Ժիրայր Սեֆիլյանի կողմից անկարգությունների եւ բռնի գործողությունների կոչեր չեն հնչել. վկա

Շենգավիթ վարչական շրջանի ընդհանուր իրավասության դատարանում Սեֆիլյանի եւ մյուսների գործով այսօրվա նիստի ժամանակ գործով ամբաստանյալ Ներսես Պողոսյանի պաշտպան Արայիկ Պապիկյանը մի քանի միջնորդություններ ներկայացրեց:

Նա հերթական անգամ միջնորդեց Պողոսյանի խափանման միջոց կալանքը փոխելու վերաբերյալ, որը դատավոր Տաթեւիկ Գրիգորյանը թողեց առանց քննության: Հիշեցնենք, որ նախորդ նիստում եւս նման միջնորդություն էր ներկայացվել, որի մերժումից մինչ օրս Ներսես Պողոսյանը հացադուլ է անում: Այնուհետեւ Արայիկ Պապիկյանը ներկայացրեց դատավոր Տաթեւիկ Գրիգորյանի ինքնաբացարկի միջնորդություն՝ պնդելով, որ դատավորն անաչառ չէ. «Ձեր համար ավանդույթ է մեր միջնորդությունները մերժելը: Դուք կանխակալ վերաբերմունք ունեք Ներսես Պողոսյանի հանդեպ: Հիմնավոր կասկածներ ունենք, որ դուք չեք կարող հանդես գալ որպես օբյեկտիվ դատավոր»,- ասաց Պապիկյանը: Ներկայացված միջնորդության դեմ առարկեցին գործով մեղադրող դատախազները, ապա դատարանը հեռացավ խորհրդակցական սենյակ եւ վերադառնալով՝ այս միջնորդությունը եւս մերժեց:

Դատավորն այսօր մի քանի անգամ սանկիցա կիրառեց ամբաստանյալների նկատմամբ՝ ոտքի չկանգնելու պատճառով: Այս անգամ, սակայն սանկցիան միայն նախազգուշացման տեքսով էր: Նշենք, որ նմանատիպ իրավիճակներում դատավոր Տաթեւիկ Գրիգորյանը մի քանի անգամ ամբաստանյալներին մի քանի ժամով հեռացրել է նիստերի դահլիճից:

Դատարանում այսօր հարցաքննվեցին մի քանի վկաներ, որոնց տված ցուցմունքները, ըստ էության, առնչություն չունեին քրեական գործի հետ:

Մասնավորապես՝ հարցաքննվեց Աննա Ա.-ն: Վերջինիս ազգանունը ներկայացնում ենք կրճատ, քանի որ ապակիներից այս կողմ՝ լրագրողների համար լսելի չէր այն: Լսելիության հարցը կարգավորվեց մի քանի զգուշացումներից հետո միայն: Վկան դատարանին հայտնեց, որ ճանաչում է Ժիրայր Սեֆիլյանին եւ Վարուժան Ավետիսյանին: Նրա  հետ աշխատանքային հարաբերություններ է ունեցել՝ աշխատելով համապատասխանաբար «Նախախորհրդարան»-ում, հետագայում՝ «Հիմնադիր Խորհրդարան» եւ «Առանցք» հասարակական կազմակերպություններում` որպես թարգմանիչ, նաեւ լուսաբանել է «Հիմնադիր Խորհրդարան»-ի միջոցառումները՝ երթերն ու ցույցերը: Վկայի խոսքով՝ որոշ ժամանակ աշխատելով Սեֆիլյանի ղեկավարության ներքո՝ որոշել է դուրս գալ ՀԽ-ից, քանի որ մասնագիտական եւ գաղափարական տարաձայնություններ են առաջացել. «Ես կարծում էի, որ երթերն ու ցույցերն արդյունավետ չեն, որովհետեւ գնալով մարդկանց թիվը նվազում էր: Այդ պատճառով որոշեցի դուրս գալ»,- պատմեց Աննա Ա.-ն: Նա նաեւ նշեց, որ ՀԽ-ի ղեկավարներ Ժիրայր Սեֆիլյանի եւ Վարուժան Ավետիսյանի կողմից անկարգություններ եւ բռնի գործողություններ կազմակերպելու կոչեր չեն հնչել: Հրապարակվեց վկայի նախաքննական ցուցմունքը, որում ասված է. «Ես բռնության կողմնակից չեմ եւ նրանց գաղափարները չկիսելու պատճառով դուրս եկա ՀԽ-ից»: Մեղադրող դատախազների հարցերին ի պատասխան վկան հստակեցրեց, որ խոսքը միայն գաղափարական տարաձայնության մասին է: 

Այնուհետեւ հարցաքննվեց վկա Արմեն Հովսեփյանը: Վերջինս ասաց, որ ամբաստանյալներից որեւէ մեկին չի ճանաչում: Ասաց, որ աշխատում է ավտովարձույթի սրահում՝ տնօրեն է:

Դատավորն առաջարկեց վկային ցուցմունք տալ քրեական գործով իրեն հայտնի հանգամանքների շուրջ, ի պատասխան վկան ասաց. «տեղյակ չեմ»: Դատավորի դիտարկմանը՝ նախաքննության ընթացքում հարցաքննվել եք, վկան դրական պատասխան տվեց, ապա շարունակեց. «Մեքենայի վարձակալություն է մեր մոտից եղել, բայց ես չէի հիշում տվյալ անձին»,- ասաց նա: Հարցաքննությունից պարզ դարձավ միայն այն, որ այս վկան վարձով ավտոմեքենա էր տվել ամբաստանյալներից Գալուստ Գրիգորյանին: Այսքանով նրա հարցաքննությունն ավարտվեց:

Մյուս վկան՝ Մարիամ Սարգսյանն է: Մինչ ցուցմունք տալը՝ դիմելով դատարանին նա ասաց՝ իր դատարան կանչվելու պատճառն այդպես էլ չի հասկացել: Սարգսյանը հայտնեց, որ լեզվաբան է, սովորել է Վալերի Բրյուսովի անվան համալսարանում: Ասաց, որ ինքն ընդամենը մոտ երեք տարի առաջ բաժանորդագրվել է «Նախախորհրդարան» ընդդիմադիր կազմակերպության էլեկտրոնային հասցեին՝ նորություններ ստանալու նպատակով, ընդ որում, դա նրան պետք էր համալսարանում քաղաքագիտական վերլուծություններ անելու առաջադրանքի համար: Վկայի խոսքով՝ բուհն ավարտելուն պես նա դադարեցրել է բաժանորդագրությունը:

Վկաների հարցաքննությունն այսքանով ավարտվեց: Եվս մի քանի վկայի հաջորդ նիստում բերման ենթարկելու որոշում կայացվեց, քանի որ նրանք ծանուցվել են, բայց չեն ներկայացել: 

Վկաներին բերման ենթարկելուն դեմ էր ամբաստանյալ Ներսես Պողոսյանը. «Մարդ են, էսօր չեն եկել, մյուս շաբաթ կգան»,- ասաց նա:

Սույն գործով հաջորդ դատական նիստը տեղի կունենա հոկտեմբերի 13-ին: