Կաշառքի մեջ մեղադրվող դատավորի առողջական վիճակը ավելի է սրվել. այս գործով կդիմեն ՄԻԵԴ

ՀՀ Ազգային անվտանգության ծառայության կողմից Շենգավիթ վարչական շրջանի ընդհանուր իրավասության դատարանի արդեն նախկին դատավոր Իշխան Բարսեղյանի անմեղության կանխավարկածը խախտելու դեպքով պաշտպանները կդիմեն ՄԻԵԴ:

Այս մասին այսօր մեր հարցին ի պատասխան ասաց Բարսեղյանի պաշտպան Վարդուհի Էլբակյանը: «Չի բացառվում, որ առանց ներպետական ատյանները սպառելու միանգամից գանգատ ներկայացնենք ՄԻԵԴ»,- ասաց Էլբակյանը՝ հավելելով, որ պաշտպանական կողմն ավելի մանրամասն հայտարարություն կտարածի:

Հիշեցնենք, որ Իշխան Բարսեղյանը ձերբակալվել է հոկտեմբերի 27-ին Արշակունյաց պողոտայի եւ Գարեգին Նժդեհի փողոցի խաչմերուկի գետնանցումում քաղաքացի Նորիկ Հակոբյանից կաշառք ստանալու պահին՝ ՀՀ ԿԱ ԱԱԾ կողմից իրականացված օպերատիվ-հետախուզական միջոցառման շրջանակներում:

ԱԱԾ-ն դատավորին ձերբակալելու հենց հաջորդ օրը տեսանյութ տարածեց, որում երեւում էր, թե ինչպես է Իշխան Բարսեղյանը գումար վերցնում գործով արդեն վկա Նորիկ Հակոբյանից: Պաշտպանական կողմը պնդում է, որ տեսանյութն ամբողջական չէ եւ խախտում է դատավորի անմեղության կանխավարկածը: Չնայած, Բարսեղյանին կալանքի տակ պահելը պաշտպանական կողմն ապօրինի է համարում, այնուամենայնիվ, դատարանում Բարսեղյանի խափանման միջոց կալանավորումը փոխելու վերաբերյալ պաշտպանական կողմը միջնորդություն չի ներկայացնի, քանի որ այդ միջնորդությունն, ըստ Էլբակյանի՝ ժամանակի զուր վատնում կլինի:

Այսօր Շենգավիթ եւ վարչական շրջանի ընդհանուր իրավասության դատարանում դատավոր Կարեն Մարդանյանի նախագահությամբ շարունակվեց սույն գործով երրորդ դատական նիստը. դատարան էր ներկայացվել Իշխան Բարսեղյանը, որը նախորդ նիստին չէր բերվել՝ առողջական խնդիրների պատճառով: Բարսեղյանն այսօր դատարանում հայտարարեց, թե համաձայն է, որպեսզի իր շահերի պաշտպանությունը դատարանում ներկայացնի նաեւ փաստաբան Արա Ղազարյանը:

Ինչից հետո նախագահող դատավորն Իշխան Բարսեղյանին հարցրեց՝ ծանո՞թ է որպես ամբաստանյալ իր իրավունքներին ու պարտականություններին. «Պարո´ն Բարսեղյան, կանգնե´ք, խնդրում եմ»,- այսպես նրան դիմեց նախագահող դատավոր Կարեն Մարդանյանը: Բարսեղյանն ի պատասխան ասաց, որ ծանոթ է, բայց Կարեն Մարդանյանը որոշեց նորից հրապարակել այն, ինչն, ըստ էության, դուր չեկավ Իշխան Բարսեղյանին: «Միգուցե պետք չէ՞»,- ցածր ձայնով դիմելով նախագահող դատավորին ասաց նա:

Ավելի վաղ, Բարսեղյանի պաշտպան Վարդուհի Էլբակյանը լրագրողների հետ զրույցում նշել էր, որ միտումնավոր են Բարսեղյանին դատում հենց այն դատարանում, որտեղ նա երկար տարիներ աշխատել է: Ի դեպ, այսօրվա նիստին ներկայացել էին երեք վկաներ, որոնք դատարանի աշխատակիցներն էին: Արդեն երրորդ նիստն է, սակայն դատարան չի ներկայանում այս գործով առանցքային վկա Նորիկ Հակոբյանը, որի տված հաղորդման հիման վրա է ձերբակալվել, ապա կալանավորվել է Իշխան Բարսեղյանը:

Այսօրվա նիստում ամբաստանյալ Իշխան Բարսեղյանի պաշտպան Վարդուհի Էլբակյանը միջնորդեց հետաձգել դատական նիստը եւ պաշտպանական կողմին տրամադրել ապացույցներ։ Նա նշեց, որ դատավոր Իշխան Բարսեղյանի վերաբերյալ գործի նյութերին ծանոթանալուց հետո պաշտպանական կողմը, հասկանալով, որ վարույթն իրականացնող մարմինը քրեական գործով նախաքննությունն իրականացրել է ոչ բազմակողմանի, լրիվ եւ օբյեկտիվ, սկզբունքորեն հրաժարվել է այդ փուլում միջնորդություններ ներկայացնել։ Նա նշեց, որ քրեական գործով մեղադրական եզրակացությանը ծանոթանալուց հետո պարզվել է, որ նախաքննության մարմնի կողմից քրեական գործի բոլոր նյութերն են ծանոթանալու համար տրամադրվել պաշտպաններին»:

Մասնավորապես, ըստ պաշտպանի, մեղադրական եզրակացությունից պարզ է դառնում, որ որպես դատավորին մեղսագրվող մեղադրանքը հիմնավորող փաստական տվյալներ են նշվել դատավորի, գործով մյուս ամբաստանյալ, փաստաբան Էլզա Զաքարյանի բջջային հեռախոսահամարների մուտքային եւ ելքային զանգերի վերծանումները, դրանց հետ կապված սկավառակներ: Էլզա Զաքարյանը մեղադրվում է կաշառքի միջնորդության մեջ: Դատարանի որոշման հիման վրա նրա հեռախոսային խոսակցությունների գաղտնալսման արդյունքները պարունակող սկավառակները, դատավոր Իշխան Բարսեղյանի նկատմամբ իրականացված արտաքին դիտումը եւ ներքին դիտումը, ինչպես նաեւ կաշառք տալու նմանակում օպերատիվ-հետախուզական միջոցառումների արդյունքները պարունակող լազերային սկավառակները, Շենգավիթ վարչական շրջանի ընդհանուր իրավասության դատարանում տեղադրված տեսագրող սարքի տեսագրությունները պարունակող լազերային սկավառակը եւս համարվել են փաստական տվյալներ:

Ամբաստանյալ Իշխան Բարսեղյանի մյուս պաշտպան Արա Ղազարյանն էլ ասաց, որ այս նյութերն էական նշանակություն ունեն պաշտպանական կողմի համար։ «Խոսքը սահմանադրական եւ կոնվենցիոն իրավունքի մասին է, դատավարության սկզբից կողմերը պետք է ունենան այն նյութերը, որոնք էական են կամ իրենք համարում են, որ էական են՝ իրենց պաշտպանությունը նախապատրաստելու համար»,- ասաց պաշտպանը։ Կանգ առնելով Իշխան Բարսեղյանի նկատմամբ արտաքին դիտում եւ ներքին դիտում, ինչպես նաեւ կաշառք տալու նմանակում օպերատիվ-հետախուզական միջոցառումների արդյունքները պարունակող լազերային սկավառակների վրա՝ Արա Ղազարյանն ասաց, որ այս դատավարությունը մեկնարկել է առանց այս նյութերի եւ դրանց հիմքում ընկած փաստական տվյալների՝ իմաստազուրկ կլինի, եթե պաշտպանական կողմը չունենա դրանք:

Մեղադրող դատախազը, սակայն առարկեց միջնորդության դեմ՝ նշելով, որ պաշտպանական կողմն է սայթաքել, համապատասխան միջնորդություն չի ներկայացրել, եւ հիմա փորձ է արվում դա վերագրել նախաքննության մարմնի կողմից իր պարտականությունները չկատարելուն: Այնուամենայնիվ, լսելով դատավարության կողմերին, դատարանը բավարարեց միջնորդությունը եւ որոշեց պաշտպանական կողմին տրամադրել նշված նյութերը:

Այս գործով հաջորդ դատական նիստը տեղի կունենա փետրվարի 9-ին