Ազգի փրկիչը. Կարապետովիչի հուշաքարը չի փակցվի

Տպագրվել է «Հայկական Ժամանակ» օրաթերթի՝ 2004 թվականի հոկտեմբերի 19-ի համարում

Մոտ մեկ ամիս առաջ մի խումբ երեւանցիներ գրավոր դիմել են Երեւանի քաղաքապետ Երվանդ Զախարյանին՝ «ԱԼՄ» հոլդինգի նախագահ Տիգրան Կարապետյանի հուշաքարը իր տան պատին փակցնելու թույլտվություն ստանալու համար: Այո՛, հենց հուշաքարը, քանզի 32 քաղաքացու ստորագրությամբ քաղաքապետին ուղղված դիմումի մեջ գրված է. «Մենք, բազմաթիվ հին երեւանցիներով ցանկանում ենք «ԱԼՄ» հոլդինգի նախագահ Տիգրան Կարապետյանի ազգանվեր աշխատանքի համար, նրա բնակարանի պատին, մեր ուժերով տեղադրել սպիտակ մարմարյա  հուշաքար, որը կհիշեցնի նրա անմոռանալի ազգանվեր գործը՝ նվիրված հայ ազգին: Խնդրում ենք ձեր կարգադրությունը»:

Ահա այսպես: Ի պատասխան հին երեւանցիների դիմումի, քաղաքապետարանի  կազմակերպչական բաժնի պետ Գագիկ Բաղդասարյանի ստորագրությամբ, Կարապետովիչի հուշաքարը փակցնելու գործի նախաձեռնողներին է ուղարկվել հետեւյալ գրությունը. «Ի պատասխան ձեր դիմումի՝ հասցեագրված Երեւանի քաղաքապետին, Տիգրան Կարապետյանի բնակարանի պատին հուշաքար տեղադրելու մասին, հայտնում ենք, որ համաձայն Երեւանի քաղաքապետարանի  անվանակոչության հանձնաժողովի կանոնադրության, կենդանության օրոք հուշաքարի տեղադրման թույլտվություն չի տրվում»:

Ավելին, մեզ հետ զրույցում քաղաքապետարանի կազմակերպչական բաժնի պետ Գագիկ Բաղդասարյանը տեղեկացրեց, որ համաձայն անվանակոչության մասին կանոնադրության, հուշաքար փակցնելու թույլտվություն տրվում է պետությանն ու ժողովրդին անուրանալի ծառայություններ մատուցած հայտնի գործչի մահից միայն 3 տարի անց եւ միայն բացառիկ դեպքերում, այն էլ՝ կառավարության հատուկ որոշմամբ է հնարավոր, որ հուշաքար փակցվի հայտնի գործչի մահվանից անմիջապես հետո, ինչպես դա եղավ հոկտեմբերի 27-ի զոհերի դեպքում: Այդուհանդերձ, քաղաքապետարանի պատասխանը չի բավարարել դիմումատուներին, քանզի, ստանալով քաղաքապետարանի մերժումը, դիմող կողմի ներկայացուցիչը գրել է. «Ստացել եմ պատասխանը, որն ինձ չի բավարարում»:

Իսկ արդեն երեկ մեզ էր դիմել Կարապետովիչի մարմարյա հուշաքարը փակցնելու ջատագովներից մեկը՝ հին կայարանցի ներկայացած Սաշիկ Ստեփանյանն ու պաշտոնապես հայտարարեց, որ իրենք՝ Կարապետովիչի երկրպագուները, կանգ չեն առնելու եւ այս հարցը հասցնելու են մինչեւ հանրապետության նախագահ: «Այդ ինչպե՞ս է, որ Շառլ Ազնավուրին կենդանության օրոք արձան են կանգնեցնում, իսկ մենք ուզում ենք մեր ազգի փրկիչ Կարապետովիչի համար ընդամենը մի հուշաքար փակցնել եւ մեզ թույլ չեն տալիս», - քաղաքապետարանի անարդարությունից եւ չուզողությունից բողոքում էր կայարանցի Ստեփանյանը: Մենք, իհարկե, փորձեցինք բացատրել, որ հուշաքար փակցնում են բացառապես հանգուցյալների հիշատակին, սակայն կայարանցի Ստեփանյանն անդրդվելի էր. «Կարապետովիչը բացառիկ դեպք է, եւ նրան հե՛նց կենդանության օրոք է հուշաքար հասնում, ինչպես հասնում է Շառլ Ազնավուրին»:

Եւ քանի որ իրոք եղել է Ազնավուրի նախադեպը, երեկ մենք քաղաքապետարանի անվանակոչության վարչության պատասխանատու քարտուղար Իրինա Գրիգորյանից փորձեցինք պարզել՝ ինչո՞ւ է Ազնավուրին հասնում, իսկ Կարապետովիչին՝ ոչ: Գրիգորյանը պատասխանեց, որ որոշ բացառիկ դեպքերում թույլատրվում է մարդկանց կենդանության օրոք կանգնեցնել նրանց արձանը, ոչ թե հուշաքար փակցնել նրանց բնակարանի պատին, բայց դրա համար պետք է կառավարության որոշում: Այնպես որ, եթե Կարապետովիչի հուշաքարը փակցնելու կողմնակիցները չեն պատրաստվում նահանջել՝ պետք է դիմեն կառավարությանը: Եւ միգուցե այդ դեպքում նրանց թույլատրվի փակցնել Կարապետովիչի մարմարյա հուշաքարը:  Մեր նյութը թերի կլիներ, եթե չփորձեինք պարզել, թե ինչպես է վերաբերում Տիգրան Կարապետյանն իր հուշաքարը փակցնելու մի խումբ քաղաքացիների նախաձեռնությանը:

«Ես այդ նախաձեռնության հետ որեւէ առնչություն չունեմ, սակայն եթե դա օրենքի շրջանակում է, ցանկացած ոք ցանկացած նախաձեռնությամբ հանդես գալու իրավունք ունի»,- պատասխանեց նա: Եւ քանի որ Կարապետովիչի հուշաքարի հարցը, հաշվի առնելով «ԱԼՄ» հոլդինգի նախագահի աննախադեպ հեղինակությունը, կարծես հասարակական մեծ հնչեղություն է ստանում, երեկ այս հարցի վերաբերյալ իր տեսակետը մեր թերթին փոխանցեց նաեւ Կարապետովիչի ոխերիմ թշնամի, ԱԺ պատգամավոր Հմայակ Հովհաննիսյանը. «Չարենցի հայտնի խոսքերը՝ հանճարին բանջար են ասում, բանջարին՝ հանճար, միանշանակ վերաբերում է նաեւ մեր օրերին, երբ անասնացած, ոչխարացած հոտին ուղարկում են քաղաքապետարան, որպեսզի իրական հերոսների թափուր մնացած տեղերում ջեբկիրների հուշաքար դնեն»,- վրդովված հայտարարեց նա՝ խոստանալով այս թեմային անդրադառնալ նաեւ ԱԺ ամբիոնից:

Նաիրա Զոհրաբյան