«Զարգացած եւ քայլեն ժամանակին համընթաց». Արցախի նախագահը պարգեւատրել է դպրոցականներին

Այսօր Արցախի Հանրապետության նախագահի նստավայրում տեղի է ունեցել 2016-2017 ուսումնական տարվա դպրոցականների առարկայական օլիմպիադայի ՀՀ եզրափակիչ փուլում մրցանակային տեղեր գրաված եւ գովասանագրերի արժանացած ԱՀ 39 աշակերտների եւ նրանց ուսուցիչների պարգեւատրման հանդիսավոր արարողություն:

«Արցախպրես»-ի հաղորդմամբ՝  ԱՀ նախագահ Բակո  Սահակյանն աշակերտներին պարգեւատրել  է  արժեքավոր նվերներով՝  դյուրակիր համակարգիչներով (նոթբուք, պլանշետ), բջջային հեռախոսներով, իսկ  ուսուցիչներին՝ 100 հազարական դրամ գումարով:

«Մեր հանրապետությունում առանցքային տեղ է հատկացվում կրթության եւ գիտության զարգացմանը, եւ  այս ուղղությամբ իրականացվում են տարբեր ծրագրեր, որոնք, ըստ ամենայնի, նպաստում են մատաղ սերնդի ուսման մակարդակի բարձրացմանը, դպրոցների շենքային պայմանների բարելավմանը, տեխնիկական հագեցվածության ապահովմանը: Ժամանակակից կրթական համակարգը   եւս  երկրի դեմքն է, եւ մենք անելու  ենք    հնարավոր ամեն  ինչ, որպեսզի մեր երիտասարդներն ստանան որակյալ կրթություն, լինեն բազմակողմանի զարգացած եւ  քայլեն ժամանակին  համընթաց»,- մասնավորապես  ասել  է   Բ.  Սահակյանը:

ԱՀ կրթության, գիտության եւ սպորտի նախարար Սլավա Ասրյանը եւս կարեւորել է կրթության  դերը:  

«Դպրոցականները նույն ոգով ու եռանդով  պետք է շարունակեն աշխատել, որպեսզի  կրթական  ոլորտում Արցախի անունը հետայսու եւս բարձր պահեն: Դպրոցական  տարիներին     յուրաքանչյուր  աշակերտ  պիտի  խորապես ուսումնասիրի  այն առարկաները  որոնք   նա  պիտի  օգտագործի  իր կյանքի հետագա տարիներին:

Ուրախալին  այն  է, որ այս տարի բնագիտական առարկաներից  եւս  առաջընթաց  է  արձանագրվել. նախորդ տարվա համամեմատ առարկայական  օլիմպիադայի  եզրափակիչ   փուլում  հաղթողները 8-ով ավելացել  են»,-ըստ  էության  ասել  է Ս. Ասրյանը:

Ստեփանակերտի  Վիտալի  Ջահանգիրյանի  անվան   N  11   ավագ  դպրոցի    հայոց  լեզվի  եւ  գրականության ուսուցչուհի  Իրա  Սարումյանն   իր   խոսքում ասել   է. «Այսօր  բոլորիս համար հիշարժան օր  է. մեզնից  յուրաքանչյուրը  հպարտություն ու բերկրանք  է  ապրում     օրվա    խորհրդով: Շնորհակալություն եմ  հայտնում մեր պետությանը՝  դպրոցի եւ ուսուցչի  դերը բարձրացնելու եւ մեր չափազանց համեստ աշխատանքն  արժեւերելու համար: Գաղտնիք  չէ, որ  միայն  պետության հովանու ներքո ուսուցիչը կարող է իրականացնել    մատաղ  սերնդի   կրթության եւ  դաստիարակության պատասխանատու եւ վեհ   գործը»:

Նույն  դպրոցի   անվան   N11 ավագ  դպրոցի   9-րդ  դասարանի   աշակերտ  Արմեն  Բեգլարյանն  էլ նշել  է, որ  ինքը  2-րդ  անգամն   է, ինչ   ՀՀ-ում  մասնակցում   է   պատմություն  առարկայի  եզրափակիչ   փուլին:

«Մենք   ուրախ    ու   հպարտ  ենք, որ  երկրի  Նախագահը    արժեւորում  եւ  կարեւորում    է  կրթության  ոլորտում  մեր   հաջողություններն   ու    ձեռքբերումները: Մենք  ուրախ  ու  շնորհակալ  ենք  ստացած  նվերների   համար.  դրանք նաեւ   պարտավորեցնում  են  մեզ:

Շնորհակալ  եմ  նաեւ    իմ  ուսուցիչներին, ովքեր   ջանք  ու  եռանդ  չեն  խնայել՝  մեզ  կրթելու   եւ   գիտելիքներ  հաղորդելու  համար: Մեր  ստացած  գիտելիքները   մենք  օգտագործելու  ենք  ի  շահ  մեր  երկրի  բարօրության»,- ասել է   Ա.  Բեգլարյանը:

Ասկերանի      շրջանի  Ակնաղբյուրի    Վարդան  Ջիվանշիրյանի  անվան   միջնակարգ  դպրոցի  11-րդ  դասարանի պատմությու- նից  առարկայական  օլիմպիադայի  եզրափակիչ   փուլի   առաջին  կարգի   դիպլոմակաիր    Արգինե  Սարգսյանն   էլ    նշել  է,  որ    ինքը   եւս  ուրախ  ու  հպարտ  է. երկրորդ  անգամն է   իրեն   բախտ   վիճակվել     ՀՀ-ում   օլիմպիադայի  եզրափակիչ    փուլին մասնակցելու եւ   հաղթելու:

«Ես  ջանք  ու  եռանք  չեմ  խնայել՝  բարձր    պահելու  համար     Արցախի  Հանարպետության    անունն  ու  պատիվը:   Մեր  հաջողությունների  համար  մենք    երախտապարտ  ենք   մեր  ուսուցիչներին.  այդ   նրանց անմնացորդ  նվիրումի   ու  հոգատարության   շնորհիվ  է, որ       հասել  ենք    գիտության  նվաճումների:  Մենք   մեր   երախտագիտությունը  նրանց  հայտնել  ենք    մեր  հաջողություններով:

Հավաստիացնում  եմ  բոլորիդ, որ  հետայսու    ավելի  մեծ  եռանդով   ու  մեծ  սիրով   կշարունակենք աշխատել՝  նվաճելուհամար   նորանոր  բարձունքներ»,-մասնավորապես  ասել  է Ա.  Սարգսյանը:

Միջոցառմանը ներկա էին նաեւ ԼՂՀ ԱԺ նախագահ Աշոտ Ղուլյանը, վարչապետ Արայիկ Հարությունյանը, պաշտոնատար այլ անձինք, ուսուցիչներ, աշակերտներ   եւ   այլք: