Պտտվիր, պտտվիր, կարուսել. ուլտիմատում՝ դաշնակցական ձեւով

Տպագրվել է «Հայկական Ժամանակ» օրաթերթի՝ 2004 թվականի հոկտեմբերի 2-ի համարում

Եթե մեկ նախադասությամբ ամփոփելու լինենք դաշնակցության երեկ հրավիրած ասուլիսը, ապա դա ուղղակի ուլտիմատում էր Ռոբերտ Քոչարյանին՝ իր շրջապատի որոշ ազդեցիկ պաշտոնյաներին պաշտոնանկ անելու պահանջով: «Վերջապես, մենք կարծում ենք, ժամանակն է, որպեսզի նախագահի շրջապատում գտնվող պատասխանատու կադրերը չփորձեն պատսպարվել նախագահի թիկունքում: Պետք է լինի ճիշտ հակառակը. նրանք՝ իրենց վարքով եւ աշխատանքով պետք է բարձրացնեն նախագահի վարկանիշը: Դժբախտաբար, պետք է արձանագրենք, որ ոմանք այսօր պահպանում են իրենց դիրքերը՝ լոկ նախագահի հեղինակության հաշվին»,- ասուլիսի կեսից ասուլիս հրավիրելու բուն դրդապատճառը բացահայտեց ՀՅԴ Հայաստանի ԳՄ ներկայացուցիչ Արմեն Ռուստամյանը:

Եւ քանի որ ՀՅԴ-ն սիրում է նամյոկներով քաղաքական հարցեր լուծել, Արմեն Ռուստամյանի նախապես արած մեկ այլ հայտարարությունից էլ պարզ դարձավ, որ խոսքը նախագահի շրջապատի այն պատասխանատու կադրերի մասին է, որոնք պլուտոկրատ են. այսինքն՝ իշխանության են հասել փողով եւ իշխանությունը պահում են փողով: «Անհրաժեշտ է հստակ արձանագրել, որ երկրում ձեւավորվում է փողի եւ հարստության իշխանություն, եւ դեմոկրատիայի փոխարեն ավելի ու ավելի է հաստատվում պլուտոկրատիան՝ հարստության իշխանությունը, իր բոլոր արատավոր դրսեւորումներով եւ վտանգավոր հետեւանքներով: Իսկ պլուտոկրատիայի աստիճանն ուղիղ համեմատական է երկրում առկա կոռուպցիայի աստիճանին:

Մինչդեռ, մենք արդեն իսկ հայտարարել ենք, որ երկրում առկա կոռուպցիայի աստիճանն այլեւս վտանգում է երկրի քաղաքական կայունությունը»,- հայտարարեց ՀՅԴ ԳՄ ներկայացուցիչը: Որ նախագահի շրջապատում ինչ ասես կա, նաեւ՝ պլուտոկրատներ ու էլի ուրիշ բաներ, Արմեն Ռուստամյանն, իհարկե, այս հարցում չի սխալվում: Սակայն, այս էլ որերորդ անգամ ՀՅԴ բարձրաստիճան ներկայացուցիչներն անանուն ակնարկներ են անում ինչ-ինչ բարձրաստիճան պաշտոնյաների հասցեին ու այդպես էլ համարձակություն չեն ունենում հրապարակավ որեւէ անուն հնչեցնելու: Ուստի, երեկ մենք Արմեն Ռուստամյանին հարցրեցինք՝ դաշնակցությունը վախենո՞ւմ է տալ այն պաշտոնյաների անունները, ովքեր իրենց վարքով ու աշխատանքով վարկաբեկում են երկիրն ու, ըստ ՀՅԴ-ի, նաեւ  Քոչարյանին:

«Մենք ոչ մի բանից չենք վախենում: Պարզապես չենք կարծում, որ այս պահին այդ անունների հրապարակումը գործին կօգնի: Բայց, եթե տեսնենք, որ  այլեւս ոչ մի միջոց չի ազդում, ոչ միայն կտանք այդ անունները, այլ նաեւ համապատասխան փաստերով կդիմենք, որպեսզի նրանց հանդեպ թե՛ վարչական, թե՛ քրեական գործեր հարուցվեն»,- մեր հարցին ի պատասխան ասաց ՀՅԴ ԳՄ ներկայացուցիչը:  Այդուհանդերձ, ինչո՞ւ էր երեկ, ՀՅԴ ԳՄ ժողովից առաջ, դաշնակցությունն ասուլիս հրավիրել, որի մասին ազդարարել է դեռեւս մեկ ամիս առաջ: Երեկ լրագրողները սպասում էին, որ դաշնակցության պատասխանատուները կխոսեն կոալիցիոն կառավարության սպառվածության եւ երկիրը գերեզմանային կայունության տանելուց, ինչի մասին մինչասուլիսյան հրապարակումներում բազմիցս ակնարկում էին դաշնակցության ներկայացուցիչները:

Սակայն, պարզվում է, ՀՅԴ-ի գործընկերները շատ ավելի լավ են ճանաչում իրենց դաշնակցին, եւ իզուր չէր, որ վերջիններս անտարբեր արձանագրում էին՝ ՀՅԴ-ի ուզածը մի քանի պաշտոն է, որոնց վրա դաշնակցությունը վաղուց աչք ունի: Եւ ինչպես սիրում է կրկնել ՀՀԿ խիստ բարձրաստիճան մի պաշտոնյա՝ եթե անգամ դաշնակներին ցախավելով էլ քշենք, նրանք կոալիցիայից դուրս եկողը չեն:

Եւ իրոք, եթե ՀՅԴ-ի մղումն իսկապես անկեղծ է, ու եթե իրոք կան բարձրաստիճան պաշտոնյաներ, որոնց վարքն ու աշխատանքը վարկաբեկիչ է երկրի հեղինակության համար, եւ դաշնակցությունն էլ հատորներով գործեր ունի այդ պաշտոնյաների կատարած ապօրինությունների եւ չարաշահումների վերաբերյալ, ապա այդ պաշտոնյաների անունները չհրապարակելը հավասազոր է հանցագործությունը պարտակելուն: Իսկ պարտակում են միայն այն դեպքում, եթե այդ ամենն ասվում է ոչ թե հանուն երկրի, այլ հանուն անձնական շահի: Այլապես, ստացվում է, «Հայ արիական միաբանության» նախագահի՝ արվամոլներին բացահայտելու սպառնալիքին զուգահեռ, ՀՅԴ-ն էլ իր մասով է քաղաքական դաշտ ներմուծում հանցագործ պաշտոնյաներին բացահայտելու սպառնալիքը:    

Ինչեւէ, ասուլիսի մնացած մասը ՀՅԴ ԳՄ անդամներ Արմեն Ռուստամյանն ու Լեւոն Մկրտչյանը նվիրեցին իրենց ներկայացրած հակակոռուպցիոն փաթեթի օրենսդրական նախաձեռնությունների վերլուծությանը եւ Ընտրական օրենսգրքին: Ու որպեսզի ասուլիսին ներկա լրագրողները լրիվ չհիասթափվեն չարդարացած սպասումներից, Արմեն Ռուստամյանը համենայնդեպս տեղեկացրեց, որ եթե իրենք դուրս գալու լինեն կոալիցիայից, դա կանեն շատ հանգիստ՝ առանց այդ մասին նախապես ամպագոռգոռ հայտարարություններ անելու:

Նաիրա Զոհրաբյան