Անշլագ. Ֆրանկեյնշտեյնը կխժռի Քոչարյանին

Տպագրվել է «Հայկական Ժամանակ» օրաթերթի՝ 2004 թվականի հուլիսի 1-ի համարում

Երեկ Կինոյի տանն անշլագ էր. զեկույցով հանդես պիտի գար «Ազգային միաբանություն» կուսակցության նախագահ Արտաշես Գեղամյանը: Զեկույցի թեման էլ պիտի լիներ ԵԽԽՎ ամառային լիագումար նիստում Ռոբերտ Քոչարյանի ելույթը: Սակայն, դահլիճում եւ դահլիճի մատույցներից դուրս հավաքված ժողովուրդը տեւական ժամանակ չէր թողնում, որ Արտաշես Մամիկոնովիչը քաղաքականապես մերկացնի Ռոբերտ Քոչարյանի ելույթը: «Մեր փրկիչ, մեր պատվախնդրություն, մեր խիղճ, թագավոր ախպեր, հուպ տուր»,- գոռում էին գեղամյանականները: Ինչեւէ, հոտընկայս օվացիաներից հետո դահլիճը վերջապես թույլ տվեց, որ Արտաշես Գեղամյանը խոսի: Պարզվեց, «ԱՄ» նախագահը, նախ, մտադիր է եղել Քոչարյանի ելույթից հետո առաջինը մոտենալ նրան, ձեռքը սեղմել եւ շնորհակալություն հայտնել համաեվրոպական արժեքային համակարգին դավանող ելույթի համար, սակայն, ավա՜ղ, դա չի կարողացել անել, քանզի Ռոբերտ Քոչարյանը Ստրասբուրգի բարձր ամբիոնից խոսել է ընդամենը որպես  դաշտային հրամանատար:

Այս նախաբանից հետո «Ազգային միաբանության» նախագահը նախանձով հիշեց նույն ամբիոնից Վրաստանի եւ Ադրբեջանի նախագահների ունեցած ծրագրային, երկրի տեսլականը մինչեւ 2020 թվականը գծագրող ելույթների մասին ու ամոթանք տվեց Քոչարյանին, որ վերջինս, նախանձից ելնելով, ԵԽԽՎ ամբիոնից ծաղրուծանակի է ենթարկել Վրաստանի տնտեսությունը: «Քոսին տնազ անողը գոնե պետք է փարթամ մորուք ունենա»,-դիմելով Քոչարյանին՝ ասաց «ԱՄ» նախագահը: Այնուհետեւ, Արտաշես Մամինոկովիչը փառք ու պատիվ տվեց վրաց ոստիկաններին, որոնք իրենց հարազատ ժողովրդի վրա ձեռք չբարձրացրին: Գեղամյանի այս  խոսքերից հետո Կինոյի տանն ակնհայտորեն ստեղծվեց պրովրացական տրամադրություն, ու ամեն անգամ Վրաստանի նախագահի կամ վրաց ոստիկանության անունը լսելիս՝ դահլիճը թնդում էր որոտընդոստ ծափահարություններից:

Այսքանով ավարտելով հարավկովկասյան  հանրապետությունների նախագահների համեմատական բնութագիրը՝ «ԱՄ» նախագահը հիմնականում ծանրացավ Քոչարյանի ելույթի այն հատվածի վրա, որը վերաբերում էր կոռուպցիայի դեմ պայքարին: Կոռուպցիայի մասին խոսելիս էլ Գեղամյանը կենտրոնացավ բացառապես Պնախարար Սերժ Սարգսյանի վրա: «Էդ որ «փալաքալ» եմ ասում, թասիբներիդ կպնում է, ու դատի եք տալիս:  Կաշառակերության քավոր եմ ասում՝ բա՛ դատի տուր: Կամ, վերջապես ե՞րբ եք դատի տալու այն թերթին, որը ձեզ հրապարակավ ղումարբազ անվանեց: Դատի տվեք, որ մենք էլ, ձեզ հետ միասին, ձեր ճակատից մաքրենք ղումարբազի խարանը: Ե՞րբ եք դատի տալու «Հայ աշխատավորական միությանը» եւ ՀՅԴ-ին, որոնք եւս ձեզ համարում են կոռուպցիայի կնքահայրը:

Բա թասիբդ պահի, Գեղամյանի՞ց ուր ես կախվել»,- դիմելով Սերժ Սարգսյանին՝ հարցրեց Արտաշես Գեղամյանը: Սերժ Սարգսյանով ավարտելով Քոչարյանի ելույթի կոռուպցիայի դեմ պայքարի հատվածը՝ «ԱՄ» նախագահը մերկացրեց նաեւ  ԵԽԽՎ ամբիոնից հնչած այն սուտը, թե ապրիլի 12-ի լույս 13-ի գիշերը ոստիկաններն ընդամենը խցանված փողոցն են բացել: «Գիշերվա ժամը 2-ին էդ ո՞րդ էիք աշխատում. եթե, իհարկե, չհաշվենք որոշ նախարարների, որ այդ ժամին կազինոներում քրտնաջան ղումար են խաղում»,- հարցնում է Արտաշես Գեղամյանը: Ահա այսպես, դրվագ առ դրվագ մերկացնելով Քոչարյանի ելույթը, «ԱՄ» նախագահը հայտարարեց. «Պարոն Քոչարյան, Ստրասբուրգի ձեր ելույթով՝ հանկարծ չկարծեք, թե ստվեր գցեցիք ընդդիմության վրա. ընդդիմությունը կա, ընդդիմությունը  կլինի, եւ հաղթանակը մերն է: Իսկ ձեզ, Ֆրանկեյնշտեյնի պես, խժռելու է ձեր իսկ ստեղծած համակարգը»,- Ռոբերտ Քոչարյանին զգուշացրեց «Ազգային միաբանության» նախագահը: Ամենավերջում Արտաշես Մամիկոնովիչը տեղեկացրեց, որ լուրեր են տարածում, թե իրեն սպանելու համար քիլերներ են վարձել: Իշխանությունների հերթական այս սանձարձակությանը «ԱՄ» նախագահը նախընտրեց պատասխանել Համո Սահյանի տողերով. «Հայաստան ասելիս աշխարհը իմ տունն է/ Հայաստան ասելիս էլ մահը ո՞ւմ շունն է»:

Այսպիսով, երեկ Կինոյի տանը Արտաշես Գեղամյանի ծրագրային ելույթն առանձնապես չէր տարբերվում նրա նախկին բոլոր ելույթներից: Թերեւս, միակ տարբերությունն այն էր, որ այս էլ երկրորդ անգամ Արտաշես Գեղամյանը հանդես եկավ ոչ թե մեր դարավոր բարեկամ Ռուսաստանի, այլ ԱՄՆ-ի ջատագով: «ԱՄՆ-ը պետք է լինի ժողովրդավարության այն շտեմարանը, ում պետք է հետեւենք եւ ում օգնությունը պետք է ակնկալենք»,- ասաց Արտաշես Գեղամյանն ու իրավապահ մարմինների ուշադրությունը հրավիրեց «Չորրորդ իշխանություն» թերթի այն հրապարակման վրա, ուր նշված էր, որ Հայաստանում ՌԴ դեսպանն աշխատավարձ է ստանում Սերժ Սարգսյանից: «ԱՄ» նախագահը հիշեց նաեւ, որ ապրիլի 12-ի գիշերն իրեն ու ընդդիմության մյուս ներկայացուցիչներին անձամբ զանգահարել է Հայաստանում ԱՄՆ դեսպան Ջոն Օրդուեյն ու առաջարկել իր օգնությունը: «Նա մանրամասն հետաքրքրվեց, թե ինձ հետ ինչ է պատահել, եւ ես արդյո՞ք բժշկական կամ այլ կարգի օգնության կարիք ունեմ, ու պատրաստակամություն հայտնեց անմիջապես իմ ետեւից մեքենա ուղարկել: Դեսպանը նաեւ բարեկամաբար նշեց ընդդիմության թույլ տված սխալները, որոնք ես հարգանքով լսեցի»,-  հիշեց «Ազգային միաբանության» առաջնորդ Արտաշես Գեղամյանը:

Նաիրա Զոհրաբյան