Արկադի Վարդանյանի անվտանգության խնդիր կա՞, ինչու նրա պահման ռեժիմը չի փոխվում

Քաղաքագետ Արկադի Վարդանյանի պատժի կրման տեսակի փոփոխման հարցը անընդհատ ձգձգվում է, ներկայացված դիմումը՝ մերժվում: 4 տարի առաջ Արկադի Վարդանյանը անազատության մեջ է հայտնվել ընկերոջ հորը թունավորելու փորձի համար: 2013 թվականին քաղաքագիտության դոկտոր, հրապարակախոս Արկադի Վարդանյանը դատապարտվել է 10 տարվա ազատազրկման:

Կիրառված համաներման արդյունքում նրա պատժաչափը նվազել է: Մեր զրույցում Արկադի Վարդանյանի պաշտպան Նիկոլայ Բաղդասարյանն ասաց, որ իր պաշտպանյալը պահվում է կիսափակ ռեժիմով, սակայն ՀՀ քրեակատարողական օրենսգրքի համաձայն նրա պահման ռեժիմը պետք է փոփոխվեր կիսաբաց ռեժիմով: Երկու ռեժիմների տարբերությունն այն է, որ կիսափակ ռեժիմը խցիկային ռեժիմ է, իսկ կիսաբաց ռեժիմը խցիկային չէ: Այսինքն` Արկադի Վարդանյանը պատիժը կկրի ՔԿՀ-ի պատերի ներսում, բայց ոչ խցում:

Բաղդասարյանի խոսքով՝ պատժի կեսը կրելուց հետո իր պաշտպանյալը իրավունք ուներ դիմելու, որպեսզի իր ռեժիմը փոխեն, ինչն էլ՝ արել է: «Օրենքով նախատեսված են այն բացառությունները, երբ պատժի կրման ռեժիմը պետական մարմինները չեն կարող փոխել: Օրենքով նման կարգավորում տրվել է, որպեսզի բացառեն կոռուպցիոն ռիսկերը: Այսինքն՝ պետությունը հայեցողական լիազորությամբ չի օժտված այս հարցում, այլ եթե կա ստույգ փաստ, որ այդ բացառությունը առկա է՝ չեն փոխում, չկա ստույգ փաստ՝ պետք է փոխեն: Փոփոխությունը ռեժիմի բացառապես պայմանավորված է դատապարտյալի վարքագծով, եւ չի կարող պայմանավորված լինել քրեակատարողական հիմնարկի պաշտոնատար անձանց համոզմունքով»,- ասաց Բաղդասարյանը:

Վերջինիս խոսքով՝ ժամկետը լրանալուց հետո Արկադի Վարդանյանը դիմում է ներկայացրել «Արմավիր» ՔԿՀ-ին կիսաբաց ռեժիմ տեղափոխելու վերաբերյալ, հիմնարկն էլ դիմումը բավարարել է եւ գրավոր միջնորդագիր է ուղարկել ՀՀ քրեակատարողական վարչության համապատասխան հանձնաժողովին: Սակայն վարչությունը ներկայացված միջնորդագիրը տեխնիկական սխալի պատճառով ետ է վերադարձրել, այնինչ պաշտպան Նիկոլայ Բաղդասարյանի պնդմամբ, որեւէ տեխնիկական սխալ միջնորդագրում չի եղել, ինչը հաստատեց դատարանում «Արմավիր» ՔԿՀ-ի ներկայացուցիչը: Ուստի պաշտպանական կողմը դիմել է դատարան՝ համարելով, որ միջնորդագիրն անօրինական են մերժել, եւ միջնորդել է միջնորդագիրը մերժած պաշտոնատար անձին հրավիրել դատարան, որը դատարանը բավարարել է: Սակայն անսպասելիորեն ՀՀ քրեակատարողական վարչությունից դատավորը ստանում է նամակ, որ պաշտոնատար անձը չի ցանկանում գալ դատարան եւ տալ բացատրություն, այսպես ասած, առանց իր բացատրության տալու առաջարկում է դատարանին «յոլա գնալ»:

Ըստ պաշտպանի, դատարանը փոխանակ ձեռնարկի միջոցներ, որպեսզի ի կատար ածվի իր որոշումը, նոր որոշում է կայացնում՝  չհարցաքննել ՀՀ քրեակատարողական վարչության ներկայացուցչին: Նիկոլայ Բաղդասարյանի խոսքով՝ դատարան դիմելուց հետո «Արմավիր» ՔԿՀ-ն Արկադի Վարդանյանի անձնական գործում ավելացրել է մի փաստաթուղթ, ըստ որի՝ նրա անձնական կյանքի անվտանգությանը սպառնալիք կսպառնա, եթե բավարարվի իր դիմումը: «Նախ «Արմավիր» ՔԿՀ-ում Արկադի Վարդանյանը չի կարող պահվել կիսաբաց ռեժիով, քանի որ այնտեղ նման ռեժիմով պահվում են միայն «սպասարկող» դատապարտյալները, իսկ Արկադի Վարդանյանն իր առողջական խնդիրներով չի կարող նման աշխատանք կատարել»: Հետեւաբար՝  Նիկոլայ Բաղդասարյանը գտնում է, որ այդ հիմնավորումը մտացածին է: «Ես բացառում եմ, որ ՀՀ քրեակատարողական որեւէ հիմնարկում չկարողանան նրա անվտանգությունն ապահովել: Այս քայլով նրանք փորձում են արդարացնել ՀՀ քրեակատարողական վարչության թույլ տված անօրինականությունը»,- ասաց Արկադի Վարդանյանի պաշտպանը:

Բացի այդ, Վարդանյանն առողջական խնդիրներ ունի, իրականում այդ ռեժիմում նրան պահելն ազդում է առողջական վիճակի վրա: Մեր հարցին, թե, այնումենայնիվ, ո՞րն է պատճառը՝ դիմումը չբավարարելու արդյո՞ք քաղաքական ենթատեքստ կա, թե՞ ոչ, Նիկոլայ Բաղդասարյանը պատասխանեց. «Իմ պաշտպանյալը քաղաքական է համարում: Ես կարծում եմ պատճառը պաշտոնատար անձանց անփութությունն է: Կարելի էր միջնորդագիրը բավարարել, անձին տեղափոխել կիսաբաց ռեժիմ եւ դրանով ամեն ինչ ավարտել»,- մեր զրույցում եզրափակեց Նիկոլայ Բաղդասարյանը:

Հիշեցնենք, որ 2014 թվականին Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավճռով՝ հոր սպանությունը նախապատրաստելու մեջ մեղադրվող Արսեն Ավետյանը դատապարտվել է 11 տարվա, իսկ քաղաքագիտության դոկտոր, ՌԴ քաղաքացի Արկադի Վարդանյանը՝ նույն մարդու թունավորման փորձի համար՝ 10 տարվա ազատազրկման: Արկադի Վարդանյանին մեղադրանք է առաջադրվել ՀՀ քրեական օրենսգրքի 38-35-104-րդ հոդվածի 2-րդ մասի 8-րդ կետով, որում և ճանաչվել է մեղավոր: