Առայժմ խոստումներ. ներող եղեք, հայե՛ր, ներող

Տպագրվել է «Հայկական Ժամանակ» օրաթերթի՝ 2004 թվականի դեկտեմբերի 10-ի համարում

«Մենք կանգնեցինք այնպիսի իրավիճակի առջեւ, որ 2004 թվականին ՀՀ-ում գոյություն ունի բջջային կապի բաժանորդ դառնալ ցանկացողների մի հսկա հերթ: Սա սովորական երեւույթ չէ, եւ մենք պետք է ներողություն խնդրենք Հայաստանի հասարակությունից՝ այս երեւույթի գոյության համար»: «Արմենիա» հյուրանոցում երեկ հրավիրված ասուլիսում այսպիսի հայտարություն արեց «ԱրմենՏելի» գլխավոր գործադիր տնօրեն Վասիլիս Ֆետսիսը: Հունիսի 1-ից «ԱրմենՏելի» գլխավոր տնօրեն նշանակվելուց հետո նա առաջին անգամ էր լրագրողների առջեւ հանդես գալիս: Նա նաեւ առաջինն է «ԱրմենՏելի» տնօրեններից, ով հրապարակավ ընդունեց, որ բջջային կապի ոլորտում առկա վիճակը իրենց վարած սխալ քաղաքականության հետեւանք է, ինչի համար էլ ներողություն խնդրեց:

Ըստ Ֆետսիսի՝ իրենց եւ կառավարության ներկայացուցիչների բանակցությունների արդյունքում պարտվողներ եւ հաղթողներ չկան, քանի որ ստեղծված նոր թիվ 60 լիցենզիան բավարարում է երկու կողմերին: Ինչ վերաբերում է հակամարտության երկարաձգվելու տարբերակին, ապա այս դեպքում միանշանակ տուժելու էր Հայաստանի բնակչությունը: «Ինչ կարող էր անել կառավարությունն «ԱրմենՏելի» դեմ. եթե միշտ տարաձայնություններ ունենայինք, ապա ո՞վ էր լինելու զոհը, իհարկե՝ Հայաստանի բնակչությունը: Պետությանն անհրաժեշտ է հեռահաղորդակցության զարգացում, հետեւաբար՝ անհրաժեշտ էր գտնել հավասարակշռված լուծում»,- այսպես բնորոշեց Ֆետսիսը արդեն պատմության գիրկն անցած բանակցությունները:

Ինչեւէ, ըստ Ֆետսիսի, 2005-ին իրենք ներդրումներ կկատարեն հեռահաղորդակցության գրեթե բոլոր ոլորտներում: Մասնավորապես, Ֆետսիսը խոստացավ, որ գալիք տարում իրենք կապահովեն հանրապետությունում բջջային կապի ողջ պահանջարկը, անկախ նրանից՝ երկրորդ օպերատորը կսկսի ծառայություններ մատուցել, թե՝ ոչ: «Իզի քարտերի» առաջիկա խմբաքանակը, սակայն, ըստ «ԱրմենՏելի» ղեկավարի, իրենք բաց կթողնեն 2005-ի առաջին եռամսյակի ընթացքում միայն: Վ. Ֆետսիսի խոսքերից ակնհայտ դարձավ, որ բջջային կապի ոլորտում սակագների նվազեցում դժվար է ակնկալել, նույնիսկ երկրորդ օպերատորի՝ «Ղ-Տելեկոմի» հետ մրցակցության պայմաններում:

«ԱրմենՏելի» ղեկավարը, նկատելով, որ մրցակցությունն իսկապես նպաստում է ապրանքի, տվյալ դեպքում՝ կապի որակի բարելավմանը, նաեւ՝ սակագների նվազեցմանը, միաժամանակ ավելացրեց. «Սակայն անկեղծ լինենք՝ ոչ մի երկրում երկու օպերատորներ, որոնք ունեն մեծ պահանջարկ, սակագների հարցում չեն պայքարի: Դա կպահանջի ծանր ներդրումներ, դա նրանց կողմից կլինի ինքնասպանություն»: Այսպիսով, Վ. Ֆետսիսը ակնարկում է, որ իրատեսական չէ ակնկալել, որ «Ղ-Տելեկոմը» հնարավորություն կունենա անհամեմատ ցածր սակագներ առաջարկել՝ «ԱրմենՏելին» ստիպելով նույնը անել: Առավել հավանական է, որ եկող տարվա կեսին երկու ընկերությունները ինչ-որ սակագնային նոր տարբերակներ ներկայացնեն հանրությանը եւ այդպիսով սկսեն համատեղ գոյատեւել՝ առանց մեկը մյուսին «զայրացնելու»:

Ֆետսիսը այդպես էլ չցանկացավ պատասխանել՝ փոխվե՞լ, թե՞ պահպանվում է իրենց ընկերության հիմնական բաժնետեր հունական OTE-ի՝ «ԱրմենՏելի» 90 տոկոս բաժնետոմսերը վաճառելու մտադրությունը: Նա հայտարարեց, որ իր խնդիրը ընկերության կառավարումն է, իսկ բաժնետոմսերը վաճառել-չվաճառելու վերաբերյալ հարցին կարող են պատասխանել հենց բաժնետերերը: Ինչեւէ, ըստ Ֆետսիսի, 2005-ի ընթացքում իրենք կավարտեն գյուղերի հեռախոսաֆիկացումը, զուգահեռ կիրականացնեն նաեւ թվայնացման գործընթացը, մասնավորապես՝ Երեւանում թվային բաժանորդները եկող տարեվերջին կկազմեն ընդհանուրի 80 տոկոսը:

Իսկ հեռախոսակապի նոր սակագնային քաղաքականությունը, որը կկիրառվի 2005-ի տարեսկզբից, ըստ «ԱրմենՏելի» տնօրենի, հասարակության շրջանում կապահովի հավասարություն, քանի որ, նրա բերած տվյալներով, ստացվում է, որ ներկա գործող սակագներով Հայաստանի աղքատ եւ անապահով խավը փաստացի վճարում է հարուստների կապի ապահովման համար: Բանն այն է, որ ըստ հրապարակված տվյալների՝ աղքատ բաժանորդները ամսական խոսում են միջինը 200 րոպե, այսինքն՝ նույնիսկ իրենց անվճար 360 րոպեն չեն սպառում, արդյունքում, 900 դրամ վճարելով, նրանց խոսակցության մեկ րոպեի սակագինը ստացվում է մոտ 4.5 դրամ:

Իսկ հարուստները կամ իրավաբանական անձինք, վճարելով 4 հազար դրամ ամսական, խոսում են ավելի քան 10 հազար րոպե: Արդյունքում՝ նրանց մեկ րոպեի արժեքը ստացվում է մոտ 40 լումա: Նոր գնային քաղաքականությունն, ըստ Ֆետսիսի, այս «անարդարությունը» կվերացնի. եթե աղքատները կշարունակեն 900 դրամ վճարել, ապա հարուստները եւ իրավաբանական անձինք նախկինի պես խոսելու համար ստիպված կլինեն վճարել 30-40 դոլար: Ինտերնետ հեռախոսակապի ծառայությունն «ԱրմենՏելը» խոստանում է մատուցել եկող տարեսկզբից: Ըստ Ֆետսիսի՝ այս ծառայության մատուցման համար իրենց կիրառելիք սակագները նախկինից շատ բարձր չեն լինի, բայց որակը կլինի անհամեմատ բարձր: Այս դեպքում ճիշտ կլիներ ասել՝ մինչեւ չտեսնենք՝ չենք հավատա: 

Վահագն Հովակիմյան