Կառավարության անդամները բզեզ կդառնան. վարչապետը կխախտի աշխատանքային օրենսգիրքը

Չի բացառվում, որ շատ շուտով Հայաստանի կառավարության անդամները հայտնի հեքիաթի հերոսի պես բզեզ դառնան: Նրանք պատրաստվում են աշխատել օրնիբուն` իրենց չխնայելով:

Վարչապետ Կարեն Կարապետյանը երեկվա նիստում, նախքան օրակարգային հարցերի քննարկումը, հանդես է եկել աշխատանքային արտակարգ ռեժիմի անցնելու վերաբերյալ հայտարարությամբ: «Անցել են ընտրությունները շատ ավելի հանդուրժողական մթնոլորտում: Մեր թիմը ստացել է մեր երկրում փոփոխություններ անելու քվե: Իմ հորդորը մեր բոլոր թիմակիցներին հետեւյալն է՝ աշխատանքային ռեժիմի, համապատասխան ջանքերի, պատասխանատվության եւ բոլոր գործողությունների մասով հայտարարում ենք արտակարգ իրավիճակ: Ուրախացնում եմ ձեզ, որ մեր ռեժիմն ավելի է ծանրանում»,- ասել է գործադիրի ղեկավարը:

Իսկ ՀՀ ֆինանսների նախարար Վարդան Արամյանը նիստից հետո լրագրողների հետ ճեպազրույցում մանրամասնել է, որ առաջիկայում սկսելու են նախկին 8 ժամի փոխարեն աշխատել 10-12 ժամ՝ ներառյալ շաբաթ օրերը: Նա նշել է, որ բարձր ցուցանիշ են սահմանել եւ պետք է այդ բարձր ցուցանիշն ապահովեն:

Բայց թե՛ վարչապետի, եւ թե՛ նախարարի խոսքերից հասկանալի չի դառնում` ովքե՞ր են աշխատելու արտակարգ ռեժիմով, միայն գերատեսչությունների ղեկավարնե՞րը, թե նաեւ դրանց աշխատակազմերը, կամ արդյոք պետական ծառայողները վարձատրվելո՞ւ են լրացուցիչ աշխատանքի դիմաց եւ որքա՞ն երկար է շարունակվելու հայտարարված արտակարգ աշխատանքային ռեժիմը:

Այս հարցերի վերաբերյալ պարզաբանում ստանալու նպատակով դիմեցինք ֆինանսների նախարարություն: Տեղեկատվության եւ հասարակայնության հետ կապերի բաժնից փոխանցված պատասխանից պարզ է դառնում, որ վճարում նախատեսված չէ, կառավարությունում հավաքված են ղեկավար մարդիկ, որոնք հանուն երկրի պատրաստ են աշխատել ինչքան որ պետք է, իսկ նրանց օրինակն էլ վարակիչ է ենթակաների համար: Վարակված ենթակաները եւս հավելյալ չեն վարձատրվի:

«Անհերքելի է, որ աշխատանքով կարելի է հասնել ցանկալի արդյունքի: Մեր թիմը գործադրում է առավելագույն ջանքեր՝ արդարացնելու մեր քաղաքացիների սպասումները: Այդ առումով արդյունավետ եւ տեւական աշխատանքն ուղիղ համեմատական է նրան, թե հասարակությունն ինչ դրական փոփոխություններ կզգա իր համար:

Մեր թիմում չկա որեւէ պարտադրանք` կատարելու աշխատանք աշխատաժամանակից դուրս: Մեզ մոտ հավաքված են մարդիկ, որոնք գաղափարի առաջամարտիկներ են, մեծ պատրաստակամությամբ եւ նվիրումով են կատարում իրենց պարտականությունները, որպեսզի արդարացնեն հասարակության սպասումները: Իսկ գաղափարի նվիրյալները լինում են նախաձեռնող եւ պրոակտիվ ու որպես ուղենիշ թիրախավորում են աշխատանքի արդյունքը: Պատահական չէ նաեւ, որ ՀՀ աշխատանքային օրենսդրությունն է ամրագրել այն գաղափարը, որ արտաժամյա չի համարվում ղեկավար պաշտոնատար անձանց` սահմանված աշխատաժամանակը գերազանցող աշխատանքը: Միայն երջանկություն է տեսնել չկաղապարված եւ փութաջան ղեկավար աշխատողների, որոնց աշխատանքը մոտիվացնում է իրենց բազմաթիվ ենթակաների, ովքեր էլ իրենց հերթին նոր գաղափարների իրագործման ակնկալիքով սեփական նախաձեռնություն են դրսեւորում` մաս կազմելու մեր քաղաքացիների բարօրության կերտմանը»:

Բայց եթե անգամ ընդունենք, որ արտակարգ աշխատանքային ռեժիմի անցնելու մասին վարչապետի հայտարարությունը բխում է երկրի նկատմամբ անսահման սրտացավությունից, արդյոք կարելի՞ է անարդարության ու օրենքը ոտնահարելու ճանապարհով հասնել դրական արդյունքի, ի դեպ, առիթի դեպքում էլ խոսել օրենքի երկիր ստեղծելու անհրաժեշտության մասին:

Իսկ եթե ղեկավարներից բացի աշխատելու են պետական այլ ծառայողներ, ինչը հասկանալի է դառնում ֆինանսների նախարարության պարզաբանումից, ապա նշանակում է, որ խախտվելու են աշխատանքային օրենսգրքի մի շարք դրույթներ, ընդ որում` հայտնի էլ չէ, թե որքան ժամանակ:    

Հատուկ կառավարության համար մեջբերենք մի քանի այդպիսի հոդված.

Հոդված 139. Աշխատաժամանակի տեւողությունը

  1. Աշխատաժամանակի առավելագույն տեւողությունը, ներառյալ` արտաժամյա աշխատանքը, չի կարող անցնել օրական 12 ժամից (հանգստի եւ սնվելու համար` ընդմիջումը ներառյալ), իսկ շաբաթվա ընթացքում` 48 ժամից:

Բայց հաշվի առնելով աշխատանքային ժամերի մասին ֆինանսների նախարարի հայտարարությունը, ստացվում է, որ մարդիկ այսուհետ աշխատելու են շաբաթական 60-72 ժամ` օրենքով նախատեսված 48 ժամի փոխարեն:

Բացի այդ, գործատուն կարող է աշխատողին ներգրավել արտաժամյա աշխատանքների միայն բացառիկ դեպքերում:

Հոդված 145. Արտաժամյա աշխատանքը թույլատրելու բացառիկ դեպքերը

- Արտաժամյա աշխատանքը թույլատրվում է հետեւյալ բացառիկ դեպքերում, եթե`

    1) կատարվում է պետության պաշտպանության, ինչպես նաեւ տարերային         աղետների, տեխնոլոգիական վթարների, համաճարակների, դժբախտ            պատահարների, հրդեհների եւ արտակարգ բնույթ կրող այլ դեպքերի                կանխարգելման կամ դրանց հետեւանքների վերացման համար                          անհրաժեշտ աշխատանք.

     2) անհրաժեշտ է ավարտել սկսած աշխատանքը, որը պատահական կամ          չնախատեսված խոչընդոտների պատճառով չէր կարող ավարտվել նորմալ        աշխատաժամանակի ընթացքում, եւ եթե սկսած աշխատանքների                      դադարեցումը կարող է առաջացնել նյութերի փչացում, ոչնչացում կամ             սարքավորումների անսարքություն.

     3) իրականացվում է այնպիսի մեխանիզմների կամ սարքավորումների             նորոգման կամ վերականգնման աշխատանքներ, որոնց անսարքության           հետեւանքով ընդհատվել է զգալի թվով աշխատողների աշխատանքը.

     ...

Հոդված 146. Արտաժամյա աշխատանքի տեւողությունը

  1. Գործատուի պահանջով արտաժամյա աշխատանքը իրար հաջորդող երկու օրվա ընթացքում չպետք է գերազանցի 4 ժամը, իսկ տարվա ընթացքում` 180 ժամը:

Հոդված 184. Արտաժամյա աշխատանքի եւ գիշերային աշխատանքի վարձատրությունը

- Արտաժամյա աշխատանքի յուրաքանչյուր ժամի համար, ժամային դրույքաչափից բացի, վճարվում է հավելում` ժամային դրույքաչափի 50 տոկոսից ոչ պակաս չափով, իսկ գիշերային աշխատանքի յուրաքանչյուր ժամի համար` ոչ պակաս, քան ժամային դրույքաչափի 30 տոկոսի չափով:

Աշխատանքային օրենսգիրքը չի նախատեսում երկրում փոփոխություններ կատարելու քվե ստանալու հիմքով մարդկանց լրացուցիչ աշխատեցնելու եւ մանավանդ չվարձատրելու հնարավորություն:

Այսպիսով, եզրակացությունը մեկն է` կամ կառավարության վերոնշյալ հայտարարությունը մնալու է զուտ որպես հայտարարություն, կամ գերատեսչությունների աշխատակիցները շահագործվելու են` դա կյանքի կոչելու նպատակով:

Տպել
20411 դիտում

Քրեական հեղինակություն Նորատուսցի Արան կրակոցների պահին ալկոհոլի ազդեցության տա՞կ է եղել. նա օգտվում է լռելու իրավունքից

Վարչապետ Նիկոլ Փաշինյանը և տիկին Աննա Հակոբյանը ներկա են գտնվել Յուրի Բաշմետի համերգին (լուսանկարներ)

Թեկնածուներից մեկը դիմել է ստոր մեթոդների. ահազանգում է Էջմիածնի քաղաքապետի պաշտոնակատարը (լուսանկար)

Թուրքիայում Իրանի դեսպանատունը ուժեղացված հսկողության տակ է

20 տարվա փչացրածը, 20 օրում չի ուղղվի. Վանեցյանը հանդիպեց հավաքականի ֆուտբոլիստների հետ

Սիսիանում տներից մեկի պատշգամբի փլուզման հետեւանքով 75-ամյա քաղաքացին մահացել է

Ակումբի տեսախցիկներով ֆիքսվել են Քրեական հեղինակություն Նորատուսցի Արայի կրակոցները (տեսանյութ)

Նիկոլ Փաշինյանի հրաժարականից հետո վարչապետ ընտրելու համար ԱԺ հատուկ նիստեր չեն գումարվի

Շատ արդյունավետ հանդիպումներ էին. Ջասթին Թրյուդո

Հանդիպում ոչ պետական բուհերի ռեկտորների հետ

Մանվել Գրիգորյանի կալանքի ժամկետը եւս երկու ամսով երկարաձգվեց

ԲԴԽ-ն ընդունել է Նիդերլանդների Թագավորության Դատական խորհրդի պատվիրակությանը

Արագածոտնի ավազահանքում փլուզման տակ 25-ամյա երիտասարդ է մնացել ու մահացել

Վիճաբանությանը միջամտած երիտասարդը մեխով հարվածներ է ստացել կրծքավանդակին. քննություն է տարվում

Հայաստանի եւ Արցախի նախագահները տիկնանց հետ զբոսնել են Ստեփանակերտում և Շուշիում (լուսանկարներ)

Նորածինը մահացել է ծնվելուց կարճ ժամանակ անց. սրտի արատը չէր հայտնաբերվել

Կբացվի «Սիրիահայ մշակույթի շունչը Երևանում» բարեգործական ցուցահանդես-տոնավաճառը

Երեխայի «խաթր» ոչ ասելու արվեստը. Լյուսի Քոչարյանի անդրադարձը

Երեւանում կանցկացվի խորհրդարանների գլխավոր քարտուղարների աշխատաժողով

Քարվաճառում կկառուցվի «Սիդնեյ» թաղամաս. պետնախարարն ընդունել է «ԱՐԻ» ընկերության բաժնետերերին