Դուրդ չի՞ գալիս, որ ռեժիմը սպանեց. դատավորը չթողեց Խանդոյանին հարգել Հաց բերողի հիշատակը

«Սասնա ծռեր» խմբի անդամ Արայիկ Խանդոյանի (Միայնակ գայլ) եղբոր՝ Արարատ Խանդոյանի գործով դատական նիստն այսօր անցավ լարված մթնոլորտում:

Խանդոյանն ի հիշատակ Հաց բերող Արթուր Սարգսյանի՝ այսօր դատական նիստերի դահլիճ մտավ Արթուրի նկարով, թեւին սեւ ժապավեն կապած: Հաց բերողի նկարը նա ամրացրել էր իր պիջակին: Նիստը սկսվելուն պես Արարատ Խանդոյանը հայտարարեց, որ դատարանում ներկա գտնվողները կանգնեն եւ մեկ րոպե լռությամբ հարգեն Սարգսյանի հիշատակը: «Հարգենք մեր ընկերոջ՝ Արթուր Սարգսյանի հիշատակը, որը զոհ գնաց քրեաօլիգարխիկ ռեժիմի կամայականությանը»,- հայտարարեց Խանդոյանը, որից հետո դահլիճում ներկա գտնվող նրա հարազատներն ու ընկերները ոտքի կանգնեցին: Սա բարկացրեց նախագահող դատավոր Մնացական Մարտիրոսյանին եւ նա հրահանգեց նստել, ոտքի չկանգնել: «Ոչ ոք ոտքի չկանգնի»,- զգուշացրեց դատավորը, ինչին հակադարձեց Խանդոյանը. «Ով հարգում է, թող ոտքի կանգնի»,- պատասխանեց Խանդոյանը:

Մնացական Մարտիրոսյանը սպառնաց Խանդոյանին, որ չլսելու դեպքում սանկցիա կկիրառի նրա նկատմամբ եւ կհեռացնի դատական նիստերի դահլիճից: «Դե սրանից հետո ինձ կտեսնեք ոտքի կանգնելուց՝ նոր էն ժամանակ կիմանաք»,- վրդովվեց Խանդոյանը: Դատարանն, այնուամենայնիվ, Արարատ Խանդոյանի նկատմամբ սանկցիա կիրառեց՝ նախազգուշացման տեսքով: «Դուրդ չի՞ գալիս, որ ռեժիմն ա սպանել էդ տղուն»,- դիմելով դատավորին, ասաց Խանդոյանը: Այս հայտարարությունից հետո դատավորը կրկին նախազգուշացրեց նրան, որ շարունակելու դեպքում կհեռացվի նիստերի դահլիճից:

Այսօրվա նիստում դատարանը շարունակեց լսել գործով տուժող ճանաչված ոստիկաններից երեքին: Ոստիկաններից Հայրապետ Մելքոնյանը, որը ծառայում է ոստիկանության զորքերի 10.33 զորամասում, դատարանին հայտնեց, որ հուլիսի 20-ին մի խումբ անձինք բախումներ հրահրեցին, ինչի հետեւանքով ինքը աջ ծնկի սալջարդ է ստացել: Տուժողը, սակայն չի տեսել, թե ինչ առարկայից է վնասվածքը ստացել. «Վահանները քաշում էին ոստիկանների, ուզում էին վերեւ՝ գունդ գնալ, այնտեղ զինված մարդիկ կային, կրակում էին, վտանգավոր էր, դրա համար չէինք թողնում, որպեսզի առաջանան»,- պատմեց տուժող ոստիկանը: Մյուս ոստիկանները նույնպես հայտնեցին, որ բախումների ժամանակ սալջարդ են ստացել: Այս ոստիկանները նույնպես չեն տեսել` ովքեր են եղել հարվածողները, ինչպես նաեւ բախումների ժամանակ չեն տեսել Արարատ Խանդոյանին:

Գործով տուժող ճանաչված ոստիկանների հարցաքննությունից հետո դատարանը հետազոտեց գործում եղած ապացույցները, մասնավորապես, դատարանում զննվեց իրեղեն ապացույց դեպքի վայրի տեսաերիզը: Այս տեսաերիզը դատարանում զննվեց երեք անգամ, քանի որ ոչ պաշտպանական կողմին եւ ոչ էլ դատարանի դահլիճում ներկա գտնվողներին չէր երեւում` այդ բախումների ժամանակ Արարատ Խանդոյանը հարվածո՞ւմ է ոստիկանին, կամ քաշո՞ւմ է արդյոք ոստիկանի վահանը, թե՞ ոչ:

«Կադրում որտե՞ղ է երեւում, որ ես վահան եմ քաշում: Բայց կադրում պարզ երեւում է, որ ինձ հարվածում են: Ոստիկաններին ասում եմ՝ մարդ չեք արա, ձեր բնակիչներին ինչո՞ւ եք խփում, ինձ հարվածում են: Ես գնում եմ, այդտեղ որտե՞ղ է երեւում, որ ես հարվածում եմ»,- հայտարարեց Արարատ Խանդոյանը: Ի պատասխան  մեղադրող դատախազ Հայկ Պետրոսյանն ասաց. «Ակնհայտ տեսնում եմ, որ հրմշտում է ոստիկաններին»,- ասաց նա: Խանդոյանը հակադարձեց՝ «Ես չեմ հրմշտում, ես հանդարտության կոչեր էի անում»,- ասաց նա: Դատախազն էլ նկատեց. «Ոտքին հարվածելով` հանդարտության կոչ էիք անո՞ւմ»: Այս խոսքերը զայրացրին Արարատ Խանդոյանին: «Դուբինկայով հարվածելով` կարողանում են ինչ -որ բան անել: Ես իրավունք չունեմ ասեմ, մի հարձակվեք, հո վայրենի չեք: Էս գիտե՞ս ինչից է, ինչքան զիբիլի կատու կա, բռնել-դրել եք ոստիկանության զորքերում, դրա համար էլ տենց ա եղել»:

Նա դատարանում նաեւ հայտարարեց, որ իրեն կալանավորելը նախապես պլանավորված է եղել, քանի որ ոստիկանները մինչ դեպքը՝ գնացել են Ծաղկահովիտ՝ իրենց տուն: Արարատ Խանդոյանը «Սասնա ծռեր» խմբի անդամ Արայիկ Խանդոյանի՝ «Միայնակ գայլ»-ի  եղբայրն է: «Եթե, ի սկզբանե դա պետական պատվեր չէր, ապա ինչի՞ համար էր ոստիկանությունը հետաքրքրված ինձնով»,- նկատեց Խանդոյանը: Դատարանում ներկա գտնվող Խանդոյանի հարազատները նույնպես դժգոհեցին: «Ո՞ւր ա, որ վահան ա քաշում»,- ասում էին նրանք:

Դատավոր Մնացական Մարտիրոսյանն առաջարկեց Արարատ Խանդոյանին ցուցմունք տալ, սակայն Խանդոյանն ասաց, որ այսօր պատրաստ չէ: Նրա պաշտպան Արա Ղարագյոզյանն էլ հայտարարեց, որ զննված տեսաերիզը անթույլատրելի ապացույց ճանաչելու վերաբերյալ առաջիկայում հանդես կգան համապատասխան միջնորդությամբ:

Այսօրվա դատական նիստում դատավոր Մնացական Մարտիրոսյանը բավարարեց պաշտպանական կողմի միջնորդությունը եւ վերացրեց Արարատ Խանդոյանի տեսակցությունների եւ հեռախոսային զանգերի վրա դրված արգելանքը: Այս միջնորդությունը ներկայացվել էր նաեւ դատաքննությունը սկսելու փուլում, որը, սակայն դատավորը մերժել էր:

Այս գործով հաջորդ դատական նիստը կշարունակվի մարտի 30-ին՝ ժամը 12:00-ին:

Հիշեցնենք, որ Արարատ Խանդոյանը մեղադրվում է 2016 թվականի հուլիսի 20-ին Երեւան քաղաքում տեղի ունեցած զանգվածային անկարգություններին մասնակցելու, ոստիկանի վահանը քաշելու, նրա նկատմամբ բռնություն գործադրելու մեջ: Գործով տուժող է ճանաչվել 46 ոստիկան: