Իրար ստուգում են. ոլորտների վերաբաշխում ԿԳՆ-ում

Տպագրվել է «Հայկական Ժամանակ» օրաթերթի՝ 2004 թվականի հունիսի 30-ի համարում

Նախագահի վերահսկողական ծառայությունը, որ դպրոցական մեդալի քննությունների ընթացքում բարձրացրած աղմուկից հետո այդպես էլ ոչ մի կոնկրետ փաստ չհրապարակեց այդքան շեփորած խախտումների մասին, այժմ էլ ստուգումներ է սկսել կրթության եւ գիտության նախարարությունում: Արդեն մի քանի օր է՝ նախագահի վերահսկողական ծառայության աշխատակից Ալբերտ Ֆրանգուլյանը, որն, ի դեպ, մեդալի քննությունների ընթացքում բարձրացված աղմուկի ժամանակ գլխավոր դերակատարն էր, գրեթե դուրս չի գալիս ԿԳՆ-ից: Թե այժմ ինչ է ստուգում վերահսկողականը, պարոն Ֆրանգուլյանը հրաժարվեց պատասխանել (թեեւ մեր տեղեկություններով՝ հիմա էլ ստուգվում են միջպետական պայմանագրերով արտասահման սովորելու մեկնող ուսանողների գործերը):

Իսկ մինչ նույն Ֆրանգուլյանը ԿԳՆ գործերն է ստուգում, կրթության նախարարության աշխատակիցները նախօրեին հրաժեշտ էին տալիս նրա միջոցով մեդալի քննությունների շուրջ նախագահականի սարքած ինտրիգի հետեւանքով պաշտոնանկ արված ԿԳ փոխնախարար Աիդա Թոփուզյանին: Եւ ԿԳՆ աշխատակիցները, որոնց մի մասն ուշադիր հետեւում է, թե այս անգամ նախագահի վերահսկողականի ստուգումներն ինչ ելք են ունենալու, դրան զուգահեռ քննարկում են նաեւ տիկին Թոփուզյանի ոլորտի՝ հանրակրթության վերաբաշխման հնարավոր տարբերակները: Այս ոլորտում գոնե առաջիկայում նոր փոխնախարարի նշանակում չի սպասվում, եւ բնականաբար՝ դա պետք է վերաբաշխվի գործող երեք  փոխնախարարների միջեւ:

Ըստ կուլիսային խոսակցությունների՝ ամենայն հավանականությամբ, մինչ այժմ տիկին Թոփուզյանի ղեկավարած ոլորտը կառաջարկվի ԿԳ հանրապետական փոխնախարար Արա Ավետիսյանին, որը մինչ այժմ ղեկավարում էր բարձրագույն կրթության եւ գիտության ոլորտները: Կենտրոնական ընտրական հանձնաժողովի նախկին նախագահ Արտակ Սահրադյանի ԿԳ փոխնախարար նշանակվելուց հետո, մոտ մեկ ամիս առաջ գիտության ոլորտը տրվեց Արտակ Սահրադյանին: Եւ քանի որ պարոն Ավետիսյանը բարձրագույն կրթության ոլորտում վերջին շրջանում առանձնապես լծակներ չուներ եւ արդեն 2 տարի է՝ մեկուսացված է անգամ բուհական ընդունելության քննություններից,  նրա ղեկավարած բարձրագույն կրթության ոլորտը նույնպես կտրվի ԿԸՀ նախկին նախագահին:

Փոխարենը գիտության ոլորտն, ըստ քննարկվող տարբերակների, կտրվի դաշնակցական փոխնախարար Մուշեղ Միքայելյանին: Այսպիսով, այս 2 փոխնախարարները եւս այսուհետ զբաղվելու կոնկրետ ոլորտ կունենան: Բանն այն է, որ նրանցից եւ ոչ մեկը մինչ այժմ պաշտոնապես ոչ մի ոլորտ չէր ղեկավարում (ի տարբերություն Թոփուզյանի եւ Ավետիսյանի, մյուս փոխնախարարների դեպքում ոլորտի ղեկավարման համար փաստաթղթային ձեւակերպում մինչ այժմ չկա): Այնպես որ, դաշնակցական Մուշեղ Միքայելյանը, որ փոխնախարար նշանակվելուց ի վեր կրթության նախարարությունում անգործությունից  «շարիկ է գլորում» (սա համակարգչային խաղ է), պաշտոնավարումից ամիսներ անց վերջապես ինչ-որ գործ կունենա անելու:

Իսկ Արտակ Սահրադյանը վերջապես կընկնի իր տարերքի մեջ, եւ հաշվի առնելով ընտրությունների ժամանակ նրա խաղացած դերը՝ կարելի է պատկերացնել, թե ինչ կանի նա կրթության ոլորտի հետ: Ահա այսպես էլ առանց ծրագրերի ու բուն կրթության հետ կապված որոշակի պլանների ԿԳՆ-ում կադրային նշանակումներ են արվում՝ առաջնորդվելով լոկ կուսակցական եւ այլ շահերով, ու թերեւս՝ հենց նաեւ դրանից է, որ կրթությունն այսօր նման ողբալի վիճակում է: 

Ինչ վերաբերում է Աիդա Թոփուզյանին, նրան ոչ մի գործ չի առաջարկվել: Իհարկե, խոսակցություններ կային, որ նա պետք է դառնա գիտելիքների գնահատման նոր ստեղծվելիք կենտրոնի տնօրենը, սակայն մեզ հետ ունեցած զրույցի ժամանակ ԿԳ նախարար Սերգո Երիցյանը դա բացառեց՝ ասելով, որ դրա համար նախեւառաջ տեխնիկական կրթություն է պետք ունենալ, ինչն Աիդա Թոփուզյանը չունի: Ի դեպ, կրթության նախարարությունում Թոփուզյանի պաշտոնանկությունն, ըստ էության, անակնկալ էր: Հետաքրքիր է նաեւ, որ չնայած նախագահի վերահսկողականի մեդալի քննությունների շուրջ բարձրացրած աղմուկին, Աիդա Թոփուզյանի ազատման հրամանի մեջ այդպես էլ ոչ մի պատճառ չնշվեց: Իհարկե, իրականում պաշտոնանկության պատճառ էր դարձել խոսակցությունն այն մասին, թե տիկին Թոփուզյանը մեդալի քննության ժամանակ բացահայտ փորձել է օգնել ընդդիմադիր շատ հայտնի գործիչներից մեկի երեխային:

Լուսինե Բարսեղյան