Փակ սենյակի գաղտնիքը. գեներալը չկարողացավ բացել դռնակը

Տպագրվել է «Հայկական Ժամանակ» օրաթերթի՝ 2004 թվականի փետրվարի 27-ի համարում

Երեկ, մեր թերթում տպագրված «ՊՆ-ն գաղտնալսումներ է անում» հրապարակման մեջ, «ԱՄ» նախագահ Արտաշես Գեղամյանը եւ փոխնախագահ Ալեքսան Կարապետյանը Պնախարար Սերժ Սարգսյանին մեղադրել էին ՀՀ մարզատեխնիկական ընկերության շենքում տեղադրված սարքավորումների միջոցով քաղաքական գործիչների հեռախոսազրույցները գաղտնալսելու մեջ: Արձագանքելով այս հրապարակմանը՝ մարզատեխնիկական ընկերության նախագահ, գեներալ- լեյտենանտ Արկադի Տեր-Թադեւոսյանը զանգահարել է Ալեքսան Կարապետյանին եւ փորձել հերքել նրա կողմից կատարված պնդումները: Նկատի ունենալով այս փաստը՝ երեկ մենք նույնպես հանդիպեցինք պարոն Տեր-Թադեւոսյանին, պարզելու, թե հատկապես ինչ հիմքով է նա հերքում գաղտնալսման մասին մեղադրանքը:

Մեր հանդիպման սկզբում Տեր-Թադեւոսյանը սկսեց սպառնալ, որ դատի է տալու մեր թերթին եւ Արտաշես Գեղամյանին՝ իրեն սրիկա անվանելու համար (չնայած Արտաշես Գեղամյանը խորհուրդ էր տվել Սերժ Սարգսյանին՝ պարզել, թե որ սրիկան է գաղտնալսում իրենց հեռախոսազրույցները): Մարզատեխնիկական ընկերության ղեկավարը իր մոտ կանչեց ընկերության իրավաբանին եւ հրահանգեց համապատասխան հայցադիմում կազմել: Այնուհետեւ, փոքր-ինչ հանդարտվելով, առաջարկեց մտնել մեր թերթում նշված երկու փակ սենյակները, որտեղ, ըստ Ալեքսան Կարապետյանի, տեղադրված են գաղտնալսող սարքավորումները:

Տեր-Թադեւոսյանը հայտարարեց, որ այդ սենյակները ինքը վարձակալությամբ տրամադրել է «Ինտերտելեկոմ» կազմակերպությանը, որը ինտերնետային կապի պրովայդեր է եւ միաժամանակ զբաղվում է ինտերնետ հեռախոսակապով: Կարելի էր կարծել, որ դրանից հետո պարոն Թադեւոսյանը պետք է հայտարարեր, թե քանի որ այդ տարածքը ինքը վարձակալությամբ տրամադրել է այլ կազմակերպության, ուրեմն՝ տեղյակ չէ, թե այնտեղ ինչ է կատարվում, եւ գաղտնալսման փաստը հաստատել կամ հերքելու խնդիրը հենց «Ինտերտելեկոմինն» է եւ ոչ թե մարզատեխնիկական ընկերությանը: Սակայն պարոն Տեր-Թադեւոսյանը տանտիրոջ իրավունքով կարգադրեց, որ բացվի փակ սենյակի դուռը, որտեղ գտնվում են ինչ-որ սարքավորումներ:

Մեր զրուցակիցը պնդում էր, որ ցանկացած մասնագետ, այդ սարքավորումներին նայելով, կհասկանա, որ դրանցով հնարավոր չէ գաղտնալսում իրականացնել: Սակայն այդ սենյակի դուռը այդպես էլ հնարավոր չեղավ բացել, որովհետեւ, նախ, պարզվեց, որ բանալին աշխատակիցներից մեկի մոտ է, որը բացակայում է, իսկ երբ հիշյալ աշխատակիցը եկավ, պարզվեց՝ բանալին նրա մոտ չէ: Սակայն մեր զրույցի հիմնական արդյունքն այն էր, որ Արկադի Տեր-Թադեւոսյանն ընդունեց, որ Արտաշես Գեղամյանի եւ Ալեքսան Կարապետյանի հեռախոսազրույցի ընթացքում վերջինիս հեռախոսի վրա ֆիքսվել են մարզատեխնիկական ընկերությանը պատկանող հեռախոսահամարները: «Այդ համարները մենք նույնպես տվել ենք «Ինտերտելեկոմին» որի դիմաց ես անվճար զանգահարելու հնարավորություն ունեմ»,-պարզաբանեց մեր զրուցակիցը:

Այնուամենայնիվ, անհասկանալի է, թե ինչու երբ Արտաշես Գեղամյանը Վիեննայից զանգահարում է Երեւան՝ Ալեքսան Կարապետյանին, վերջինիս հեռախոսի վրա ֆիքսվում է ոչ թե Արտաշես Գեղամյանի, այլ «Ինտերտելեկոմի» հեռախոսահամարները: Այս կազմակերպության փոխտնօրեն Արթուրը մեզ բացատրում է, որ պատճառը կարող է լինել այն, որ Արտաշես Գեղամյանը Վիեննայից զանգահարել է ոչ թե իր հեռախոսահամարով, այլ այնտեղից գնված ինտերնետային հեռախոսաքարտով: «Այդ դեպքում ավստրիական ինտերնետ պրովայդերը միանում է մեզ հետ եւ մեր միջոցով Ալեքսան Կարապետյանի հեռախոսին, որի պատճառով էլ վերջինիս հեռախոսի վրա ֆիքսվում է մեր հեռախոսահամարը»,-բացատրում է «Ինտերտելեկոմի» փոխտնօրենը:

Հենց Արկադի Տեր-Թադեւոսյանի եւ «Ինտերտելեկոմի» ողջ անձնակազմի ներկայությամբ մենք զանգահարեցինք պարոն Գեղամյանին, որը միանշանակ հայտարարեց, որ երբեւէ ոչ մի քարտ չի գնել եւ զանգահարել է բացառապես ռոումինգ արված իր բջջային հեռախոսով: Ի դեպ, մեր ներկայությամբ տեղի ունեցած հեռախոսազրույցի ընթացքում Արկադի Տեր-Թադեւոսյանը Արտաշես Գեղամյանի հետ խոսում էր հարգալից տոնով եւ անգամ չակնարկեց, որ պատրաստվում է նրան դատի տալ: Գեներալը պնդում էր միայն, որ իր բարոյական նկարագիրը իրեն թույլ չի տա զբաղվել գաղտնալսմամբ: «Ես նույնպես խորը հարգանք եմ տածում աֆղանական եւ ղարաբաղյան պատերազմների հերոս գեներալ Արկադի Տեր-Թադեւոսյանի նկատմամբ եւ որեւէ առիթ չունեմ չհավատալու նրան: Եթե նա վստահեցնում է, որ կապ չունի գաղտնալսման հետ, ապա մնում է կարծել, որ դա արվում է առանց նրա գիտության»,-պարզաբանեց Արտաշես Գեղամյանը:

Ավետիս Բաբաջանյան