Թումանյանի՝ Դսեղի տուն-թանգարանում սանհանգույց կկառուցվի

Հովհաննես Թումանյանի ծննդյան 150-ամյակին ընդառաջ ՀՀ Մշակույթի նախարարությունը սկսում է միջոցառումների շարք: Խոսքը ոչ միայն մշակութային իրադարձություններ կազմակերպելու, այլեւ գրողի տուն-թանգարաններում անհրաժեշտ ենթակառուցվածքները ստեղծելու մասին է: Ավելի վաղ մշակույթի նախարար Արմեն Ամիրյանը նշել էր, որ Դսեղում սանհանգույց, փոքրիկ հանգստի գոտի, հուշանվերների խանութ կառուցելու նպատակ կա: Բացի այդ՝ ցանկություն կա թանգարանի դիմաց գտնվող հատված ծառերի (դրանք սնամեջ էին եւ կարող էին քամուց շրջվել) կոճղերը քանդակել թումանյանական հեքիաթների հերոսների կերպարներով: Այսօր՝ հունվարի 25-ին, լրագրողների հետ հանդիպման ժամանակ Ամիրյանը նշեց, որ մի քանի ամիս է, ինչը նախարարությունը փորձում էր հովանավորներ գտնել այդ ծրագրերն իրականացնելու համար, եւ ամերիկաբնակ հայ երաժիշտ Աշոտ Տիգրանյանն օգնելու ցանկություն է հայտնել:

«Այս ձմռանն օդանավի մեջ հանդիպեցի Աշոտ Տիգրանյանին, եւ մենք 5 ժամ մինչեւ Փարիզ հասնելը խոսում էինք հայաստանյան մշակութային կյանքից, իրադարձություներից, թե ինչ ենք ցանկանում, ծրագրում անել, եւ մաեստրոն անմիջապես արձագանքեց ու խոստացավ օգնել Թումանյանի՝ Դսեղի տուն-թանգարանի ենթակառուցվածքները կառուցելու հարցում: Նա ֆինանսավորելու է: Սա հրաշալի նորություն է, որ այսօր մենք փորձելու ենք իրականություն դարձնել առայժմ հուշագրի տեսքով, եւ երբ եղանակը բարենպաստ լինի շինարարության համար, մենք կսկսենք: Կարծում եմ՝ նույնիսկ փետրվարին կկարողանանք սկսել ենթակառուցվածքների նախագիծն իրականություն դարձնել»,- ասաց Ամիրյանը ավելացնելով, որ Տիգրանյանը մեծ հնարավորություններ չունի, սակայն սիրով 8 մլն դրամ է տրամադրելու թանգարանի հետ կապված ծրագիրն իրականացնելու համար:

Աշոտ Տիգրանյանը երկար տարիներ՝ շուրջ 30 տարի, ապրում է ԱՄՆ-ում, սակայն նա ծնվել է Երեւանում: Նրա տունը գտնվել է Թումանյանի՝ Երեւանի տուն-թանգարանի դիմաց, եւ հիմա շատ ուրախ է, որ հետաքրքիր զուգադիպությամբ կարող է իր ներդրումն ունենալ մեծ գրողի 150-ամյակին նվիրված ծրագրերից մեկն իրականացնելու հարցում:

«Սա Աստծու կամքով էր: Երեւանում ապրել եմ Թումանյանի տուն-թանգարանի դիմաց, եւ սա շատ հետաքրքիր զուգադիպություն է: Անչափ շնորհակալ եմ թե՛ Աստծուն, թե՛ պարոն Ամիրյանին, որ ունեմ այս գեղեցիկ հնարավորությունը: Ես շատ մեծ հաճույքով եւ հպարտությամբ կկատարեմ խոստումս»,- ասաց նա:

Չարենցի անվան գրականության, արվեստի թանգարանի տնօրեն Կարապետ Վարդանյանը (Թումանյանի՝ Դսեղի տուն-թանգարանը Չարենցի անվան գրականության, արվեստի թանգարանի մասնաճյուղն է) շնորհակալություն հայտնեց Տիգրանյանին պատրաստակամության համար: Նա ընդգծեց, որ նշված ենթակառուցվածքներից հատկապես կարեւոր է սանհանգույց կառուցելու հարցը, որպեսզի այցելուներն իրենց հնարավորինս հարմարավետ զգան:

«Ուզում եմ ընդգծել ենթակառուցվածքների խնդիրների կարեւորությունը, եւ հատկապես սանհանգույցի մասին է խոսքը: Թումանյանի անունն ամռան ամիսներին հազարավոր մարդկանց է հասցնում Դսեղ, առավելապես դպրոցականների, եւ երեխաները 4-5  ժամ ավտոբուսով այնտեղ հասնելուց հետո բնական է՝ սանհանգույց են փնտրում: Ունենք այնտեղ հարեւանուհի, բայց նրա ունեցածը սանհանգույց է չէ, արտաքնոց է, եւ վրան էլ գրել է 100 դրամ: Իսկապես լուրջ խնդիր է սա, եւ մեծ բարեբախտություն է մեզ համար, որ պարոն նախարարը եւ Տիգրանյանը հանդիպեցին ինքնաթիռում, եւ հիմա ես պետք է Աստված կանչեմ, որ նրանք հաճախ հանդիպեն ինքնաթիռում, որովհետեւ բազմաթիվ այլ խնդիրներ էլ ունենք (կատակում է),»,- ասաց Վարդանյանը:

Ասուլիսն ավարտվեց ենթակառուցվածքների շինարարության համար համագործակցության համաձայնագրի ստորագրմամբ: Այն ստորագրեցին Աշոտ Տիգրանյանը եւ Կարապետ Վարդանյանը: Մշակույթի նախարարությունում այս հուշագրի ստորագրմամբ ազդարարվեց 150-ամյակին նվիրված միջոցառումների իրականացման սկիզբը: