Դատավոր Իշխան Բարսեղյանի նկատմամբ ԱԱԾ աշխատակիցները բռնություն են գործադրել

2016 թ-ի հոկտեմբերի 27-ին կաշառք ստանալու պահին ձերբակալված, ապա կալանավորված Շենգավիթ վարչական շրջանի ընդհանուր իրավասության դատարանի արդեն նախկին դատավոր Իշխան Բարսեղյանի գործով դատական նիստն արդեն երկրորդ անգամ է հետաձգվում:

Իշխան Բարսեղյանը, հիշեցնենք, ձերբակալվել է Գարեգին Նժդեհ փողոցի խաչմերուկի գետնանցումում քաղաքացի Նորիկ Հակոբյանից կաշառք ստանալու պահին՝ ՀՀ ԿԱ ԱԱԾ կողմից իրականացված օպերատիվ-հետախուզական միջոցառման շրջանակներում: Դատավորին «կաշառք առաջարկող» Նորիկ Հակոբյանը սույն գործով վկայի կարգավիճակ ունի: Նա, սակայն երկու դատական նիստին էլ չի ներկայացել:

Բացի Իշխան Բարսեղյանից ամբաստանյալի աթոռին է նաեւ փաստաբան Էլզա Զաքարյանը, որն էլ մեղադրվում է կաշառքի միջնորդության մեջ:

Գործը հիշեցնենք, քննվում է նույն դատարանում՝ դատավոր Կարեն Մարդանյանի նախագահությամբ: Դատական նիստը հետաձգվեց, քանի որ գործով ամբաստանյալ դատավոր Իշխան Բարսեղյանը չէր ներկայացվել դատարան: Կարեն Մարդանյանը դատավարության մասնակիցներին տեղեկացրեց, որ ՔԿՀ-ից գրություն է ստացվել այն մասին, որ առողջական վիճակից ելնելով Իշխան Բարսեղյանին հնարավոր չէ ներկայացնել դատական նիստին: Բացի այդ գործով, մյուս ամբաստանյալ, փաստաբան Էլզա Զաքարյանի պաշտպանության համար ներգրավվեցին երեք պաշտպաններ:

Նշենք, որ նախորդ դատական նիստին Էլզա Զաքարյանը հրաժարվել էր իր պաշտպանից եւ հանրային պաշտպան խնդրել: Այսօրվա դատական նիստին թե՛ հանրային պաշտպան էր ներկայացել եւ թե՛ երեք փաստաբան: Էլզա Զաքարյանը, սակայն, այս անգամ էլ հրաժարվեց հանրային պաշտպանից եւ գործով ներգրավվեց երեք պաշտպան՝ Տիգրան Աթանեսյանը, Հովհաննես Չամսարյանը եւ Արմեն Սողոմոնյանը: Բացի դա Իշխան Բարսեղյանի գործով եւս մեկ պաշտպան ներգրավվեց՝ Արա Ղազարյանը: Բայց քանի որ Իշխան Բարսեղյանը դատարանում չէր եւ, ըստ նախագահող դատավորի՝ Բարսեղյանի կամքը հաստատելու վերաբերյալ չկար որեւէ փաստաթուղթ, ուստի Արա Ղազարյանի հարցը կքննվի հաջորդ նիստում: Այսպիսով՝ Իշխան Բարսեղյանի շահերը դատարանում կպաշտպանեն վեց փաստաբաններ՝ նախկին դատավոր Վլադիմիր Գրիգորյանը, Վարդուհի Էլբակյանը, Լիանա Գրիգորյանը, Կարեն Հովհաննիսյանը, Կարեն Ղազարյանը եւ Արա Ղազարյանը:

Պաշտպաններից Վլադիմիր Գրիգորյանը չէր ներկայացել, սակայն նախորդ դատական նիստում նրա դիտողությունը` ինչո՞ւ է մեղադրող դատախազի աթոռն ավելի բարձր տեղում դրված, տեղ էր հասել: Այսօր արդեն, դատախազ Կարեն Բիշարյանը, իր «դիրքով» հավասարվել էր դատավարության մասնակիցներին, նրա սեղանն ու աթոռը բարձր տեղից ներքեւ էր իջեցվել: Այսպիսով՝ ամբաստանյալի բացակայության պատճառով դատական նիստը հետաձգվեց. հաջորդ դատական նիստը տեղի կունենա փետրվարի 3-ին, ժամը 15:00-ին:

Դատական նիստի ավարտից հետո Իշխան Բարսեղյանի պաշտպան Վարդուհի Էլբակյանը պարզաբանեց, որ իր պաշտպանյալի մոտ ատամների հետ կապված խնդիր է առաջացել, դատավորը, կարելի է ասել, ենթարկվել է բերանի խոռոչի փոքր վիրահատության, միգուցե խնդիրը դրա հետ է կապված։ «Ես նույնպես անակնկալի եկա, որ չէր ներկայացվել դատարան: Բայց ուրբաթ օրը գիտեի, որ իր ինքնազգացողությունը շատ վատ է»,- ասաց նա: Խնդրի առաջացումը, ըստ պաշտպանի, նաեւ առաջացել է Իշխան Բարսեղյանին բերման ենթարկելու ընթացքում։

«Այդ մասին պարոն Բարսեղյանն էլ է հայտարարություն արել, որ բռնության է ենթարկվել։ Նախաքննության ընթացքում այդ մասին հայտարարություններ եղել են, եւ դա նույնպես նպաստել է, որպեսզի առաջանային այդ խնդիրները։ Ամբողջ ատամնաշարը շարժվում էր»,- ասաց Վարդուհի Էլբակյանը՝ նշելով, թե իրենք գտնում են, որ օպերատիվ-հետախուզական միջոցառումն իրականացնելիս ոչ համաչափ ուժ է կիրառվել Իշխան Բարսեղյանի նկատմամբ։ Մեր դիտարկմանը,  այսինքն` ձերբակալվելիս դատավորը դիմադրել է, Էլբակյանն ասաց. «Խոսքը նրա դիմադրության մասին չէ: Երբ նրան փորձել են բերման ենթարկել, հենց այդ ժամանակ ոչ համաչափ ուժ է կիրառվել եւ նա ստացել է մարմնական վնասվածքներ նաեւ դեմքի հատվածում»:

Մեր ճշտող հարցին, թե դատաբժշկական փորձաքննություն նշանակվե՞լ է եւ ի՞նչ աստիճանի վնասվածքներ է Իշխան Բարսեղյանը ստացել, պաշտպանը պատասխանեց, որ կատարվել է դատաբժշկական փորձաքննություն, որն իրենց չի բավարարում։ «Վնասվածքները, ըստ էության նշվել են, սակայն նրա մարմնական վնասվածքների չափը եւ վարույթն իրականացնող մարմնի որոշումը մեզ չի բավարարում, համապատասխան փուլում միջնորդությամբ հանդես կգանք: Ըստ եզրակացության՝ նա թեթեւ աստիճանի մարմնական վնասվածք է ստացել», - պատասխանեց Վարդուհի Էլբակյանը:

Մյուս հարցին, թե նրան բռնության ենթարկելու դեպքի առթիվ քրեական գործ հարուցվե՞լ է, Էլբակյանն ասաց, որ քրեական գործի նախաքննության ընթացքում իր պաշտպանյալը հաղորդում չի ներկայացրել, սակայն դա քննարկման թեմա դարձել է: «Իսկ ընդհանուր բռնության վերաբերյալ պաշտպանական կողմն այս պահին մեծ աշխատանքներ է տանում: Աշխատանքները երբ պատրաստ կլինեն, հանդես կգանք համապատասխան հայտարարությամբ»,- եզրափակեց նա:

Գործով մյուս ամբաստանյալ Էլզա Զաքարյանի պաշտպան Տիգրան Աթանեսյանից էլ հետաքրքրվեցինք, թե ինչպե՞ս ստացվեց, որ երեքով որոշեցին պաշտպանել իրենց գործընկերոջ շահերը: Մեր հարցին ի պատասխան Աթանեսյանն ասաց. «Նախորդ դատական նիստին Էլզա Զաքարյանն ասել էր, որ չունի միջոցներ փաստաբան վարձելու համար եւ խնդրեց, որ իրեն տրամադրեն հանրային պաշտպան: Այդ լուրն իմանալով ես վրդովեցի, որ մեր պալատը չի զբաղվում մեր կոլեգայի պաշտպանության հարցով՝ անկախ ամեն ինչից»,- հավելեց Աթանեսյանը:

Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով (կաշառք ստանալը, որը կատարվել է դատավորի կողմից՝ պատժվում է ազատազրկմամբ՝ յոթից տասներկու տարի ժամկետով):