Եթե լինի հրաման՝ ոչ միայն կորցրած դիրքերը, մի քանի շրջան էլ ավելին կվերցնենք. Ռ. Գասպարյան

Արցախյան առաջնագծում վերջին օրերին ստեղծված լարվածությունը շարունակվում է: Այսօր արդեն տարբեր ազատամարտիկներ հայտարարել են առաջնագիծ մեկնելու պատրաստակամության մասին: Արդյո՞ք առաջնագծում կա նրանց անհրաժեշտությունը: Այս մասին զրուցել ենք ԱԺ պատգամավոր, ազատամարտիկ Ռուստամ Գասպարյանի հետ, որի ղեկավարած գումարտակն այս օրերին առաջնագծում է.

- Պարոն Գասպարյան, ձեր ձեւավորած գումարտակը շարունակո՞ւմ է ծառայությունը: Վերջին օրերի լարվածությամբ պայմանավորված լրացուցիչ խմբի օգնության անհրաժեշտություն կա՞:

-Հենց հիմա իմ գումարտակը գտնվում է Մատաղիսի, Թալիշի դիրքերում, արդեն մոտ 10-15 օր է՝ առաջին գծում հերթապահություն են իրականացնում: Ներկա դրությամբ  նոր ուժերի անհրաժեշտություն չկա: Քանի որ գումարտակը Պաշտպանության նախարարության հետ պայմանագիր ունի՝ իր հերթապահությունն է իրականացնում սահմանին: Եթե, Աստված չանի, անհրաժեշտություն լինի՝ էլի կամավորներ կհավաքենք, անպայման կկանգնենք մեր երեխաների կողքին:

- Ձեզ ի՞նչ լուրեր են հաղորդվում, իրավիճակն ինչպիսի՞ն է առաջնագծում:

- Լարված, շատ լարված վիճակ է, արկակոծություն, հրետակոծություն:

- Ստեղծված վիճակը շատերը համեմատում են ապրիլի հետ: Դուք տեսնո՞ւմ եք համեմատության եզրեր:

 -Չի կարելի համեմատել: Թեեւ այսօր եւս ամենախոշոր զենքերն են օգտագործում (հրետանի եւ այլն), բայց իրավիճակը համեմատել ապրիլյան դեպքերի հետ, իհարկե ճիշտ չէ: Նրանք կրակում են շատ խոշոր տրամաչափի զենքերից, մենք համապատասխան պատասխան տալիս ենք, լռեցնում ենք: Ապրիլին կարելի է ասել գաղտագողի հարձակվեցին, հիմա պատրաստ վիճակում ենք ու Աստված չանի, եթե հարձակում լինի, մեր ժողովուրդը թող վստահ լինի, Ադրբեջանն էլ թող իմանա, որ մի քանի տարածք անպայման կորցնելու են:

- Ադրբեջանական կո՞ղմը:

- Այո, իհարկե: Ընդ որում նկատի չունեմ մի քանի մանր-մունր դիրքեր, նկատի ունեմ մի քանի շրջան:

- Իսկ հնարավո՞ր է հետ վերադարձնել այն դիրքերը, որ հայկական կողմն է կորցրել ապրիլին:

-Ճիշտ է, որոշակի դիրքեր կորցրեցինք, բայց կարողացանք կասեցնել շատ լուրջ հարձակում: Համոզված եղեք՝ եթե այդքան մեծ ուժերով ու այդպես գաղտագողի հարձակվեին Ռուսաստանի բանակի վրա՝ տասնյակ կիլոմետրերով առաջ կգնային մինչեւ ռուսները հասցնեին կասեցնել (եթե կարողանային կասեցնել): Բայց փառք մեր բանակին, զինվորին, որ հենց տեղում, դիրքերում կարողացան կասեցնել: Դա այդ պատերազմի համար լուրջ կորուստ չէր: Ճիշտ է՝ մեր հանրապետության համար կորուստ է, բայց նման պատերազմ կանխելու համար դա կորուստ չէր: Ինչ վերաբերում է կորցրած տարածքը հետ վերադարձնելուն՝ ես նման ինֆորմացիա չունեմ, որ նման հրահանգ կա: Եթե կլինի հրաման՝ առանց խնդրի մենք կկարողանանք ոչ միայն կորցրած դիրքերը հետ բերել, այլ մի քանի շրջան ավելին վերցնել:

- Այսինքն հիմա այդ առումով ավելի պատրաստ ենք, քան ապրիլին:

- Միանշանակ, հիմա շատ լուրջ ենք պատրաստ: Համոզված եղեք, դուք էլ մեր ժողովրդին հույս, հավատ ներշնչեք, որ խնդիր չունենք մենք: Իհարկե պատերազմը զոհեր է պահանջում, բնական է, կլինեն, բայց շատ քիչ քանակությամբ: Հիմա շատ ավելի արդյունավետորեն կկարողանանք խնդիրը լուծել:

- Առաջիկա օրերին, ըստ ձեզ՝ սպասվո՞ւմ է ավելի լայնածավալ պատերազմական գործողություն:

- Մենք նման ծրագիր չունենք, մեր բանակը նման խնդիր չունի իր առջեւ դրած, բայց Ադրբեջանից ամեն վայրկյան սպասելի է: Նրանք միշտ ուզում ու փորձում են: Թշնամին նենգ է, ամեն պահի հնարավոր է հարձակում:

Հիշեցնենք, որ արցախյան առաջնագծում հակառակորդի ակտիվության վերաբերյալ կանխատեսումները վերջին օրերին սկսել են իրականանալ. փետրվարի 24-ին Արցախի ՊՆ-ն հայտարարեց, որ առավոտից սկսած հակառակորդը տարբեր տրամաչափի ականանետերից եւ  Դ-44 տիպի հրանոթներից շարունակել է հյուսիսային ուղղությամբ խախտել հրադադարի պահպանման ռեժիմը: Ընդ որում, ըստ հաղորդագրության, թիրախավորվել էին ոչ միայն մարտական հենակետերը, այլեւ Թալիշ բնակավայրը:

Այս լարվածությունը շարունակվեց եւ գագաթնակետին հասավ փետրվարի 25-ին. Ադրբեջանը փորձեց Մարտունու եւ Ակնայի ուղղություններով ձեռնարկել հարձակման փորձ: Հայտարարվեց, որ ՊԲ առաջապահ ուժերի պատասխան գործողությունների արդյունքում հակառակորդը տվել է զոհեր եւ վիրավորներ, մի քանի դիակ գտնվում է չեզոք գոտում:

Տեղի ունեցածից 2 օր անց՝ այսօր Ադրբեջանի պաշտպանության նախարարությունը վերջապես հրապարակեց փետրվարի 25-ի առավոտյան արցախյան դիրքերի ուղղությամբ ձեռնարկված հարձակողական գործողությունների արդյունքում չեզոք գոտում հայտնված իր զոհերի անունները՝ հայտարարելով, որ դիակների տարհանման գործընթացին խոչընդոտում է արցախյան կողմը՝ նոր պահանջներ առաջ քաշելով:

Արցախի Հանրապետության պաշտպանության նախարարությունը հայտարարեց, որ ադրբեջանական դիակների տարհանման գործընթացը չի իրականացվել ոչ թե արցախյան, այլ ադրբեջանական կողմի մեղքով, քանի որ վերջինս խախտել է բանակցությունների ընթացքում նախապես ձեռքբերված պայմանավորվածությունը: Թե ինչ պայմանավորվածության մասին էր խոսքը՝ Արցախը չհրապարակեց՝ պնդելով, որ դա գաղտնի տեղեկություն է: Ժամեր առաջ, սակայն, հայտնի դարձավ, որ ադրբեջանցի զինվորների դիերը չեզոք գոտուց տարհանվել են:

«Տեղեկացնենք, որ տարհանման գործընթացն իրականացվել է համաձայն փետրվարի 25-ին ձեռքբերված պայմանավորվածության, այսինքն այնպես, ինչպես սկզբնական շրջանում պնդել է արցախյան կողմը», - ասված էր Արցախի ՊՆ-ի հաղորդագրությունում: