Քարոզարշավի ժամանակ Ջրառատի գյուղապետը մոտեցել է քաղաքացիներին եւ սկսել հայհոյել

Մարտի 12-ին Արմավիրի մարզի Ջրառատ գյուղում «Օհանյան-Րաֆֆի-Օսկանյան» դաշինքի քարոզարշավից հետո դաշինքի համակիրների եւ ՀՀ ոստիկանության զորքերի հրամանատար Լեւոն Երանոսյանի ազգականների միջեւ ծեծկռտուք է տեղի ունեցել, որն ավարտվել է կրակոցով:

Մասնավորապես կիզակետում է եղել Լեւոն Երանոսյանի քրոջ որդին՝ Ջրառատ համայնքի ղեկավար Սամվել Գալստյանը եւ եղբայրը՝ հուլիսի 29-ին Սարի թաղում տեղի ունեցած բախումներից հայտնի Լեռնիկ Երանոսյանը:

Նույն օրը «Օհանյան-Րաֆֆի-Օսկանյան» դաշինքը հաղորդագրություն էր տարածել՝ նշելով, որ Ջրառատի գյուղապետ Սամվել Գալստյանի կողմից սպառնալիքներ են հնչեցվել գյուղի բնակչի՝ «Օհանյան-Րաֆֆի-Օսկանյան» դաշինքի համակրի հանդեպ: Նշվել էր, որ գյուղապետը ոչ անհայտ փոխոստիկանապետ Լեւոն Երանոսյանի բարեկամն է, իսկ գյուղն էլ նույն Երանոսյանի ծննդավայրն է:

Հաղորդագրության մեջ նշվում էր նաեւ, որ գյուղապետի շրջապատը ներկայացնող անձանցից մեկը դաշինքի կողմնակցի վրա ատրճանակ է ուղղել։ Ատրճանակը «Օհանյան-Րաֆֆի-Օսկանյան» դաշինքի կողմնակիցները խլել են նրա ձեռքից եւ վնասազերծել օրինախախտին: Նշենք, որ միջադեպից հետո ոստիկանություն են բերման ենթարկվել միայն «ՕՐՕ» դաշինիքի 6 համակիրները եւ երեկոյան ուշ ժամի ազատ արձակվել:

Մեզ հայտնի դարձավ, որ ծեծկռտուքի հետեւանքով հիվանդանոց է տեղափոխվել Լեռնիկ Երանոսյանը: Վերջինս մարտի 12-ին փակ գանգուղեղային տրավմա ախտորոշմամբ տեղափոխվել է «Նաիրի» բժշկական կենտրոն, վիճակը գնահատվում է կայուն: Այս մասին մեր զրույցում ասաց բժշկական կենտրոնի տնօրեն Անատոլի Գնունին: Նա ասաց, որ Լեռնիկ Երանոսյանն այժմ գտնվում է նյարդաբանական բաժանմունքում՝ բժիշկների հսկողության տակ: «Նա համապատասխան բուժումներ է ստանում»,- ասաց Գնունին:

Պարզվեց նաեւ, որ ատրճանակը եղել է Լեռնիկ Երանոսյանի ձեռքում, միջադեպի ժամանակ նա օդ է կրակել. «Մակարով» տիպի ատրճանակը պատկանում է հենց նրան: Մեր տեղեկություններով, Լեռնիկ Երանոսյանը բացատրություն է տվել, բացի դա հենց նա է հանցագործության մասին հաղորդում տվել, իսկ միջադեպի մյուս կողմը՝ ՕՐՕ դաշինքի համակիրները հրաժարվել են բացատրություն տալուց: Լեռնիկ Երանոսյանը 2016 թվականի հուլիսի 29-ին Սարի թաղում տեղի ունեցած դեպքերի գլխավոր հերոսներից մեկն էր: Նա աշխատում է որպես Ոստիկանության զորքերի 1001 զորամասի շտաբի օպերատիվ բաժնի պետի տեղակալ, կոչումով՝ գնդապետ:

Ինչ վերաբերում է Ջրառատում նախօրեին տեղի ունեցած ծեծկռտուքին, ապա գլխավոր հերոսին՝ համայնքի ղեկավար Սամվել Գալստյանին, երեկ ողջ օրվա ընթացքում գտնել չհաջողվեց: Ջրառատի գյուղապետարանից մեզ ասացին, որ Գալստյանին Արմավիրի մարզպետարան են կանչել: Մեր զրույցում երեկ OՐՕ դաշինքի ներկայացուցիչ Ստեփան Մարգարյանը որոշ մանրամասներ ներկայացրեց միջադեպից:

- Պարոն Մարգարյան, ինչի՞ց է առաջացել միջադեպը:

- Քարոզարշավի ընթացքում Ջրառատի գյուղապետը մեքենայով մոտեցել է մարդկանց եւ սկսել գոռգոռալ, թե ինչո՞ւ եք հավաքվել, հայհոյանքներ է հնչեցրել: Այնուհետեւ մեր համակիրները հանդիպել են, խոսակցություն է եղել, այդ ընթացքում քաշքշոցներ են սկսվել, որն էլ վերածվել է ընդհուպ մինչեւ կրակոցի:

- Այսինքն՝ նաեւ կրակոցնե՞ր են հնչել:

- Այո, ինչ-որ մեկը կրակել է, դա ֆիքսված է եւ ոստիկանությունն է ֆիքսել դա: Մեր տղաները վնասազերծել են նրանց, զենքը վերցրել եւ տրամադրել ոստիկանությանը:

- Գյուղապետից բացի էլ ովքե՞ր են մասնակցել միջադեպին, Լեռնիկ Երանոսյանն է՞լ է այդտեղ եղել:

- Ես նման խոսակցություն լսել եմ եւ կրակոցը կապում են նրա հետ, բայց քանի որ պաշտոնական տեղեկատվություն չունեմ, չեմ կարող ասել, ոստիկանությունում քննություն է գնում, ֆիքսել են, որ կրակոց կա, բայց չեն ասում՝ ո՞վ է, ի՞նչ է:

- Ձեր համակիրներն այդ ծեծկռտուքի հետեւանքով վնասվածքներ ստացե՞լ են:

- Այո: Ես եւ Էլինար Վարդանյանը երեկ գնացել ենք ոստիկանություն, այնտեղ տեսել եք մեր համակիր տղաներին, վնասվածքներ ստացողներ կային, ակնհայտ դեմքին երեւացող մարմնական վնասվածքներ կային, մեկին տեսա, աչքը կապտած էր:

- Բերման ենթարկվածները քանի՞սն էին:

- Բերման է ենթարկվել 4 անձ, մեկն էլ կամավոր է ներկայացել՝ երբ որ ճշտել է, որ իրեն ոստիկանությունը փնտրում է:

- Ոստիկանությունը, փաստորեն, բերման է ենթարկել միայն ձեր համակիրներին: Սա ինչպե՞ս կգնահատեք:

- Մենք նույն հարցը տվել ենք ոստիկանությանը. եթե հնչել է կրակոց՝ ով է նա, ինչու նա բերման չի ենթարկվել: Մեզ հավատացրել են, որ քննությունը շարունակվում է եւ ովքեր որ անցել են այս գործով բոլորի մասնակցությամբ քննչական գործողություններ կարվեն: Գիշերը մեր համակիրներն ազատ են արձակվել, հիմա տեսնենք՝ ինչ կլինի: Ես ուզում եմ հավատացնել, որ գյուղապետն է սկսել հրահրել այս ամենը, նա ոչ միայն չի կատարել իր պարտավորությունը՝ բնականոն հունով ապահովելու քարոզարշավը, նախընտրական հանդիպումը, որն օրենքով իր պարտականությունն է, այլ նաեւ՝ պրովոկացիա է արել, հրահրել է ծեծկռտուք, որը կրակոցով է ավարտվել: Ես կարծում եմ, որ սա անթույլատրելի է, ըստ էության, տեղական իշխանության ներկայացուցիչը ոչ միայն չի կատարում իր պարտավորությունը, այլ նաեւ միջադեպ է հրահրում: Սրանից գործող իշխանությունները եւ այն կուսակցությունը, ում անդամն է նա, իսկ նա Հանրապետական է, պետք է հետեւություն անեն եւ իրենք եւս պետք է սրան գնահատական տան:

- Ընտրություններին ընդառաջ այս միջադեպն ինչպե՞ս կգնահատեք:

- Խափանել ընդդիմադիր դաշինքի քարոզարշավը, փորձել ինչ-որ վախի մթնոլորտ առաջացնել, սա է: Որեւէ ուրիշ բան չի եղել:

- Ձեր համակիրները նույն գյուղի՞ց են:

- Այո:

- Պարոն Մարգարյան, ձեր դաշինքը պահանջելո՞ւ է, որ գյուղապետը, Լեռնիկ Երանոսյանը պատասխանատվության ենթարկվեն:

- Դա մեր պահանջելու կամ չպահանջելու խնդիրը չէ, այստեղ ոստիկանության խնդիրն է, քննություն է գնում, մենք սպասում են արդյունքներին:

Նշենք, որ դեպքի առթիվ դեռ քրեական գործ չի հարուցվել: Հետաքրքիր է, որ նյութեր նախապատրաստում է ոչ թե ՀՀ հատուկ քննչական ծառայությունը, (Երանոսյանը բարձրատիճան պաշտոնյա է,-հեղ.) այլ՝ ՀՀ քննչական կոմիտեն: