ՌԴ բուհերում սովորելու ընդունելության քննությունների արդարությունը միանշանակ չի ընդունվում

Ռուսաստանյան բուհերում սովորելու համար Հայաստանում օրեր առաջ անցկացված ընդունելության քննությունների արդյունքները ոչ բոլոր դիմորդների կողմից են միանշանակ ընդունվել, եւ քննությունների ընթացքը ոմանց տարակուսելու տեղիք է տվել:

Ավելի վաղ հայտնել ենք, որ ՀՀ կրթության եւ գիտության նախարարությունը Գիտության եւ մշակույթի ռուսական կենտրոնի հետ համատեղ 2017-2018 ուսումնական տարվա համար հայտարարել են մրցույթ՝ Ռուսաստանի Դաշնության բարձրագույն ուսումնական հաստատություններում բարձրագույն եւ հետբուհական կրթություն ստանալու նպատակով:

Հայաստանցի ուսանողների համար տրամադրվել էր ընդհանուր առմամբ 187 տեղ` տարբեր մասնագիտությունների գծով, եւ ուսումնառությունը պետք է լիներ անվճար, այսինքն` փոխհատուցվելու էր Ռուսաստանի Դաշնության պետական բյուջեից: Ընդունելության գործընթացը պետք է կազմակերպեր Հայաստանը, ավելի կոնկրետ` ՀՀ կրթության եւ գիտության նախարարությունը` գնահատման եւ թեստավորման կենտրոնի հետ համատեղ:

Մեզ դիմած դիմորդը, չցանկանալով անունը հրապարակել, ասում էր, որ քննությունների գրավոր փուլից հետո իրենց տեղեկացվել է, որ արդյունքների մասին կիմանան բանավոր քննությունից առաջ: Այսինքն` դա նշանակում է, որ նաեւ պարզ կդառնար, թե դիմորդը բանավոր քննությանը մասնակցելու իրավունք ստացե՞լ է, թե ոչ: Բայց դիմորդին իր գնահատականը հայտնել են միայն բանավոր քննության օրը, ընդ որում, տեղեկացրել, որ թեպետ այդ գնահատականը բարձր է, բայց բանավոր քննության մասնակցել չի կարող, որովհետեւ, համաձայն նախարարի հրամանի, տեղերի քանակը նվազեցվել է մինչեւ 40-ի չափ, ինչը նշանակում է, որ մեծացել է նաեւ մրցակցությունը:

ՀՀ կրթության եւ գիտության նախարարության արտաքին կապերի եւ սփյուռքի վարչության պետ Արթուր Ղազարյանը մեր զրույցում նշեց, որ բանավոր քննություն ասվածն ուղղակի զրույց-հարցազրույց է, որն անցկացրել է ռուսական կողմի ձեւավորած հանձնախումբը` ասենք հետաքրքրվելու, թե դիմորդն ինչու է ցանկանում ընդունվել ռուսաստանյան բուհ եւ այլն, իսկ այդ հանձնախմբում ՀՀ կրթության եւ գիտության նախարարությունն ունեցել է ներկայացուցիչ:

Արթուր Ղազարյանը վստահեցրեց, որ գրավոր քննությունից հետո արդեն երրորդ օրը արդյունքները փակցված են եղել Երեւանի Ջոն Կիրակոսյանի անվան դպրոցում, որտեղ էլ քննությունն է անցկացվել:

«Հավանաբար դժգոհությունը կապված է եղել մարզերից եկողների հետ, այսինքն` նրանք տվյալ պահին չեն կարողացել գալ, Ջոն Կիրակոսյանի անվան դպրոցում ֆիզիկապես ներկա գտնվել եւ տեսնել իրենց քննության արդյունքները: Բայց որքան նախարարությունում զանգ է ստացվել, պատասխանել են մարդկանց»,- նշեց նա:

Ասաց, որ նախապես հայտարարված տեղերի քանակի փոփոխություն չի եղել, այսինքն` դրանց թիվը 187-ից չի նվազեցվել 40-ի: Ընդհակառակը, նրա վստահեցմամբ, նույնիսկ հնարավորության դեպքում ավելացվել են մեծ պահանջարկ առաջացրած տեղերը: «Դիմորդները պետք է անկեղծություն ունենան եւ ասեն, որ այն մասնագիտությունների դեպքում, որտեղ մրցակցությունը մեծ է եղել, ռուսական կողմը հնարավորինս փորձել է բավարարել պահանջարկը այն տեղերի հաշվին, որոնք թափուր են մնացել դիմորդ չլինելու պատճառով` պահպանելով այդ 187 տեղը»,- հայտարարեց ԿԳՆ արտաքին կապերի եւ սփյուռքի վարչության պետը:

Արձագանքելով դիտարկմանը, թե ընդունված է կարծել, որ արտասահմանյան բուհերում սովորելու համար անցկացվող ընդունելության քննությունները պատահական մարդիկ չէ, որ հաղթահարում են, նա պատասխանեց. «Օրինակ` 5-ամյա կրթահամակարգով բժշկագիտություն մասնագիտության համար 15 տեղ է եղել, դիմել է շուրջ 40 հոգի: Այդ 15 հոգուն, ովքեր անցել են, գնացեք ասեք` միայն անկեղծ պատասխանեք` որեւէ ծանոթ, որեւէ միջամտություն եղե՞լ է: Մյուս մասնագիտությունների դեպքում նույնպես»:

Մեր զրուցակցի տեղեկացմամբ, ռուսաստանյան բուհերը դեռեւս պետք է հաստատեն ընդունելության քննությունների արդյունքները, իսկ դրանից հետո նաեւ կորոշվի, թե 187-ից որ 25 դիմորդներն են իրավունք ստանալու սովորել պարտադիր զինվորական ծառայությունից տարկետման իրավունքով:

Մինչ այդ ՀՀ կրթության եւ գիտության նախարարությունը պաշտոնական հարցում է արել ՀՀ պաշտպանության նախարարություն` հետաքրքրվելով, թե որոնք են այսօր մեր երկրի, պետության համար նախապատվելի մասնագիտություններ, որպեսզի այդ մասնագիտություններն ընտրած դիմորդներն էլ տարկետում ստանան: Դրանք ըստ ստացված պատասխանի, մասնավորապես հետեւյալն են` իֆորմացիոն անվտանգություն, մեքենաշինություն-մեքենագիտություն, մեխանիկա, ինժեներություն: «Հիմնականում՝ բնագիտական առարկաներ»,- ասաց Արթուր Ղազարյանը: