Ազատ, արդար, թափանցիկ. ոստիկանությունից դժգոհ են բոլորը

Տպագրվել է «Հայկական Ժամանակ» օրաթերթի՝ 2004 թվականի մայիսի 20-ի համարում

Արարատի քաղաքապետի թեկնածու Կարեն Խաչատրյանը երեկ մեզ հետ զրույցում հայտարարեց, որ մայիսի 16-ին Արարատում կայացած քաղաքապետի ընտրություններից հետո ինքը որոշել է այսուհետ հանդես գալ ընդդիմադիր դիրքերից եւ պայքարելու է, որպեսզի արդարությունը հաղթանակի: Հիշեցնենք, որ վերը նշված ընտրություններում գրանցված 4 թեկնածուներից հաղթող էր ճանաչվել Արարատի գործող քաղաքապետ, ՀՀԿ անդամ Հակոբ Թովմասյանը, իսկ Կ. Խաչատրյանը եղել է երկրորդը: Արարատի շուրջ 13 հազար ընտրողներից քվեարկությանը մասնակցել են մոտ 5 հազար 400-ը, որոնցից Հ. Թովմասյանի օգտին քվեարկել են 1762-ը, Կարեն Խաչատրյանի օգտին՝ 1591-ը (ձայների տարբերությունը 171 է), իսկ անկուսակցականներ Հայկ Հայկյանը եւ Ազատ Մարտիրոսյանը համապատասխանաբար ստացել են 901 եւ 773 քվե:

Մինչ ընտրությունները Կարեն Խաչատրյանը եւս ՀՀԿ անդամ է եղել, բայց քվեարկությունից մոտ 5 օր առաջ նա կուսակցության շարքերից հեռացվել է: Նրան ՀՀԿ-ից հեռացնելու մասին հայտարարվել է ընտրություններից 4-5 օր առաջ՝ Հ.Թովմասյանի ընտրողների հետ հանդիպման ժամանակ: Կարեն Խաչատրյանի խոսքերով՝ իրեն հայտնի չէ, թե ինչու եւ կոնկրետ երբ են իրեն ՀՀԿ-ից հեռացրել: Նա ոչ էլ փորձել է այդ հարցը կուսակցության կենտրոնական գրասենյակից պարզել, եւ կուսակցական ղեկավարներից ոչ մեկին մինչ օրս այդ առնչությամբ չի դիմել: «Ես չեմ դիմել ՀՀԿ կենտրոնական գրասենյակ, որովհետեւ ցանկություն չեմ ունեցել, քանի որ արդեն զգացել էի, թե ինչ է կատարվում»,- ասաց Կ. Խաչատրյանը: Գրանցվելիս ՀՀԿ անդամ թեկնածուի քվեաթերթիկներում դրանից հետո նշվել է, որ նա անկուսակցական է:

Ընտրությունների ընթացքի վերաբերյալ Կ. Խաչատրյանի, Ա. Մարտիրոսյանի եւ Հ. Հայկյանի, մեզ հետ զրուցած վստահված անձանց ու թիվ 25 ԸԸՀ (ընտրությունները կազմակերպած) նախագահ Վիլիկ Բարսեղյանի կարծիքները հիմնականում համընկնում են: «Լցոնումներ չեն եղել, ինչ եղել է՝ կապված է եղել ընտրողների ցուցակների հետ»,- այսպես բնորոշեց ընտրությունների ընթացքը Վ.Բարսեղյանը: Վերը նշված թեկնածուները եւս նշում էին, որ Հ. Թովմասյանի հաղթանակն ապահովելու խնդիրը հիմնականում լուծվել է ընտրացուցակների միջոցով, որտեղից նրա հակառակորդների հարազատները եւ կողմնակիցները՝ քվեարկությունն սկսվելուց մի քանի ժամ առաջ դուրս են բերվել, որից հետո, մայիսի 16-ին գնալով տեղամասերը, իրենց անունները ցուցակներում չեն գտել:

Կ. Խաչատրյանի վստահված անձինք մեզ հետ զրույցում միաբերան պնդում էին, որ ցուցակները փոխվել են մայիսի լույս 16-ի գիշերը, քանի որ մինչ այդ՝ մայիսի 15-ի երեկոյան իրենք գնացել են տեղամասերը եւ ստուգել ընտրական ցուցակները ու արտառոց ոչինչ չեն հայտնաբերել: Իսկ քվեարկության օրը անակնկալ պարզել են, որ իրենց հարազատների մեծ մասի անունները ցուցակներում չկան: Բացի այդ, ընտրացուցակներից հանվել են նաեւ այն ընտրողների անունները, որոնք մինչ այդ արդեն հրապարակավ Հ. Թովմասյանին դեմ են արտահայտվել, այսինքն՝ ակնհայտ է եղել, որ նրանք կգնան ընտրության եւ կքվեարկեն, սակայն՝ ո՛չ հօգուտ գործող քաղաքապետի:

Կարեն Խաչատրյանի խոսքերով՝ դատական կարգով իրենց իրավունքները վերականգնել է «դուրս մնացած» ընտրողների միայն մի մասը, բազմաթիվ մարդիկ ցուցակներում իրենց անունները չհայտնաբերելուց հետո գնացել են տուն, քանի որ Արարատին սպասարկող առաջին ատյանի դատարանը տեղակայված է Վեդիում, եւ ոչ բոլորն են ցանկացել իրենց իրավունքները վերականգնելու համար անձրեւոտ եղանակին հասնել հարեւան քաղաք: Ընտրական ցուցակներում նշված չի եղել նաեւ թեկնածուներից մեկի՝ Հ. Հայկյանի անունը, որը ստիպված է եղել դատական կարգով վերականգնել ընտրելու իր իրավունքը: Ինչեւէ, թիվ 25 ԸԸՀ նախագահ Վիլիկ Բարսեղյանի խոսքերով՝ դատական կարգով ընտրելու իրավունքը վերականգնել է 167 մարդ, ինչը, ըստ վերջինիս, իրոք բավական մեծ թիվ է: Հաջորդ հետաքրքիր դրվագը վերաբերում է Արարատի ոստիկանության գործելաոճին:

Ըստ Կ. Խաչատրյանի, ընտրությունների նախորդ օրվանից սկսած, Արարատի ոստիկանները սկսել են տարբեր կարգի խոչընդոտներ հարուցել իր եւ իր կողմնակիցների համար: Մասնավորապես, մայիսի 15-ից պետավտոտեսուչները սկսել են Կ. Խաչատրյանի կողմնակիցների մեքենաները տարբեր պատճառաբանություններով տանել տուգանային հրապարակ եւ այնտեղից բաց են թողել երկու օր հետո միայն, այսինքն՝ ընտրություններից հետո: Տեղամասային ընտրական հանձնաժողովների ընդդիմադիր քաղաքական ուժերին («Ազգային միաբանությանը» եւ «Արդարություն» դաշինքին) ներկայացնող երկու անդամներից բացի՝ մնացած 7 անդամները պաշտպանել են գործող քաղաքապետին: Իսկ ՏԸՀ-ների ընդդիմադիր անդամները չեզոք դիրք են գրավել:

Ըստ Կարեն Խաչատրյանի՝ երբ իր, Հ. Հայկյանի կամ Ա. Մարտիրոսյանի վստահված անձինք փորձել են միջամտել՝ իրենց նկատած որեւէ խախտում կանխելու նպատակով, նրանց ասել են, որ հանգիստ նստեն տեղները, հակառակ դեպքում՝ սպառնացել են ոստիկանների օգնությամբ տեղամասից հեռացնել եւ այլեւս ներս չթողնել: Վերը նշված թեկնածուների խոսքերով՝ ընտրությունների օրը Արարատի մարզի ոստիկանության ողջ անձնակազմը տեղափոխված է եղել իրենց քաղաք, նրանց հետ Արարատ են բերվել նաեւ վահաններով, սաղավարտներով եւ ռետինե մահակներով զինված հատուկ ջոկատներ, այդ թվում՝ զրահատեխնիկա: Նման պայմաններում, ըստ մեր զրուցակիցների, բնական է, որ ընտրողների մի զգալի մասը վախեցել է ընտրություններին մասնակցել:

Կ. Խաչատրյանն ասում է, որ հանրապետության ղեկավարության վերին օղակներում իր նկատմամբ ձեւավորված բացասական վերաբերմունքը հիմնականում պայմանավորված է երջանկահիշատակ Վազգեն Սարգսյանի նկատմամբ իր վերաբերմունքով: «Ես պաշտում եմ Վազգենին, եւ դա չեմ թաքցրել: Իսկ Վազգենին պաշտելու համար մարդուն չի կարելի հակա հանել: Վազգենը մեր սպարապետն է, եւ ես երբեք չեմ փոշմանի իմ ասածների համար, որ ես վազգենապաշտ եմ»,- հայտարարեց Կարեն Խաչատրյանը: Ի դեպ, Ա. Մարտիրոսյանի եղբայրը մինչ ընտրությունները աշխատել է «Արարատցեմենտ» գործարանում, սակայն քվեարկության հաջորդ օրը, ըստ թեկնածուի, իր եղբորը  ազատել են աշխատանքից՝ ադմինիստրացիայի պահանջները չբավարարելու պատճառաբանությամբ:

Ընտրություններից մի քանի օր առաջ աշխատանքից հեռացվել է նաեւ Կ. Խաչատրյանի հայրը, որը աշխատում էր Արարատի էլեկտրացանցում: Ընտրությունների վերաբերյալ մեկնաբանություններ ստանալու նպատակով դիմեցինք նաեւ հաղթող թեկնածուին՝ Հակոբ Թովմասյանին, սակայն նա պատասխանեց, որ ինքն առայժմ չի ցանկանում խոսել: «Ես կսպասեմ՝ թող իրենք (հակառակորդ թեկնածուները- խմբ.) դիմեն դատարան, ես կխոսեմ դատարանում եւ փաստերով հանդես կգամ: Իսկ ընկեր միլիցիան քնած էր, թող քնած էլ մնա: Ես պետական մարդ եմ, իմ հարցերը կառավարությունում կլուծեմ»,-ասաց Թովմասյանը: Արարատի քաղաքապետի խոսքերից պարզ դարձավ, որ նա էլ իր հերթին ոստիկանության կամ, ավելի ճիշտ կլիներ ասել, Արարատի ոստիկանապետ Գառնիկ Պետրոսյանի հետ կապված դժգոհություններ ունի:

Հ. Թովմասյանին հատկապես վիրավորել էր այն փաստը, որ երբ իր ընտանիքի անդամները՝ կինը եւ մայրը, գնացել են ընտրելու, տեղամասի մոտ կանգնած ոստիկանները նրանց չեն թույլատրել մեքենան ՏԸՀ-ի դիմաց կանգնեցնել: Արարատի քաղաքապետի խոսքերով՝ մեր զրույցից հետո նա մտադիր է գնալ կառավարություն եւ այնտեղ բարձրացնել իրենց քաղաքի ոստիկանապետի հարցը, քանի որ նրա եւ իր համագործակցությունն ինքն այլեւս չի պատկերացնում: Ինչ վերաբերում է Կարեն Խաչատրյանին ՀՀԿ-ից հեռացնելու պատմությանը, ըստ Հակոբ Թովմասյանի, խնդիրը լուծվել է հետեւյալ կերպ. ընտրություններից մի քանի օր առաջ ինքը վարչապետ Անդրանիկ Մարգարյանից փորձել է վերջնականապես պարզել, թե իրենցից, ի վերջո, ով է ներկայացնելու ՀՀԿ-ն: Վարչապետի պատասխանը միանշանակ է եղել. «Իհարկե՝ դու (այսինքն՝ Հ. Թովմասյանը-խմբ.)»: Դրանից հետո մյուս հանրապետականին առանց պատճառաբանության կուսակցությունից հեռացրել են: Այսպիսի բաներ:

Հ.Գ. Արարատի քաղաքապետի պարտված թեկնածուները համատեղ բողոք են ներկայացրել  թիվ 25 ԸԸՀ նախագահին, որոնք վերաբերում են ընտրական ցուցակներին: Իսկ ընտրությունների արդյունքները դատական կարգով բողոքարկելու վերաբերյալ վերջնական որոշում կարծես  չեն կայացրել:

Վահագն Հովակիմյան