«Անլուրջ» գործ. կանխատեսումներ «Եվրո-2004»-ի վերաբերյալ

Տպագրվել է «Հայկական Ժամանակ» օրաթերթի՝ 2004 թվականի հունիսի 10-ի համարում

Չափազանցություն չի լինի, եթե ասենք, որ այսօր ողջ աշխարհը միավորող ամենահզոր «գաղափարը» ֆուտբոլն է: Աշխարհն այսօր ապրում է ֆուտբոլի Եվրոպայի առաջնությամբ, որը մեկնարկելու է շաբաթ օրը: Այդ օրվան սպասում են բոլոր ֆուտբոլասերները՝ անկախ տարիքից, ազգությունից, սեռից, դավանանքից, քաղաքական հայացքներից, զբաղեցրած պաշտոնից: Մենք էլ այդ աշխարհի մի մասնիկն ենք եւ նույն անհամբերությամբ ու հուզմունքով սպասում ենք այդ մեծ տոնին: Հիմա տեսնենք, թե ինչ կանխատեսումներ են անում մեր քաղաքական գործիչներն ու պաշտոնյաները, ում են երկրպագում, որ թիմերն են հասնելու եզրափակիչ, ով է հաղթելու եւ ինչ հաշվով:

Ռոբերտ Քոչարյանն առայժմ ձեռնպահ է մնում կանխատեսումներ անելուց: Նրա մամուլի խոսնակ Աշոտ Քոչարյանն այլ մանրամասներ չհայտնեց. փոխարենը ներկայացրեց իր հստակ կանխատեսումը՝ եզրափակիչում կխաղան Հոլանդիայի եւ Ֆրանսիայի հավաքականները, Հոլանդիան կհաղթի 2:1 հաշվով: 

ԱԺ նախագահ Արթուր Բաղդասարյանը վստահ է, որ հաղթելու է ուժեղագույնը: Սա, իհարկե, կարելի էր համարել ստանդարտ պատասխան, եթե նա չմասնավորեցներ, որ այդ ուժեղագույնը պարզվելու է, երբ եզրափակիչում մրցեն Անգլիայի եւ Հոլանդիայի հավաքականները:

ԱԺ փոխնախագահ Վահան Հովհաննիսյանը, պարզվեց, ընդհանրապես չի հետաքրքրվում ֆուտբոլով:

Իսկ մյուս փոխնախագահ Տիգրան Թորոսյանի պարագայում՝ խնդիրը մի քիչ բարդանում է: Նրա մեջ միավորվում են «տեխնարը», ֆուտբոլասերը եւ հայրենասերը: «Քանի որ ես ինժեներական կրթություն ունեմ, պետք է մի քիչ հիմքեր լինեն, որպեսզի կանխատեսումներ անեմ»,-մեր հարցին ի պատասխան ասաց Տ.Թորոսյանը: Իսկ  ցանկությո՞ւն: «Ցանկությունը մեկը պետք է լիներ, որ Հայաստանի հավաքականը խաղար, բայց ցավոք սրտի...»,-ասաց նա:

ՀՀ վարչապետ Անդրանիկ Մարգարյանը կանխատեսում անելուց առաջ նախ ճշտեց, թե որոնք են, մեր կարծիքով, ամենաուժեղ հինգ հավաքականները, ապա՝ հայտնեց իր կարծիքը. «Իմ համակրանքը միշտ եղել է Ֆրանսիայի կամ Իտալիայի կողմը: Նրանցից մեկը կխաղա հավանաբար Գերմանիայի հետ եւ կհաղթի 2:0 հաշվով»:

Պնախարար Սերժ Սարգսյանը հայտնի է նրանով, որ ֆուտբոլի հարցում անում է անթերի կանխատեսումներ եւ մի անգամ նույնիսկ ստացել է մեր թերթի սահմանած մրցանակը: «Գոնե մի քանի խաղ խաղան, հետո կանխատեսում անեմ: Կլինի՞»,-կանխատեսում անելու մեր խնդրանքին ի պատասխան հարցրեց Ս.Սարգսյանը: Իհարկե՝ կլինի: Բայց որեւէ կանխատեսում Պնախարարից «չպոկելը» մեր ընթերցողները ճիշտ չէին հասկանա: Եւ պրն Սարգսյանը կանխատեսեց. «Կուզենայի, որ եզրափակիչում լինի 3:1 հաշիվ: Ինձ համար դա էական է»: Սա որպես ցանկություն կարող է հնչել, բայց հաշվի առնելով, որ Սերժ Սարգսյանի ցանկություններն ու կանխատեսումները մեծ մասամբ համընկնում են, կարելի է պնդել, որ դա հենց կանխատեսում է: Բայց թե ինչու է դա Պնախարարի համար այդքան էական՝ չհասկացվեց: Համենայնդեպս, քաղաքական ուժերին կառաջարկեինք Ս.Սարգսյանի կանխատեսման այդ հատվածն անուշադրության չմատնել. գուցե նա ինչ-որ բան ակնարկեց:   

Նախարարներից ամենամոլի ֆոտբոլասերը, թերեւս, առեւտրի եւ տնտեսական զարգացման նախարար Կարեն Ճշմարիտյանն է: Նրա կարծիքով՝ Չեխիայի հավաքականը շատ ուժեղ է եւ լավ թիմ է, բայց՝ կասկածում է, որ դուրս կգա եզրափակիչ: Ինչ վերաբերում է կանխատեսումներին, ապա, ըստ Կ.Ճշմարիտյանի, եզրափակիչում կխաղան Գերմանիան ու Անգլիան, եւ կհաղթի վերջինս՝ 1:2 հաշվով: 

Գերմանիայի՝ եզրափակիչ դուրս գալը կանխատեսեց նաեւ ՀՀ ֆինանսների նախարար Վարդան Խաչատրյանը: Նա, սակայն, ավանդաբար երկրպագում է Ֆրանսիայի հավաքականին: Իսկ կանխատեսումը հետեւյալն է՝ եզրափակիչում կխաղան Գերմանիան ու Ֆրանսիան, եւ վերջինս էլ կհաղթի 1:2 հաշվով: 

Էներգետիկայի նախարար Արմեն Մովսիսյանն առանձնապես ֆուտբոլով չի հետաքրքրվում, բայց որոշեց կանխատեսել, որ եզրափակիչ դուրս կգան Անգլիայի եւ Չեխիայի հավաքականները, եւ Անգլիան 2:1 հաշվով կհաղթի:

Առողջապահության նախարար Նորայր Դավիդյանը կանխատեսեց, որ եզրափակիչում Հոլանդիան 2:0 հաշվով հաղթելու է Պորտուգալիային:

Արտգործնախարար Վարդան Օսկանյանի կարծիքը մեզ չհաջողվեց ստանալ. փոխարենն ունենք փոխնախարար Ռուբեն Շուգարյանի եւ ԱԳՆ մամուլի խոսնակ Համլետ Գասպարյանի կանխատեսումները: «Մի քիչ տարօրինակ կթվա, բայց եզրափակիչում կխաղան Շվեդիան ու Ֆրանսիան, եւ Ֆրանսիան կհաղթի 2:1»,-իր կարծիքով տարօրինակ կանխատեսում արեց Ռ.Շուգարյանը:

Հ.Գասպարյանն էլ է համոզված, որ 2:1 հաշվով Ֆրանսիան է հաղթելու, բայց հաղթելու է Իսպանիային:

Նույն արդյունքը կանխատեսեց գյուղնախարար Դավիթ Լոքյանը: Բայց իր կանխատեսմամբ նա գերազանցեց բոլորին. կանխատեսումը մեջբերենք բառացի՝ առանց կրճատումների. «Որոշել եմ այդ օրերին քիչ գործի գնամ: Ես շատ կուզենայի, որ եզրափակիչում խաղան Իսպանիան ու Ֆրանսիան, եւ հաղթեր Ֆրանսիան՝ 2:1 հաշվով: Մի գոլը Զիդանը խփեր, այն կողմից (Իսպանիայի-խմբ.)՝ Սոլարին, մյուս գոլը խփեր Անրին: Սա եւ ցանկություն է, եւ կանխատեսում»:

Ճիշտ նույն կանխատեսումը արեց նաեւ սոցապ հիմնադրամի նախագահ Ֆրունզե Մուշեղյանը:

Տարածքային կառավարման նախարար Հովիկ Աբրահամյանը նախապատվությունը տվեց Իտալիային, որը եզրափակիչում 2:1 հաշվով հաղթելու է Անգլիայի հավաքականին:

Արդարադատության նախարար Դավիթ Հարությունյանն ընդհանրապես տեղյակ չէր, կառավարության աշխատակազմի ղեկավար նախարար Մանուկ Թոփուզյանն առհասարակ չի հետաքրքրվում ֆուտբոլով: Նույն վերաբերմունքն ունի նաեւ բնապահպանության նախարար Վարդան Այվազյանը, որը կանխատեսումներ անելու մեր խնդրանքին ի պատասխան՝ խորհուրդ տվեց զբաղվել «լուրջ գործով»:

Մեր անլուրջ գործը շարունակելով՝ հասանք մշակույթի նախարար Հովիկ Հովեյանին: «Ինձ դա չի հետաքրքրում: Հարցրեք, թե ով ինչ գիրք է տպել, Էն ժամանակ Մարադոնան էր խաղում, ես սպորտային հետաքրքրություններ չունեմ: Ես լավ ձի եմ քշում, հարցրեք «Այրուձիում» քանի ձի կա, որն է քուռակ բերել: Ձիասպորտն ա Հայաստանինը: Մնացածը սիկտիրչի բաներ են: Այ, հենց ըտենց էլ կգրես»,- բորբոքվեց նորանշանակ նախարարը: Ըտենց էլ գրում ենք, բայց Հ.Հովեյանը, թերեւս, չիմանա, թե ոնց գրեցինք, որովհետեւ նա, ինչպես ինքը հայտարարեց, «Հայկական ժամանակ» չի կարդում:

Իսկ քաղաքաշինության ավելի նորանշանակ նախարար Արամ Հարությունյանը միայն մի ցանկություն հայտնեց. «Ցանկանում եմ, որ Ռուսաստանը հաջողության ունենա»: Բայց ռուսներն այս դեպքում էլ են քաշելու մերոնց՝ ի դեմս նախորդ օրն այդ պաշտոնում նշանակված Ա.Հարությունյանի:

Կրթության նախարար Սերգո Երիցյանն այս օրերին Մոսկվայում է, այդուհանդերձ՝ ներկայացրեց իր կանխատեսումը. «2:0 հաշվով Ֆրանսիան կհաղթի հարեւան երկրներից որեւէ մեկին»:

Հանրապետական խմբակցության ղեկավար Գալուստ Սահակյանն էլ Ֆրանսիայում է: Գուցե սա է պատճառը, որ խմբակցության քարտուղար Գագիկ Մելիքյանին ստիպել է կանխատեսել, որ չեմպիոն դառնալու է Ֆրանսիայի հավաքականը, որը եզրափակիչում 2:0 հաշվով պարտության է մատնելու Իսպանիային:

Ամենաօրիգինալը, բնականաբար, ՄԱԿ խմբակցության ղեկավար Գուրգեն Արսենյանի կանխատեսումն էր: «Եզրափակիչ չի լինելու»,-կարճ կտրեց նա՝ մեր հարցին ի պատասխան:

Իր ղեկավարի նման կարծիքից անտեղյակ լինելն էր թերեւս պատճառը, որ ՄԱԿ-ի քարտուղար Գրիգոր Ղոնջեյանը կանխատեսեց՝ «Հոլանդիա-Պորտուգալիա՝ 2:1»:

«Մեծագույն ցավով պետք է արձանագրեմ, որ խորությամբ չեմ հետաքրքրվում ֆուտբոլով եւ որեւէ կանխատեսում չեմ կարող անել: Բայց ինչքան ես լսել եմ իմ ընկերներից, որոնք զբաղվում են, պետք է որ Պորտուգալիան կրի»,- ասաց ընկերվարական սկզբունքներին հավատարիմ, ՀՅԴ խմբակցության ղեկավար Լեւոն Մկրտչյանը:

Արշակ Սադոյանը խոստովանեց, որ այնքան էլ մեծ գիտակ չէ ֆուտբոլի հարցերում, բայց կցանկանար, որ եզրափակիչ դուրս գա Իտալիան կամ Իսպանիան, որովհետեւ չի սիրում գերմանական ֆուտբոլը: Հավանաբար, Սադոյանի կարծիքով, եզրափակիչ դուրս կգա նաեւ Ֆրանսիան: Ինքը շատ է սիրում Անգլիայի հավաքականը, այդուհանդերձ, հույս չունի, որ այս անգամ իր սիրած թիմն իրեն լավ կդրսեւորի: Այլ կանխատեսումներ Ա.Սադոյանը չարեց:  

Գրիգոր Հարությունյանն ավելի կոնկրետ կանխատեսում ունի. «Լավագույն թիմերն են՝ Ֆրանսիան, Հոլանդիան, Իսպանիան: Եզրափակիչում կլինեն Ֆրանսիան եւ, կարծում եմ, Իսպանիան: Հաշիվը 3:2՝ հօգուտ Ֆրանսիայի»:

Հայտնի ֆուտբոլասեր է Վիկտոր Դալլաքյանը: Եւ նա կխախտեր ավանդույթը, եթե մեր հարցին ի պատասխան մի հետաքրքիր պատմություն չհիշեր. «Ես սիրում եմ հոլանդական ֆուտբոլը՝ Կրոյֆի թիմին, այսինքն՝ դա տոտալ ֆուտբոլն է, որի նման ֆուտբոլ ես չեմ տեսել եւ համոզված եմ, որ չեմ տեսնի: Մի լավ պատմություն պատմեմ՝ կգրե՞ս: Նոր դարի պատմության քննության ժամանակ ինձ ընկել էր Նիդեռլանդական հեղափոխությունը: Ուրեմն, դասախոսը մահացել է, օղորմի իրան, ինձ հարցրեց, թե ովքեր են Նիդեռլանդական հեղափոխության առաջնորդները: Ես էլ մոռացել էի, սկսեցի թվարկել 71-72 թվերի Հոլանդիայի հավաքականի կազմը՝ Կրոյֆ, Կրոլ, Նեսկենս, Վան Հենիկեն, Ռիսբերգեր, Ռեպ եւ այլն. անգիր գիտեմ մինչեւ հիմա: Դասախոսն ասեց. «Այ տղա, ճիշտ ես ասում, բայց դրանք երկրորդական գործիչներն են»: Ինքն էլ չգիտեր էլի...»,-պարզաբանեց Վ.Դալլաքյանը: Ինչ վերաբերում է կանխատեսմանը, ապա եզրափակիչ են դուրս գալու Ֆրանսիան ու Պորտուգալիան, եւ ըստ Դալլաքյանի՝  2:1 հաշվով հաղթելու է Ֆրանսիայի հավաքականը:

Մանուկ Գասպարյանն էլ այնքան պասիվ ֆուտբոլասեր չէ եւ ունի կանխատեսումներ: Սակայն նա վատ վիճակի մեջ է հայտնվել: Դեռ մի քանի ամիս առաջ հրապարակավ կանխատեսել է, որ չեմպիոն է դառնալու Իտալիան, որը 2:0 հաշվով եզրափակիչում հաղթելու է Պորտուգալիային: Սակայն այս ամիսների ընթացքում թիմերի խաղի մեջ փոփոխություններ են տեղի ունեցել, եւ Մ.Գասպարյանը կանխատեսում է, որ իր կանխատեսումը կարող է եւ չիրականանալ, բայց հավատարիմ է մնում իր կանխատեսմանը: Ահա այսպիսի անկանխատեսելի պատմության մեջ է ընկել Մ.Գասպարյանը:

Նման պատմության մեջ ընկնելու հեռանկարն ակնհայտորեն չի սպառնում Արտաշես Գեղամյանին: «Այն գործում, որում մասնագետ չեմ, կանխատեսումներ չեմ անում»,-մեր հարցերին ի պատասխան ասաց Ա.Գեղամյանը:

Ստեփան Դեմիրճյանը խոստովանեց, որ վերջին տարիներին մի քիչ հեռացել է ֆուտբոլից, բայց ժամանակին շատ էր սիրում Գերմանիայի հավաքականի խաղը:

Այս կանխատեսումները, ցանկություններն ամփոփենք ՀՀ ֆուտբոլի ֆեդերացիայի նախագահ Ռուբեն Հայրապետյանի տեսակետներով: Ըստ նրա՝ լավագույն հավաքականներն են Իտալիան, Իսպանիան, Ֆրանսիան եւ Պորտուգալիան: Որեւէ կանխատեսումներ անելու տարբերակը Ռուբեն Հայրապետյանը բացառում է: Մի խոսքով, Հայաստանում, ինչպես ողջ աշխարհում, ոմանք սիրում են ֆուտբոլ, ոմանք չեն հետաքրքրվում, ոմանք լուրջ չեն համարում, ոմանք կարծում են, որ ձիասպորտն է ապագան: Բայց միանշանակ է, որ մի քանի օրից սկսվող առաջնությունը յուրահատուկ ռիթմ է հաղորդելու մեր կենցաղին:

Հայկ Գեւորգյան