Մեր այցելած երկու պոլիկլինիկաներում պապիլոմավիրուսի դեմ որեւէ մեկին չէին պատվաստել

Այսօր դեկտեմբերի 11-ն է: Ասել է թե՝ մեկնարկել է մարդու պապիլոմային վիրուսի դեմ պատվաստումների գործընթացը: Բայց մեր այցելած երկու մանկական պոլիկլինիկաներում էլ պարզ դարձավ, որ ոչ ոք դեռեւս չի ներկայացել պատվաստում ստանալու:

Մեկում շահառուներին հրավիրել էին եւ սպասում էին, մյուսում դեռ չէին էլ հրավիրել:

Թիրախային խմբում 13 տարին լրացած աղջիկներն են: Առողջապահության նախարարությունը վստահեցնում է, որ պապիլոմավիրուսի դեմ պատվաստումը նրանց հնարավորություն է տալու խուսափել արգանդի վզիկի քաղցկեղից ու որ պատվաստանյութն անվտանգ է, իսկ հանրության մի ստվար զանգվածի շրջանում կա հակազդեցություն ու բողոք: Նրանք համոզված են, որ երեխաներին պատվաստելը կարող է ունենալ անդառնալի հետեւանքներ կամ որ պատվաստումն առնվազն անվտանգ չէ:

Երեւանի N2 բուժմիավորման N1 մանկական պոլիկլինիկայի մանկաբույժ Աննա Սիմոնյանն ասաց, որ դեռեւս որեւէ երեխայի չեն հրավիրել պատվաստում ստանալու, որովհետեւ չնայած առողջապահության ոլորտի պատասխանատուները հայտարարել են, որ գործընթացը մեկնարկելու է դեկտեմբերի 11-ին, բայց համապատասխան հրաման իրենք չեն ստացել:

«Մեզ ոչ մեկը ոչ մի պաշտոնական հրաման չի տվել: Ամեն դեպքում այսօրվա՝ դեկտեմբերի 11-ի վերաբերյալ ոչ մի կոնկրետ բան դեռ չկա: Մեր պոլիկլինիկայում ոչ մի մանկաբույժ երեխա չի կանչել»,- ասաց բժշկուհին:

Պատվաստանյութը, սակայն այստեղ արդեն ստացել են: Նաեւ պապիլոմավիրուսային վարակի դեմ պատվաստումների վերաբերյալ զրույցներ են ունեցել ծնողների հետ: «Խոսել ենք, զրուցել ենք: Անընդհատ ենք խոսում: Այնպես չէ, որ բոլորը միանշանակ գոհ են պատվաստումից, ինչպես բոլոր նորարարություններից՝ սկզբում: Բայց երբ որ հրաման լինի, սկսենք նորից խոսել, արդեն կտեսնենք»,- նշեց նա:

Աննա Սիմոնյանի ցուցակում 13 տարեկանը լրացած յոթ աղջիկ կա: Պոլիկլինիկայում աշխատող մանկաբույժները մի քանիսն են եւ յուրաքանչյուրն իր սպասարկման տարածքն ունի: Մեր զրուցակիցը կարծում է, այդ յոթ երեխայից չորսի ծնողները դեմ չեն լինի նրանց պատվաստել:

Իսկ հարցը, թե բժշկուհին ինքը պատվաստման կողմնակի՞ց է, միանշանակ պատասխան չստացավ:

-Միանշանակ ձեզ չեմ կարող ասել: Ժամանակին ես իմ աղջկան ուզում էի տանել մարդու պապիլոմավիրուսային վարակի դեմ պատվաստելու, երբ այդ պատվաստումը դեռ ընդգրկված չէր պատվաստումների ազգային օրացույցում ու վճարովի էր: Ուղղակի ինչ-ինչ պատճառներով չստացվեց: Իրեն չկարողացա համոզել:

-Իսկ հիմա դուք կասկածներ ունեք եւ լրիվ վստահ չե՞ք, որ պատվաստումը ճիշտ է:

- Չեմ կարող որեւէ հաստատ բան ասել ձեզ: Տասը տարին մի քիչ... Բայց իրոք դա պաշտպանում է այնպիսի հիվանդությունից, որ Աստված չանի, առաջանա: Դաժան հիվանդություն է քաղցկեղը: Միայն անունը բավականին դաժան է:

-Այսինքն՝ քաղցկեղից պաշտպանում է, բայց ուրիշ վտանգներն էլ չեք բացառո՞ւմ:

-Ցանկացած պատվաստում իր վտանգները, իր բարդություններն ունի: Այդ որ ասվում է անպտղություն է առաջացնում, ես դրան չեմ հավատում եւ չեմ վստահում նման խոսակցություններին:

-Ուղղակի, ինչքան հասկացա՝ այնքան էլ վստահ չեք, որ ճիշտ է երեխաներին պատվաստելը:

-Պատվաստելը ճիշտ է, բայց քանի որ պատվաստանյութի ժամկետը տասը տարին է, դա է ինձ մի քիչ... Թե չէ այո, ճիշտ է: Նորից եմ կրկնում, բոլոր պատվաստումներն ունեն թույլատրելի տոկոսային բարդություններ:

Մանկաբույժ Աննա Սիմոնյանը, երբ խոսում է պատվաստանյութի տասը տարվա ժամկետի մասին, նկատի ունի դրա գոյությունից մինչեւ օրս անցած ժամանակը, որը նրա կարծիքով, փաստորեն քիչ է՝ պատվաստանյութի առավելություններն ու թերություններն ամբողջովին բացահայտված լինելու համար:

«Արաբկիր» մանկական պոլիկլինիկայում նույնպես մեր այցելության պահին որեւէ մեկը չէր եկել պապիլոմավիրուսի դեմ պատվաստվելու: Մանկական բաժնի վարիչ Կարինե Հովսեփյանը վստահ էր, որ անպայման գալու են, եւ պատվաստվողները մեծամասնություն են կազմելու:

«Պատվաստվելու են 2004 թվականի հուլիսի մեկից մինչեւ դեկտեմբերի 31-ը ծնված աղջիկները: Մենք նախօրոք արդեն պատրաստել ենք մեր ցուցակները՝ ովքեր են մտնում այդ տարիքային խմբի մեջ: Դրանք տրված են տեղամասային մանկաբույժներին, բուժքույրերին: Նրանք արդեն հայտնել են ծնողներին, եւ հույս ունեմ, որ մենք այսօր արդեն կունենանք հաճախում: Այս պահին մեր պոլիկլինիկայում ունենք 120 երեխա, որոնց 13 տարին լրացած է եւ ենթակա են պատվաստման»,- ասաց Կարինե Հովսեփյանը:

Երբ պոլիկլինիկայի բուժաշխատողները զանգահարել են նշված տարիքի աղջիկների ծնողներին՝ երեխաներին հրավիրելու պապիլոմավիրուսի դեմ պատվաստվելու, ստացել են թե՛ դրական եւ թե՛ բացասական արձագանքներ: «Կա ե՛ւ դրականը, ե՛ւ կա բացասականը: Իհարկե, մեր տարածքում դրականը ավելի շատ է, որովհետեւ մեծ աշխատանք կատարվել է, մեր ժողովուրդը բավականին գիտակից է, եւ համոզված եմ, որ մեզ մոտ մենք կունենանք պատվաստումների մեծ ընդգրկվածություն»,- կարծիք հայտնեց մանկական բաժնի վարիչը: Նա, ի դեպ, առանց վարանելու հայտարարեց, որ երեխային պապիլոմավիրուսի դեմ պատվաստելը ճիշտ ընտրություն է եւ չպետք է բաց թողնել պետության ընձեռած այդ կարեւոր հնարավորությունը:

Պատվաստվելու հրավիրված, բայց դեռ վարանող ծնողներն, ըստ նրա, կարող են իրենց աղջիկներին պոլիկլինիկա տանել նաեւ հունվար-փետրվար ամիսներին:   

«Պարտադիր չէ, որ բոլորը գան մինչեւ դեկտեմբերի 28-29-ը, բայց համոզված եմ, որ մենք հունվարին, մաքսիմում փետրվարին կունենանք պատվաստումներ: Մոտ 100 երեխա հաստատ կպատվաստվեն: Մինչեւ 6 ամսվա ընթացքում էլ կարող են գալ պատվաստվել, բայց, իհարկե ցանկալի է, որ դա լինի հունվարին, մաքսիմում՝ փետրվարին, որովհետեւ պապիլոմավիրուսի դեմ պատվաստումը երկնվագ է՝ վեց ամիս ընդմիջումով: Ցանկալի է, որ ժամանակին գան եւ 14 տարին լրանալուց առաջ երկուսն էլ ստացած լինեն»,- եզրափակեց «Արաբկիր» պոլիկլինիկայի բժշկուհին:

Լուսանկարում Կարինե Հովսեփյանն է:

Տպել
1868 դիտում

«Քաղաքացու որոշում» ՍԴԿ-ն հրապարակել է ցուցակի առաջին 31 թեկնածուների անունները:

Վարորդներին խորհուրդ է տրվում երթեւեկել ձմեռային անվադողերով

Ես կլինեմ ՀՀԿ-ի կենտրոնական հարձակվողը. Մենուա Հարությունյան

Դեկտեմբերին արտահերթ ընտրություններ կլինեն նաեւ Ուրցաձորում, համայնքի ղեկավար են ընտրելու

«Ազգային Առաջընթաց» կուսակցության ցուցակը կին է գլխավորում

Գլխավոր դատախազությունը կարճել է Հայաստանում Քևին Օքսուզի դեմ հարուցված քրեական գործը

Գողություն Աբովյան փողոցի սրճարաններից մեկում. որոնվում է տեսապատկերված անձը (տեսանյութ)

ՀՀ գյուղատնտեսության նախարարի պաշտոնակատար Գեղամ Գևորգյանն այցելել է «Սպայկա» ընկերություն

Դատախազությունը նոր երևան եկած հանգամանքով վերանայման վարույթ կսկսի. Մարտի 1-ի գործով նախկին փոխոստիկանապետը փոշմանել է

ԱԳ նախարարի պաշտոնակատարն ընդունեց ՄԱԿ-ի հատուկ զեկուցողին

Դավիթ Տոնոյանն ընդունել է Հայաստանում Կարմիր խաչի միջազգային կոմիտեի պատվիրակության ղեկավարին

ՕԵԿ համապետական ցուցակի առաջին տասնյակը. այն գլխավորում է Արթուր Բաղդասարյանը

Հայաստան ապօրինի թմրամիջոց ներկրելու հերթական դեպքն է կանխվել (տեսանյութ)

Նիկոլ Փաշինյանը հանդիպել է Ամենայն Հայոց Կաթողիկոսի հետ

Նոյեմբերի 14-ի դրությամբ համաներմամբ ազատ է արձակվել 475 դատապարտյալ

Դեռ չեմ գիտակցում, որ աշխարհի չեմպիոն եմ. Սիմոն Մարտիրոսյան

Հռիփսիմե Խուրշուդյանն այլեւս ՀՀ հավաքականի անդամ չէ. Փաշիկ Ալավերդյան

ՊԵԿ-ն անհիմն, առանց ապացույցի տեղեկատվություն է հրապարակել. «Գազպրոմ Արմենիա»-ն հերքում է

ՀՀԿ համամասնական ցուցակը ամբողջությամբ

Ռոբերտ Քոչարյանը Սիլվա Համբարձումյանից նաեւ 2 միլիոն է պահանջում. դատավորի անունը հայտնի է