Կայուն Հայաստան. մահափորձ անակնկալ ելքով

Տպագրվել է «Հայկական Ժամանակ» օրաթերթի՝ 2004 թվականի մայիսի 27-ի համարում

«Արմենիա-Լադա» ՓԲԸ-ի տնօրեն Ռաֆայել Շահմուրադյանը մայիսի 24-ի կեսգիշերին իր դեմ տեղի ունեցած մահափորձի արդյունքում հրաշքով կենդանի է մնացել: Մոտավորապես ժամը 23.45-ին, երբ Շահմուրադյանն իր «Նիսսան պատրոլ» ավտոմեքենայով Բաղրամյան պողոտայի վրա` «Մետրոպոլիտենի» վարչության շենքի դիմաց կանգնած է եղել լուսացույցի կարմիր ազդանշանի տակ, ձախ կողմից մոտեցել է «Նիվա» մակնիշի սպիտակ ավտոմեքենա, որի մեջ գտնվող 24-27 տարեկան երիտասարդը կրակ է բացել նրա վրա: Երիտասարդ քիլերը Շահմուրադյանի վրա կրակել է ութ անգամ. կրակոցներից միայն առաջինն է հասել նպատակակետին, իսկ մնացած յոթը Շահմուրադյանին չեն կպել: Իսկ այդ միակ փամփուշտը «Արմենիա-Լադայի» տնօրենին խոցել է ձախ կողմից՝ թիկունքի մասից:

Գնդակը, անցնելով մարմնի ողջ լայնքով, կանգ է առել աջ ուսի մոտ եւ հրաշքով որեւէ օրգան չի խոցել: Նախօրեին Նոր Նորքի շտապօգնության հիվանդանոցում Շահմուրադյանին վիրահատել են` գնդակը մարմնից հանելու նպատակով, ու հիմա նրա կյանքին ոչինչ չի սպառնում: Ավելին, այսօր կամ վաղը նա դուրս է գրվելու հիվանդանոցից: Իսկ մահափորձի փաստի առիթով Արաբկիր համայնքի դատախազությունում քրեական գործ է հարուցվել ՀՀ ՔՕ 34-104 հոդվածի վեցերորդ կետով, այսինքն՝ շատերի կյանքի համար վտանգավոր եղանակով սպանության փորձ: Երեկ երեկոյան այս գործի նախաքննությունն Արաբկիրի դատախազությունից տեղափոխվել է ՀՀ գլխավոր դատախազություն:

Այս մահափորձը բացառիկ է իր լկտիությամբ եւ «անբռնազբոսությամբ»: Երբ Ռ. Շահմուրադյանի ուղղությամբ կրակոցներ են հնչել, լուսացույցի տակ այլ մեքենաներ նույնպես կանգնած են եղել: Դեպքի վայրում է եղել անգամ երթուղային տաքսի` մի քանի ուղեւորներով: Հանցագործը չի փորձել անգամ թաքցնել իր դեմքը, այսինքն՝ դիմակով չի եղել. նա, ինչպես եւ Շահմուրադյանը, մեքենայում եղել է մենակ: Իսկ այդ սպիտակ «Նիվայի» վրա, մեր տեղեկություններով, եղել են «28» կոդով պետհամարանիշեր: Մահափորձի համար, մեր տեղեկություններով, ընտրվել է «Մակարով» տեսակի ատրճանակ, ու եթե հաշվի առնենք, որ այն կարող է պարունակել առավելագույնը ութ փամփուշտ, ստացվում է, որ հանցագործը Շահմուրադյանի վրա դատարկել է ողջ պահունակը:

Առաջին կրակոցից հետո, մեր տեղեկություններով, Շահմուրադյանը կռացել է, ուստի մնացած բոլոր կրակոցները արվել են նրա մեքենայի դռան ուղղությամբ: «Մակարովը» ընդհանրապես թույլ զենք է համարվում, եւ սա է պատճառը, որ փամփուշտների մի մասը չի խոցել անգամ «Նիսսան պատրոլի» դուռը: Թե ինչ վիճակում է այս գործի քննությունը, առայժմ հայտնի չէ: Համենայնդեպս, իրավապահներին կարծես չի հաջողվել տաք հետքերով բռնել հանցագործին, այսինքն, կարելի է ասել, որ մահափորձը բացահայտված չէ: Ինչ վերաբերում է կատարվածի շարժառիթներին, տարածված եւ հաստատուն կարծիք կա, որ տեղի ունեցածը կապվում է Շահմուրադյանի տնտեսական գործունեության հետ: «Արմենիա-Լադա» ընկերությունը զբաղվում է ավտոմեքենաների եւ ավտոպահեստամասերի ներկրմամբ եւ վաճառքով, տեխնիկական սպասարկմամբ:

Այս ընկերությունը նաեւ մի շարք ավտոարտադրողների ներկայացուցիչն է Հայաստանում: Դրանց շարքում են նաեւ Նիժնի Նովգորոդի «Վոլգա» եւ Տոլյատիի «Լադա» ավտոգործարանները: Այս հանգամանքը կարող էր եւ էական չհամարվել, սակայն, «Արմենիա-Լադային» մոտ կանգնած մեր աղբյուրները պնդում են, թե իրենց ընկերությունը վերջերս լուրջ կոնֆլիկտներ ունի նույն ոլորտում բիզնես ծավալող «Արարատ-Լադա» ընկերության հետ: Այս ընկերության հիմնական բաժնետերերից մեկը ՀՀ կապի եւ տրանսպորտի նախարար Անդրանիկ Մանուկյանն է, եւ մեր աղբյուրների պնդմամբ՝ «Արմենիա-Լադա»-«Արարատ-Լադա» հակասությունները վերաճած են եղել Ռաֆայել Շահմուրադյան-Անդրանիկ Մանուկյան հակասությունների:  Նույն աղբյուրների պնդմամբ՝ վերջերս ՀՀ կապի եւ տրանսպորտի նախարարությունը որոշակի խոչընդոտներ է հարուցել Շահմուրադյանի ղեկավարած ընկերության համար:

Այս ամենը, սակայն, մեծ հաշվով դեռ ոչինչ չի նշանակում: Մեր տեղեկություններով, սակայն, սա իրավապահ մարմինների կողմից քննվող վարկածներից մեկն է: ՀՀ կապի եւ տրանսպորտի նախարար Անդրանիկ Մանուկյանն այս օրերին գտնվում է Ռումինիայում եւ այնտեղ մասնակցում է Տրանսպորտի նախարարների եվրոպական կոնֆերանսի նիստին: Երեկ մեր հեռախոսազրույցում Մանուկյանն ասաց, որ երեկ է լսել Շահմուրադյանի դեմ տեղի ունեցած մահափորձի մասին: Մեր հարցին ի պատասխան՝ պարոն Մանուկյանը ասաց, որ Ռաֆայել Շահմուրադյանի հետ որեւէ կոնֆլիկտ եւ հակասություն չի ունեցել: Սակայն, երբ մենք մատնանշեցինք մեզ հայտնի դարձած մեկ-երկու փաստ, նա ասաց, որ դրանք ընդամենը աշխատանքային խնդիրներ են: Իսկ մեր հարցին, թե արդյոք կարո՞ղ ենք ասել, որ ինքը ցավում է տեղի ունեցածի համար, Անդրանիկ Մանուկյանը պատասխանեց, որ ցանկացած մարդու նկատմամբ նման վերաբերմունքն անընդունելի է:

Ա.Կ.