Վերաքննիչ դատարանը՝ հումորի ակումբ. Սարֆարյանի նիստի ժամանակ դատավորը բարձր ծիծաղել է

Վերաքննիչ դատարանում այսօր սկսվել է 2016 թվականի Ամանորի գիշերը Ազատության հրապարակում տոնածառ տեղադրելու փորձից հետո 2 տարվա ազատազրկման դատապարտված քաղաքացիական ակտիվիստ Գեւորգ Սաֆարյանի վերաքննիչ բողոքի քննությունը:

Հիշեցնենք, որ Սաֆարյանը Վերաքննիչից պահանջում է բեկանել Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանի վճիռը  եւ կայացնել  արդարացման դատական ակտ: Բողոքը մակագրվել է Վերաքննիչ քրեական դատարանի դատավորներ Ռուբիկ Մխիթարյանին, Սերգեյ Չիչոյանին եւ Մհեր Արղամանյանին:

Նիստը սկսվել է մեղադրող դատախազին բացարակ եւ դատավորին ինքնաբացարկ հայտնելու միջնորդությամբ, որոնք խորհրդակցական սենյակում քննվելուց հետո մերժվել են:

Մեր զրույցում Սաֆարյանի պաշտպան Տիգրան Հայրապետյանն ասաց, որ մեղադրող դատախազին բացարակ է հայտնել, քանի որ նա օրենքի դրույթներով չէր կարող անկողմնակալ դատախազ համարվել: «Ասեմ, թե ինչու: Երբ որ Գեւորգ Սաֆարյանը ձերբակալվելուց հետո հաղորդում էր ներկայացրել ՀՔԾ՝ ոստիկանների գործողությունների վերաբերյալ, այս նույն դատախազը այս գործով հսկող դատախազ էր: Նա ասել էր, որ իր համար ձեւավորվել է կանխակալ կարծիք, որ ոստիկանների գործողությունները օրինաչափ են եղել: Դատարանն այնուամենայնիվ մերժեց բացարկի մեր միջնորդությունը՝ ասելով, որ դա հիմք չի»,-ասաց Հայրապետյանը:

Նիստի ընթացքում Գեւորգ Սաֆարյանը դատարանին խնդրել է իրեն տրամադրել  պաշտպանի ներկայացրած բողոքի կրկնօրինակները: Տիգրան Հայրապետյանն ասաց, որ ինքն էլ չունի իր  պաշտպանյալի բողոքը, որովհետեւ նա  բանտից է գրել եւ ուղարկել: Պաշտպանը իր հիմնավորումը ներկայացնելիս նկատել է, թե ինչպես է դատավոր Մհեր Արղամանյանը ժպտում։ Սա դարձավ  ինքնաբացարկի միջնորդություն անելու հիմք։ «Նախ դատավորներից մեկը Սերգեյ Չիչոյանն ասաց՝ ձեր պատճառով ձգձգվում է դատական նիստը, ես էլ հակադարձեցի՝ ասեցի, որ ձեր պատճառով է ձգձգվում, որովհետեւ ձեր պարտականությունն էր, որպեսզի բողոքը ուղարկվեր իմ պաշտպանյալին, որ մենք էլ պատրաստված գայինք: Այդ ժամանակ դատավոր Մհեր Արղամանյանը բարձր ծիծաղեց, երբ ասեցի, որ ոչ օրինչափ են գործել: Ես ինքնբացարկի միջնորդություն ներկայացրի Արղամանյանին, նա հերքեց, ասեց, թե ինքը չի ծիծաղել: Հետեւաբար, ինքնբացարկի միջնորդությունն էլ մերժվեց: Մենք եկել ենք այն հույսով, որ վերաքննիչում կարող ենք բան փոխել, որովհետեւ անօրինական դատական ակտ է կայացվել, բայց պարզվում է՝ եկել ենք այստեղ, զվարճանում ենք: Դատավորներն իրենց տեղում չեն: 37 էջանոց հիմավորումներ եմ ներկայացրել, մոտ 80 հիմնավորումներ եւ եթե այդ ամեն մի հիմնավորման ժամանակ  դատավոր Արղամանյանն այդպես պետք է արձագանքի....»,- ասաց պաշտպանը:

Մեր դիտարկմանը, թե դատավորների պահվածքը հաշվի առնելով՝ ի՞նչ ակնկալիքներ ունեն Վերաքննիչ դատարանից, Հայրապետյանն ասաց՝ ակնկալում է, որ դատարանը իր գործառույթները կիրականցնի. «Ոնց որ եկած լինեին ձեւական նիստ անելու: Դատավորները պետք է հասկանան, որ կամ իրենք չպետք է դատավոր աշխատեն, կա՛մ եթե իրենք հրահանգ են կատարում, ապա իրենց տեղը բատնում պետք է լինի՝ ոչ թե դատարանում: Պետք է լրջանան ու անեն այն, ինչի համար իրենք կոչված են, ոչ թե դատական նիստ անցկանցնեն հեգնանքով: Այսօր ոնց որ հումորի ակումբ գնացած լինեին: Տեսնեիք, թե ինչպես էին այդ նույն դատավորները ինքնաբացարկի միջնորդությունը մերժելիս նայում Գեւորգի հարզատաներին, որոնք դժգոհություն հայտնեցին, դատավորները արհամարանքով, զզվանքով էին նայում նրանց»,-մանրամասնեց Հայրապետյանը: Նա ասաց, որ եթե Վերաքննիչ դատարանը մերժի բողոքը, ապա ներպետական ատյանները սպառելուց հետո դիմելու են Մարդու իրավունքների եվրոպական դատարան: «Ակնհայտ անմեղ անձին, շինծու մեղադրաք են առաջադրել»,-ասաց նա:

Նշենք, որ Գեւորգ Սաֆարյանը ոտքերի հետ կապված խնդիրներ ունի: Տիգրան Հայրապետյանը նշեց, որ նրա վիճակն ավելի է բարդացել: «Գնալով ոտքերի ցավն ավելի է ուժեղանում, լուրջ խնդիր կա, ու ամեն անգամ քայլելուց ինքը շատ ուժեղ ցավեր է ունենում: Պետք է համապատասխան բժիշկ գա, տեղում զննի, որից հետո ինքը նշանակի համապատասխան զննություն՝ քաղաքացիական հիվանդանոցում: Բժիշկ է պետք, հարազատաները փնտրում են»,- մեր հարցին ի պատասխան հավելեց Գեւորգ Սաֆարյանի պաշտպանը:

Հիշեցնենք, որ 2016 թվականի Ամանորի գիշերը Ազատության հրապարակում տոնածառ տեղադրելու փորձի ժամանակ ոստիկանների եւ քաղաքացիների միջեւ բախումներ տեղի ունեցան:  Գեւորգ Սաֆարյանը մեղավոր ճանաչվեց  իշխանության ներկայացուցչի՝ ՀՀ ոստիկանության 4-րդ հատուկ գումարտակի հրամանատար, ոստիկանության մայոր Գեղամ Խաչատրյանի նկատմամբ բռնություն գործադրելու համար: Կենտրոն եւ Նորք-Մարաշ վարչական շրջանների ընդհանուր իրավասության դատարանը դատավոր Մնացական Մարտիրոսյանի նախագահությամբ սույն թվականի հունվարի 16-ին Սաֆարյանին դատապարտեց երկու տարվա ազատազրկման: Ակտիվիստը պարբերաբար հայտարարում էր, որ իր նկատամամբ քաղաքական հետապնդում է իրականացվում:

Գեւորգ Սաֆարյանի վերաքննիչ բողոքի քննություն կշարունակվի ապրիլի 26-ին: