Բլե՞ֆ. 30 օր՝ գործուն զղջալու համար

Տպագրվել է «Հայկական Ժամանակ» օրաթերթի՝ 2004 թվականի հուլիսի 8-ի համարում

Երեկ ԱԺ քարտուղարությունն ԱԺ պետաիրավական հարցերի մշտական հանձնաժողովին է ուղարկել գարնանային նստաշրջանի ընթացքում քվեարկությունների կեսից ավելիից անհարգելի բացակայած պատգամավորների ցուցակը: Գարնանային նստաշրջանում տեղի է ունեցել  292 քվեարկություն, որոնցից ուղիղ 292-ից անհարգելի բացակայել են «Արդարություն» եւ «Ազգային միաբանություն» խմբակցությունների 24 պատգամավորները: ԱԺ քարտուղարությունն անհարգելի է համարել նաեւ  ՀՅԴ անդամ Ալվարդ Պետրոսյանի եւ «Ժողպատգամավոր» խմբի անդամ Լեւոն Սարգսյանի բացակայությունները: Սակայն անհարգելի բացակայած Ալվարդ Պետրոսյանը պետաիրավական հարցերի հանձնաժողովին բժշկական տեղեկանք է ներկայացրել, իսկ Լեւոն Սարգսյանը դիմել է ԱԺ նախագահին եւ խնդրել` իր բացակայությունները համարել հարգելի, որովհետեւ հիվանդ է եղել:

Արթուր Բաղդասարյանը Լեւոն Սարգսյանի բոլոր հիվանդությունները համարել է հարգելի: Ընդդիմադիր 24 պատգամավորները ո՛չ ԱԺ նախագահին են խնդրել եւ ո՛չ էլ պետաիրավական հարցերի հանձնաժողովին են որեւէ տեղեկանք ներկայացրել՝ իրենց բացակայությունները հարգելի համարելու համար: «Արդարություն» դաշինքից եւ «Ազգային միաբանությունից» ճշտեցինք, որ նրանք առաջիկայում եւս չեն պատրաստվում բյուլետեն բերել կամ խնդրագիր ներկայացնել խորհրդարանին: Իսկ այդ դեպքում, ըստ ԱԺ պետաիրավական հարցերի մշտական հանձնաժողովի նախագահ Ռաֆիկ Պետրոսյանի, իր գլխավորած հանձնաժողովը, որը, համաձայն ԱԺ կանոնակարգի, պարտավոր է քննարկել անհարգելի բացայակած 24-ի հարցը, միայն մեկ որոշում կարող է կայացնել.

«Ես տեղեկացնում եմ, որ պետաիրավական հարցերի հանձնաժողովը նրանց բացակայությունները համարելու է անհարգելի: Իսկ եթե խորհրդարանում կկայացվի այլ քաղաքական որոշում, ապա թող պատգամավորներն արդեն փակ-գաղտնի քվեարկությամբ նրանց բացակայությունները համարեն հարգելի: Նրանց հարցը ԱԺ աշնանային նստաշրջանի հենց առաջին նիստում դրվելու է փակ-գաղտնի քվեարկության»,- ասում է Ռաֆիկ Պետրոսյանը: Ավելին, ԱԺ պետաիրավական հարցերի մշտական հանձնաժողովի նախագահը նաեւ այն կարծիքին է, որ մեր ընդդիմադիրները ոչ միայն անհարգելի բացակայողներ են, այլեւ՝ ընդհանրապես խիղճ չունեն. «Ստացվում է, որ այնտեղ, որտեղ իրենց պետք է՝ իրենք չեն բոյկոտում. բոլորը մեկ մարդու պես իրենց աշխատավարձը ստանում են, պետության հաշվին մեծ ուրախությամբ բոլոր գործուղումներին գնում են, իսկ խորհրդարանում աշխատել չեն ուզում:

Մինչդեռ բազմաթիվ երկրների խորհրդարաններում այն պատգամավորները, ովքեր չեն մասնակցել խորհրդարանի աշխատանքներին, զրկվում են աշխատավարձից: Ու եթե մեր ընդդիմադիրները խիղճ ունեին՝ պետք է հրաժարվեին աշխատավարձից: Այլապես ստացվում է, որ չորս տարի կարող են ոչինչ չանել, իրենց համար պտտվել փողոցներում եւ ստանալ պետության փողերը: Այսօր արդեն բանը հասել է այնտեղ, որ մեզ վրա հարձակվում են լրագրողներն ու ժողովուրդը, թե ինչի համար նրանք պետք է աշխատավարձ ստանան: Բոլոր դեպքերում հասարակական եւ պաշտոնական ճնշում կա, թե հանուն ինչի նրանք պետք է պահպանեն իրենց մանդատները»,- մեզ հետ զրույցում երեկ ասաց ԱԺ պետաիրավական հարցերի մշտական հանձնաժողովի նախագահը:

Այսպիսով, սեպտեմբերի 13-ին մեկնարկող ԱԺ աշնանային նստաշրջանի հենց առաջին նիստում պատգամավորները փակ-գաղտնի քվեարկությամբ պետք  որոշեն ընդդիմադիր 24 պատգամավորներին մանդատից զրկել-չզրկելու հարցը: Եթե մինչ այդ ընդդիմությունը կոալիցիայի հետ նստի բանակցությունների, եւ քաղաքական համաձայնությունը կայացվի, ապա կոալիցիայի պատգամավորները փակ, գաղտնի քվեարկությամբ իրենց ընդդիմադիր գործընկերների բացակայությունները կհամարեն հարգելի, ու վերջիններս  կպահպանեն իրենց մանդատները: Եթե՝ ոչ, ապա սեպտեմբերի 14-ից արդեն ԱԺ-ում մենք չենք ունենա ընդդիմություն: Ի դեպ, եթե կոալիցիա-ընդդիմություն քաղաքական համաձայնությունը կայացվի, ապա ընդդիմության բացակայությունները հարգելի կհամարվեն միայն այն պայմանով, որ նրանք վերադառնան խորհրդարան:

Այդուհանդերձ, խորհրդարանական ընդդիմությունը կոալիցիայի հետ որեւէ հարցի շուրջ բանակցել չի պատրաստվում: «Հանրապետություն» կուսակցության առաջնորդ Արամ Սարգսյանն արդեն իսկ տեղեկացրել է, որ իրենց երեք պատգամավորները սեպտեմբերին խորհրդարան չեն գնա, ՀԺԿ լրատվական ծառայության ղեկավար Ռուզան Խաչատրյանը երեկ փոխանցեց, որ ԱԺ-ի աշխատանքները բոյկոտելու մասին «Արդարություն» դաշինքի կայացրած որոշումը մնում է ուժի մեջ, իսկ «Ազգային միաբանության» փոխնախագահ Ալեքսան Կարապետյանը նշեց, որ խորհրդարան վերադառնալ-չվերադառնալու լուրջ հարցն իրենց կուսակցությունը դեռ չի քննարկել: Իսկ ԱԺ պետաիրավական հարցերի մշտական հանձնաժողովի նախագահը զգուշացնում է, որ ընդդիմությունը մտածելու եւ որոշում կայացնելու համար ունի ընդամենը մեկ ամիս ժամանակ: Ի դեպ, այդ զգուշացումը պետաիրավական հանձնաժողովը պաշտոնական նամակով ուղարկել է բոլոր 24 պատգամավորների տան հասցեներով: Ինչպես նկատեց կոալիցիոն մի պատգամավոր՝ ընդդիմությանը 30 օր ենք տվել՝ գործուն զղջալու համար: Այսուհանդերձ, շատերն այն կարծիքին են, որ խորհրդարանական մեծամասնությունը որոշել է բլեֆի գնալ ընդդիմությանը սանձելու համար եւ ոչ մի դեպքում չի համարձակվի ընդդիմադիր պատգամավորներին զրկել  մանդատից:

Նաիրա Զոհրաբյան