Կապրենք՝ կտեսնենք. դաշինքը ձեւավորվում է

Տպագրվել է «Հայկական Ժամանակ» օրաթերթի՝ 2004 թվականի դեկտեմբերի 23-ի համարում

Հայաստանի ազատական առաջադիմական կուսակցության նախագահ Հովհաննես Հովհաննիսյանը հաստատում է, որ իրենք շարունակում են բանակցությունները «Հանրապետություն» եւ «Ժառանգություն» կուսակցությունների հետ՝ նոր ընդդիմադիր ձեւաչափ ստեղծելու ուղղությամբ: Պարոն Հովհաննիսյանը վստահեցնում է, որ այդ ձեւաչափը բաց է լինելու այն կուսակցությունների համար, որոնք պատրաստ կլինեն իրենց հետ «հավասարը՝ հավասարի» սկզբունքով նստել կլոր սեղանի շուրջ եւ գտնել ներքին ու արտաքին մարտահրավերներին դիմակայելու հնարավորություններ: «Կարծում եմ՝ այսօր այն պահը չէ, որ պետք է պայքարել սեղանի գլխին կանգնելու համար: Թող ճոռոմ չհնչի, բայց կարծում եմ, որ մարդիկ այսօր պետք է առաջնորդվեն երկրի եւ ժողովրդի խնդիրները լուծելու կարեւորությամբ», - ասում է ՀԱԱԿ նախագահը:

Քանի որ հայտնի է, թե ով չի ուզում «հավասարը՝ հավասարի» սկզբունքով նստել կլոր սեղանի շուրջ, այլ պայքարում է ուղղանկյուն սեղանի գլխին նստելու համար, պարոն Հովհաննիսյանին հարցրինք, թե ինչու իրենց համար ընդունելի չէ ՀԺԿ նախագահ Ստեփան Դեմիրճյանի դիրքորոշումը, որը, դեմ լինելով նոր ձեւաչափին, առաջարկում է օրինական իշխանություն ձեւավորելու խնդրի շուրջ համագործակցել «Արդարություն» դաշինքի հետ: «Նոր գաղափարների, նոր արժեքների, նոր ալիքի համար անհրաժեշտ է այդ գաղափարները կրող, հանուն դրանց պայքարելու պատրաստ նոր դաշինք: Իսկ «Արդարությունը» ունի իր խորհրդարանական խմբակցությունը, եւ քանի դեռ կա այս ԱԺ-ն, այդ խմբակցությունը կարող է գոյություն ունենալ», - ասում է պարոն Հովհաննիսյանը:

Իսկ արդյո՞ք այդ նոր գաղափարները, նոր արժեքներն ընդամենը արտաքին քաղաքականության մեջ ավելի շատ Արեւմուտքին նախապատվություն տալը չէ: Ըստ պարոն Հովհաննիսյանի՝ խնդիրը չպետք է նեղացնել եւ դարձնել միայն արտաքին քաղաքական կողմնորոշման հարց: Նա առաջարկում է խնդրին նայել ավելի ընդգրկուն. «Մենք ուզում ենք, որ մեր երկիրն առաջ ընթանա, մեր ժողովուրդը բարեկեցիկ ապրի: Մենք ուզում ենք, որ երկրում հարգվեն մարդու իրավունքները, լինի խոսքի եւ մամուլի ազատություն, որ մեր երկրի քաղաքացին իրեն երկրի տեր զգա: Իսկ որտե՞ղ են այդ արժեքները: Իհարկե՝ ոչ Ռուսաստանում, այլ Արեւմուտքում: Դրա համար է, որ նման արժեքային համակարգի կողմնակիցներին անվանում են արեւմտամետներ: Հենց այդ արժեքները խորացնելու, մեր երկրում մնայուն դարձնելու համար է, որ մենք կողմ ենք եվրաինտեգրացիային:

Երկրի անվտանգության համակարգը հուսալի դարձնելու համար է, որ կողմ ենք Հայաստանի անդամակցությանը այնպիսի կայացած դաշինքի, ինչպիսին ՆԱՏՕ-ն է, ռազմաքաղաքական եւ տնտեսական հարաբերությունների լայն դաշտի ձեւավորմանը Միացյալ Նահանգների հետ»: Իսկ արդյո՞ք իրենց արեւմտամետության արտահայտություն չէ նաեւ, որ նոր ձեւավորվող ընդդիմությունը իշխանափոխության հարցում իր հույսը կապում է ոչ թե Ռուսաստանի, այլ Արեւմուտքի աջակցության հետ: Անդրադառնալով այս խնդրին՝ պարոն Հովհաննիսյանն ասում է. «Եթե նման խնդիր կա, ապա մեղավորը դարձյալ իշխանություններն են, որոնք ընդդիմությանը զրկել են գործելու իրավունքից: Նրանք ստեղծել են անելանելի փակուղային վիճակ, որից դուրս գալու ելքը շատերը տեսնում են արտաքին ուժերի աջակցությամբ իրականացվելիք հեղափոխության մեջ»:

Խոսելով նոր դաշինքի ձեւավորման հնարավոր ժամկետների մասին՝ պարոն Հովհաննիսյանը ասում է, որ իրենք չափազանց լուրջ են վերաբերվում դրան եւ նախապատրաստվում են ամենայն մանրամասնորեն՝ հասարակությանը հերթական հիասթափությունը չպատճառելու նպատակով: «Մենք չենք ուզում, որ լինի այնպես, ինչպես եղավ ավանդների վերադարձման դեպքում. երբ մարդկանց հույս ներշնչեցին, թե ահա ուր որ է ձեր գումարները կվերադարձնենք, բայց պարզվեց՝ իրականում ամենեւին էլ կարեւորը ավանդներն ու ավանդատուները չեն: Ուղղակի ինչ-որ մեկը պատվեր է կատարում, մյուսը խաղեր է տալիս, երրորդը զբաղված է դիմացինին փչացնելով:

Մենք հասկանում ենք, որ միայն հասարակության վստահությունը վայելելու դեպքում է հնարավոր իշխանափոխություն իրականացնել: Մեր դաշինքը կներկայացնի իր ծրագրերը, պատրաստ կլինի առաջնորդելու հասարակությանը, բայց դրա համար պետք է, որ հասարակությունը վստահի դաշինքին, հավատա մեր ծրագրերին եւ կանգնի մեր կողքին», - պնդում է պարոն Հովհաննիսյանը: Ինչպես «Արդարություն» դաշինքի դեպքում, նոր ձեւավորվող դաշինքի դեպքում եւս՝ նախապես չի որոշվելու, թե ով է առաջնորդը: «Մենք ստեղծում ենք հավասարների դաշինք, որը սկսելու է գործընթացներ: Միայն այդ գործընթացների ընթացքում պարզ կլինի, թե ով է առաջնորդը, ով է, որ մեզանից մեկ քայլ առաջ է: Կարծում եմ՝ առաջնորդին կորոշի դիպվածը», -վստահ է Հ.Հովհաննիսյանը:

Ավետիս Բաբաջանյան