Անորոշություն. վտարում են ոչ միայն կենտրոնից

Տպագրվել է «Հայկական Ժամանակ» օրաթերթի՝ 2004 թվականի հոկտեմբերի 7-ի համարում

Երեւանի քաղաքապետ Երվանդ Զախարյանը ապրիլի 6-ին որոշում է կայացրել Լենինգրադյան փողոցի 16 հասցեում գտնվող տրամվայի պարկի վարչական մասնաշենքում բնակվողներին վերաբնակեցնել Բագրատունյաց 44 հասցեում գտնվող տրոլեյբուսի պարկի վարչական շենքում: Քաղաքապետը հանձնարարել է Երեւանի «Էլեկտրատրանսպորտ» ՓԲԸ-ին, որը տնօրինում է այս տարածքը՝ «մեկշաբաթյա ժամկետում լուծել վերաբնակեցման հարցը, հակառակ դեպքում դատական կարգով վտարել վերջիններիս իրենց զբաղեցրած տարածքից»: Որոշումը վերաբերում է 7 ընտանիքի՝ թվով 20 անձի. նրանք շուրջ 14 տարի՝ 1990-ից սկսած բնակվում են այդտեղ: 90-ականներին տրամվայը մայրաքաղաքային գրեթե միակ գործող տրանսպորտն էր, եւ տրամվայ վարողների ու սպասարկողների պակաս էր զգացվում:

Որպեսզի մարդիկ համաձայնեն աշխատել ոչ բարձր աշխատավարձով եւ այլ աշխատանք չփնտրեն, տրամվայի պարկի ղեկավարությունն իր աշխատակիցներին բնակության համար տարածք էր տրամադրել պարկի վարչական շենքում: Աշխատատեղին առավել հիմնավոր կապելու համար նաեւ պայմանագրեր էին կնքել այս անձանց հետ, որ եթե նրանք 6 տարի՝ մինչեւ 1996թ. աշխատեն պարկում՝ նրանց բնակարաններ կտրամադրվեն: Այս 7 ընտանիքը, որից 4-ը փախստականներ են Ադրբեջանից, համաձայնել են այս պայմաններին, բնակություն հաստատել այստեղ, բարեկարգել վարչական շենքը եւ տարիներ շարունակ խնամել: Ինչ իմանային, որ 14 տարի անց տրամվայը վտարելու են մեր կյանքից, իսկ տրամվայը սպասարկողներին՝ պարկի տարածքից, նրանց հետ կնքված պայմանագրերը դառնալու են թղթի կտոր, իսկ զբաղեցրած տարածքը՝ հերթական համեղ պատառ որոշ կառուցապատողների համար:

Նշված տարածքն առայժմ պատկանում է Երեւանի «Էլեկտրատրանսպորտ» ՓԲԸ-ին, մեկ ամիս առաջ՝ «Երեւանտրանսինն» էր, որոնք իրենց չեն համարում նախկին տրամվայի պարկի իրավահաջորդը: Նրանք համարում են, որ կարող են ժառանգել պարկի գույքը, բայց ոչ՝ վերջինիս պարտավորությունները: Այնպես, ինչպես Երեւանի քաղսովետի պարտավորությունները չի պատրաստվում ժառանգել Երեւանի քաղաքապետարանը (աշխատակիցների հետ պայմանագրերը հաստատել է քաղսովետը): Սակայն այս 7 ընտանիքները բոլորովին չեն հավակնում, որ իրենց շքեղ բնակարաններով կապահովեն, անգամ չեն հավակնում, որ իրենց այնքան գումար կտան, որ կարողանան Երեւանում բնակարան գնել:

Նրանք համաձայն են Երեւանից դուրս բնակություն հաստատել, միայն թե կարողանան բնակության համար քիչ թե շատ պիտանի բնակարաններ ձեռք բերել՝ չնայած միջազգային կոնվենցիաները եւ ՀՀ կառավարության 1992-ի թիվ 598 որոշումն ասում են, որ փախստականներին իրենց տարածքներից կարելի է վտարել միայն համարժեք կացարանով ապահովելու դեպքում: Վտարման վտանգի առաջ հայտնված մարդիկ գնացել են տրոլեյբուսի պարկ՝ Բագրատունյաց 44 եւ տեսել, որ նշված վարչական շենքում ոչ միայն տարրական պայմաններ չկան, այլեւ ուղղակի բնակտարածք չկա՝ ընդամենը 6 փոքր սենյակ, որոնց մի մասը 10 ք/մ-անոց է: Չկան սանհանգույց, խոհանոց, կոմունալ հարմարություններ: Հայտնի չէ, թե ինչպես են պատրաստվում 7 ընտանիքը տեղավորել 6 սենյակում: Բացի այդ, չէ՞ որ շուտով գալու է նաեւ տրոլեյբուսի պարկի հերթը:

Եթե 14 տարի տրամվայի պարկում աշխատելը եւ բնակվելը հիմք չէ, ի՞նչ երաշխիք կա, որ տրոլեյբուսի պարկի տարածքի ապագա սեփականատերը եւս չի ցանկանալու հյուրանոց կամ սաունա բացել եւ կրկին չի վտարելու այս մարդկանց: Այս գործն արդեն դատարանում է. «Էլեկտրատրանսպորտ» ՓԲԸ-ն դիմել է դատարան՝ նշելով, որ այս մարդիկ խոչընդոտում են ընկերությանն՝ «իր հայեցողությամբ տիրապետելու գույքը», եւ խնդրել է վտարել նրանց: Մալաթիա-Սեբաստիա համայնքի դատավոր Իսկուհի Վարդանյանը քննում է հայցը: Դատական գործին զուգահեռ՝ ՓԲԸ-ն բուռն շինարարություն է ծավալել՝ նորոգում, մոդեռնացնում է Լենինգրադյանի վրա գտնվող շինությունները:

Արդեն անջատել են վարչական շենքի ջուրը, հոսանքը, կոյուղին: 4 փախստական ընտանիքները դիմել են ՄԱԿ-ի փախստականների գրասենյակին, որը ծանոթանալով գործի մանրամասներին՝ ստանձնել է նրանց իրավունքների պաշտպանությունը: Ըստ գրասենյակի հանրային կապերի գծով պատասխանատու Ռոզա Մինասյանի՝ իրենք այս դեպքը դիտարկում են որպես մարդուն բռնի կերպով իր բնակարանից վտարելու փաստ, ինչը մարդու իրավունքների կոպիտ ոտնահարում է: Նրանք դիմել են իրենց մշտական գործընկերոջը՝ ՀՀ իրավաբանների միությանը, որը փաստաբան է տրամադրել այս անձանց իրավունքները դատարանում պաշտպանելու համար: Տվյալ դեպքում լուծումն, իրենց կարծիքով, կարող է լինել երկու տարբերակով. կամ՝ համարժեք բնակարանների ապահովում, կամ՝ բնակարանի ձեռքբերման համար անհրաժեշտ գումարի տրամադրում:

Արմինե Օհանյան