Մանախն ու «Ելք» դաշինքի անդամները կառերեսվեն. քննիչը մերժել է Մանախի պահանջը

Մարտի 31-ին տեղի ունեցած միջադեպի գործով «Ելք» դաշինքի անդամների եւ Հոկտեմբերի 27-ի գործով ազատազրկման դատապարտված Արթուր Այվազյանի` Մանախի միջեւ մայիսի 12-ին առերեսում է սպասվում:

Հիշեցնենք, որ ապրիլի 1-ին՝ ժամը 1-ին, «Ելք» դաշինքի անդամ Հայկ Սարգսյանը իրավապահներին հայտնել էր, որ ժամը 22:50-ին անհայտ անձը հարվածել է իրեն՝ պատճառելով վնասվածքներ, ինչպես նաեւ հանել է ատրճանակը եւ ուղղել իր վրա, սակայն այն վնասազերծվել է «Ելքի» անդամներից մեկի՝ Գառնիկ Վարդանյանի կողմից: Ավելի ուշ իրավապահները ձերբակալեցին Արթուր Այվազյանին, ապա կալանավորեցին:

Ապրիլի 30-ին «Ելք» դաշինքի անդամներ, գործով տուժող Հայկ Սարգսյանին, վկա Գառնիկ Վարդանյանին իրավապահները հրավիրել են ՀՀ ԱՆ «Նուբարաշեն» քրեակատարողական հիմնարկ՝ առերեսման: Երբ կողմերը պատրաստ են եղել առերեսման, Արթուր Ավագյանը` Մանախը, ՀՀ քննչական կոմիտեի քննիչների ներկայությամբ ասել է, թե ցանկանում է, որ առերեսումը նկարահանվի, հակառակ դեպքում կհրաժարվի մասնակցել քննչական այդ գործողությանը:

Այս տեղեկությունը մեր զրույցում հաստատեց Արթուր Այվազյանի պաշտպան Հայկ Ալումյանը եւ պատասխանեց մեր մի քանի հարցերին:

- Պարոն Ալումյան, նախաքննությունն ի՞նչ փուլում է, ի՞նչ քննչական գործողություն է Արթուր Այվազյանի մասնակցությամբ կատարվել:

- Դե երեւի ձեզ համար գաղտնիք չէ, որ փորձել են իրեն առերեսման ներկայացնել այն անձանց հետ, ովքեր իր դեմ ցուցմունքներ են տվել, բայց Արթուր Այվազյանը ի սկզբանե, երբ առաջին անգամ հարցաքննվել է, հատուկ ընդգծել է, որ ուզում է առերեսվել, բայց անպայման ուզում է, որպեսզի առերեսումը տեսաձայնագրվի: Քննիչի համար դա նորություն չէր, միգուցե մյուս կողմի համար նորություն էր Արթուր Այվազյանի դիրքորոշումը, բայց քննիչը շատ լավ գիտեր, որ հենց փորձի այդ առերեսումը իրականացնել, Արթուր Այվազյանը ասելու է, որ այն տեսագրեք, ձայնագրեք:

Այնուամենայնիվ, քննիչը առանց համապատասխան սարքավորումների, մյուս կողմի երկու անձանց ներկայացրել էր առերեսման. Արթուր Այվազյանը հայտարարեց, որ ինչպես նախկինում ասել է, հիմա էլ պահանջում է, որ առերեսումը տեսաձայնագրվի: Ինչից հետո առերեսումը դադարեցվեց, եւ քննիչը ժամանակ վերցրեց, որպեսզի տեխնիկական տեսանկյունից ապահովի տեսաձայնագրությունը: Հետագայում ես ստացա քննիչի կողմից մի նամակ, որ առերեսումը տեսաձայնագրելը մերժվել է: Ես չհասկացա, թե ինչու: Ինքը սկզբում հետաձգվեց, որպեսզի ապահովի այդ տեխնիկական պայմանները, եւ դրանից բավական ժամանակ հետո ես նման բովանդակությամբ նամակ ստացա:

- Ե՞րբ տեղի կունենա առերես հարցաքննությունը:

- Ես ենթադրում եմ, որ մայիսի 12-ին:

- Պարոն Ալումյան, ինչո՞ւ էր Արթուր Այվազյանը պահանջում տեսաձայնագրել առերես հարցաքննությունը:

- Որպեսզի հետագայում որեւէ մեկը կամայական ձեւով չմեկնաբանի այդ գործողություն ժամանակ տեղի ունեցած իրադարձությունները: Որպեսզի ավելի օբյեկտիվ լինի, մի բան է, երբ որ ցուցմունքը գրառվում է, մեկ այլ բան է, երբ դա նաեւ տեսաձայնագրառվում է:

- Հիմա մայիսի 12-ին առերեսումը տեղի կունենա՞, թե Արթուր Այվազյանը կրկին կհրաժարվի եւ նույն պահանջը կներկայացնի:

- Ես իմ պաշտպանյալի դիրքորոշումը գիտեմ, իմ պաշտպանյալը համառորեն պնդում է, որ ինքը ցանկանում է, որպեսզի դա տեսաձայնագրվի, հիմա եթե դա սուբյեկտիվ պատճառով  անհնարին է, քննիչը չի ցանկանում, ես չգիտեմ դրանից հետո պարոն Այվազյանը ինչ դիրքորոշում կունենա:

- Արթուր Այվազյանը նույնպես վնասվածքներ էր ստացել, դատաբժշկական փորձաքննություն էր նշանակվել: Եզրակացությունն արդեն պատրա՞ստ է:

- Ոչ, ես դեռ չեմ հրավիրվել այդ եզրակացությանը ծանոթանալու, ինչից ենթադրում եմ, որ դեռ քննիչը այն չի ստացել:

- Իսկ բացի առերես հարցաքննությունից, այլ գործողություններ իր մասնակցությամբ կատարվե՞լ են:

- Այդ հարցին առայժմ չեմ կարող պատասխանել:

Գործով տուժող Հայկ Սարգսյանի ներկայացուցիչ Նիկոլայ Բաղդասարյանը առերեսումը տեսաձայնագրելու մեջ խնդիր չի տեսնում, սակայն կարծում է, որ սխալ կազմակերպված աշխատանք է. «Մենք հասել ենք էնտեղ, նոր իմացել ենք, որ տեսաձայնագրման խնդիր կա, ու պետք է մենք այդ քննչական գործողությունը դադարեցնենք: Կարելի էր այդ քննչական գործողությունը օրինակի համար անել առանց տեսաձայնագրման, իսկ մնացած գործողությունը տեսաձայնագրել: Ուղղակի կազմակերպված չի գործընթացը գնում»,- ասաց Բաղդասարյանը: Նա ասաց, որ գործում 180 աստիճանի հակասական ցուցմունք կա: Նա վստահեցնում է, որ տուժող կողմը դեպքի վերաբերյալ բացառիկ ճշմարտություն է ներկայացնում. «Դատաքննության ընթացքում ես բոլոր ապացույցները կներկայացնեմ, անժխտելի ապացույցներ կան»,- եզրափակեց Բաղդասարյանը:

Նշենք, որ Արթուր Այվազյանը` Մանախը, 15 տարվա ազատազրկման էր դատապարտվել Հոկտեմբերի 27-ի գործով կարեւորագույն վկայի սպանությունը պատվիրելու եւ իրագործելու համար:

Միջադեպը եղել է «Ելք» դաշինքի քարոզարշավի ընթացքում Եռագույնի շուրջ առաջացած խոսակցությունից, որի արդյունքում գործադրվել էր զենք: Արթուր Այվազյանին (Մանախ) մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով (Խուլիգանություն, որը զուգորդվել է անձի նկատմամբ բռնություն գործադրելով) եւ 235-րդ հոդվածի 1-ին մասով (ապօրինի կերպով զենք պահելը, կամ փոխադրելը):