Վահան Շիրխանյանին բերման կենթարկե՞ն. դատախազը միջնորդեց անհապաղ միջոցներ ձեռնարկել. ՖՈՏՈ

Արթուր Վարդանյանը

Ազատամարտիկ Խաչիկ Ավետիսյանը

Դատավոր Արմեն Բեկթաշյանը

Ամբաստանյալ Հայր Անտոնը

Հայտնի փաստաբան Կարինա Մոսկալենկոն

Ուղեկցող ոստիկանները

2015 թ-ին ԱԱԾ-ի կողմից Նորքում վնասազերծված զինված խմբի գործով դատական նիստն արդեն երրորդ անգամ է հետաձգվում:

Կենտրոն եւ Նորք-Մարաշ վարչական շրջանների ընդհանուր իրավասության դատարանն ու ՀՀ ԱՆ «Երեւան-Կենտրոն» ՔԿՀ-ն երրորդ անգամ է չեն կարողանում ապահովել զինված խմբի գործով ամբաստանյալ, ՀՀ պաշտպանության նախկին փոխնախարար Վահան Շիրխանյանի ներկայությունը դատական նիստերին: Նշենք, որ Շիրխանյանը ցանկություն է հայտնել ներկա գտնվել դատական նիստին, սակայն ի վիճակի չէ ինքնուրույն քայլել, եւ նրան դատարան տեղափոխելու համար պատգարակ է հարկավոր:

Նախագահող դատավոր Արմեն Բեկթաշյանը դատավարության մասնակիցներին տեղեկացրեց, որ «Երեւան-Կենտրոն» քրեակատարողական հիմնարկից հերթական գրությունն են ուղարկել դատարանին՝ տեղեկացնելով, որ Վահան Շիրխանյանը հրաժարվել է դուրս գալ խցից եւ մասնակցել գործով քննությանը:

Նշվածի վերաբերյալ մեղադրող դատախազը հայտարարեց, թե Շիրխանյանի առողջական վիճակը բավարար է, եւ որ նա անհարգալից վերաբերմունք է ցուցաբերում դատարանի նկատմամբ`չներկայանալով նիստերին: Դատախազը նշեց. «անհրաժեշտ է միջոցներ ձեռնարկել եւ Շիրխանյանին ներկայացնել դատարան»: Մեղադրողն, ամենայն հավանականությամբ, ակնարկում էր Շիրխանյանին ուժով դատարան բերելը, այսինքն՝ բերման ենթարկելը:

Շիրխանյանի պաշտպան Հայկ Ալումյանը, ի պատասխան մեղադրողի հայտարարության, դատարանին կրկին ներկայացրեց երեք փաստաթուղթ, որոնք վկայում են իր պաշտպանյալի առողջական ծանր վիճակի մասին, մասնավորապես` ՀՀ մարդու իրավունքների պաշտպանի`դեռեւս նախորդ տարվա նոյեմբերի 10-ին կայացրած որոշումը, ՀՀ ԱՆ քրեակատարողական հիմնարկներում վերահսկողություն իրականացնող դիտորդական խմբի ընթացիկ հաշվետվությունը եւ օրեր առաջ նյարդաբանի կողմից կատարված զննության արդյունքները:

Զինված խմբի գործով ամբաստանյալ, ազատամարտիկ Խաչիկ Ավետիսյանի պաշտպան Գիվի Հովհաննիսյանը միջնորդեց Շիրխանյանի վերաբերյալ քննվող գործի վարույթն անջատել: Այս միջնորդությանը, սակայն, դատարանը չանդրադարձավ: Բեկթաշյանը հայտնեց, որ ՔԿՀ-ից պահանջելու են Շիրխանյանի առողջական վիճակի վերաբերյալ փաստաթղթերի փաթեթը, այդ թվում` նրա հիվանդության քարտը:

Գործով ամբաստանյալների պաշտպաններից Ինեսսա Պետրոսյանը, Հայկ Ալումյանն ու մի քանի այլ պաշտպաններ միջնորդեցին դատարանին՝ մեկ ժամով հետաձգել դատական նիստը եւ ՔԿՀ-ին հրահանգել՝ Շիրխանյանին սայլակով կամ պատգարակով տեղափոխել դատարան, սակայն նախագահող դատավոր Արմեն Բեկթաշյանը, առանց քննության առնելու պաշտպանների միջնորդությունը, հապճեպ հետաձգեց դատական նիստը:

Դատական նիստի ավարտից հետո Շիրխանյանի պաշտպան Հայկ Ալումյանը մեր հարցին ի պատասխան հայտնեց, որ իրենք չեն ցանկանա, որպեսզի Շիրխանյանի վերաբերյալ գործից մաս անջատվի:

Անդրադառնալով մեղադրող դատախազի միջնորդությանը` Ալումյանն ասաց. «Եթե մեղադրողը նկատի ուներ բերման ենթարկելու որոշումը, ապա պետք է նման միջնորդության հիմք ունենար, սակայն նա պատկերացնում է, թե որքան տգեղ կհնչեր, եթե միջնորդեր Շիրխանյանին բերման ենթարկել: Նա ուզում էր, որ այդ տգեղ որոշումը կայացնի դատարանը, այլ կերպ ասած` այդ «կեղտոտ» աշխատանքը թողնում էր դատարանի վրա: Տգեղ կլինի, քանի որ Շիրխանյանը չի կարողանում քայլել, սակայն ցանկանում է մասնակցել դատական նիստին»:

Պաշտպանի խոսքով` եթե անգամ Շիրխանյանին ուժով բերեն դատարան, ստիպված են լինելու նրան գրկած բերել, սակայն, ըստ նրա, դա էլ է տարբերակ: «Շիրխանյանն ուզում է գալ դատարան: Հիմա թե ինչպե՞ս կբերեն գրկա՞ծ, պատգարակո՞վ, թե՞ սայլակով, հարց է»,- նշեց պաշտպանը:

Դիտարկմանը, թե հնարավոր է` չեն ցանկանում Շիրխանյանին պատգարակով բերել, որպեսզի նրան այդ վիճակով չտեսնեն, պաշտպանն արձագանքեց. «Ամբաստանյալի վիճակը վաղուց է այդպես. մի մարդ, ով շատ մաքրասեր լինելով, 4 ամիս է` չի կարողանում լոգանք ընդունել, իր խցում ամեն օր ստիպված սառը ջրով շփում է իրեն, որպեսզի հիգիենան պահի, քանի որ ոչ ոք նրան չի օգնում, այդ մարդու վիճակի մասին էլ ի՞նչ է մնում ասել»:

Շիրխանյանի առողջական վիճակի մասին այսօր բարձրաձայնեց հայտնի փաստաբան, ՌԴ միջազգային իրավունքի առաջատար մասնագետ, ՄԻԵԴ-ում ընդդեմ ՌԴ-ի առաջին գանգատը ներկայացրած ու շահած Կարինա Մոսկալենկոն: Նա ՄԻԵԴ-ում ներկայացնում է Վահան Շիրխանյանի շահերը:

Մոսկալենկոն, որը ժամանել է Ստրասբուրգից, այսօր մի քանի լրագրողների հետ զրույցում հայտարարեց, որ իրեն «Երեւան-Կենտրոն» ՔԿՀ-ն առավոտյան թույլ չի տվել հանդիպել Վահան Շիրխանյանի հետ, մինչդեռ նախապես տեղեկացվել է իր այցի մասին, ներկայացվել են համապատասխան փաստաթղթեր:

«Նախապես պայմանավորվածություն կար, որ պետք է հանդիպեմ Շիրխանյանի հետ: Ես հազարավոր կիլոմետրեր եմ կտրել՝ իմ պաշտպանյալին հանդիպելու նպատակով, գիտեմ, որ նրա վիճակը իսկապես ծայրահեղ ծանր է, բայց առավոտից ինձ թույլ չեն տալիս հանդիպել նրան»,- ասաց նա` հավելելով. «Իմ պարտականությունն է ՄԻԵԴ-ում Շիրխանյանի նկատմամբ իրականացվող վերաբերմունքը ներկայացնելը, ոչ թե ներպետական ատյանում ընթացող գործի քննությանը հետեւելը»: Հայտնի փաստաբանը նաեւ տեղեկացրեց, որ ոչ միայն Շիրխանյանի կալանավորման որոշումն է սխալ եղել, այլ խախտվել են Մարդու իրավունքների եվրոպական կոնվենցիայի 3-րդ (խոշտանգումների արգելում) եւ 5-րդ (ազատության եւ անձնական անձեռնմխելիության իրավունք) հոդվածները:

Մոսկալենկոն տեղեկացրեց, որ Շիրխանյանի անունից ներկայացված գանգատը ՄԻԵԴ-ն ընդունել է վարույթ եւ դասել առաջնահերթ քննվող գործերի շարքը:

Սույն գործով հաջորդ դատական նիստը տեղի կունենա հունվարի 27-ին, ժամը 14:30-ին: