Սեֆիլյանի գործով վկային 19 ժամ պահել են անազատության մեջ. նա հաշվառված է հոգեբուժարանում

Ժիրայր Սեֆիլյանի եւ մյուսների գործով այսօր տեղի ունեցած նիստում որպես վկա հարցաքննվեց 65-ամյա Աշոտ Պետրոսյանը: 

Նրա ցուցմունքից պարզ դարձավ, որ 16 տարի է հոգեմետ դեղեր է օգտագործում: Դատավոր Տաթեւիկ Գրիգորյանի հարցին, թե ի՞նչ գիտի սույն քրեական գործի մասին, վկան ասաց, որ ոչինչ չգիտի, եւ չգիտի, թե ինչու են իրեն առանց հարցնելու բերել դատարան: Նշենք, որ վկային բերման են ենթարկել դատարան, քանի որ մի քանի անգամ ծանուցվելուց հետո չի ներկայացել դատարան:

Վկան դժգոհեց, որ առավոտյան դեղահաբեր է ընդունել եւ երկու ժամ անց պետք է սնվեր, սակայն արդեն մի քանի ժամ է դատարանում է: Նշենք, որ նրա հարցաքննությունը կիսատ էր մնացել այն պատճառով, որ Սեֆիլյանի պաշտպան Տիգրան Հայրապետյանը մի քանի միջնորդություններ էր ներկայացրել դատարանին:

Աշոտ Պետրոսյանը դատարանում հայտնեց, որ ճանաչում է միայն ամբաստանյալներ Ժիրայր Սեֆիլյանին եւ Գեւորգ Սաֆարյանին՝ որպես «Նախախորհրդարան» կազմակերպության («Հիմնադիր խորհրդարան») անդամների: Տեսել է իրենց բարեւել, անցել: Նա ասաց, որ մասնակցել է բողոքի ակցիաներին, քանի որ իրեն համարում է արդարության մարտիկ:

Մեղադրողներից Պետրոս Պետրոսյանի հարցին՝ էլ ո՞ւմ է ճանաչում այդ կազմակերպությունից, վկան հարցով պատասխանեց. «Ի՞նչ կապ ունի, թե ում եմ ճանաչում: Ես հիշողությունից մի քիչ թույլ եմ, ես շատ վատ վիճակում եմ, առողջական խնդիրներ ունեմ, առանց զգուշացնելու բերել եք էստեղ»,- արձագանքեց նա: Դատավորը մի քանի անգամ վկայից հետաքրքրվեց, թե ինքնազգացողությանը վա՞տ է, թե՞ ոչ, կարո՞ղ է շարունակել հարցաքննությունը, թե՞ ոչ, ապա վկային թույլատրեց հարցերին պատասխանել նստած:

Պետրոսյանը նշեց, որ որպես աջակից մի քանի ամիս ապրել է Մերգելյան ինստիտուտի մոտ գտնվող բնակարանում: Մեղադրողի հարցին՝ ով է իրեն այդ բնակարանում թույլ տվել ապրել, վկան նշեց՝ չի հիշում:

«Ես պիտի դուրս գայի էդ օրը, իմ ժամը լրացել էր, ոհմակով մտան մի 30 հոգի, ես ասում էի՝ ձեռք մի տվեք, բայց խուզարկեցին բնակարանը, էն սենյակում, որ մնում էի, պահարան կար, որտեղից բաներ գտան՝ ձողեր, դուբինկաներ»: Մեղադրող դատախազի ճշտող հարցին, թե խուզարկությանը ընթերականեր մասնակցե՞լ են, վկան նախ ասաց, որ երկու հոգու տեսել է, ապա Պետրոս Պետրոսյանից հետաքրքրվեց, թե ընթերական ինչ է: Մինչ դատախազի պատասխանելը նա ասաց, որ այս տարիների ընթացքում առաջին անգամ է, որ հայտնվում է նման իրավիճակում:

Երբ նախագահող դատավոր Տաթեւիկ Գրիգորյանը վկային փորձում էր պարզաբանել, թե ընթերական ինչ է, Սեֆիլյանի պաշտպան Տիգրան Հայրապետյանն ասաց, որ վկան արդեն իսկ պատասխան հնչեցրել է եւ հորդորեց վկայի նկատմամբ ճնշումներ չգործադրել: Նախագոհղ դատավորը վկայից հետաքրքրվեց, թե դատարանն իր վրա ճնշում գործադրո՞ւմ է, վկան ասաց. «Ես առանց այն էլ ճնշված եմ»: Դատավորի ճշտող հարցին, թե դատավորը ձեզ ճնշո՞ւմ է, վկան հետեւյալ պատասխանը տվեց. «Դո՞ւք եք դատավորը»: Նրա պատասխանը ծիծաղ առաջացրեց թե՛ դատավարության մասնակիցների, եւ թե՛ դահլիճում ներկա գտնվողների մոտ: 

Վկայի հարցաքննությունից պարզ դարձավ, որ նրան 19 ժամ հարցաքննել են՝ առավոտյան ժամը 07:00-ից մինչեւ գիշերը 02:00-ը: Այդ ընթացքում ոչ հասցրել է դեղահաբերը ընդունել, ոչ էլ սնվել: «Մինչեւ 2-ը պահել են, քննչականի պետի տեղակալն էլ մատ էր թափ տալիս, թե գրի»,- ասաց վկան:

Սեֆիլյանի պաշտպանի հարցին ի պատասխան՝ 65-ամյա վկան ասաց, որ Ժիրայր Սեֆիլյանի կողմից զանգվածային անկարգություններ կազմակերպելու կոչերից տեղյակ չէր, նրա կողմից համենայնդեպս անկարգությունների կոչեր չի լսել: Նա շտապեց հայտարարել, որ շատ է հարգում Սեֆիլյանին: Պարզվեց նաեւ, որ «Նախախորհրդարան»ի տրամադրած բնակարանում վկան աշխատել է որպես պահակ: Ապա անկեղծացավ, որ ըստ էության, պահակություն չի էլ արել:

Մեղադրող դատախազ Պետրոս Պետրոսյանը միջնորդեց հրապարակել վկայի նախաքննական ցուցմունքը՝ էական հակասություններ տեսնելով դատարանում տված ցուցմունքների միջեւ: Դատարանը բավարարեց դատախազի միջնորդությունը:

Ըստ վկայի նախաքննական ցուցմունքի՝ ինքը մոտ 4 ամիս ապրել է Ժիրայր Սեֆիլյանի վարձակալած բնակարանում, որն օգտագործվել է որպես «Նախախորհրդարանի» գրասենյակ: Նա  պատմել է, որ մոտ 4 ամիս մնացել է այդ բնակարանում:

Աշոտ Պետրոսյանը նախաքննության ընթացքում հայտնել է նաեւ, որ բնակարանում առգրավված բոլոր իրերը կամ Սեֆիլյանն է բերել, կամ նրա ցուցումով է տեղափոխվել այնտեղ: Նա հայտնել է նաեւ, թե անհնազանդության կոչեր է արել Ժիրայր Սեֆիլյանը, ու այդ իրերը հենց այդ նպատակով են ձեռք բերվել: Ցուցմունքի հրապարակման ժամանակ վկան պարբերաբար ընդհատում էր դատաախազին՝ բղավելով. «սուտ  է»: Իսկ երբ մեղադրողը ավարտեց ցուցմունքի հրապարակումը, վկան ծափահարեց, ապա դիմելով դատարանին՝ ասաց, որ 99 տոկոսն իրականությանը չի համապատասխանում: Մի քանի րոպե հետո, սակայն, տոկոսների չափը նվազեց. «60-70 տոկոսն իրականությանը չի համապատասխանում»,- ասաց նա: «Ինձ մինչեւ գիշերը 2-ը հարցաքննել են, բայց հիմա էդտեղ գրած ա՝ մինչեւ 18:50-ը, բայց ըսենց բան չկա: Ստորագրություններն իմն են, բայց թե էս ինչ ա, չեմ հասկանում, ոնց են նկարել»,- դատարանում ասաց նա::

Տիգրան Հայրապետյանի հարցին՝ 19 ժամվա հարցաքննությունից հետո ուշադի՞ր է կարդացել ցուցմունքը, վկան դրական պատասխան տվեց. «Երկու լիստ ա եղել ընդամենը, մեկի վրա ստորագրել եմ, մյուսի վրա էլ հարցերն են եղել, բայց էսքան երկար-բարակ չի եղել, էս սաղ հեքիաթներ են: Ինձնից ուզում էին իմանալ՝ դուբինկեքն ինչի համար են… որ եկել են խուզարկության, էդ տղաներն են դուռը բացել, ես էլ տկլոր եմ եղել, չի բացառվում, որ էդ դուբինկեքն իրանք էլ բերած լինեին, սրիկաները»: Վկայի հարցաքննությունից հետո Տիգրան Հայրապետյանը միջնորդեց քրեական գործ հարուցել, վկայի նկատմամբ ճնշում գործադրելու, անձին 19 ժամ անազատության մեջ պահելու հանցակազմերով: Մեղադրողը, սակայն, առարկեց միջնորդության դեմ՝ նշելով, որ վկայի նկատմամբ ճնշում չի գործադրվել: Դատարանն, այսպիսով, մերժեց Հայրապետյանի միջնորդությունը, նշելով, որ դատական նիստին մասնակցում է երկու մեղադրող, եւ եթե առերեւույթ հանցագործության դեպք լինի, նրանք կաշկանդված չեն համապատասխան ընթացք տալուց:

Այսօրվա նիստի ընթացքում նախագահող դատավորը Տաթեւիկ Գրիգորյանը մի քանի անգամ նախազգուշացման տեսքով սանկցիա կիրառեց Ժիրայր Սեֆիլյանի եւ մյուս ամբաստանյլաների նկատմամբ (բացի Հովհաննես Պետրոսյանից,-հեղ.) դատավորի՝ ներս մտնելիս ոտքի չկանգնելու համար: Սովորաբար նման իրավիճակներում դատավոր Տաթեւիկ Գրիգորյանն առաջին նախազգուշացումից հետո Սեֆիլյանին եւ մյուսներին մի քանի ժամով հեռացնում էր նիստերի դահլիճից: