Արծվիկ. երգի մեղեդու մեջ միայն չինական մշակույթի տարրեր փնտրելն առնվազն զավեշտալի է

Երգչուհի Արծվիկն իր երաժշտական կարիերայի ամենազբաղված փուլում է: Մինչև մայիսին Ուկրաինայում կայանալիք «Եվրատեսիլ 2017» երգի միջազգային մրցույթը նա շատ անելիքներ ունի: Այս շրջանում զբաղված է վոկալի, պարի պարապմունքներով, հագուստի ընտրությամբ, ելույթ է ունենում համերգների ընթացքում, եվրատեսիլյան անցուդարձի ամենաակտիվ մասնակիցներից է: Armtimes.com-ը փորձեց պարզել երգչուհու կարծիքը եվրատեսիլյան իր «Fly with me»-ի երգի վերաբերյալ հնչած քննադատությունների վերաբերյալ, ծանոթանալ մրցույթի նախապատրաստական աշխատանքների մանրամասներին:

- Արծվիկ, «Դեպի Եվրատեսիլ» մրցույթում հաղթելուց հետո ինչո՞վ էիք զբաղված:

- Հանրային հեռուստաընկերության «Դեպի եվրատեսիլ» նախագիծն ավարտվեց դեկտեմբերի վերջին՝ Ամանորի նախաշեմին, այդ իսկ պատճառով միանգամից մրցույթից հետո շտապեցի պատրաստվել տոներին եւ մի փոքր հանգստանալ, քանի որ պատկերացնում էի, թե ինչ զբաղված փուլ է ինձ սպասվելու: Փաստորեն չսխալվեցի, վերադարձա Հայաստան, ու սկսվեց կյանքիս, թերեւս, ամենազբաղված եւ միաժամանակ ամենահետաքրքիր փուլը:

- Մեկնել էիք Ռուսաստան: Ե՞րբ վերադարձաք ու ե՞րբ սկսեցիք զբաղվել եվրատեսիլյան գործերով:

-Այո, իրավացի եք: Թեեւ ես անսահման երջանիկ եմ, որ մասնակցեցի «Դեպի եվրատեսիլ»-ին ու նախագծի շնորհիվ կանգնած եմ երազանքիս իրականացման ճանապարհին, այնուամենայնիվ պետք է նշեմ, որ մի քանի ամիս շարունակ ստիպված եմ եղել հետաձգել բոլոր գործերս փորձերին եւ նկարահանումներին մասնակցելու համար: Այդ իսկ պատճառով մրցույթից հետո հնարավորություն ստեղծվեց ավարտին հասցնելու կիսատ մնացած աշխատանքները եւ վերադառնալ արդեն լիարժեքորեն ներգրավվելով «Եվրատեսիլ»-ի նախապատրաստական աշխատանքներին:

- Ի՞նչ կասեք Ձեր՝ «Fly with me» երգի արձագանքների վերաբերյալ: Դրանք բավականին սուր էին, շատ էին բացասական արձագանքները:

- Արձագանքները բավական տարբեր էին, ու պետք է խոստովանեմ, որ որպես արտիստ ինձ համար առավել ընդունելի են բացասական արձագանքները, քան չեզոք. բացասական մեկնաբանություններն ինձ համար որոշակի ցուցանիշ են: Սակայն կարեւոր է ընդգծել, որ «Fly with me»-ի շուրջ առկա, այսպես կոչված, բացասական արձագանքների մեծ մասն անհանգստություններ ու մտահոգություններ էին, ինչն ինձ համար դրական մեկնաբանությունների կողքին կարեւոր նշանակություն ունեին: Սա առաջին հերթին ցույց է տալիս մարդկանց սրտացավությունն ու անհանգստությունը, որի համար երախտապարտ եմ:

- Արծվի՛կ, երգի վերաբերյալ 2 հիմնական նկատառում-քննադատություն կար. 1-ինը, որ չինական մշակույթ է ներկայացնում, 2-րդը, որ երգը կառուցվածք չունի: Այս կարծիքների մասին ի՞նչ կասեք:

- Խոսել երգի ֆիքսված կառուցվածք չունենալու մասին ինձ համար առնվազն ոչ պրոֆեսիոնալ է: «Fly with me»-ն ունի կառուցվածք՝ իր կառուցվածքը, ու եթե այն չի համապատասխանում կառուցվածքի վերաբերյալ դասական մոտեցմանը, ապա չի նշանակում, որ լավը կամ ընդունելի չէ:

Իսկ ինչ վերաբերում է երգի մեղեդիին, ապա այն բազում էթնիկ հարմոնիաներ եւ լադային կառուցվածքներ է համադրում, ու այդ շարքում միայն չինական մշակույթի տարրեր փնտրելն առնվազն զավեշտալի է ինձ համար:

-Ի՞նչ կասեք, այսպես ասած, «Եվրատեսիլ 2017»-ի երգացանկի մասին:

- Ինձ համար այդ ամբողջությունը մի մեծ գունապնակ է հիշեցնում, որտեղ բազում գույներ կան՝ մեկը մյուսին լրացնող, հարստացնող, երբեմն նույնիսկ անզատելի: Ես էլ փորձում եմ իմ գույնով լրացնել գունապնակը եւ իրական երաժշտական տոն պարգեւել:

-Ինչպե՞ս եք գնահատում Ձեր շանսերը «Եվրատեսիլում»:

- Եվրատեսիլյան փորձը ցույց է տվել, որ կանխատեսումներով զբաղվելն ամենաանշնորհակալ գործն է: Շատ անկանխատեսելի է ամեն բան իրականում, քանի որ քեզ գնահատողը ոչ թե մեկ մարդ է կամ միայն ժյուրիի անդամ, այլ 43 երկիր: Պատկերացնո՞ւմ եք, թե քո երգն ու կատարումը քանի մարդու պետք է միաժամանակ դուր գա, որպեսզի կարողանաս հաջողություն ունենալ տվյալ մրցույթում: Այնուամենայնիվ, մեծապես կարեւորում եմ կենդանի կատարումը փորձերին եւ մրցույթի շրջանակում, ինչից հետո շատ բան առավել պարզ կերեւա: Հաջողության հասնելու գործում անհրաժեշտ է նաեւ տարբերվող երգ ներկայացնել, որպեսզի այն առանձնանա եւ հիշվի:

- Տեսահոլովակի շնորհանդեսից հետո ինչո՞վ եք զբաղվելու մինչեւ «Եվրատեսիլը»:

- Այս տարվա մասնակիցների շրջանում եվրատեսիլյան «challenge» (խմբ. մարտահրավեր) եմ սկսել, որի շրջանակում ես ծանոթանում եմ տարբեր ազգերի էթնիկ երաժշտությանը եւ ամենահայտնի երգերից հատվածներ կատարում՝ առաջարկելով տվյալ երկրի մասնակցին էլ հայկական որեւէ երգ կատարել: Այս ընթացքն ինձ շատ է ոգեւորում, քանի որ այս ամենի արդյունքում հայկական երգն է տարածում գտնում ամբողջ աշխարհում, ինչն իհարկե շատ ոգեւորիչ է: Իսկ ես էլ կարծես աշխարհի մշակույթների կենտրոնում լինեմ, ինքս ինձ համար շատ հետաքրքիր բացահայտումներ եմ կարողանում անել: Բացի այդ՝ ողջ օրս բաղկացած է իրար հաջորդող պարապմունքներից՝ երգի, վոկալի, պարի, հագուստի՝ նույնը տարբեր հաջորդականություններով: