Իմ թիմն արեց առավելագույնը. Աբրահամ Խաշմանյան

Չեմպիոնների լիգայի 2017-18 մրցաշրջանի որակավորման 2-րդ փուլի ԲԱՏԷ-ի դեմ պատասխան խաղում «Ալաշկերտը» ներդրել է ողջ ուժերը: Նման կարծիք այսօր՝ հուլիսի 18-ին, Վազգեն Սարգսյանի անվան «Հանրապետական» մարզադաշտում տեղի ունեցած հանդիպումից հետո արտահայտեց Հայաստանի չեմպիոնի գլխավոր մարզիչ Աբրահամ Խաշմանյանը: Նրա թիմը պարտվեց 3:1 հաշվով: 1-ին խաղը Բելառուսում ավարտվել էր 1:1 եւ «Ալաշկերտը» Չեմպիոնների լիգայից դուրս մնաց 2 խաղի արդյունքում ԲԱՏԷ-ին զիջելով 4:2 հաշվով:

- Առաջին 20 րոպեն ու դրանից հետո «Ալաշկերտը» միանգամայն այլ ֆուտբոլ խաղաց: Ի՞նչն էր պատճառը:

- Պարտությունից հետո արդարացում չի լինում: Ավելացնեմ, որ նման խաղերում 1 սխալը ճակատագրական է լինում: Իսկ մենք թույլ տվեցինք այդ սխալները, որոնցից մրցակիցն օգտվեց: Ես չէի ասի, որ մենք այսօր վատ խաղացինք: Անմնացորդ նվիրվեցինք, երեւի թիմն առավելագույնն արեց: Երեւի դեռ չենք հասել այն մակարդակին, որ նման սխալներ թույլ չտանք:

- 1-ին խաղում հաջողվում էր պաշտպանությունում հավաքված գործել: Այսօր գրեթե չէր ստացվում: Ի՞նչն էր պատճառը, վատ ֆիզիկական պատրաստվածությու՞նը:

- Չեմ կարծում, որ ֆիզիկապես վատ էինք, որովհետեւ ամբողջ խաղի ընթացքում տեմպը կարողացանք պահել: Հիմնական պատճառն արդեն նշեցի՝ նման խաղերում 1 սխալը ճակատագրական է լինում: Մեզ 1-ին գոլը խփեցին ճակատագրական սխալից: Կենտրոնում տարածություն տվեցինք հարվածելու, դարպասապահն էլ... 20-25 մետրից խփում են... չեմ ուզում մատնանշել կոնկրետ մարդկանց սխալները, ընդհանուր եմ ասում: Մի քանի սխալներ թույլ տվեցինք ու պարտվեցինք: Մրցակիցը բավականին փորձառու է եւ կարողացավ օգտվել:

- Ասացիք, որ չեք ցանկանում կանգ առնել կոնկրետ մարդկանց սխալների վրա, բայց բեկումնային եղավ հենց այդ գոլը:

- Այդպիսի բաներ լինում են մեծ ֆուտբոլում: Նշեցի հիմնական պատճառ՝ ուրեմն ինչ-որ տեղ դեռ չենք հասունացել այդքան, որ նման սխալներ թույլ չտանք: 1-ին գոլի ժամանակ սխալվեցինք կենտրոնում: Կիսապաշտպանական գծում ազատ տարածություն տվեցինք, իրավունք չունենք տարածություն տալու, բայց ֆուտբոլ է: Մինչեւ խաղը ես նշել էի, որ կազմի ընտրության հարցում խնդիրներ ունենք: Նորից ասում եմ՝ արդարացում չկա, բայց ցանկանում եմ Ձեր հարցին լիարժեք պատասխանել: Ունեինք ֆուտբոլիստ, որը լավ պատրաստ չէր, ստիպված էինք խաղադաշտ դուրս բերել, հիմանական կազմի խաղացող կար, որին կորցրել էինք.... Իմ կարծիքով՝ իմ թիմն այսօր արեց առավելագույնը: Ունեինք պահեր, որոնք պետք է օգտագործեինք, չօգտագործեցինք: Եթե կարողանայինք 1:0-ն պահել մինչեւ 1-ին խաղակեսի վերջը, 2-րդում էլ կկարողանայինք լավ խաղալ, բայց 1:1-ի դեպքում 50-50 էր, մրցակիցն օգտվեց իր շանսերից, մենք՝ ոչ:

- Չե՞ք կարծում, որ Բեգլարյանն այսօր անպատասխանատու խաղաց: Գեւորգ Կասպարովն ավելի փորձառու է...

- Ես կարող եմ ասել, որ վատ խաղաց: Միչնեւ հիմա խաղում էր Արսեն Բեգլարյանը: Հավաքականի դարպասապահ է, բավական պրակտիկա ունեցող, հույս ենք դրել նրա վրա: 1 խաղում էլ սխալվեց, պարտվեցինք:

- Չե՞ք կարծում, որ 1:0-ից պետք էր մեծ ուժերով պաշտպանվել:

- Շատ ակնթարթային եղավ ամեն ինչ: Ֆուտբոլում շատ արագ է ամեն ինչ լինում, չես հասցնում: Նշեցի, որ եթե կարողանայինք 1:0-ն պահել մինչեւ 1-ին խաղակեսի վերջը, կկարողանայինք փոխել ամեն ինչ, բայց 1:1-ից հետո հարձակվել, նախաձեռնել էր պետք, ու կարծում եմ՝ մենք նախաձեռնում էինք, վատ չխաղացինք այսօր:

- Համեմատած նախորդ տարվա՝ թիմն աճե՞լ է:

- Համարում եմ, որ աճել ենք անցած տարվա համեմատ, բայց պետք է հաշվի առնենք մրցակցի գործոնը: Այս տարի ավելի ուժեղ ենք, բայց ես այն մարզիչներից եմ, որոնց համար արդարացումներ չկան պարտության դեպքում՝ անկախ նրանից ում դեմ ենք խաղում:

- Մինչեւ խաղն ինչպես էիք գնահատում ձեր հնարավորությունները:

- Ես էլ ֆուտբոլիստներն էլ մտածում էինք, որ 50-50: Մենք դուրս էինք եկել լավ խաղ ցուցադրելու, հաղթելու համար: Գիտեինք, որ այսքան ժողովուրդ է գալու: Առիթից օգտվելով ասեմ, որ շնորհակալ եմ այդքան ժողովրդին, որ եկել աջակցում էին: Թող շարունակեն, թող ուշադրություն չդարձնեն այս պարտությանը: Միայն այդպես կարող ենք առաջ գնալ, միայն թիմը բավական չէ առաջ գնալու համար, այս մթնոլորտով մենք կարող ենք ունենալ ֆուտբոլ, թող չհուսահատվեն:

- Մրցավարի գործողությունների գո՞հ եք:

- Եթե ինձ եք հարցնում, ես դժգոհ եմ, եզրայինից էլ եմ դժգոհ, բայց չեմ կարծում, որ գլոբալ ազդեցություն է ունեցել:

- Ինչպե՞ս կամփոփեք թիմի ելույթները Չեմպիոնների լիգայի այս խաղարկությունում:

- Անցած տարվա նման 1-ին փուլն անցանք, 1-ին նպատակը դա էր: Մեծ էր ցանկությունը նաեւ 2-րդ փուլը հաղթահարելու, բայց իրականությունն այն է, որ դեռ չենք կարողանում: Պետք է աշխատել, պետք է ավելին անել: