Խառը բաներ. ԵԿՄ-ն պառակտման շեմի՞ն

Տպագրվել է «Հայկական Ժամանակ» օրաթերթի՝ 2004 թվականի դեկտեմբերի 4-ի համարում

Դեկտեմբերի 11-ին հրավիրված Երկրապահ կամավորականների միության 6-րդ համագումարից առաջ այդ կազմակերությունը բաժանվել է երկու մասի՝ համագումարին մասնակցելու մտադրություն ունեցողների եւ բոյկոտելու կողմնակիցների, կամ՝ ԵԿՄ վարչության գործող նախագահ Մանվել Գրիգորյանի կողմնակիցների եւ նրա հակառակորդների:

Թե ինչ են ուզում համագումարին մասնակցելու կողմնակիցները, շատ պարզ է՝ լսել հերթապահ հաշվետվություն, բանաձեւեր ընդունել ղարաբաղյան հարցի շուրջ ստեղծված իրավիճակի եւ հոկտեմբերի 27-ի քրգործից անջատված մասը կարճելու մասին, Մանվել Գրիգորյանին վերընտրել ԵԿՄ վարչության նախագահ: Թե ինչ նպատակ են հետապնդում համագումարը բոյկոտելու կողմնակիցները, դժվար է ասել: Բայց հայտնի է, որ նրանց առաջնորդը ԵԿՄ Երեւանի քաղաքային կազմակերպության ղեկավար, ԱԺ պատգամավոր Հակոբ Հակոբյանն է: Նրանից մեկնաբանություններ ստանալ մեզ չհաջողվեց, քանի որ պարոն Հակոբյանը բավական երկար ժամանակ բացակայում է Հայաստանից կամ գոնե այդպես ներկայացնում է նրա շրջապատը:  Ըստ ամենայնի, նա Հայաստան կվերադառնա միայն դեկտեմբերի 11-ից հետո:

Հայտնի է նաեւ, որ ԵԿՄ համագումարին չմասնակցելու մտադրություն ունեն «Հանրապետություն» կուսակցության քաղխորհրդի նախագահ, ԱԺ պատգամավոր Ալբերտ Բազեյանը, ԱԺ պատգամավոր Սասուն Միքայելյանը եւ ԵԿՄ-ում կշիռ ունեցող այլ գործիչներ: Նրանցից որեւէ մեկը առայժմ հրապարակավ չի խոսում այն պատճառների մասին, որոնց համար իրենք որոշել են չմասնակցել համագումարին: Բայց ոչ հրապարակային պարզաբանումները հետեւյալն են. «ԵԿՄ-ն պետք է լիներ միջանկյալ օղակ բանակի եւ հասարակության միջեւ, բայց այսօր դարձել է իշխանության կցորդը: ԵԿՄ-ն ղեկավարում է ոչ թե նրա փաստացի ղեկավար Մանվել Գրիգորյանը, այլ պաշտպանության նախարար Սերժ Սարգսյանը, եւ մասնակցելով համագումարին՝ մենք, ըստ էության, մասնակցում ենք ոչինչ չտվող թատերական ներկայացման: ԵԿՄ-ն մասնակցել է 2003 թվականի նախագահական, մասամբ նաեւ խորհրդարանական ընտրությունների ժամանակ իրականացված ընտրակեղծիքներին, տեր չի կանգնել մեր ժողովրդի արդար ընտրությանը»:

Այս շարքը կարելի է շարունակել. դրանց մեջ շատ մեծ ճշմարտություն կա: Սակայն խնդիրն այն է, որ նման հարցադրումներով կարող են հանդես գալ միայն շատ քիչ թվով բոյկոտի կողմնակից երկրապահներ, քանի որ այն մարդկանց մեծ մասը, ովքեր բոյկոտելու են համագումարը՝ ամենաակտիվ մասնակցությունն են ունեցել ընտրակեղծիքների իրականացմանը, եւ նրանց շատ քիչ մասն է մասնակցել ընդդիմության կազմակերպած միջոցառումներին: Իսկ ըստ մեկ այլ ԵԿՄ վարչության անդամի, ով ընդդիմադիր հայացքներ ունի եւ մտադիր է մասնակցել համագումարներին, եթե ինչ-որ մարդիկ հարցադրումներ ունեն Մանվել Գրիգորյանին, դեմ են մինչ այժմ ԵԿՄ-ի կողմից իրականացվող քաղաքականությանը, ապա ավելի ճիշտ կլինի, եթե մասնակցեն համագումարին, հրապարակային ներկայացնեն իրենց հարցադրումները եւ փորձ անեն փոխել վարչությունը եւ նրա նախագահին:

«Եթե դա չի ստացվի, ապա այդ դեպքում մենք հայտարարությամբ կներկայացնենք մեր փաստարկները եւ դուրս կգանք այդ կառույցից: Թե չէ՝ այսպես ստացվելու է, որ այդ մարդիկ մնալու են ԵԿՄ անդամ, բայց ԵԿՄ-ն պառակտվել է»,- ասում է մեր մի զրուցակիցը: Իսկ ինչ կլինի, եթե դեկտեմբերի 11-ին ԵԿՄ 6-րդ համագումարի պատվիրակ ընտրված տասնյակ, եթե ոչ՝ մեկ հարյուրից ավելի, պատվիրակներ չմասնակցեն համագումարին: Եթե նորից հիշենք, որ բոյկոտին մասնակցելու են Երեւանի քաղաքային կազմակերպությունը, Հրազդանի, Աշտարակի եւ այլ շրջանների մասնաճյուղերը կամ առանձին պատվիրակներ, պարզ կդառնա, որ ԵԿՄ-ն դե ֆակտո կհայտնվի պառակտման փաստի առաջ, եւ համագումարը կարող է դառնալ ինչ-որ առումով ոչ լեգիտիմ:

Մյուս կողմից, երբ համագումարին չեն մասնակցում «դասական» երկրապահները, ապա համագումարում կարող են մեծամասնություն կազմել բանակային ծառայության մեջ գտնվողները, որոնց փաստացի առաջնորդը ոչ թե ՊՆ փոխնախարար, ԵԿՄ վարչության նախագահ Մանվել Գրիգորյանն է, այլ ՊՆ մեկ այլ փոխնախարար՝ Արթուր Աղաբեկյանը: Շատերը չեն բացառում, որ այդ պայմաններում Մանվել Գրիգորյանին չի հաջողվի վերընտրվել: Ինչը չէր կարող տեղի ունենալ, եթե բոյկոտողները մասնակցեին համագումարին: Ի վերջո, բոյկոտի կողմնակիցները երկընտրանքի դեպքում ստիպված են լինելու ընտրել Մանվել Գրիգորյանին, քան նույն Արթուր Աղաբեկյանին: Իսկ այս դեպքում նրանք մաքուր են մնում՝ փաստորեն թույլ տալով, որ ԵԿՄ նախագահ դառնա Արթուր Աղաբեկյանը: Ի դեպ, «Հանրապետություն» կուսակցության առաջնորդ Արամ Սարգսյանը երեկ մեզ հետ զրույցում հայտարարեց, որ մասնակցելու է ԵԿՄ համագումարին. «Իհարկե, մասնակցելու եմ համագումարին: Իհարկե, ես դեմ եմ ԵԿՄ-ի պառակտմանը, որի հավերժ նախագահը իմ եղբայր Վազգեն Սարգսյանն է»:

Ավետիս Բաբաջանյան