Մարտունակության սինդրոմ. ՌԴ խորքից եկել է նամակ, գնում են բանակ

Տպագրվել է «Հայկական Ժամանակ» օրաթերթի՝ 2004 թվականի հուլիսի 9-ի համարում

Պաշտպանության նախարարությունն, արդեն մի քանի օր է, սկսել է բանակ զորակոչել միջպետական պայմանագրով ռուսաստանյան բուհեր դիմած ասպիրանտներին: Ըստ կրթության եւ գիտության նախարար Սերգո Երիցյանի հաղորդած տվյալների՝ ՊՆ-ն այս մի քանի օրվա ընթացքում արդեն տասը նման տղաների բանակ է տարել: Մենք արդեն տեղեկացրել ենք, որ կրթության նախարարության հայտարարած մրցույթի արդյունքում Ռուսաստանի բուհեր էին ընդունվել 44 ասպիրանտներ: Սակայն տարօրինակ զուգադիպությամբ ԿԳՆ-ում նախագահի վերահսկողական ծառայության իրականացրած ստուգումներից հետո 44 հոգուց բաղկացած այդ ցուցակը, փաստորեն, ընդունելությունից մեկ ամիս անց փոխարինվել էր բոլորովին այլ ցուցակով, ըստ որի՝ արդեն ռուսաստանյան բուհերի ասպիրանտուրաներ սովորելու է ուղարկվելու միայն 15 հոգի՝ նախնական ցուցակում ընդգրկվածները:

ՊՆ-ն փութաջանորեն սկսել է հավաքագրել նախկին ցուցակից դուրս մնացած ասպիրանտներին այն դեպքում, երբ զորահավաքն, արդեն մի քանի օր է, ավարտված է, իսկ տղաները կրթության եւ գիտության նախարարությունից տարկետման իրավունքը հաստատող փաստաթուղթ ունեն: Երեկ մեզ հայտնի դարձավ, որ առաջին ցուցակով ընդունվածների ծնողները, որոնք ավելի քան մեկ ամիս շարունակ վստահ են եղել, որ իրենց երեխաներն ընդունվել են եւ արդեն սեպտեմբերին պետք է մեկնեն Ռուսաստան սովորելու, դիմել են հնարավոր բոլոր ատյաններին՝ սկսած վարչապետից ու նախագահի վերահսկողական ծառայությունից, վերջացրած ՊՆ-ով, ԱԺ-ով ու Հայաստանում Ռուսաստանի դեսպանատնով: Երեկ մեզ հետ զրույցի ժամանակ ծնողները հայտնեցին, որ ՌԴ դեսպանատանն իրենց ասել են, թե ռուսական կողմն այս պատմության հետ ոչ մի առնչություն չունի:

Ավելին, ծնողներին հաջողվել է իրենց ուղիներով հենց Ռուսաստանի կրթության նախարարությունից պարզել, որ իրականում ռուսական կողմը տեղերի ոչ մի կրճատում էլ չի արել, ինչպես դեռ մեկ շաբաթ առաջ մեզ փորձում էր համոզել ԿԳ նախարար Սերգո Երիցյանը: Եւ որպես ասվածի ապացույց՝ ցույց էին տալիս փաստաթղթեր, որտեղ ռուսական բուհերի ռեկտորներն անձամբ են կոնկրետ մարդկանց համար երաշխավորագրեր ուղարկել Հայաստան եւ խնդրել, որ նրանց ուղարկեն սովորելու: Օրինակ, Մոսկվայի ինժեներաֆիզիկական ինստիտուտի ռեկտոր Բ. Օնիկիյը երաշխավորագրեր է ուղարկել մինչ այդ այնտեղ սովորող Վահագն Օհանջանյանի եւ Դավիթ Դավթյանի համար, որտեղ նշում է նրանց գերազանց առաջադիմության մասին: Այս տղաները, սակայն, որոնց մասին հիացմունքով է գրում ՄԻՖԻ-ի ռեկտորը, եւ որոնք ԿԳՆ-ի հայտարարած մրցույթի արդյունքում ընդունվել էին սույն բուհերի ասպիրանտուրաները, այժմ, արդեն մի քանի օր է, գտնվում են բանակում:

Հիշեցնենք, որ դեռ մեկ շաբաթ առաջ Սերգո Երիցյանը մեզ ասել էր, որ նախագահի վերահսկողական ծառայության ստուգումներն այստեղ ոչ մի կապ չունեն, եւ ցուցակը փոխվել է, քանի որ Ռուսաստանն այս տարի ասպիրանտուրայի համար ընդամենը 15 քվոտա է սահմանել: Իսկ 44 հոգու անունները մրցույթից հետո Ռուսաստան են ուղարկվել որպես ասպիրանտուրայի թեկնածուներ: Այնինչ, սրանից դեռ 1,5 ամիս առաջ ԿԳՆ-ն բոլոր 44 ընդունվածներին տվել է հետեւյալ փաստաթուղթը. «Այսինչ Այսինչյանը, միջպետական համաձայնագրի շրջանակներում, ՀՀ ԿԳՆ-ի կողմից գործուղվել է ՌԴ՝ ասպիրանտական կրթություն ստանալու նպատակով: Նրա ուսումը նախատեսված է մինչեւ 2007 թվականը: Համաձայն «Զինապարտության մասին» օրենքի, միջկառավարական համաձայնագրի շրջանակներում ուսման մեկնած ուսանողները օգտվում են տարկետման իրավունքից»: Եւ որքան էլ Սերգո Երիցյանը պնդի, թե նախագահի վերահսկողականը սույն պատմության հետ ոչ մի կապ չունի, ու պատճառը ՌԴ-ի սահմանած քվոտաներն են, հասկանալի է, որ դա ամենեւին էլ այդպես չէ:

Իհարկե, երեկ ծնողները պնդում էին, որ այս ամենի պատճառը, ըստ իրենց հավաստի աղբյուրների, դեռ դպրոցական մեդալի քննությունների ժամանակ արդեն նախկին ԿԳ փոխնախարար Աիդա Թոփուզյանի կողմից ընդդիմադիր գործչի երեխային, իբր, օգնելու փորձն է եղել, որին, իբր, տեղյակ է եղել Սերգո Երիցյանը: Ըստ նրանց՝ նախագահականից այս կերպ, իբր, փորձել են պատժել նաեւ Երիցյանին: Բայց չի բացառվում, որ իրականում այստեղ բոլորովին այլ պատճառներ կան: Երեկ մեզ հաջողվեց ձեռք բերել այն 15 հոգու անունները, ովքեր, ըստ նոր ցուցակի, պետք է մեկնեն ՌԴ: 15 հոգուց միայն 2-ն են աղջիկներ, եւ ակնհայտ է, որ տվյալ պարագայում, բացի այլ պատճառներից, որոնց վերաբերյալ տվյալ պահին կարելի է միայն ենթադրություններ անել, կա նաեւ բանակի խնդիր: Ինչեւէ, այժմ ծնողները որոշել են, բացի դատարան դիմելուց, նաեւ նամակ գրել ՌԴ նախագահ Վլադիմիր Պուտինին:

«Մեզ հետապնդում են որպես հանցագործներ: Մի՞թե այս հանրապետությունում արդարություն չկա»,- երեկ ՀՀ ԿԳ նախարարին էին դիմում վրդովված ծնողները: Նախարարը հայտարարեց, թե ինքը փորձել է խոսել Մոսկվայի հետ եւ հուսով է, որ ծնողների հետ ընդհանուր ուժերով հնարավոր կլինի լուծումներ գտնել: «Բայց այս պարագայում խնդրի հարթությունը մի քիչ փոխվել է, եւ 10 հոգու արդեն տարել են բանակ»,- ասում էր նա: Թե ինչ արդյունքի կհասնեն նրանք, կարծում ենք, ակնհայտ է, քանի որ հարցը շատ վերեւներում արդեն իսկ լուծված է: Ի դեպ, վերահսկողականի «ստուգումներից» հետո նույն պատմությունն է սպասվում նաեւ ՌԴ բուհեր ընդունված մագիստրոսներին:

Լուսինե Բարսեղյան