Երկու երնեկ մի տեղում. ԱԺ փոխխոսնակն ազատ ընտրությունների ջատագով է

Տպագրվել է «Հայկական Ժամանակ» օրաթերթի՝ 2004 թվականի հոկտեմբերի 21-ի համարում

Երեկ Մամուլի ազգային ակումբում հրավիրված մամուլի ասուլիսում ԱԺ փոխխոսնակ Տիգրան Թորոսյանը զարմացրեց իր անկեղծությամբ: Նա ըստ էության հաստատեց այն տեսակետը, որ կոալիցիայի անդամ ՀՅԴ-ն եւ ՕԵԿ-ը պահանջում են խորհրդարանական ընտրությունները դարձնել 100 տոկոս համամասնական՝ նպատակ ունենալով հաջորդ ընտրությունների ժամանակ ավելի մեծ թվով մեծահարուստների ներգրավել իրենց կուսակցական ցուցակներում: Թորոսյանը հիշեցրեց, որ այդ կուսակցությունները, որոնք բացատրում են, թե մեծամասնական ընտրակարգի դեպքում հաղթելու ավելի մեծ հնարավորություն ունեն փողատերերը` պետք է անկեղծորեն տեսնեն, թե որքան հարուստ, սակայն քաղաքական գործունեության փորձ չունեցող մարդիկ են իրենց ցուցակների միջոցով հայտնվել խորհրդարանում: ՀՀԿ խորհրդի փոխնախագահն անկեղծորեն ընդունեց, որ դա վերաբերում է նաեւ ՀՀԿ համամասնական ցուցակին:

«Հայաստանում կուսակցությունները լիովին կայացած չեն», - ասում է պարոն Թորոսյանը: Նրա կարծիքով՝ 100 տոկոսանոց համամասնական ընտրակարգը ավելի մեծ փորձությունների կենթարկի այդ համակարգը: Չնայած վերը նշվածին՝ ԱԺ փոխխոսնակը կողմ է համամասնական տեղերի ավելացմանը: Սակայն նա կարծում է, որ չպետք է սեւեռվել համամասնական-մեծամասնական հարաբերությունների վրա, եւ ավելի կարեւոր է, թե ինչպիսին կլինեն ընտրությունները: «Հաջորդ նախագահական եւ խորհրդարանական ընտրությունները ունենալու են բացառիկ նշանակություն Հայաստանի հետագա զարգացման համար: Հայաստանը կանցկացնի նորմալ ընտրություններ՝ կունենա շատ մեծ հնարավորություն իրական զարգացման համար: Չի կարողանա անցկացնել նման ընտրություններ՝ ստիպված կլինի տեղ գրավել այնպիսի երկրների շարքում, որոնց մասին դուք շատ լավ գիտեք»,-ասում է Տիգրան Թորոսյանը:

Երեկ նա այնքան էր կարեւորում արդար ընտրությունների անցկացման անհրաժեշտությունը, որ այդ խնդրին անդրադարձավ մի քանի անգամ: Նաեւ՝ երբ խոսք եղավ ընտրակեղծիքների հեղինակներին պատժելու մասին. «Իհարկե, կարեւոր է, որ պարզվի՝ ով է մեղավոր եւ այլն: Բայց նաեւ շատ կարեւոր է, որ կուսակցություններն իսկապես հասկանան, որ Հայաստանը պետք է կտրուկ քայլեր անի ընտրությունների որակի բարձրացման առումով, որպեսզի երկրի հետագա ընթացքը լինի լիարժեք: Սրա գիտակցումը եթե չեղավ, որքան ուզում եք պատժեք, ինչ ուզում եք արեք, ցավոք, մենք կունենանք ընտրություններ, որոնցից ե՛ւ արտաքին դժգոհություն կլինի, ե՛ւ ներքին»: Արդար ընտրությունների անցկացման անհրաժեշտությունը կարծես թե անվիճելի է:

Սակայն ակնհայտ է, որ նման ընտրությունների դեպքում Տիգրան Թորոսյանը փոքր շանս կունենա պատգամավոր ընտրվելու, էլ ուր մնաց՝ նրա ներկայացրած քաղաքական ուժը խորհրդարանում ունենա ներկայացվածության այնպիսի աստիճան, որ պարոն Թորոսյանն ընտրվի ԱԺ փոխխոսնակ եւ ԵԽԽՎ-ում հայաստանյան պատվիրակության ղեկավար: «Ո՞րն է ձեզ համար ավելի գերադասելի՝ արդար ընտրություննե՞րը, թե՞ ձեր ներկա կարգավիճակը»,-մեր այս հարցին եւս պարոն Թորոսյանը շատ անկեղծ պատասխան տվեց. «Ես կարծում եմ, որ այդ երկուսն իրար չեն հակասում, ընդհակառակը՝ այդ երկուսի համատեղումը լավագույն տարբերակն է»:

Ինչպես տեսնում եք, պարոն Թորոսյանն անկեղծորեն խոստովանում է, որ պատրաստ չէ ինքնազոհաբերման եւ ընդամենը ցանկանում է հաճելին համատեղել օգտակարի հետ: Անկեղծության բացառիկ դրսեւորում կարելի է համարել նաեւ պարոն Թորոսյանի տեսակետը ընտրակեղծիքների հեղինակների վերաբերյալ: «Ես համոզված եմ, որ քաղաքական ուժերը կեղծիքներ, խախտումներ թույլ տալու որոշումներ երբեք չեն կայացրել, չեն կայացնում եւ չեն կայացնելու: Խախտումները որոշակի խմբերի, մարդկանց գործունեության արդյունք են», - ասում է նա: Հիրավի, որեւէ մեկը չի կարող պնդել, որ 2003թ. խորհրդարանական ընտրություններից առաջ ՀՀԿ-ն ընտրակեղծիքներ իրականացնելու գրավոր որոշում է կայացրել, որը ստորագրվել է ՀՀԿ խորհրդի նախագահ Անդրանիկ Մարգարյանի կողմից: Այդ որոշումը թերեւս կայացվել եւ իրականացվել է ՀՀԿ վերնախավի, Սերժ Սարգսյանի ու նրա շրջապատի եւ ՀՀԿ ցուցակում ընդգրկված մեծահարուստների կողմից, որոնց այլ կերպ՝ քան «մարդկանց խումբ», անվանել չի կարելի:

Ավետիս Բաբաջանյան