Մեզ մոտ արտոնյալներ չկան. Հ1-ը պարզաբանում է Մելքոնյանի հետ կապված խնդիրը (տեսանյութ)

Հայաստանի Հանրային հեռուստաընկերության մեկնաբան Քրիստինե Մելքոնյանը աշխատանքից չի ազատվել: Այս մասին armtimes.com-ի հետ զրույցում ասաց Հանրային հեռուստաընկերության լրատվական եւ վերլուծական ծրագրերի տնօրեն Հարություն Հարությունյանը՝ անդրադառնալով մամուլի այն հրապարակումների, որոնց համաձայն՝ Մելքոնյանի համար ոչ նպաստավոր պայմաններ են ստեղծվել, որի հետեւանքով նա աշխատանքից ազատվել է:

Պարոն Հարությունյան, մամուլում գրվել է, որ դուք եւ Արտակ Հերիքյան զույգը չի հանդուրժում պրոֆեսիոնալներին եւ այնպիսի իրավիճակ է ստեղծվել, որ հաղորդավար Քրիստինե Մելքոնյանն ազատվի աշխատանքից: Ինչպես նաեւ, որ նախկինում դուք պահանջել եք, որ Մելքոնյանը դուրս գա դատախազությունից: Խնդրում եմ ասեք՝ նա աշխատանքից ազատման դիմում գրե՞լ է, եթե ոչ, հիմա արձակուրդո՞ւմ է:

-Դիմում ինքը չի գրել: Քրիստինե Մելքոնյանից մինչեւ այս պահը ես նման դիմում չեմ ստացել: Իմ օգնականը փոխանցեց, որ արձակուրդի դիմում էլ չի գրել, Մելքոնյանը փոխանցել է, որ երկուշաբթի կամ երեքշաբթի կգա, կստորագրի արձակուրդ գնալու դիմումը:

Քանի որ հիմա ամառվա սեզոն է, մենք փորձում ենք հնարավորինս շատ բոլորին արձակուրդ ուղարկել, որովհետեւ սեպտեմբերից նորից մեծ թափով պետք է աշխատենք: Կարծում եմ՝ բոլոր խմբագրություններում է նույն  իրավիճակը, բոլորը ձգտում են ամառվա սեզոնին գնալ արձակուրդ: Հետեւաբար՝ ինքն ասել է, որ ուզում է արձակուրդ գնալ, դիմումն էլ նույնիսկ չի տվել, ասել է, որ երկուշաբթի կամ երեքշաբթի կգա, արձակուրդի դիմումը կտա: Կգա, կխոսենք, կհասկանան՝ ինչը ոնց է, այդ ժամանակ պարզ կլինի:

-Իր հետ կապված տարաձայնություններ կա՞ն:

-Ոչ միայն իր հետ կապված, բոլորի հետ կապված կարող են լինել տարաձայնություններ, եթե աշխատանքը թերի է կատարվում, կամ եթե աշխատանքի մեջ որեւէ մեկը զլանում է: Ես կարծում եմ՝ բոլոր խմբագրություններում է այդպես, չի կարող խմբագիրն աչք փակել որեւէ լրագրողի կատարած թերի աշխատանքի վրա, համաձայն չե՞ք: Սա աշխատող օրգանիզմ է, մենք իրար հետ ապրում ենք օրական գրեթե 14 ժամ,  եւ այդ 14 ժամվա ընթացքում ամեն ինչ հնարավոր է լինի: Մենք նրա համար ենք, որ հավաքվենք, քննարկենք թերությունները եւ այնպես անենք, որ հետո այդ թերությունները չկրկնվեն:

-Քրիստինե Մելքոնյանի դեպքում վերջին մեկ ամսվա ընթացքում եղե՞լ են թերացման դեպքեր:

-Ոչ միայն Քրիստինեի, էլի մարդկանց, էլի աշխատակիցներ կան, որոնց դեպքում եղել են թերացումներ, ոչ ամբողջական մոտեցում աշխատանքին: Եղել են քննարկումեր, եղել են դիտողություններ, խնդրանք, պահանջ, որպեսզի գործին մոտենան ամբողջությամբ:

-Քրիստինե Մելքոնյանի դեպքում եղե՞լ են այնպիսի թերացումներ, որոնք կարող են հանգեցնել աշխատանքից ազատման:

-Ես ասացի, որ աշխատաքնից ազատման խնդիր չկա դրված: Եթե նման բան լինի, նաեւ չի բացառվում որ լինի որեւէ մեկի հետ կապված, ինձանից սկսած, Արտակ Հերիքյանով վերջացրած: Կարող է լինել ցանկացածիս հետ կապված: Կա աշխատանքի մասով քննարկում, թերացում եւ այդ թերացման մասով քննարկում, ինքը երեւի մի քիչ վիրավորվել է դրանից, որովհետեւ ինքը մտածել է՝ երեւի իրեն պետք է դիտողություն չանեն: Բայց մեզ մոտ արտոնյալներ չկան: Եթե դուք համարում եք, որ դատախազությունից իր դուրս գալը կամ մնալը քննարկման թեմա չի, ինձ համար դա քննարկման թեմա է, որովհետեւ շահերի բախում գոյություն ունի:

-Այսինքն ճի՞շտ է այն տեղեկությունը, որ ժամանակին պահանջել եք, որ նա ազատվի գլխավոր դատախազի մամուլի խոսնակի աշխատանքից:

-Այո, ճիշտ է: Ես առաջին օրը որ եկել եմ, իրեն խնդրել եմ, ասել եմ՝ ընտրիր կամ հանրայինը, կամ դատախազությունը, որովհետեւ չի կարող հեռուստադիտողը դատախազության մասին լուրը քո շուրթերից լսել եւ հավատա քեզ, որովհետեւ դու մամուլի խոսնակ ես այդ դեպքում, կամ հանրային կապերի վարչության պետ: Նորմա՞լ է դա, թե ոչ:

-Հ1-ի նախկին աշխատակից Նվեր Մնացականյանը հայտարարել է, որ Հանրայինում նոր մարդիկ են եկել եւ երևի չեն ուզում եղած կադրերի հետ աշխատել: Ինչպե՞ս կարձագանքեք այս հայտարարությանը:

-Ախր Արտակ Հերիքյանը երբ որ Հանրայինում եթեր է մտել, Նվեր Մնացականյանը Գյումրիում էր ապրում, հավանաբար մտքով չէր էլ անցնում, որ կարող է մի օր հեռուստատեսությունում աշխատի: Այդ ո՞նց եղավ, որ Արտակ Հերիքյանը նոր է, ինքը հին է: Արտակ Հերիքյանը 18 տարեկանում 1990 թվականին եթեր է մտել, որտե՞ղ էին իրենք: Արդեն ծիծաղելի է այս ամենը դառնում:

Եվ մի բան էլ՝ խնդրում եմ դադարեցնել պրոֆեսիոնալներ, ոչ պրոֆեսիոնալ երիտասարադներ թեմայի շահարկումը: Երիտասարդներից պետք չէ վախենալ, ընդհակառակը, նրանց ավելի պետք է ոգեշնչել, նրանք ավելի ազատ են իրենց մտածումներում, աշխատանքում: Ուղղակի նրանց պետք է հնարավորություն ըտալ, ինչն էլ անում ենք:

Ցավն այն է, որ երբ աշխատում են հանրայինում,  շատ ԶԼՄ-ների համար նրանք վատն են, ոչ պրոֆեսիոնալ են, իսկ երբ աշխատանքից ազատվում են, միանգամից դառնում են պրոֆեսիոնալ: Ես մի գնահատական ունեմ բոլորի համար, այստեղ աշխատողները, բոլորը՝ անկախ տարիքից, սեռից, պրոֆեսիոնալ լրագրողներ են, և եթերը լավագույն միջոցն է յուրաքանչյուրի պրոֆեսիոնալիզմը գնահատելու: Նրանց կարող են սիրել, չսիրել, հարգել, չհարգել, բայց բոլորը պարտավոր են իրենց գործում լինել  արհեստավարժ: Միգուցե ոչ բոլորին է դա հաջողվում, բայց ձգտումը գոնե տեսանելի պետք է լինի: