Ինձ «Ալֆա» ջոկատը ԱԱԾ բերման ենթարկեց այնպես, ինչպես Լապշինին. Արարատ Խանդոյան

«Սասնա ծռեր» խմբի անդամ Արայիկ Խանդոյանի (մականունը՝ Միայնակ գայլ) եղբոր՝ Արարատի գործով այսօր տեղի ունեցած դատական նիստն անցավ լարված մթնոլորտում. պատճառը գործով վկա, ոստիկանության մայոր,Վահե Չախմախչյանի ցուցմունքներն էին:

Խանդոյանը, հիշեցնենք, մեղադրվում է ՊՊԾ գնդի գրավմանը հաջորդած օրերին ոստիկանների եւ քաղաքացիների միջեւ 2016 թ. հուլիսի 20-ին Երեւան քաղաքում տեղի ունեցած զանգվածային անկարգություններին մասնակցելու, ոստիկանի վահանը քաշելու, նրա նկատմամբ բռնություն գործադրելու մեջ: Գործով տուժող է ճանաչվել 46 ոստիկան:

Այս փուլում հարցաքննվում են գործով վկաները, որոնք հիմնականում ոստիկանության աշխատակիցներ են: Մասնավորապես, այսօր հարցաքննվեց ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակից, ավագ օպերլիազոր, կոչումով մայոր Վահե Չախմախչյանը, որը մի քանի հոգու հետ հուլիսի 20-ին բերման է ենթարկել Արարատ Խանդոյանին: Չախմախչյանը դատարանին հայտնեց, որ այդ օրը ինքը օպերատիվ-հետախուզական միջոցառումներ է իրականցրել Խորենացի փողոցում, եղել է քաղաքացիական հագուստով: Նրա պատմելով՝ զանգվածային անկարգությունների ժամանակ իր տեսադաշտում է հայտնվել «ագրեսիվ հայացքով» Արարատ Խանդոյանը: Նա ցուցմունք տվեց, թե տեսել է՝ ինչպես է Արարատ Խանդոյանը ձեռքերով եւ ոտքերով հարվածում առաջին շարքում կանգնած ոստիկաններին:

Հարցին, թե ինչո՞ւ հենց այդ ժամանակ չեն բերման ենթարկել Խանդոյանին, այլ մի քանի ժամ անց, վկան պատասխանեց, որ եթե այդ ժամանակ բերման ենթարկեին, իրավիճակը էլ ավելի կսրվեր: Խանդոյանը մինչ հարց տալը, ոստիկանության մայորից հետաքրքրվեց, թե հիշողության հետ կապված խնդիրներ ունի՞, վկան ասաց՝ ոչ: Այս պատասխանից շատ չանցած վկան Խանդոյանի գրեթե բոլոր հարցերին պատասխանեց. «չեմ հիշում», ինչը զայրացրեց Խանդոյանին: Վերջինիս հարցին, թե որտե՞ղից են իրեն բերման ենթարկել, վկան ասաց՝ Օպերայի սրճարաններից մեկից՝ այդպես էլ չհիշելով բերման ենթարկելիս ներկայացե՞լ են, թե՝ ոչ, կամ ասել են՝ ի՞նչ կասկածանքով են բերման ենթարկում, թե՝ ոչ:

Արարատ Խանդոյանին զայրացրեց վկայի այն պատասխանը, ըստ որի՝ նրան ոչ թե ԱԱԾ են բերման ենթարկել, այլ ոստիկանության Քանաքեռ-Զեյթունի բաժին: «Ինչի՞ եք սուտ խոսում», - գոռաց Խանդոյանը եւ ոստիկանների ուղեկցությամբ դուրս եկավ դահլիճից: Նախագահող դատավոր Մնացական Մարտիրոսյանը նրա նկատմամբ սանկցիա կիրառեց՝ նախազգուշացման տեսքով, սպառնալով, որ կրկնվելու դեպքում կարող է ժամերով հեռացվել դատական նիստերից: Այնուհետեւ հայտարարվեց 10 րոպե ընդմիջում: Ընդմիջումից հետո Խանդոյանը վերադարձավ եւ սկսեց հարցեր ուղղել վկային, սակայն Վահե Չախմախչյանը կրկին «չեմ հիշում» պատասխաններն էր պարբերաբար տալիս, ինչը նյարդայնացնում էր Խանդոյանին: «Ինձ էլ Լապշինի պես արտահանձնեք Ադրբեջանին, պրծնեմ»,- վրդովված ասաց նա:

Խանդոյանը դատարանում հայտարարեց, որ վկան կեղծ եւ սուտ ցուցմունքներ է տալիս: Նա պնդեց, որ իրեն «Մեղեդի» սրճարանից ԱԱԾ է բերման ենթարկել «Ալֆա» ջոկատը, այլ ոչ թե ոստիկան Վահե Չախմախչյանը. «Տարել են ԱԱԾ դարպասների մոտ, մեզ սպասեցնել են տվել 30 րոպե, 30 րոպեից հետո մեզ տեղափոխել են 6-րդ վարչություն: Չախմախչյանը իր սեփական Մերսեդեսով եկել է եւ դարպասներից ներս չի մտել: Մեզ նստացրել են Չախմախչյանի արծաթագույն Մերսեդեսը եւ տեղափոխել Քանաքեռ-Զեյթունի ոստիկանության բաժին»,- ասաց Խանդոյանը՝ հավելելով, որ իրեն բերման են ենթարկել այնպես, ինչպես նախօրեին ադրբեջանցիները՝ հայնտի բլոգեր Լապշինին: «Մտածում են՝ մի աստղ բարձրացնեն, մի աստղ ավել ստանան, բայց չեն մտածում՝ մարդու դեմ կեղծ ցուցմունք տալով, մարդուն մեղադրեն այնպիսի հանցանքի մեջ, որը նա չի արել: Դա ուղղակի աբսուրդ է», - ավելացրեց Արարատ Խանդոյանը:

Դատարանում այսօր հարցաքննվեցին նաեւ ամբաստանյալի համագյուղացիներ Երվանդ Խաչատրյանը եւ Լեւոն Հակոբյանը։ Ծաղկահովիտի նախկին համայնքապետ Երվանդ Խաչատրյանը հայտնեց, որ ինքը ճանաչում է Արարատ Խանդոյանին եւ նրա ընտանիքին․ «Հայրենասիրական ոգով լի ընտանիք են, հինգ եղբայրներից չորսը մասնակցել են Արցախյան հերոսամարտին։ Կարող եմ ասել, որ Արարատը հայրենասեր, աշխատող, կարգին տղա է»,- հավելեց նա։

Ցուցմունքից պարզ դարձավ, որ վկային ոստիկանության Արագածոտնի բաժին են հրավիրել ամբաստանյալին տեսանյութի մեջ ճանաչելու համար․ «Ասացին՝ վկայի կարգավիճակում չե՞ս լինի։ Ինձ ասացին՝ ճանաչեք ձեր համագյուղացուն։ 45 վայրկյանանոց տեսանյութում, մոտ 15 վայրկյանանոց երեւում էր Խանդոյանը»,-ներկայացրեց վկան, հավելելով, որ ամբաստանյալը կանգնած է եղել ոստիկանների առաջ, փորձել է վահան քաշել, սակայն չի ստացվել։ Ըստ նրա՝ Արարատ Խանդոյանը եղել է նաեւ հաշտարարի դերում։

Ցուցմունքն ավարտելուց հետո վկան, դիմելով դատարանին, ասաց․ «Ես մի բան կարող եմ ասել, հիշելով Արարատի անցած ճանապարհը, խնդրում եմ մեղմ վարվել նրա հետ»։

Դատարանում ցուցմունքով հանդես եկավ նաեւ Ծաղկահովիտի համայնքապետարանի աշխատակից, համայնքի նախկին ղեկավար Լեւոն Հակոբյանը, որը նշեց, որ 1980-ականներից ճանաչել է Խանդոյանին, սակայն ինքը դեպքին ականատես չի եղել։

«Քննչական կոմիտեում ցույց են տվել 15 վայրկյանանոց տեսաերիզ, հարցրել են ՝ ճանաչու՞մ եք, ասել եմ ՝ ճանաչում եմ։ Երեւում է, որ Արարատը ձեռքը մեկնեց, բայց չի երեւում դեպի ո՞ր կողմ գնաց, երեւում է նաեւ ոտքը։ Ձեռքը մեկնեց, բայց վահան չի խլել»։

Վկայությամբ հանդես եկավ ոստիկանության ներքին զորքերի աշխատակից Նազարեթ Գեւորգյանը, որը նշեց, թե իր պատասխանատվության տակ գտնվող անձնակազմից հուլիսի 20-ին Խորենացի փողոցում տուժել են երեք հոգի, այդ թվում եւ ինքը, սակայն չի տեսել՝ ովքեր են հարվածում, չի ճանաչում նաև Արարատ Խանդոյանին, նրան տեսել է միայն հեռուստացույցով։ Վկան կրկնեց, որ իրենք ժողովրդին զգուշացրել են, փորձել հանդարտեցնել, երբ նկատել են, որ ժողովուրդն առաջ է գալիս, հրաման են ստացել չորս քայլ առաջ գնալ, հետո քսան քայլ։

Այս գործով հաջորդ նիստին կհարցաքննվեն տուժողները: Հաջորդ նիստը տեղի կունենա փետրվարի 16-ին, ժամը 12:00-ին: