարող, ուստի դատարանը մեկ շաբաթով հետաձգեց այն: Դատարանի այս որոշումը զայրույթ առաջացրեց ամբաստանյալ, ազատամարտիկ Խաչիկ Ավետիսյանի մոտ. նա սկսեց բղավել եւ սպառնալ, որ հաջորդ դատական նիստին ինքը չի ներկայանալու դատարան եւ մատը թափահարելով ասաց. «Մեզ տանում-բերում են, իսկ նրանք, ովքեր կեղծ ցուցմունքներ են տվել, իրանք դուրսն են»: Խաչիկ Ավետիսյանին ուղեկցող ոստիկանները դուրս հանեցին դահլիճից, որից հետո սկսեց բղավել մյուս ամբաստանյալ, խմբի պարագլուխ համարվող Արթուր Վարդանյանը. «Էս դատարանը, բառիս բուն իմաստով, շոու է, շոու բիզնես են սարքել: Ինչքան ուզեն փորձեն մեզ ոչնչացնել՝ չի՛ ստացվելու: Չի՛ լինելու իրանց մոտ: Խոսքի համար անազատություն…Սա՛ է արդարությունը Հայաստանում»:

Նիստի ավարտից հետո նրա պաշտպան Լեւոն Բաղդասարյանը մեր հարցին ի պատասխան ասաց, որ այնպիսի տպավորություն է, որ դատապրոցեսն արհեստականորեն ձգձգում են. «Արթուր Վարդանյանը ցանկանում է, որպեսզի օբյեկտիվ դատավարություն տեղի ունենա եւ արդարություն իրականացվի, որն այս պահի դրությամբ կասկածի տակ է դրվում»,- ասաց պաշտպանը եւ հավելեց, որ իր պաշտպանյալը մեղադրանքը հնարածին եւ շինծու է համարում: Հաշվի առնելով, որ նիստի ավարտից հետո խմբի անդամ Խաչիկ Ավետիսյանը հայտարարեց, որ կեղծ ցուցմունք տված անձինք դրսում են, իսկ իրենց տանում-բերում են, պաշտպանից հետաքրքրվեցինք՝ Արթուր Վարդանյանի դեմ ցուցմունք տված անձինք կա՞ն խմբի անդամներից: Նա դժվարացավ պատասխանել՝ ասելով, որ այդ բոլոր հարցերի պատասխանները կստանանք դատաքննության ընթացքում: 

Այս գործով հաջորդ դատական նիստը տեղի կունենա հունվարի 20-ին, ժամը 14:30-ին: Այն հերթական անգամ կհետաձգվի, եթե Վահան Շիրխանյանի խնդրանքը չկատարեն եւ նրան պատգարակով չբերեն դատարան: