Տեղական ինքնակառավարման մարմինները կմնան ՀՀԿ-ի տիրապետության տա՞կ. մյուսները քննարկում են

Նոյեմբերի 5-ին հանրապետության բոլոր մարզերի մի շարք համայնքներում սպասվում են ՏԻՄ ընտրություններ: Արտաշատում եւ Գորիսում կլինեն համայնքի ղեկավարի արտահերթ ընտրություններ, քանի որ Արտաշատի նախկին քաղաքապետը՝ Արգամ Աբրահամյանը, անցած խորհրդարանական ընտրություններում ընտրվեց ԱԺ պատգամավոր «Ծառուկյան» դաշինքից, իսկ Գորիսում նախկին քաղաքապետ Վաչագան Ադունցը հրաժարականի դիմում ներկայացրեց: Մնացած համայնքներում հերթական ընտրություններ են:

ԿԸՀ-ից տեղեկացանք, որ թվով 52 համայնքներում կընտրեն համայնքի ղեկավարներ: Այս համայնքներից 35-ը խոշորացված  համայնքներն են: Ընդ որում՝ այդ 34 խոշորացված համայնքներն իրենց մեջ ներառում են 374 բնակավայր, որից 18-ը քաղաք է, մնացած 357-ը՝ գյուղական բնակավայր:

Այսինքն՝ հանրապետության տարածքի մեծ մասում սպասվում են ՏԻՄ ընտրություններ՝ քաղաքական նշանակալի իրադարձություն: Ճիշտ է՝ դեռ պաշտոնապես ո՛չ համայնքի ղեկավարների, ո՛չ էլ ավագանու անդամների թեկնածությունների պաշտոնական գրանցումը չի մեկնարկել, բայց բոլոր դեպքերում պարզեցինք, թե հատկապես խորհրդարանում ներկայացված ուժերն ինչպես են նախապատրաստվում այս քաղաքական պրոցեսին: Առավել եւս, որ այդ համայնքներից Արտաշատի ու Գորիսի դեպքում «նախընտրական կրքերը» սկսել էին թեժանալ ավելի վաղ:

ԲՀԿ մամուլի խոսնակ Վանիկ Էլիզբարյանը armtimes.com-ին տեղեկացրեց, որ նոյեմբերի 5-ին կայանալիք ՏԻՄ ընտրություններում՝ Արտաշատ և Գորիս քաղաքներում ԲՀԿ-ի մասնակցությունը քննարկման փուլում է:

«Այս պահին ունենք որոշում՝  թեկնածու առաջադրել Սյունիքի մարզի Սիսիան քաղաքում, ինչպես նաև այլ համայնքներում ևս, որի մասին կտեղեկացնենք առաջիկայում՝  վերջնական որոշում ընդունելուց հետո»,- նշեց Էլիզբարյանը:

ՀՅԴ ԳՄ ներկայացուցիչ Աղվան Վարդանյանն էլ armtimes.com -ին հայտնեց, որ վաղը վերջնական պարզ կլինի, թե ՀՅԴ-ն ո՞ր համայնքներում կառաջադրի համայնքի ղեկավարի սեփական թեկնածուներ: Իսկ ընդհանուր առմամբ՝ Վարդանյանը նշեց. «Վերջնական տեղեկություններ կհրապարակենք վաղը, իսկ մինչ այդ՝ այս պահին կարող եմ ասել, որ մտադիր ենք համայնքի ղեկավարի թեկնածու առաջադրել Ախուրյանում: Մնացած համայնքներում դեռ կորոշենք, բայց հիմնականում առաջադրելու ենք ավագանու անդամների թեկնածություններ»:

Աղվան Վարդանյանը հայտնեց նաեւ, թե վերջնական որոշում չկա՝ ում է սատարելու ՀՅԴ-ն  Արտաշատում ու Գորիսում, քանի որ դեռ վերջնական պարզ էլ չէ, թե այդ համայնքներում ով կառաջադրվի:

ԱԺ «Ելք» խմբակցության անդամ Էդմոն Մարուքյանն էլ armtimes.com-ի հետ զրույցում նշեց, որ ոչ միայն Արտաշատի մասով, այլ ընդհանրապես՝ քննարկման փուլում է, թե որ համայնքներում կմասնակցեն ու ինչ ձեւաչափով:

«Ամեն դեպքում՝ չենք ուզում մասնակցել օլիմպիական՝ «կարեւորը մասնակցությունն է» սկզբունքով: Մեր մասնակցությունը չպետք է լինի ինքնանպատակ. կտեսնենք՝ որ համայնքում ունենանք մրցունակ թեկնածու, կարող թիմ, այդ համայնքներում էլ մասնակցելու ենք ընտրություններին»,- նշեց Մարուքյանը:

Իսկ ՀՀԿ կազմակերպչական հանձնաժողովի նախագահ Ռուբեն Թադեւոսյանը armtimes.com-ին հայտնեց, որ ՀՀԿ-ն բոլոր համայնքներում էլ մասնակցելու է ե՛ւ համայնքի ղեկավարի, ե՛ւ ավագանու անդամների ընտրություններին:

«Ճիշտ է՝ քննարկումներ շարունակվում են, բայց բոլոր համայնքների համար էլ մեզ համար պարզ է, թե ովքեր են լինելու մեր թեկնածուները: Նախնական պատկերացումներ ունենք, դեռ կհասցնենք ամփոփել այդ ուղղությամբ քննարկումները, որից հետո մեր մարզային կազմակերպությունները կառաջադրեն մեր թեկնածուներին:  Չնայած ժամանակացույցով մինչեւ հոկտեմբերի 1-ը դեռ ժամանակ ունենք, բայց մենք շատ ենք կարեւորում ՏԻՄ ընտրությունները, քանի որ շատ ենք կարեւորում ՏԻՄ ինստիտուտը եւ վաղուց ենք նախապատրաստվում: Այսօր էլ աշխատանքներն ընթանում են նորմալ, բնականոն հունով, հանրությանը կներկայացնենք մեր թեկնածուներին, որոնց ճակատագիրը կորոշի՝ ընտրական պրոցեսով, թե ժողովուրդն ում կընտրի»,- մեզ ասաց Թադեւոսյանը:  

Ինչ վերաբերում է Արտաշատում, Գորիսում համայնքի ղեկավարի ՀՀԿ թեկնածուների շուրջ ծավալվող քննարկումներին ու մամուլի հրապարակումներին, Թադեւոսյանը նշեց, թե ժողովրդական բանահյուսությանը չեն տրվի, նման խոսակցությունները չեն մեկնաբանի, մինչեւ ՀՀԿ համապատասխան կառույցների որոշումները չլինեն: Հենց որոշումներն եղան, նշեց ՀՀԿ կազմակերպչական հանձնաժողովի նախագահը, արդեն իրենք կներկայացնենք իրենց թեկնածուներին ու հանդես կգան անհրաժեշտ մեկնաբանություններով: