Նման զզվելի արտահայտությամբ ինձ չնայեք. լարված մթնոլորտ Նուբարաշենի սպանության գործով

Էրեբունի եւ Նուբարաշեն վարչական շրջանների ընդհանուր իրավասության դատարանում դատավոր Աննա Դանիբեկյանի նախագահությամբ այսօր լարված մթնոլորտում շարունակվեց հայտնի լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով դատական նիստը:

Արդեն երրորդ դատական նիստն է՝ դատարանը հարցաքննում է գործով առանցքային տուժող Էմմա Խաչատրյանին՝ սպանված Եղիշե Խաչատրյանի մորը:

Հիշեցնենք, որ Էմմա Աբրահամյանը որդու հետ է եղել, երբ տեղի ունեցել ծեծկռտուքը:  Հարցաքննության ժամանակ նա հաստատեց, որ որդին իր եւ մեղադրյալների մեքենաների բախումը կանխելու համար արգելակել է, սաստել երիտասարդներին, ինչից հետո վերջիններս հարձակվել ու հարվածներ են հասցրել նրան. սկզբում՝ երեքը, հետո նրանց միացել են մյուս երեքը:

Էմմա Աբրահամյանը պարբերաբար դժգոհում էր պաշտպանական կողմի  հարցերից՝ նշելով, թե ամբաստանյալների պաշտպանները մոլորեցնում են իրեն, պարբերաբար նույն հարցերը տալիս: Նրա հարցաքննությունը մի քանի անգամ ընդմիջվեց՝ ինքնազգացողությունը վատանալու պատճառով:

«77 տարեկան կին եմ: Ոտքերս թույլ են, բայց ուղեղս տեղն է, ի՞նչ վիճակի մեջ եք ինձ գցում, մեկ տարուց ավելի՝ որդի եմ կորցրել»,-բղավեց նա: Պաշտպանները հետաքրքրվեցին, թե որքան ժամանակ է տեւել միջադեպը, ինչից տուժողը վրդովվեց. «Որդուս հարվածում էին, իսկ դուք ժամ եք հարցնո՞ւմ: Երանի որդիս չարգելակեր, արգելակեց՝ փրկեց նրանց…երանի չփրկեր, ինքն էլ հետները մեռներ…»: Էմմա Աբրահամյանը դժվարացավ մանրամասնել, թե մեղադրյալներից ով եւ ինչպես էր հարվածում Եղիշե Խաչատրյանին, սակայն ասաց, որ վեցն էլ նրան անխնա ծեծում էին. «Ոհմակ կազմած՝ սպանեցին որդուս…խմած էին, հարբած, քաշած, ինքնահաստատվում էին, թե ով ավելի շատ կհարվածեր»: Էմմա Աբրահամյանը պնդեց, որ ամբաստանյալներից մեկը ինչ- որ «բութ գործիքով» հարվածել է Եղիշե Խաչատրյանին, սակայն չհստակեցրեց, թե ինչ առարկա էր դա:

Ամբաստանյալ Արտաշես Չիչոյանի պաշտպան Երեմ Սարգսյանը կարծիք հայտնեց, որ Աբրահամյանը նյարդայնանում է այն դեպքերում, երբ իրենց տված հարցերին հստակ պատասխաններ չի ունենում տալու:

Ամբաստանյալների պաշտպանները ցանկանում էին իմանալ նաեւ՝ թե իրենց պաշտպանյալներից ով էր Եղիշե Խաչատրյանին հարվածում, նրա մարմնի որ հատվածին, Աբրահամյանն ի պատասխան նշում էր միայն, որ բոլոր վեց անձինք հարվածում էին տղայի գլխի եւ մարմնի բոլոր հատվածներին: Ամբաստանյալների պաշտպանների հարցերին՝ ինքը տեսե՞լ է, թե ինչպես սկսվեց միջադեպը, ինչ հարց էր քննարկվում, Աբրահամյանը նախ նշեց, թե չի տեսել, ապա Արարատ Նիկողոսյանի պաշտպան Լիպարիտ Սիմոնյանի հարցրեց, թե այդ դեպքում ինչի՞ հիման վրա է պնդում, թե ծեծկռտուքը հրահրել են ամբաստանյալները, թե առաջինը նրանք են հարվածել Եղիշե Խաչատրյանին: «Իմ որդին այնպիսի դաստիարակություն էր ստացել, որ չէր կարող հարվածել: Եթե նպատակ ունենար վնասելու, նրա մեքենայի մեջ այնքան գործիք կար, որ կարող էր հանել կռվել»,- ի պատասխան՝ նշեց Աբրահամյանը: Հարցին՝ իսկ փորձե՞լ է փախչել, տուժողն ասաց, որ չեն թողել: Սիմոնյանի հարցին, թե իր որդին վիրավորանքներ հնչեցրել է, Էմմա Աբրահամյանը պատասխանեց՝ ոչ. «Ասել է անասուն, ոչխարներ»: «Բա դրանք վիրավորանք չե՞ն»,- նկատեց պաշտպանը, ինչի վերաբերյալ տուժողը բացասական պատասան տվեց:

Տուժողը պարբերաբար կրկնում էր, թե այլեւս հարցերի չի պատասխանում, թե ինքն ամեն ինչ ասել է, հետո ամբաստանյալների պաշտպաններն էլ այս հայտարարությունից հետո դիմելով դատավորին՝ հորդորում էին չմոռանալ իր լիազորությունների մասին ու քայլեր ձեռնարկել, որ տուժողն օրենքով իր վրա դրված պարտականությունները կատարի ու պատասխանի հարցերին: Դատավորը, սակայն, կամ նշում էր, որ Աբրահամյանը հարցերին պատասխանել է, կամ առհասարակ չէր միջամտում: Աբրահամյանն, այնուամենայիվ, փոքր-ինչ հանդարտվում ու շարունակում էր պատասխանել հարցերին: Ամբաստանյալ Արտաշես Չիչոյանի պաշտպան Միհրան Պողոսյանի հարցերից մեկն առնչվում էր նրան, թե ինչպես է Էմմա Աբրահամյանն իմացել, որ որդու քունքի շրջանում վնասվածք կա: «Դիակն աչքիս առաջ, չգիտե՞մ, որ ծակվել ա»,- պատասխանեց Էմմա Աբրահամյանը: «Ծակը ե՞րբ նկատեցիք»,-շարունակեց Պողոսյանը: Այս հարցից հետո Փառանձեմ Մեյթիխանյանն առանց դատարանի թույլտվության լքեց նիստերի դահլիճն ու գնաց դեպի արգելված գոտի: Այդտեղ էլ, ըստ պաշտպանական կողմի, գտնվում է դատավորի աշխատասենյակը: Մի քանի րոպե  անց Մեյթիխանյանը վերադարձավ, դատարանը նրան նախազգուշացրեց առանց թույլտվության նիստերի դահլիճը չլքելու մասին, տիկին Մեյթիխանյանը պատասխանեց, թե իրեն վատ էր զգում «Չէի կարող ձեր թույլտվությունը վերցնել, նոր դուրս գալ, կվատանայի, այստեղ կընկնեի»,- դիմելով դատավորին՝ ասաց նա:

Պաշտպանական կողմը շարունակում էր բութ առարակյի վերաբերյալ հարցեր ուղղել էմմա Խաչատրյանին, ինչը դժգոհության առիթ էր տալիս ոչ միայն տուժողին, այլ նաեւ Փառանձեմ Մեյթիխանյանին: Մասնավորապես, երբ Լիպարիտ Սիմոնյանը հարցնում էր տուժողի իրավահաջորդին, թե բութ գործիքը, որով հարվածել են որդու քունքին, երկար էր, թե կարճ, Էմմա Աբրահամյանը չցանկացավ պատասխանել, նախագահող դատավորն էլ հանեց հարցը, իսկ Փառանձեմ Մեյթիխանայնը տեղից բղավեց. «Պատասխանել է այդ հարցին»:

Աննա Դանիբեկյանը պաշտպանի հարցը հանելու ժամանակ երբ պարզաբանում էր տալիս,  դեմքի այնպիսի արտահայտությամբ նայեց Սիմոնյանին, որ վերջինս չդիմացավ. «Դեմքի նման զզվելի արտահայտությամբ ինձ մի նայեք»,- դիմելով դատավորին, ասաց պաշտպանը, ապա շարունակեց Աննա Դանիբեկյանին հորդորել փոխել դեմքի արտահայտությունը: Ի վերջո Լիպարիտ Սիմոնյանը ինքնաբացարկի միջնորդություն հայտնեց դատավոր Աննա Դանիբեկյանին` նշելով, որ նա ակնհայտ պաշտպանում է տուժող կողմին, հանում պաշտպանական կողմի հարցերը: Նա նաեւ ավելացրեց, որ տեսել է, թե ինչպես է տուժող կողմը մտնում դատավորի գրասենյակ: Նրա միջնորդությանը միացել էին նաեւ ամբաստանյալների մյուս պաշտպանները: Մասնավորապես, ամբաստանյալ  Յուրի Հակոբյանի պաշտպան Արմեն Նադիրյանը եւս, միանալով ինքնաբացարկի միջնորդությանը, նշեց. «Այնպիսի տպավորություն էր, ոնց որ տուժող կողմը իրենց տանը լինի, երբ ուզում են՝ միջամտում են, երբ ուզում են՝ դահլիճը լքում են, շիշ են նետում, եւ այս ամենը դատարանի պասիվ վարքագծի հետեւանքն է, իսկ այն. որ հարցաքննության ընթացքում կրքերը անընդհատ բորբոքվում են, դա հենց դատարանի անգործության հետեւանքն է»:

Միջնորդության դեմ առարկեցին թե՛ մեղադրող թե՛ տուժող կողմը:

Դատարանը հեռացավ խորհրդակցական սենյակ եւ մեկ ժամ անց վերադառնալով՝ որոշեց մերժել ինքնաբացարկի միջնորդությունը:

Դատական նիստը հետաձգվեց. հաջորդ նիստին կրկին կշարունակվի տուժող Էմմա Աբրահամյանի հարցաքննությունը: