Ներսես Պողոսյանի վիճակը ծայրահեղ ծանր է. նա կրկին հացադուլ եւ ջրադուլ է հայտարարել

«Նոր Հայաստան» հանրային փրկության ճակատի առաջնորդ Ժիրայր Սեֆիլյանի գործով շուրջ 8 ամիս կալանքի տակ գտնվող Ներսես Պողոսյանը հունվարի 27-ից հացադուլ եւ ջրադուլ է հայտարարել:

Պողոսյանը կալանավորվել է 2016 թվականի մայիսի 31-ին: Նա մեղադրվում է ՀՀ Քրեական օրենսգրքի 235 հոդվածի 3-րդ մասով՝ (կազմակերպված խմբի կողմից զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը): 
Այս քրեական գործով նախաքննությունն ավարտվել է մի քանի ամիս առաջ:

Պողոսյանը նման ծայրահեղ քայլի դիմում է արդեն երկրորդ անգամ. պատճառը՝ հունվարի 27-ին Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի՝ կալանքի ժամկետը երկու ամսով երկարացնելու մասին որոշումն է։ Այս մասին մեր զրույցում ասաց նրա պաշտպան Արայիկ Պապիկյանը: Բացի ջրադուլ եւ հացադուլ հայտարարելուց Պողոսյանը հրաժարվել է նաեւ բուժօգնությունից:

«Ներսեսին ավելի վրդովեցրեց այն հանգամանքը, որ դատարանը մինչեւ խորհրդակցական սենյակ գնալը, ըստ էության հայտնեց, որ իմ պաշտպանյալը պետք է մնա կալանքի տակ: Մինչեւ խորհրդակցական սենյակ գնալը նա առաջարկեց Ներսեսին տեղափոխել ՔԿՀ, ասելով՝ որոշումը պաշտպանը կստանա: Այսինքն՝ դատարանն արդեն որոշել էր, որ խափանման միջոցը չի փոխելու»,- ասաց Պապիկյանը՝ հավելելով, որ այդ օրը դատարան էին ներկայացրել անձնական երաշխավորագրեր՝ ՀՀ ԱԺ պատգամավոր Նիկոլ Փաշինյանի, բազմաթիվ մտավորականների կողմից, ինչպես նաեւ գրավի միջնորդություն էին ներկայացրել, սակայն դատարանը երկուսն էլ անտեսել է եւ հերթական անգամ երկարաձգել կալանքը:

Պաշտպանը, որն այսօր է տեսակցել Ներսես Պողոսյանին, ասաց, որ նրա առողջական վիճակը ծայրահեղ ծանր է, հյուծված էր, դժվարությամբ է տեղաշարժվում ու չնայած դրան, հրաժարվում է նաեւ դեղեր ընդունելուց: «Թեկուզ փոքր հույս կար, որ գոնե խափանման միջոցը կփոխեին: Ես Ներսեսին ասացի, որ այսօր Վերաքննիչ բողոք եմ ներկայացրել դատարանի որոշման դեմ, ասացի՝ գոնե հացադուլն ու ջրադուլը դադարեցնի մինչեւ Վերաքննիչի որոշումը, սակայն նա չլսեց ինձ, ասաց, որ շարունակելու է»,- նշեց պաշտպանը:

Հարցին, թե մասնավորապես ի՞նչ առողջական խնդիրներ ունի Պողոսյանը, Պապիկյանը նշեց, որ ոտքերը շատ վատ վիճակում են, այտուցվել են, եւ առանց օգնության շատ մեծ դժվարությամբ է տեղաշարժվում, բացի դա նրա մոտ արդեն երիկամների խնդիր կա, ճնշում, գլխացավեր ունի, նաեւ սրտի աշխատանքից է բողոքում։ Պաշտպանն անհրաժեշտություն է տեսնում Ներսես Պողոսյանին քաղաքացիական հիվանդանոց տեղափոխելու, սակայն Պողոսյանը դրանից էլ է հրաժարվում:

Անդրադառնալով քրեական գործին, Արայիկ Պապիկյանն ասաց, որ արդեն ծանոթացել է գործի նյութերին: Հարցին, թե մասնավորապես, ի՞նչ ապացույցներ են դրվել մեղադրանքի հիմքում, պաշտպանն ասաց, որ Ներսես Պողոսյանի դեմ կան երկու անձի ցուցմունք, որոնք նշել են, թե Ներսեսի հետ ինքնաձիգեր են տարել տարբեր տեղեր: Ներսեսը, սակայն, ըստ պաշտպանի՝ պնդում է, որ ինքնաձիգերի եւ առաջադրված մեղադրանքի հետ որեւէ կապ չունի: Նրա դեմ ցուցմունք տված անձինք նույնպես գտնվում են կալանքի տակ: Պապիկյանը տեղեկացրեց, որ սույն գործը, ամենայն հավանականությամբ, դատարան կմտնի մարտ ամսին: Բացի դա, պաշտպանական կողմը պատրաստվում է Ներսես Պողոսյանի մասով գանգատ ներկայացնել ՄԻԵԴ:

Պողոսյանը հրաժարվել է տեսակցել կնոջ, մոր եւ քրոջ հետ, նրա հետ տեսակցում են միայն պաշտպանն ու եղբայրը: Այս մասին երեկ մեր զրույցում ասաց Ներսեսի կինը՝ Լիա Պողոսյանը:

Նա ասաց, որ ամուսինը չի ուզում, որպեսզի ընտանիքի անդամները նրան այդ վիճակում տեսնեն: Ներսես Պողոսյանի հարազատները հունվարի 27-ից դատախազություն դիմում են ներկայացնում՝ պահանջելով հանդիպում գործի նկատմամբ հսկողություն իրականացնող դատախազ Պետրոս Պետրոսյանի հետ, սակայն անարձագանք: «Ամեն օր դիմում եմ գրելու, ամեն օր նոր փաստ եմ ներկայացնելու գործի վերաբերյալ»,- մեր հարցին ի պատասխան ասաց Լիա Պողոսյանը: Նա նշեց, որ դիմումից բացի դատախազություն է ներկայացրել հայտնի անձանց երաշխավորագրերը: Եթե բարձրացված հարցին լուծում չտրվի եւ Ներսես Պողոսյանն ազատ չարձակվի, ապա կինը սպառնում է նաեւ նստացույց սկսել: «Նստացույց սկսելու մտադրություն ունեմ, սակայն երեխաների խնամքի հետ կապված դեռ հնարավորություն չունեմ»,- հավելեց նա:

Կնոջ պնդմամբ՝ այս գործով ազատ արձակվածներից մեկի վերաբերյալ բավական տեղեկություններ ունի, որի մասին կբարձրաձայնի ավելի ուշ. նա եւս ցուցմունք է տվել սույն գործով անցնող մեղադրյալների դեմ: Մեր պնդմանը՝ թե մասնավորապես, ո՞ւմ մասին է խոսքը, Պողոսյանի կինն ասաց, որ մի քանի օր կսպասի, որից հետո կխոսի: «Սա իմ ամուսնու նկատմամբ անձնական թշնամանք եմ բնութագրում»,- նշեց Լիա Պողոսյանը՝ հավելելով, որ նախաքննության սկզբում քննչական խմբի նախկին ղեկավարը սպառնացել է Ներսեսին, որ եթե ցուցմունք չտա, ապա 25 տարի փտելու է բանտում: Մեր զրույցում նշվածի վերաբերյալ Արայիկ Պապիկյանն ասաց, որ Ներսես Պողոսյանն այս մասին առաջին անգամ բարձրաձայնել է հունվարի 27-ի դատական նիստի ընթացքում: «Ես այն ժամանակ գործով ներգրավված չէի եւ չեմ իմացել դրա մասին»,- ասաց Պապիկյանը:

ՀՀ ԱՆ ՔԿՎ հանրային կապերի բաժնից մեր հարցին ի պատասխան ասացին, որ Ներսես Պողոսյանը պահվում է հացադուլավորների համար նախատեսված խցում, վիճակը գնահատվում է բավարար: ՔԿՎ-ի հանրային կապերի բաժնից ասացին, թե Պողոսյանը գտնվում է բժիշկների հսկողության տակ, այնինչ պաշտպանի պնդմամբ՝ երկու օր է իր պաշտպանյալին որեւէ բժիշկ չի այցելել:

Հավելենք, որ մեղադրանքը հաստատվելու դեպքում Պողոսյանին սպառնում է երեքից ութ տարվա ազատազրկում: