Ձեւավորենք նոր ուժ. Ժիրայր Սեֆիլյանը պատրաստ է նախաձեռնել

Տպագրվել է «Հայկական Ժամանակ» օրաթերթի՝ 2004 թվականի սեպտեմբերի 30-ի համարում

«Ազատագրված տարածքների պաշտպանություն» հասարակական նախաձեռնության ղեկավար Ժիրայր Սեֆիլյանը համոզված է, որ ղարաբաղյան խնդրի կարգավորման գործում վերջին շրջանում նոր սպառնալիքներ կամ երեւույթներ ի հայտ չեն եկել: «Երեք տարի առաջ ինչ վտանգ տեսել ենք, նույնը շարունակվում է այսօր», - երեկ Մամուլի ազգային ակումբում հրավիրված ասուլիսի ժամանակ հայտարարեց պարոն Սեֆիլյանը: Ըստ նրա՝ ԱՄՆ-ի, Մեծ Բրիտանիայի եւ նույնիսկ Թուրքիայի համար էական նշանակություն չունի՝ Աղդամը վերահսկում են հայերը, թե ադրբեջանցիները, քանի որ հիմնական պայքարը ընթանում է Արաքսի հովտի վերահսկողության համար: Ինչպես Ռոբերտ Քոչարյանի ազգային անվտանգության հարցերով խորհրդական Գառնիկ Իսագուլյանը՝ Ժիրայր Սեֆիլյանը եւս համոզված է, որ այդ պայքարում Հայաստանը կարող է հաղթել, եթե մեր երկրում ազգային միասնություն լինի:

Սակայն, ի տարբերություն Իսագուլյանի, որը պնդում է, թե ներկա իշխանությունները հաղթողական քաղաքականություն են վարում, իսկ ՀՀՇ-ական իշխանությունները վարում էին պարտվողական քաղաքականություն եւ ամեն ինչ անում էին Ղարաբաղը Ադրբեջանին հանձնելու համար, Սեֆիլյանը կարծում է, որ նախորդ եւ ներկա իշխանությունների միջեւ ոչ մի տարբերություն չկա: «Մեր իշխանությունները` ոչ նախորդ, ոչ էլ այսօրվա, գաղափարախոսություն չունեն: Նաեւ ընդդիմությունում չկա: Կան անհատական շահեր: Կան քաղաքական գործիչներ, որոնց մտահոգությունը միայն իրենց գրպանն է, եւ մտել են քաղաքական դաշտ միայն առեւտրի համար՝ փող աշխատելու: Այսօր գաղափարական հակասություն իշխանության եւ ընդդիմության միջեւ չկա», - հայտարարեց Սեֆիլյանը:

Նրա ամենահամոզիչ ապացույցն այն էր, որ նախորդ իշխանությունների օրոք, երբ Հայաստանից որեւէ մեկը հայտնվում էր Ադրբեջանում, այսօր իշխանություն դարձած այն ժամանակվա ընդդիմադիրները վայնասուն էին բարձրացնում, իսկ այսօրվա իշխանությունները, նույնը շարունակելով, կողմնակից են հայ-թուրքական սահմանը բացելուն, տասնյակ պատվիրակություններ են գնում Ադրբեջան, եւ ոչ ոք ձայն չի հանում: Սեֆիլյանն ասում է, որ նույն վիճակն է ղարաբաղյան հարցում: «Ովքեր փորձում են ցույց տալ, որ ներկա իշխանությունները տարբերվում են նախորդից՝ սխալվում են: Տարբերությունը մեկն է, որ նախորդ իշխանությունները ինչ-որ իրենց մտքում կար՝ հստակ ասում էին ժողովրդին: Հստակ ասում էին, որ կողմնակից են զիջելու, իսկ սրանք զիջում են, բայց իրենց ձեռքում ազգայնական դրոշ են բարձրացրել՝ իբր թե ազգայնական կազմակերպություններով կոալիցիա են կազմում: Դա սխալ է, սուտ է: Սա է վտանգավորը», - բացատրում է Սեֆիլյանը:

Այս վիճակը փոխելու համար Սեֆիլյանն առաջարկում է փոխել մեր «տխմար քաղաքական ղեկավարությանը»: Նա պահանջում է, որ ամենակարճ ժամանակում Հայաստանի քաղաքական վերնախավում արմատական փոփոխություններ լինեն, քանի որ այդ դաշտում չկա ժողովրդի շահերը պաշտպանող որեւէ կուսակցություն: «Ամեն մի կազմակերպություն սպասարկում է ինչ-որ մի պետության շահերը», - ասում է Լիբանանի քաղաքացի, «Ազատագրված տարածքների պաշտպանություն» կազմակերպության ղեկավար Ժիրայր Սեֆիլյանը, որից լավ՝ որեւէ մեկը դժվար թե դա իմանա: Սակայն նա կարծում է, որ այդ փոփոխությունը պետք է կատարվի ոչ թե առկա ուժերով, այլ միայն այն դեպքում, երբ Հայաստանում կձեւավորվի նոր քաղաքական ուժ: Ավելին՝ գաղափարական ուղղվածությամբ, որի անդամները պատրաստ կլինեն տալու, ոչ թե առնելու, պատրաստ կլինեն զոհողության:

Մեր այն հարցին, թե քանի դեռ այդ ուժը չի ձեւավորվել, ներկա իշխանությունները պետք է շարունակեն պաշտոնավարե՞լ, Սեֆիլյանն ըստ էության տվեց դրական պատասխան. «Մի օր առաջ եթե գնան՝ օգուտ է, բայց եթե եկողը որակական փոփոխություն չպետք է մտցնի` ոչ մի օգուտ»: Սեֆիլյանը վստահեցնում է նաեւ, որ այդ նոր քաղաքական ուժը ձեւավորելու հարցում ինքն անպայման որոշակի դերակատարում ունենալու է. «Արդեն հասունացած է վիճակը, եւ մենք այլեւս ձեռքներս ծալած երկար չենք կարող նստել: Մեր երկրի ղեկը պետք է լինի առողջ մարդկանց, բարոյականի տեր մարդկանց ձեռքում: Այդ պրոցեսին անպայման մասնակցելու եմ, եթե հարկ լինի՝ անպայման նախաձեռնելու եմ»:

Ավետիս Բաբաջանյան