Պաշտպանը զուտ իր ֆիզիկական ներկայությամբ դատավարությունը զարդարող բուտաֆորիա չէ. Վարոսյան

«Այն ամենն, ինչ կատարվում է «Սասնա ծռեր» խմբի դատավարության ընթացքում, թե՛ դատական նիստերի դահլիճում, թե՛ առհասարակ դատարանի տարածքում առնվազն զարմանալի է»։

Մեր զրույցում նման կարծիք հայտնեց «Սասնա ծռեր» խմբի անդամներ Արայիկ Հակոբյանի եւ Մարտիրոս Հակոբյանի (Դեդ) պաշտպան Երվանդ Վարոսյանը: Վերջինիս նկատմամբ այսօր Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանի կողմից սանկցիա է կիրառվել: Ըստ դատավորի՝ Վարոսյանը անհարգալից վերաբերմունք է դրսեւորել դատարանի նկատմամբ, առանց դատարանի թույլտվության լքել է նիստերի դահլիճը: Այնինչ Վարոսյանը դատարանում հայտարարեց, որ  նիստին առանց իրենց պաշտպանյալների չեն կարող մասնակցել նիստին:

Երվանդ Վարոսյանը մեր զրույցում նշեց, որ ամեն ինչ սկսվեց փաստաբաններին անիմաստ ու անհարկի խուզարկելու փորձերից. «Իրավիճակն այդ առումով հիմա էլ դեռ վերջնական կարգավորված չէ, թեեւ այսօր, օրինակ, առանց խուզարկվելու պահանջի, հանգիստ մտանք դատարան։ Դատական նիստերը, որոնք առհասարակ մինչ օրս ընթացել են, դատական նիստեր չեն իրականում, չպետք է տեղի ունենային, իսկ դրանց ընթացքում տեղի ունեցած գործողություններն էլ առհասարակ քրեական դատավարության հետ առնչություն չունեն այն պարզ պատճառով, որ բոլոր դեպքերում դատավարության ոչ բոլոր մասնակիցներն են ներկա գտնվել դատական նիստերին։ Այդ դատական նիստերը պետք է ավարտվեին նիստերի քարտուղարի զեկուցումից հետո, հետաձգվեին մինչ մասնակիցների ներկայությունն ապահովելը։ Ի վերջո դահլիճում են գտնվել ամբաստանյալներ, որոնց պաշտպանները ներկա չեն եղել, ինչը պաշտպանական իրավունքի կոպիտ խախտում է»,- ասաց փաստաբանը:

Խոսելով դատավորի կողմից կիրառվող անվերջ սանկցիաների մասին, Վարոսյանն ասաց, որ իր մեջ տպավորություն է, որ դատավոր Արտուշ Գաբրիելյանը կամ նրա խորհրդատուները նպատակամղվել են լիովին տապալել դատական գործընթացը։ «Հակառակ պարագայում ինչպես բացատրել խուզարկվելուց հրաժարվող փաստաբանների գործողություններն իբրեւ դատարանի նկատմամբ անհարգալից վերաբերմունք որակելը, կամ առանց պաշտպանների նիստեր իրականացնելը, հայտարարելով, թե «ոչինչ, նրանք դեռ պաշտպան չեն, քանի որ նրանց ներգրավման հարցը դեռ քննարկված չէ», իսկ մյուս` նույնպես «չներգրավված» փաստաբաններից պահանջել մնալ նիստերի դահլիճում, իսկ հեռանալը կրկին դիտարկել իբրեւ փաստաբաններին կարգապահական պատասխանատվության ենթարկելու համար Փաստաբանների պալատ դիմելու հիմք։ Միաժամանակ, բացարձակ անհասկանալի է, թե ինչպես է դատավորը պատկերացնում փաստաբանի մասնակցությունը դատավարությանը պաշտպանյալի բացակայությամբ, չէ՞ որ պաշտպանը զուտ իր ֆիզիկական ներկայությամբ դատավարությունը զարդարող բուտաֆորիա չէ, այլ կոնկրետ անձին իրավաբանական օգնություն ցույց տվող անձ, որի բոլոր գործողությունները մշտապես պետք է առնվազն համաձայնեցվեն իր պաշտպանյալի հետ»: Նրա կարծիքով՝ դատարանի դահլիճից հեռացում սանկցիան ամբաստանյալի նկատմամբ կիրառելիս դատարանը պետք է որ նախատեսի դրա հետեւանքներն այն առումով, որ պաշտպանն այդ դեպքում կարող է եւս լքել դահլիճը։ «Առավել եւս պաշտպանն իրավունք էլ չունի մնալ, երբ նման պահանջ է ստանում իր պաշտպանյալից։ Համոզված եմ նաեւ, որ մի քանի տարի առաջ սանկցիաների նման շքերթի հետ դժվար թե գործ ունենայինք, քանի որ նախաձեռնողները դժվար թե հույս ունենային, թե նման հիմքերով փաստաբանը հնարավոր է պատասխանատվության ենթարկվի, հիմա իրավիճակն այլ է, ու պալատ ուղարկվող որոշումների տարափն այս առումով անակնկալ չէ։ Ինչեւէ, լինելով անուղղելի լավատես, հույս ունեմ, որ Փաստաբանների պալատը դատավոր Արտուշ Գաբրիելյանի հետ գաղտնի հուշագիր չի ստորագրել իր կողմից ներկայացված որոշումների ճակատագրի վերաբերյալ»,- մեր զրույցում ասաց փաստաբան Երվանդ Վարոսյանը:

Հիշեցնենք, որ այսօր սանկցիա է կիրառվել նաեւ փաստաբան Լուսինե Սահակյանի նկատմամբ: Դատարանը խորհրդակցական սենյակից վերադառնալով՝ որոշեց փաստաբաններին պատասխանատվության ենթարկելու հարցով դիմել Փաստաբանների պալատ: