Սերժ Սարգսյանը թակարդը գցեց Կարեն Կարապետյանին

Արդեն երկու օր լայն քննարկման առարկա է՝ արդյոք վարչապետ Կարեն Կարապետյանը կարող է մասնակցել է 2017-ի խորհրդարանական ընտրություններին, թե՝ ոչ: Սույն հարցին «Հայկական ժամանակը» անդրադարձել էր դեռեւս նոյեմբերին:

Մասնավորապես գրել էինք, որ Սահմանադրության պահանջով պատգամավոր կարող է դառնալ անձը, ով վերջին 4 տարում բնակվել է Հայաստանի Հանրապետությունում, իսկ Կարեն Կարապետյանն, ինչպես հայտնի է 2011-2016 թթ. եղել է «Գազպրոմբանկ» ԲԲԸ առաջին փոխնախագահը, 2012 թվականից էլ «Գազպրոմ Մեժրեգիոնգազ» ընկերության գլխավոր տնօրենի տեղակալ:

Այն ժամանակ, սակայն հարցին մեծ կարեւորություն չտրվեց եւ նույնիսկ գտնվում էին առանձին ՀՀԿ-ականներ եւ քաղաքագետներ, որոնք կարծիք էին հայտում, որ ոչինչ չի կարող խոչընդոտել Կարապետյանի`ՀՀԿ ցուցակով ընտրություններին մասնակցելուն: Նույնիսկ հավաստի տեղեկություններ էին շրջանառվում, որ նա գլխավորելու է ՀՀԿ համամասնական ցուցակը:

Արդեն երկու օր է, սակայն խնդրի նկատմամբ ընդհանուր տրամադրվածությունը փոխվել է: Նախօրեին Արմեն Աշոտյանը ծավալուն հարցազրույց էր տվել, որի ամբողջ ասելիքն այն էր, որ առաջիկա ընտրություններն այնքան կարեւոր են Հայաստանի համար, որ ոչ մի պարագայում չպետք է ստվեր գցել դրանց օրինականության վրա:

Ուստի, եթե համապատասխան իրավական ընթացակարգով պարզվի, որ Կարեն Կարապետյանը վերջին 4 տարում չի բնակվել Հայաստանում, նա չի ընդգրկվի ՀՀԿ-ի ցուցակում: Նույն բանն ասել էր նաեւ ՀՀԿ կազմակերպչական հանձնաժողովի նախագահ Ռուբեն Թադեւոսյանը: Վահրամ Բաղդասարյանը նույնպես թեմային անդրադարձավ, բայց  ոչ մի մխիթարական ակնարկ Կարապետյանի օգտին չարեց: Եւ ահա երեկ վարչապետն ինքը հայտարարեց. «Վերջին տարիներին ՀՀ քաղաքացի եմ, ապրել եմ Երեւանից դուրս: Համապատասխանո՞ւմ է իմ ապրելու քանակությունը ՀՀԿ ցուցակում ընդգրկվելուն, չգիտեմ: Բայց, եթե չի համապատասխանում, ես այդ ցուցակում չեմ լինի»:

«Անկախ նրանից՝ վարչապետը կլինի ՀՀԿ համամասնական ցուցակում, թե՝ ոչ, բոլոր դեպքերում ինքն իր մասնակցության ձեւը, բովանդակությունը, ինտենսիվությունը կորոշի, և վստահ եմ, որ անկախ նրանից՝ կլինի ցուցակում, թե՝ չէ, օգուտ կտա Հանրապետական կուսակցության աշխատանքներին նաեւ նախընտրական էտապում»,- «Ազատությանը» նախօրեին ասել է Արմեն Աշոտյանը եւ հիշեցրել Սերժ Սարգսյանի խոսքը, որ եթե ՀՀԿ-ն հաղթի ընտրություններում, ապա իրենց վարչապետի թեկնածուն Կարեն Կարապետյանն է։

Կարեն Կարապետյանը երեկվա ասուլիսում ասաց, որ եթե իրեն առաջարկեն գլխավորել ՀՀԿ նախընտրական շտաբը, ինքը կհրաժարվի: Անցյալ տարեվերջին խմբագիրների հետ հանդիպման ժամանակ վարչապետն ավելի էնտուզիազմով էր մոտենում այս հարցին: Նա այն ժամանակ հայտարարեց, որ եթե կարիք լինի, արձակուրդ կվերցնի եւ կզբաղվի ՀՀԿ-ի քարոզչությամբ:

Ինչն է փոխվել ուրեմն: Կարծում ենք, Կարեն Կարապետյանը պարզապես փաստի առաջ է կանգնել: Վարչապետ դառնալու առաջարկությունն ընդունելով նրա մտքով չի էլ անցել, որ Հայաստանում քաղաքական գործունեություն ծավալելու տեսանկյունից իր համար անտեսանելի եւ անհաղթահարելի խոչընդոտներ կան: Այդ թեմայով հրապարակումներին այն ժամանակ նշանակություն չտրվեց: Փոխարենը «Գելափի» հարցումները ցույց տվեցին, որ Կարապետյանը երկրում ամենաբարձր ռեյտինգն ունի, տեղի ունեցավ շռնդլաից անդամակցությունը ՀՀԿ-ին: Ինչ իմաստ ուներ այս ամենը, եթե պետք է մեկ ամիս անց պարզվեր, որ այս ընտրությունները ոստիկանության անձնագրային բաժնի կեղծ տեղեկանքներով չեն մրոտելու, եւ եթե Կարեն Կարապետյանը վերջին 4 տարում չի բնակվել Հայաստանում, ուրեմն չի մասնակցի ընտրություններին:

Բայց սա դեռ ամբողջը չէ: Եթե իրադարձություններն այսպես զարգանան եւ ՀՀԿ-ի հաղթանակի դեպքում Կարապետյանը շարունակի զբաղեցնել վարչապետի պաշտոնը, դա միեւնույն է, կարող է տեւել մինչեւ 2018-ի ապրիլ:

Բանն այն է, որ նոր Սահմանադրությամբ 148 հոդվածում (որն ուժի մեջ է մտնում 2018 թվականի ապրիլին) ասվում է, որ կառավարության անդամը, նաեւ վարչապետը պետք է բավարարի պատգամավորի վրա տարածվող պահանջներին: Սա նշանակում է, որ 2018-ի ապրիլից վարչապետը պետք է վերջին չորս տարում մշտապես բնակված լինի ՀՀ-ում՝ բնակության ցենզի հաշվարկն էլ պետք է կատարվի նույն կարգով, ինչ պատգամավորի դեպքում:  

«Ընտրական օրենսգրքով» սահմանված է, որ պատգամավորի թեկնածուն պետք է նախորդող 4 տարիների ընթացքում 731 օր, այսինքն՝ չորս տարվա 1460 օրվա կեսից ավելին գտնված լինի Հայաստանում: Կարեն Կարապետյանը ՀՀ վարչապետ է նշանակվել 2016-ի սեպտեմբերին: Եթե մինչ 2018-ի ապրիլ նա դեռեւս մշտապես Հայաստանում բնակվի, կստացվի 575 օր:

Այսինքն՝ եւս 156 օր է անհրաժեշտ լինելու, որպեսզի 2018-ից հետո նա կարողանա զբաղեցնել ՀՀ վարչապետի պաշտոնը: Եթե Ռուսաստանում աշխատելու ընթացքում նույնիսկ բոլոր արձակուրդները Կարապետյանն անցկացրած լինի Հայաստանում, դժվար թե այս թիվը լրանա: Այսինքն՝ դե յուրե 2018-ի ապրիլին, երբ նոր Սահմանադրությունն ամբողջությամբ ուժի մեջ կմտնի եւ վարչապետը կդառնա երկրի առաջին դեմք, Կարապետյանը չի կարող դառնալ ՀՀ վարչապետ, որովհետեւ վերջին չորս տարում մշտապես չի բնակվում Հայաստանում:  

Կարեն Կարապետյանի արձագանքից նկատելի է, որ Հայաստան գալիս նա, ըստ էության, չի իմացել այս պրոբլեմի գոյության մասին: Բայց քիչ հավանական է, որ այդ մասին իմացած չլինի Սերժ Սարգսյանը:

Վերջինս թերեւս այս հաշվարկով է Կարեն Կարապետյանին Հայաստան կանչել. նրան պետության գլուխ դառնալու հույսերով հրավիրել Հայաստան, նրա պոզիտիվ իմիջի եւ Ռուսաստանում դրական ընկալման հաշվին ապահովել ՀՀԿ-ի վերարտադրությունը, եւ վճռական պահին Կարապետյանին հայտնել  ճշմարտությունը: Հենց այդտեղ էլ կվերանա վերջին խոչընդոտը՝ 2018-ին վարչապետ դառնալու Սերժ Սարգսյանի ծրագրերի համար:

Տպել
10810 դիտում

ՀՀ-ում է «օրենքով գող» Արմեն Ղազարյանը

Ես և մեր թիմը հույս ենք դնում ձեզ վրա, այս ընտրություններով պետք է լուծենք համապետական խնդիր. վարչապետ

Քրեական հեղինակություն Դոն Պիպոն ազատ է արձակվել 50 միլիոն դրամ գրավի դիմաց

ԱԺ-ն պետք է արտահայտի այն տրամադրություններն ու ընտրությունը, որ կատարում են քաղաքացիները. վարչապետ

Որպես պետությանը պատճառված վնասի մասնակի փոխհատուցում վճարվել է շուրջ 55 մլն դրամ

Քրեական հեղինակություն Դոն Պիպոն այսօր ազատ է արձակվել

ՀՀ ներքաղաքական կյանքը կրկին ալեկոծվում է, պետք է հարցերը լուծենք համաձայնությամբ. Բաբլոյան

Մի քանի օրից մենք մասնակից ենք լինելու ՀՀ պատմության ամենաարդար և ազնիվ ընտրություններին. Հայկ Մարության

Ըստ հայ ֆուտբոլիստների՝ Վանեցյանը դրական փոփոխություններ կանի հայկական ֆուտբոլում

ԱԱԾ տնօրեն Արթուր Վանեցյանը հարցաքննվել է հայտնի գաղտնալսման գործով

Փոփոխությունները չեն ազդի 700 աշխատատեղի և 25000 տոննա բանջարեղենի արտադրողականության վրա. «Սպայկա»

Ես շրջում եմ այնպես, ինչպես ուզում եմ. Միհրան Պողոսյանը՝ «ասֆալտին փռելու» օպերացիայի մասին

ՊՆ հոսպիտալից գողություն է կատարվել, գումար է կանխիկացվել քաղաքացու բանկային հաշվեհամարից

Տարոն Մարգարյանը հարցաքննվել է, նրանից առգրավվելու է 1 մլրդ 800 մլն դրամ. Վանեցյան

Չեմ փոշմանել, որ չեմ քվեարկել Նիկոլ Փաշինյանի օգտին. Աղվան Վարդանյան

Հայաստանի պատվիրակությունը մասնակցում է ՄԱԿ-ի Ատոմային էներգիայի ՄԳ գլխավոր կոնֆերանսին

Արմեն Սարգսյանի հրամանագրով վարչական դատարանի դատավորներ են նշանակվել

Արցախի զինկոմի որդին հոր հետ վիճելու համար, ընկերների հետ ծեծել է քաղաքացուն (տեսանյութ)

ՆԱՏՕ-ի փորձագետները վերապատրաստման դասընթացներ են անցկացնում ՌՈւՀ-երի ներկայացուցիչների համար

Ինչպե՞ս նորոգել ռազմական նշանակության օբյեկտներն ու ենթակառուցվածքները. քննարկում բելառուսական կողմի հետ