Պետական մակարդակով փորձում են Երեւան-Արմավիր երթուղու բիզնեսը խլել գործարարից

Երեւան-Արմավիր երթուղին շահագործող «Գալակտիկա տրանս սերվիս» ՍՊԸ-ն փաստի առաջ է կանգնել: Ընկերության ներկայացուցիչների պնդմամբ՝ արհեստական խոչընդոտներ է ստեղծվում իրենց համար, որպեսզի այս բիզնեսը տանեն սնանկության եւ տիրանան դրան:

2001 թվականին իրավաբանական անձանց պետական ռեգիստրում գրանցված այս ընկերությունը մի շարք երթուղիներ սպասարկելուց բացի, ուղեւորափոխադրում է իրականացնում Երեւան-Արմավիր ուղղությամբ: Երեւանի «Կիլիկիա» ավտոկայանից ընկերության ավտոբուսներն ու միկրոավտոբուսները հասնում են Արմավիր քաղաքի ավտոկայան եւ հակառակ ուղղությամբ 10 րոպեն մեկ պարբերականությամբ վերադառնում են մայրաքաղաք: «Գալակտիկա տրանս սերվիս» ՍՊԸ-ն հիմնադրել է Մուշեղ Խաչատրյանը, որի մահից հետո ընկերության կառավարումն իրականացնում է նրա դուստրը՝ Շուշան Խաչատրյանը:

Ըստ ընկերության ներկայացուցիչ Արթուր Վարդանյանի, Երեւան-Արմավիր երթուղով անցնում են Երեւան-Արմավիր Մյասնիկյան, Երեւան-Արմավիր-Բաղրամյան, Երեւան-Արմավիր-Բաղրամյան-Շենիկ, Երեւան-Արմավիր-Քարակերտ եւ Երեւան-Մեծամոր երթուղիները:

«Մյասնիկյան-Երեւանը մեր գծի մեջ են դրել միտումնավոր: Գծում պետք է աշխատի մի մեքենա, աշխատում է մոտ 4-ը: Ամեն օր 5-6 անգամ երթուղի են դուրս գալիս: Մի մեքենան 2 անգամ պետք է գիծ դուրս գա: Այս երթուղու մեքենաներն իրենց վերջնագիծ չեն գնացել, չեն էլ կարող գնալ: Մյասնիկյանում այդքան բնակիչ չկա՝ դա մեկ եւ երկրորդ՝ ներմարզային երթուղին կա, սա կոնկրետ դրել են այս գծի մեջ, որն աշխատում է Երեւան-Արմավիր երթուղով: Նույնը Բաղրամյան-Երեւանը, Երեւան-Շենիկը, Երեւան-Արտենին է: Մենք դեմ չենք, որ փոխադրողները գործունեություն ծավալեն, բայց մեկնման եւ վերջնակետի պահպանմամբ պետք է դա լինի: Այդ ընկերությունները գալիս են Արմավիր եւ չեն գնում իրենց վերջնագիծ: Չվացուցակներում այդ ամենն ամրագրված է եւ կանոնակարգվում է նախարարի հրամանով: Տրանսպորտի տեսչությունը վերահսկում է այս ոլորտը, բայց իրական վերահսկողություն չի իրականացվում, այլ բոլորովին հակառակ իրավիճակն է ստեղծվում»,- armtimes.com-ի հետ զրույցում ասաց «Գալակտիկա տրանս սերվիս» ՍՊԸ-ի ներկայացուցիչ Արմեն Վարդանյանը:

ՀՀ տրանսպորտի, կապի եւ տեղեկատվական տեխնոլոգիաների նախարարությունից armtimes.com-ի գրավոր հարցմանն ի պատասխան հայտնեցին, որ «Գալակտիկա տրանս սերվիս» ՍՊԸ-ն իրականացնում է թիվ 206 ավտոբուսային եւ թիվ 207 միկրոավտոբուսային երթուղիների սպասարկումը (Երեւան-Արմավիր եւ հակառակ ուղղությամբ): 206 երթուղու սպասարկման իրավունքը տրված է մինչեւ 2022 թվականը: Այս երթուղում շահագործվում է 4 փաստացի եւ 1 պահուստային ավտոբուս: 207 միկրոավտոբուսային երթուղում շահագործվում է 22 փաստացի եւ 5 պահուստային միկրոավտոբուս: 207 միկրոավտոբուսային երթին, ըստ նախարարության, 2017 թվականի հուլիսի 11-ին «Գալակտիկա տրանս սերվիս» ՍՊԸ-ին ժամանակավոր սպասարկման է տրվել, մինչդեռ տարիներ շարունակ այս ընկերությունն է սպասարկել Երեւան-Արմավիր միկրոավտոբուսային երթուղին:

Շենիկ-Բաղրամ-Երեւան թիվ 214 միկրոավտոբուսային երթուղու սպասարկման իրավունքը մինչեւ 2020 թվականը տրամադրվել է «Ռամ-Ակա» ՍՊԸ-ին: Այս երթուղում սպասարկում է 1 փաստացի եւ 1 պահուստային ավտոբուս:

Բաղրամյան-Երեւան թիվ 228 միկրոավտոբուսային երթուղու սպասարկման իրավունքը մինչեւ 2019 թվականը տրվել է կրկին «Ռամ-Ակա» ՍՊԸ-ին: Այս երթուղում էլ շահագործվում է 2 փաստացի եւ 1 պահուստային միկրոավտոբուս:

Մյասնիկյան-Երեւան թիվ 223 միկրոավտոբուսային երթուղու սպասարկման իրավունքը մինչեւ 2019 թվականը տրվել է «Ալ տրանս» ՍՊԸ-ին: Այս երթուղում էլ շահագործվում է 1 փաստացի եւ 1 պահուստային միկրոավտոբուսներ:

Մեծամոր-Երեւան թիվ 235 երթուղու սպասարկման իրավունքը մինչեւ նախորդ ամիս տրամադրված է եղել «Շանթ Գյուրջոյան» ՍՊԸ-ին: Երթուղում շահագործվում է 4 փաստացի եւ 1 պահուստային միկրոավտոբուս:

Տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանին հասցեագրված մեր հարցմանը պատասխանել է նախարարության աշխատակազմի ղեկավար Սամվել Ամիրխանյանը: Նախարարին հարցրել էինք նաեւ, թե այս ընկերություններից, որի նկատմամբ քանի անգամ է վարչական պատասխանատվություն կիրառվել: Պարզ ասած, թե այդ ընկերությունները քանի անգամ են տուգանվել: Պարզվում է, որ ամենահաճախը նախարարությունը տուգանել է «Գալակտիկա տրանս սերվիս» ՍՊԸ-ին: 2017 թվականի հունվարի 10-ից մինչեւ հուլիսի 15-ը ընկած ժամանակահատվածում այս ընկերությանը նախարարությունը տուգանել է 18 անգամ: 11 անգամ տուգանել է 207 միկրոավտոբուսային երթուղին, 7 անգամ՝ 206 ավտոբուսային երթուղին: Տուգանքների մեծ մասը վերաբերվել են չվացուցակի խախտմանը (11 ակտ), առանց համապատասխան կահավորմանը (5 ակտ) եւ այլն: «Ռամ-Ակա» ընկերությունը թիվ 214 եւ թիվ 228 երթուղիների մասով տուգանվել է 12 անգամ, «Շանթ Գյուրջոյան»-ը՝ 5 անգամ, «Ալ տրանս»-ը՝ 6 անգամ: «Գալակտիկա տրանս սերվիս» ՍՊԸ-ի ներկայացուցչի խոսքով՝ գրեթե բոլոր վարչական ակտերն այժմ դատական կարգով բողոքարկվում են:

Armtimes.com-ն իրավաբանական անձանց պետական ռեգիստրի գրանցամատյանի տվյալներից պարզեց, որ «Ալ տրանս» ընկերությունը, որն իրականացնում է Երեւան-Մյասնիկյան երթուղու սպասարկումը, 2014 թվականին հիմնադրել է Հարություն Պետրոսյանը: Ընկերության գրանցման օրը սեպտեմբերի 16-ն է: «Ալ տրանս»-ը գրանցված է Երեւանի Էրեբունի վարչական շրջանում, որտեղ էլ բնակվում է Հարություն Պետրոսյանը: Ընկերության 100 տոկոս բաժնեմասը պատկանում է հենց նրան, իսկ բաժնեմասի գինը 20 հազար դրամ է, կանոնադրական կապիտալը՝ 20 հազար դրամ: «Ալ տրանս»-ի տնօրենը նույն հիմնադիրն է: Ի դեպ, վերջինս այս ընկերությունը հիմնադրել է նույն այն ժամանակահատվածում, երբ սեփական դիմումի համաձայն ազատվել է «Գալակտիկա տրանս սերվիս» ՍՊԸ-ի տնօրենի պաշտոնից: Այսինքն՝ դուրս է եկել մեկ այլ ընկերությունից, ստեղծել է իր ընկերությունը եւ մրցակցության մեջ է մտել նախկին գործատուի հետ: Հարություն Պետրոսյանն այժմ զբաղեցնում է Հարավային ավտոկայան ՓԲԸ-ի տնօրենի տեղակալի պաշտոնը: Այս ՓԲԸ-ն էլ ստեղծված է պետության կողմից: Հարություն Պետրոսյանը ստացվում է, որ և գծատեր է, և ավտոկայանի փոխտնօրենը եւ, բնականաբար, այստեղ չի կարող շահերի բախում չլինել:

Հաջորդ ընկերությունը, որը այսպես ասած խցկվել է Երեւան-Արմավիրի երթուղու արանքում, դա «Ռամ-Ակա» ՍՊԸ-ն է, որը հիմնադրել են երեք հոգի՝ Արթուր Ջեյրանյանը, Կորյուն Սմբատյանը եւ Ռազմիկ Մխիթարյանը: Վերջինիս ընկերության տնօրենն է եղել 2005 թվականից: Արթուր Ջեյրանյանը հանդիսանում է Ավտոկայան ՓԲԸ-ի տնօրենի տեղակալը: «Ռամ-Ակա» ՍՊԸ-ի կանոնադրական կապիտալը 2005 թվականին կազմել է շուրջ 250 միլիոն դրամ, որը հետագայում նվազեցվել է եւ 2011 թվականին հասցվել է 50 հազար դրամի:

«Շանթ Գյուրջոյան» ՍՊԸ-ն էլ հիմնադրվել է 2005 թվականին Ռազմիկ Սարգսյանի կողմից, որի մասնակցությունը հետագայում դադարեցվել է: Ուշագրավ է, որ այս նույն ընկերությունն է իրականացնում նաեւ մայրաքաղաքի թիվ 63 համարի երթուղու սպասարկումը, որը կապված է Երեւանի քաղաքապետ Տարոն Մարգարյանի անվան հետ:

«Գալակտիկա տրանս սերվիս» ՍՊԸ-ին ներկայացուցչի պնդմամբ այս ընկերությունները նախարարության թույլտվությամբ եւ աչքակապությամբ հնարավորություն են ստացել մուտք գործել Երեւան-Արմավիր երթուղի, եւ ի հաշիվ իրենց, գումար աշխատել: Արմեն Վարդանյանը նշում է նաեւ, որ Երեւան-Արմավիր երթուղու համար սահմանվել է 500 դրամ ուղեվարձ, սակայն իրենք դա նվազեցրել են հասցնելով 400 դրամի, իսկ «Ռամ-Ակա» եւ «Ալ տրանս» ՍՊԸ-ները սահմանել են 300 դրամ ուղեվարձ եւ դեմպինգ են փորձում իրականացնել:

«Վարորդները նյարդային վիճակում են, ուղեւորները ասում են՝ ոնց է ստացվում մյուսները 300 դրամով են ուղեւորափոխադրում իրականացնում, դուք՝ 400-ով, պատկերացնում եք վարորդների հոգեվիճակը: 5 ամիս է ամեն օր այս հարցը բարձրացրել ենք, նախարարին ենք դիմել, բայց ոչ մի բան չի փոխվում: Ուզում են մեր ընկերությունը սնանկացման տանել: Այդ գիծը լավ գիծ է: Արմավիր-Երեւան գիծը լավ է աշխատում, փորձում են ճնշել»,- ասաց Արմեն Վարդանյանը՝ նշելով, որ մյուս երթուղիներում բացի այն, որ սահմանված չվացուցակի խախտմամբ ավելի շատ են փոխադրում իրականացնում, նաեւ սպիտակ պետհամարանիշներով մեքենաներ էլ են շահագործում, որն օրենքով արգելված է կանոնավոր ուղեւորափոխադրում իրականացնողների համար:

Ստացվում է, որ Ավտոկայան ՓԲԸ-ի տնօրենի տեղակալ Արթուր Ջեյրանյանը եւ Հարվային ավտոկայան ՓԲԸ-ի տնօրենի տեղակալ Հարություն Պետրոսյանը ստեղծելով իրենց ընկերությունները, ունենալով պետական մակարդակով աջակցություն կարողացել են մի գծի մեջ մի քանի գիծ բացել եւ յուրօրինակ բիզնես անել: Այս զույգը նաեւ փորձում է օրենքները շրջանցելով, թույլ վերահսկողության պայմաններում սահմանված չվացուցակից դուրս ուղեւորափոխադրում իրականացնելով, դեմպինգի միջոցով խաղից դուրս հանել «Գալակտիկա տրանս սերվիս» ՍՊԸ-ին:

Տպել
6189 դիտում

ՀՀ ֆուտբոլի հավաքականի խաղերի ամենաէժան տոմսերը կլինեն 1000 դրամ

Վանեցյանը անձնական միջոցներ չունի, որ ներդնի ֆուտբոլում, բայց կարծում է՝ կարիքը չի էլ լինի

Հայրապետյանը չէր եկել ժողովին, որում Վանեցյանը ընտրվեց ՀՖՖ նախագահ

Նիկողոսյանը եւ Մելիքբեկյանը՝ ՀՖՖ փոխնախագահներ

Ընտրվեց ՀՖՖ գործկոմի նոր կազմը

Արթուր Վանեցյանը ընտրվեց ՀՖՖ նախագահ

Արարատ Միրզոյանը Գյումրու թիվ 40 դպրոցի տնօրեն է նշանակել Մարմաշենի դպրոցի ուսուցչին

12-րդ դասարանում կենտրոնացված ավարտական քննություն կլինի միայն հայոց լեզու առարկայից

Վարդան Մինասյանը հեռացել է ՀՀ ֆուտբոլի հավաքականից

Անկախության տոնին պարգեւատրումներ, ցուցահանդեսներ, «Սուտլիկ որսկան» ու տոնական համերգ Գյումրիում

Սեւ մածուն. մոնստր է, մոնստր

ՀՀՇ-ով մեզ թող չվախեցնեն. ասում է Հովհաննես Հովհաննիսյանը

Ընտրություններին մասնակցող ամենահարուստ ուժը ՀՅԴ-ն է. ունեցվածքը սփռված է ողջ երկրով

Անկախության տոնի առթիվ վարչապետ Նիկոլ Փաշինյանին շնորհավորական ուղերձ է հղել ՌԴ նախագահ Վլադիմիր Պուտինը

Հայաստանի անկախության տոնի առթիվ Թբիլիսիի հեռուստաաշտարակը լուսավորվել է հայոց եռագույնով

GOOGLE որոնողական համակարգը եռագույնով է ներկվել՝ ի պատիվ Հայաստանի անկախության տոնի

Ամենից շատ վճարովի եթերաժամանակ ԲՀԿ-ն է գնել ու գրանցել ռեկորդ. նման ցուցանիշ դեռ չի եղել

Մեգան Մարքլը ներկայացրել է իր խոհարարական գիրքը

Պաշտպանը Գլխավոր դատախազին է ուղարկել Նաիրա Զոհրաբյանի տրամադրած նյութերը

Արագած գյուղում օտարերկրացիներ են մոլորվել