Հանրապետականները քանդել են մեր երկիրը. Վոլոդյա Ավետիսյանը 3 տարի անց խոսեց դատարանում

Պահեստազորի գնդապետ, խարդախություն կատարելու համար 6 տարվա ազատազրկման դատապարտված Վոլոդյա Ավետիսյանին վաղաժամկետ ազատ արձակելու դիմումի քննարկումն այսօր այդպես էլ չսկսվեց:

Երեք տարվա ընդմիջումից հետո Ավետիսյանը, ուղեկցող ոստիկանների ուղեկցությամբ, բերվեց Էրեբունի եւ Նուբարաշեն վարչական շրջանների ընդհանուր իրավասության դատարան: Մինչ նիստը սկսվելը Ավետիսյանը, դիմելով լրագրողներին, ասաց. «Կոչ եմ անում Հանրապետականներին ոչ ոք չընտրի, որովհետեւ մեր երկիրը քանդել են»:

Նիստը սկսվելուն պես դատավոր Արտուշ Գաբրիելյանը դատավարության մասնակիցներին տեղեկացրեց, որ այսօրվա դատական նիստին չի ներկայացել «Անկախ հանձնաժողովի» ներկայացուցիչը: Արտուշ Գաբրիելյանը տեղեկացրեց, որ դատարանը որեւէ տեղեկություն չունի ներկայացուցչի չներկայանալու վերաբերյալ: Հաշվի առնելով, որ առանց նրա հնարավոր չէր քննարկել պաշտպանի դիմումը, դատական նիստը հետաձգվեց: Նիստն ավարտելուց հետո Վոլոդյա Ավետիսյանից հետաքրքրվեցինք, թե ի՞նչ ակնկալիքներ ունի դատարանից, վերջինս ի պատասխան ասաց, որ հույս չի կապում դատարանի հետ եւ որ մայիսի 25-ին ազատ է արձակվելու «մայիսի 25-ին դուրս եմ գալու, որ միասին պայքարենք»,- հայտարարեց ազատամարտիկը:

Այսօրվա դատական նիստին դատարանում էին Վոլոդյա Ավետիսյանի ազատամարտիկ ընկերները, վերջիններիս բարկացրեց դատական նիստը հետաձգելու դատավորի որոշումը: «Թող զանգեն ճշտեն, գուցե անկախ հանձնաժողովի ներկայացուցիչը ճանապարհին է», «վաղն էլ դատախազը չի գա», «հետո՝ չգիտեմ ինչ կլինի»,- իրենց դժգոհությունն էին արտահայտում Ավետիսյանի ազատամարտիկ ընկերները:

Ավետիսյանի պաշտպան Արաքս Մելքոնյանը մեր հարցին ի պատասխան ասաց, որ իր վստահորդն արդեն կրել է պատժի մեծ մասը եւ բավականին քիչ ժամանակ է մնացել պատժի կրման ավարտին: Նրա խոսքով՝ Վոլոդյա Ավետիսյանը դրական է գնահատվում ՔԿՀ վարչակազմի կողմից: Նրան վաղաժամկետ ազատ արձակելու խնդրանքով 6 անգամ դիմել են «Անկախ հանձնաժողով»-ին, սակայն առանց հիմնավորման մերժում ստացել: Մենք չենք բողոքարկում «Անկախ հանձնաժողովի» որոշումը, մենք ուղղակի դիմում ենք, որպեսզի դատարանը որոշի պայմանական վաղաժամկետ ազատ արձակման հարցը: Իմ վստահորդը պատժի մեծ մասը կրել է, բավականին կարճ ժամանակ է մնում կրելու, բայց դա որեւէ նշանակություն չունի, որպեսզի թեկուզ մեկ օր շուտ ազատ արձակվի: Շատ հետաքրքիր կլինի, որ Անկախ հանձնաժողովի ներկայացուցիչ գա դատարան, հիմնավորումները հետաքրքիր կլինի լսելու, թե ինչպես են որոշում, որ կոնկրետ մեկը պետք է հավանություն դա ինչ-որ դատապարտյալին, մյուսին՝ ոչ»,- ասաց փաստաբանը:

Վոլոդյա Ավետիսյանի մարտական ընկերներից, ազատամարտիկ Գագիկ Սարուխանյանը մեր զրույցում ասաց, որ ամենայն հավանականությամբ սույն թվականի մայիսի 25-ին Վոլոդյա Ավետիսյանը կլինի ազատության մեջ: Նրա խոսքով՝ ազատամարտիկն ազատ կարձակվի 2013 թվականի համաներման հետեւանքով պատժաչափը կրճատվելու արդյունքում: Նա նաեւ իր դժգոհությունն արտահայտեց «Անկախ հանձնաժողովից»: Ծանոթ լինելով էս ռեժիմին աշխատող ցանկացած ատյանի աշխատելաոճին մենք ուղղակի չենք հավատում, որ «Անկախ հանձնաժողովի» ներկայացուցչի բացակայությունն ուղղակի պատահականություն էր:

Ի՞նչ ա, դատարանը չունե՞ր էդ ներկայացուցչի հեռախոսահամարը, որ կարողանային զանգեին, միգուցե մարդը ճանապարհին էր, գուցե 10 րոպե սպասեին: Սա ցույց է տալիս, որ իրենք թքած ունեն դատարանների վրա, վերեւից պապան ոնց ասել ա, տենց էլ պիտի լինի: Մոտ 6 անգամ մերժել են Վոլոդյա Ավետիսյանին, այն դեպքում, երբ կալանավայրի ադմինիստրացիան համարում է, որ այս մարդը ուղղվել է, համարում է, որ ինքը խախտումներ չի արել, դուք՝ անկախ հանձնաժողով, ինչի՞ց ելնելով եք մերժում, ի՞նչն  է պատճառը»,- ասաց Սարուխանյանը:

Հիշեցնենք, որ Ավետիսյանը կալանքի տակ է 2013թ-ի սեպտեմբերից: 2014թ-ի հուլիսի 17-ին Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Լեւոն Ավետիսյանի վճռով Վոլոդյա Ավետիսյանը մեղավոր էր ճանաչվել ՀՀ ՔՕ 178-րդ հոդվածի 2-րդ մասի 5-րդ կետի (խարդախությունը` մի խումբ մարդկանց հետ ընդհանուր համաձայնությամբ) եւ ՀՀ ՔՕ 34-178 հոդվածի 2-րդ մասի 5-րդ կետով (խարդախության փորձը) եւ դատապարտվել 6 տարի ժամկետով ազատազրկման:

Համաձայն մեղադրանքի՝ նա 2000 դոլար կաշառք է վերցրել Հենրիկ Զաքարյանից՝ նրա թոռանը ժամկետային ծառայությունից ազատելու համար եւ 500 դոլար է պահանջել Ալբերտ Մաթոսյանից՝ նրա որդուն զորամասում համակարգչային օպերատոր նշանակելու հարցը լուծելու համար։ Ավետիսյանը, սակայն իրեն առաջադրված մեղադրանքը չէր ընդունում եւ համարում է, որ իր դատապաշտպան պատճառը քաղաքական է:

Պայմանական վաղաժամկետ ազատման համակարգը Հայաստանում ամենախնդրահարույցներից մեկն է: Ըստ ՀՀ քրեական օրենսգրքի 76-77-րդ եւ ՀՀ քրեակատարողական օրենսգրքի 114-115-րդ հոդվածների` պայմանական-վաղաժամկետ ազատման հնարավորությունից կարող են օգտվել բոլոր այն դատապարտյալները, ովքեր ազատազրկումը կրելիս խախտումներ չեն ունեցել, բնութագրվել են դրականորեն: Այս պահանջին ներքին կարգով ավելացրել են նաեւ ուրիշները, մասնավորապես` նախկինում դատապարտված չլինելը, տուժողի հայցապահանջը բավարարելը: Դատապարտյալները հիմնականում բողոքում են «Անկախ հանձնաժողովի» որոշումներից. բացառիկ դեպքեր են լինում, երբ դատապարտյալների վաղաժամկետ ազատ արձակման դիմումը դրական որոշում է ստանում: ՀՀ արդարադատության նախարար Արփինե Հովհաննիսյանը պարբերաբար հայտարարում է, որ դատապարտյալների պայմանական վաղաժամկետ ազատման խնդիրը ամբողջական վերանայման կարիք ունի: Թե երբ պետք է վերանայվի այս կարեւոր խնդիրը, դեռ պարզ չէ, պարզ է միայն այն, որ այս կարեւորագույն խնդիրն արդեն մի քանի տարի է` լուծում չի ստանում: