Կապանի մշակույթի տանը գումարներ են յուրացվե՞լ. տնօրենը պարզաբանում է

Այս տարի ամռանը Սյունիքի մարզկենտրոն Կապան քաղաքի մշակույթի տունը քաղաքի երեխաների համար ամառային ճամբար է կազմակերպել: Ֆինանսավորողները երկուսն են՝ քաղաքապետարանն ու Կապանի լեռնահարստացման կոմբինատը: Ճամբարային հանգիստը  երկու փուլով է կազմակերպվելու: Առաջին փուլը եղել է հունիսի 26-ից հուլիսի 7-ը:

Armtimes.com-ի տեղեկություններով՝ առաջին փուլին մասնակցել է առավելագույնը 160 երեխա, սակայն ով եկել եւ ցանկություն է հայտնել մասնակցել ճամբարին, ասել են, որ այլեւս տեղ չկա: Երեխաների գրանցման փաստաթղթեում մինչդեռ նշվել է, որ ճամբարի առաջին փուլին մասնակցել է 200 երեխա:

Երկրորդ փուլը եղել է հուլիսի 10-ից հուլիսի 21-ը, սակայն տնօրենն աշխատակիցներին ասել է, որ վարձատրելու է ընդամենը մի փուլի համար: Երկրորդ փուլում ավելի քիչ են եղել երեխաները՝ 140 հոգի, բայց նույն աղբյուրի պնդմամբ՝ փաստաթղթերով կրկին 200 երեխա է ներառված եղել:

Մշակույթի տունը աշխատավարձերը փոխանցել է աշխատակիցների հաշիվներին, իսկ տնօրեն Աշոտ Գրիգորյանն ասել է, որ բոլորը 20 հազարական դրամներ պետք է տան կոլեկտիվի համար խնջույք կազմակերպելու համար: Մշակույթի տան աշխատողները դժգոհել են, որ իրենք խնջույքի փոխարեն իրենց աշխատավարձերն են ուզում ստանալ: Բացի այս, նաեւ չճշտված տեղեկություններ կան, որ երեխաների իրական թիվը պակաս լինելու պայմաներում տնօրենն աշխատակիցներից գումարային պահումներ է կատարել:

Armtimes.com-ին հասած տեղեկությունների իսկությունը փորձեցինք ստուգել՝ զրուցելով մշակույթի տան տնօրեն Աշոտ Գրիգորյանի հետ:

- Պարոն Գրիգորյան, որքա՞ն գումար է փոխանցվել մշակույթի տանը ամառային ճամբարը կազմակերպելու համար:

- Չգիտեմ, ես այդպիսի բաներ չեմ իմանում: Ես երեխաների հանգստով եմ զբաղվում, գումարն ի՞նչ կապ ունի ինձ հետ:

- Դուք տնօրենն եք ու տեղյակ չե՞ք, թե որքան գումարով է այդ ծրագիրն իրականացվում, պայմանագիր չունե՞ք:

- Ինձ մատակարարում են, ես միջոցառում եմ անցկացնում: Ձեզ հիմա երեխաների հանգիստն է հետաքրքրո՞ւմ, թե՞ գումարը: Ֆինանսավորողից իմացեք: Ես փող չեմ ծախսել, որ իմանամ:

- Դուք ձեր աշխատակիցներին վճարում եք չէ՞ կատարած աշխատանքի համար:

- Դուք աուդիտ ե՞ք անում, որ նման հարցեր եք տալիս: Ես աշխատավարձ չեմ բաժանում, ես ընդամենը երեխաների հանգիստն եմ կազմակերպում:

- Մենք տեղեկություն ունենք, որ դուք ոչ թե 200 երեխայի հանգիստ եք կազմակերպել, այլ ավելի պակաս:

- Հարգելիս, ես գումարով չեմ զբաղվում, խնդրում եմ այդ հարցերը դիմեք քաղաքապետարան, կոմբինատին, ես ֆինանսներով չեմ զբաղվում, ընդամենը հանգիստն եմ կազմակերպում: Երեխաները մի օր գալիս են՝ 10-ն են բացակա լինում, մի օր՝ 20-ը: 

- Մենք տեղեկություն ունենք, որ 160 երեխա է եղել իրականում, իսկ ձեր աշխատակիցների աշխատավարձերից պահումնե՞ր եք փորձել անել:

- Ձեզ սխալ ինֆորմացիա են տվել: Մենք 10 հազար դրամ փող ենք հավաքել ամսի 26-ին, ձեզ էլ եմ հրավիրում, կարող եք  գալ մեր խնջույքին մասնակցել, մենք գնալու ենք հանգստանանք այդ օրը: Այդ գումարը դրած է, ցուցակն էլ գրված է, իրենց ցանկությունն է: Ընդունված կարգ է, ամեն տարի ճամբարից հետո գնում ենք հանգստանալու: Ցանկություն են հայտնել, ես էլ ասել եմ, որ պետք է գումար հավաքենք այդ դեպքում: Բոլորն էլ համաձայնվել են, գումարը հավաքվել է, պայմանավորվածությունն արդեն կա, ամսի 26-ին՝ ժամը 11-ին, մենք գնալու ենք հանգստանալու:

- Երկրորդ փուլում ճամբարին քանի երեխա է մասնակցել:

- Օր կա եղել է 160, օր կա 180, տարբեր քանակի երեխաներ են գալիս: Մի օր արեւը շատ է՝ բացակայում են: Այսօր վերջին համերգն է, կարող եք գալ եւ իմանալ, թե որքան երեխա կա:

- Քանի՞սն են գրանցվել:

- 200 երեխա, երկու պատոկին էլ 200 երեխա է եղել: Ցանկություն ունեցողներն ավելի շատ են եղել:

- Ձեր աշխատողների աշխատավարձերից պահումներ չե՞ք արել:

- Իրենց աշխատավարձերը քարտերի վրա նստել է, իրենք էլ ստացել են: 10 հազար դրամ մենք փող ենք հավաքել, չենք պահել: Բացի դրանից գումար չի հավաքվել աշխատավարձերից: Աշխատավարձերն ինչի՞ եմ տալիս, որ հավաքեմ: Հավաքելու լինեի գլխից կասեի, որ չեմ տալիս:

- Խնդիրը նրանում է, որ երեխաները 200-ից քիչ են եղել, իսկ ավելի գումարը ետ եք պահանջել:

- Ես ձեզ բացատրեմ ոնց է եղել: Ես ներկայացրել եմ, թե քանի երեխա է լինելու, իսկ թե որքան գումար է փոխանցվել, ինչ է եղել, ես չեմ տնօրինում, բայց իմ ներկայացրած թիվը վճարվել է ժողովրդին, 10 հազար դրամ էլ համաձայնվել են հավաքել:

Եթե ինչ-որ մի խնդիր կա, ամոթ է, երեխաներ են: Կոլեկտիվին էլ պետք չի նման բաներ մտցնել, բզբզել: Դա ամոթ է: Մշակույթի կենտրոն է, քյասիբ հիմնարկ: Ի՞նչ խնդիր պետք է լինի, որ մենք ճամբար ենք կազմակերպում, ինչի՞ են դրա վրա աչք գցում, հարամում: Նախաձեռնողը մենք ենք, ես սա կարող եմ չանել, ինձ ոչ մեկ ոչ ստիպում է, ոչ էլ աշխատանքի բաղադրիչ մաս է կազմում: Պարզապես, մենք երեխաների համար նման բան ենք նախաձեռնում: Եթե այսպես շարունակվի, սկսեն բզբզելը, ես ինչ իմանամ թեմա գտնեն, հնարավոր է մյուս տարի հիասթափվեմ՝ չանեմ էլ: Ո՞ւմ են օգուտ տալու, երեխանե՞րն են շահելու, թե՞ բողոքողները:

- Եթե դատախազությունը ստուգումներ անի, ու պարզվի չարաշահում է եղել…

- Եթե գան ստուգեն ու չարաշահում լինի, բնականաբար՝ այս երեւույթը կվերանա, էլ ճամբար չի կազմակերպվի, ոչ մեկ չի ուզի: Հետեւանքն ուրիշ խնդիր է: