Մարզերում. մինչեւ ապրիլի 12-ը եւ դրանից հետո

Տպագրվել է «Հայկական Ժամանակ» օրաթերթի՝ 2004 թվականի մարտի 20-ի համարում

Երեկ Հրազդանի բնակչության հետ հանդիպման ժամանակ «Արդարություն» դաշինքի լիդերները հստակեցրին ժողովրդին նախագահի նստավայր բերելու ժամկետները: «Կգա օրը՝ մեր քայլերի եւ անելիքների մասին մենք ձեզ  անպայման տեղյակ կպահենք: Շատ շուտով մենք կհայտարարենք օրը, հավաքվելու տեղն ու թե ինչ քայլեր պիտի ձեռնարկենք: Ընդամենը օրերի հարց է: Իսկ այս օրերին մենք փորձում ենք համախմբել ընդդիմադիր քաղաքական դաշտի հիմնական ուժերին: Բայց եթե անգամ որոշ քաղաքական ուժեր ձգձգեն պրոցեսը, մենք ապրիլի 12-ից այն կողմ անցնելու իրավունք չունենք»,- հրազդանցիներին տեղեկացրեց «Հանրապետություն» կուսակցության նախագահ Ալբերտ Բազեյանը: Իսկ ԱԺԴ փոխնախագահ Վարդան Գրիգորյանը հրազդանցիներին խորհուրդ տվեց այսուհետ ուշադիր հետեւել խորհրդարանական հայտարարություններին, որի ժամանակ էլ հնչելու է համազգային նստացույց անելու ընդդիմության կոչը:

Եւ չնայած ընդամենը մոտ 500 հրազդանցի էր եկել «Արդարություն» դաշինքի հետ հանդիպմանը, սակայն, դաշինքի լիդերների գնահատմամբ, սրանք այն մարդիկ են, ովքեր գալու եւ կանգնելու են մինչեւ վերջ: Իսկ հավաքված ժողովուրդն իսկապես մարտական էր տրամադրված: Նկատելի էր, որ նրանք այլեւս չեն ուզում որեւէ ճառ կամ ելույթ լսել: «Մեզ ոչ մի բան էլ մի պատմեք. մենք տուռնիկի վրա ֆռռացող նախագահին էլ ենք լավ ճանաչում, կազինոներում պետության փողերը մսխող պաշտպանության նախարարին էլ ենք լավ ճանաչում, իրենց ջիպերով մեր արժանապատվության վրայով ամեն օր անցնող նախարարներին էլ ենք լավ ճանաչում: Մեզ կոնկրետ օր ու ժամ ասեք, ու մենք գալիս ենք»,- գոռում էին հրազդանցիներն՝ ի պատասխան «Արդարություն» դաշինքի քարտուղար Վիկտոր Դալլաքյանի այն կոչի, որ ժողովրդի հետ միասին իրենք կկոտրեն ղարաբաղյան կլանի երկու պարագլուխների՝ Ռոբերտ Քոչարյանի եւ Սերժ Սարգսյանի ողնաշարը:

Ի դեպ, դաշինքի գրեթե բոլոր ներկայացուցիչներն իրենց ելույթներում զգուշացնում էին ուժային կառույցների եւ տեղական ինքնակառավարման մարմինների ղեկավարներին՝ չգնալ ընդդեմ ժողովրդի որեւէ քայլի, այլապես՝ իրենց եւս ներում չի լինի: «Ուժային կառույցների եւ տեղական ինքնակառավարման մարմինների ղեկավարներին զգուշացնում ենք՝ չգնալ հոսանքին հակառակ, այլապես, ինչպես Հրազդան գետը դուրս եկավ հունից եւ իր հետ սրբեց-տարավ ամեն ինչ, ժողովրդի հոսանքը նրանց էլ կսրբի-կտանի»,- ասաց ՀԺԿ քարտուղար Գրիգոր Հարությունյանը: «Արդարություն» դաշինքի ղեկավար Ստեփան Դեմիրճյանն էլ վստահություն հայտնեց, որ իրավապահ մարմինները երբեք դուրս չեն գա ժողովրդի դեմ: «Իսկ նրանք, ովքեր կընտրեն անօրինականության ճանապարհը՝ պատասխան են տալու օրենքի եւ ժողովրդի առջեւ»,- ասաց ընդդիմության լիդերը: 

Իսկ ի՞նչ էր ասում ժողովուրդը: «Տանը մեկ հատ փամփուշտ գտնելով՝ յոթ տարի ժամկետ են տալիս, մինչդեռ նախարարի տղան չհայտարարագրված ատրճանակով փղոցներում կրակում է: Սա՞ է օրենքի երկիրը: Կամ, այդ ո՞վ է որոշել, որ Սերժ Սարգսյանի ընտանիքի համար Չարենցավանի հաստոցաշինական գործարանը պիտի դնեն ու բուլդուզերով քանդեն: Այդ գործարանը, որտեղ 2000 մարդ էր աշխատում եւ ընտանիք պահում, այսօր քանդում են՝ Սերժի եղբոր տղային տալու համար»,- ասում էր հրազդանցի Անժելա Հարությունյանն ու ընդդիմությանը կոչ անում՝ ճառ ասելու փոխարեն զանգ կախել: Ընդդիմության ճառերից մինչեւ կոկորդը կուշտ էր նաեւ Վանատուր գյուղի տարեց Պատվական Հարությունյանը: «Ո՞ւր է 40 հազար աշխատատեղը. այդ աշխատատեղերը բացվել են միայն գերեզմանոցներում եւ մեկ էլ աղոթարաններում: Մենք թաղված ենք, մենք ապրելու իրավունք չունենք. ոտքի վրա մեռնելն ավելի լավ է, քան այսպես փորսող ապրելը:

«Արդարություն» դաշինքն էլ լավ չի աշխատում: Այն, ինչ որոշել եք հիմա՝ 6 ամիս առաջ պետք է անեիք: Ստեփան Դեմիրճյա՛ն, Գեղամյանի հետ մտածիր. էլ  դիմանալու հնար չունենք»,- բարձրախոսն ընդդիմության ձեռքից վերցրեց ու սկսել բղավել վանատուրցի Պատվականը: «Քիչ մնաց, սպասեք կոչին:  Մենք լինելու ենք հետեւողական եւ այս գործընթացը հասցնելու ենք տրամաբանական ավարտին»,- հուսադրեց Ստեփան Դեմիրճյանը: «Գնամ Երեւանից պրակատով տելեվիզոր վերցնեմ, որ կոչը հանկարծ բաց չթողնեմ»,- ընդդիմությանը տեղեկացրեց հեռուստացույց չունեցող Լեւոն Հակոբյանը:  Իսկ այսօր «Արդարություն» դաշինքը կհանդիպի մայրաքաղաքի Դավիթաշեն համայնքի բնակիչներին՝ նրանց համազգային նստացույցի նախապատրաստելու համար:   

Նաիրա Զոհրաբյան