Դատավորը փաստաբաններ Լուսինե Սահակյանի եւ Մուշեղ Շուշանյանի նկատմամբ սանկցիա կիրառեց

Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանը հերթական սանկցիան կիրառեց այս անգամ էլ «Սասնա ծռեր» խմբի անդամ Սեդրակ Նազարյանի պաշտպան Լուսինե Սահակյանի եւ Արեգ Կյուրեղյանի պաշտպան Մուշեղ Շուշանյանի նկատմամբ:

Դատարանը որոշեց նրանց պատասխանատվության ենթարկելու վերաբերյալ դիմում ներկայացնել ՀՀ փաստաբանների պալատ:

Հիշեցնենք, որ փաստաբանները չէին կարողացել մտնել նիստերի դահլիճ այն բանից հետո, երբ կարգադրիչները պահանջել էին բացել պայուսակները:

Որոշման հրապարակումից հետո նիստերի քարտուղարուհին զեկուցեց, որ նիստերի դահլիճում բացակայում է Արայիկ Խանդոյանի պաշտպան Արայիկ Պապիկյանը. վերջինս դատարանին  դիմում էր հասցեագրել: Ըստ այդմ՝ Պապիկյանը նշել է, որ իր պաշտպանյալին անհիմն նիստերի դահլիճից հեռացնելուց հետո դատարանը չի լսել պաշտպանների դիրքորոշումը, ուստի իր անհամաձայնությունն է հայտնում:  «Հայտնում եմ նաեւ, որ ինձ զննելու ժամանակ մետաղորսիչը բազմաթիվ ձայներ արձակեց, իմ պայուսակում կային բազմաթիվ մետաղական առարկաներ, սակայն ինձ անարգել ներս թողեցին: Իմ գործընկերներ Լուսինե Սահակյանը եւ Մուշեղ Շուշանյանը նույն պայմաններում չկարողացան ներս մտնել: Դուք ձեր գործողություններով նպաստում եք փաստաբանների մասնագիտական աշխատանքները խոչընդոտելուն, ուստի հայտարարում եմ, որ ես չեմ շարունակելու մասնակցել այսօրվա դատական նիստին»,- դիմում գրել է Պապիկյանը:

Դատարանն այպիսով երկրորդ անգամ հեռացավ խորհրդակցական սենյակ. այս անգամ էլ Արայիկ Պապիկյանի վարքագծի վերաբերյալ որոշում կայացնելու: Կես ժամ անց վերադառնալով սանկցիա կիրառեց նաեւ Արայիկ Պապիկյանի նկատմամբ:

Այնուհետեւ այսօրվա նիստում նույնպես գործի քննությունը կասեցնելու եւ Սահմանադրական դատարան դիմելու միջնորդություն արվեց՝ ամբաստանյալներ Արեգ Կյուրեղյանի ու Սմբատ Բարսեղյանի կամքին հակառակ հանրային պաշտպան ներգրավելու հարցի հետ կապված:

Այս անգամ օրենքի դրույթի սահմանադրականությունն որոշելու հարցով ՍԴ դիմելու միջնորդությամբ հանդես եկավ հանրային պաշտպան Գարեգին Մարգարյանը՝ ավելի վաղ նույնաբովանդակ միջնորդությամբ հանդես էին եկել նաեւ հանրային պաշտպան Արմինե Ֆանյանը, Լիանա Գասպարյանը:

Դատարանը, սակայն երրորդ անգամ նույնաբովանդակ որոշում կայացրեց՝ միջնորդությունը թողնվեց առանց քննության:

Արա Զաքարյանը միջնորդեց նիստը հետաձգել`պատճառաբանելով, որ իր գործընկերները չեն կարողացել ներկայանալ նիստին՝ խուզարկության պատճառով, իսկ նիստին ներկա ամպբաստանյալներից շատերը առանց պաշտպանի են:

«Հորդորում եմ այդ պաշտպաններին հնարավորություն տալ իրականացնել պաշտպանություն եւ ձեւական խոչընդոտները վերացնել: Դուք աչք եք փակում այն փաստի վրա, որ կարգադրիչները մեզ թույլ չեն տալիս մտնել նիստերի դահլիճ: Եթե դատախազները ներկա չլինեին, դուք կշարունակեի՞ք նիստը: Սա կողմնակալ վերաբերմունք է»,-ասաց Արա Զաքարյանը: Այս միջնորդությանը միացան նաեւ գործով մյուս փաստաբանները: «Ես կոչ եմ անում նաեւ վերջ տալ փաստաբանների նկատմամբ հալածանքներին: Ամեն մեկիս վրա 10- ից ավել սանկցիա կա, հիմա էլ դիմում եք փաստաբանների պալատ, այսպես փաստաբանական գործունեություն իրականացնելու հնարավորությունից էլ կզրկվենք»,- հավելեց Տիգրան Հայրապետյանը: Այս միջնորդությունը դատավորն այդպես էլ չքննեց:

Այնուհետեւ Դատավոր Արտուշ Գաբրիելյանն ընթերցեց Կարո Եղնուկյանի ներկայացրած միջնորդությունը, ըստ որի՝ նա ցանկանում է Տիգրան Հայրապետյանից բացի, մեկ այլ պաշտպան ունենալ՝ Նինա Կարապետյանցին: Դատավորը Կարո Եղնուկյանին քաղբանտարկյալ անվանեց. «Հիմա ընթերցում եմ քաղբանտարկյալ Կարո Եղնուկյանի միջնորդությունը»: Սա առաջացրեց դահլիճում ներկա գտնվողների ծիծաղը:

Քանի որ Նինա Կարապետյանցը դատարանի դահլիճում չէր, նիստը հետաձգվեց: 

Մյուս նիստը նշանակվեց սեպտեմբերի 13-ին. նշենք, որ այդ օրը 170-ից ավել փաստաբաններ գործադուլ են անում՝ ընդդեմ զննության: