Ի գո՛րծ. քեզ տեսնենք, Ամալյան

Տպագրվել է «Հայկական Ժամանակ» օրաթերթի՝ 2004 թվականի դեկտեմբերի 24-ի համարում

Հեռուստատեսության եւ ռադիոյի ազգային հանձնաժողովի նախագահ Գրիգոր Ամալյանը շուտով իշխանական կլանին իր անսահման հավատարմությունը ցույց տալու փայլուն հնարավորություն կունենա: Դեկտեմբերի 28-ին բացվելու է Երեւանի տարածքում 100,6 Մհց եւ 101,1 Մհց ռադիոհաճախականությունների համար հայտարարված մրցույթներին ներկայացված առաջարկները: Այս մրցույթի ինտրիգն այն է, որ երկու հաճախականությունների մրցույթներին էլ մասնակցում է «Էմ Էս Էքսփլորեր» ընկերությունը, որի հիմնադիրներից մեկը Մեսրոպ Մովսիսյանն է՝ «Ա1+»-ի ղեկավարը: Անկեղծ ասած, մյուս հիմնադիրն էլ՝ «Համագործակցություն հանուն ժողովրդավարության կենտրոն» հասարակական կազմակերպությունը՝ ի դեմս Ստեփան Դանիելյանի, ՀՌԱՀ-ի չափանիշներով, «բարեհույս» չէ:

Իսկ սա արդեն բավական է, որ մրցույթն անցնի մեքենայություններով, խախտումներով եւ ուղղված լինի միայն մի նպատակի՝ «Էմ Էս Էքսփլորեր»-ին հաղթող չհայտարարել: Թե դրա համար կոնկրետ ինչ խախտում կկատարվի, այնքան էլ կարեւոր չէ: Բայց մի մեքենայություն արդեն արվել է, եւ դա ակնհայտ է. մրցույթի առաջարկների փաթեթները բացվելու են դեկտեմբերի 28-ին, իսկ հաղթողին ՀՌԱՀ-ը հավանաբար կհայտարարի դեկտեմբերի 31-ին: Այսինքն՝ այն ժամանակ, երբ մարդիկ զբաղված են ամանորյա հոգսերով, եւ, բացի այդ, չի գործում ոչ իշխանական մամուլը, իսկ նույն ՀՌԱՀ-ից եթեր ստացած հեռուստաընկերություններից եւ ոչ մեկը չի հանդգնի ՀՌԱՀ-ի որոշումը որեւէ կերպ կասկածի տակ առնել, օբյեկտիվորեն վերլուծել, անկախ նրանից՝ որքան զավեշտալի կլինի այդ որոշումը: Մի խոսքով, «Էմ Էս Էքսփլորեր»-ին մերժելը աղմուկ չի հարուցի:

Մի ուշագրավ հանգամանք եւս՝ երկու հաճախականություններին, բացի «Էմ Էս Էքսփլորեր»-ից, մասնակցում են նաեւ «Ավտոռադիո» ՍՊԸ-ն եւ «Ռադիոավրորա» ՍՊԸ-ն, որոնցից յուրաքանչյուրը հայտ է ներկայացրել միայն մեկ հաճախականության վրա: Սա առնվազն  տպավորություն է ստեղծում, որ նախօրոք ամեն ինչ պայմանավորված է՝ այս երկուսը իրար հետ մրցելու անհրաժեշտություն չունեն, եւ այս խաղի մեջ «Էմ Էս Էքսփլորեր»-ը պարզապես «ավելորդ» է՝ անկախ ներկայացրած առաջարկից: Իսկ հաճախականությունները հանվել են մրցույթի միայն այն պատճառով, որ հայտնվել է դրանց հավակնող, բացարձակ վերահսկողության տակ գտնվող երկու ընկերություն: Հակառակ դեպքում հաճախականությունները մրցույթի չէին հանվի՝ բա որ «անբարեհույսները» որեւէ հաճախականության միակ հավակնորդը լինեին, այդ ժամանակ ինչպե՞ս պետք է մերժեին:  

«Էմ Էս Էքսփլորեր»-ի հիմնադիրներ Մ. Մովսիսյանը եւ Ս.Դանիելյանը իրենց ներկայացրած առաջարկի մասին երեկ որոշ պարզաբանումներ ներկայացրին: Ըստ այդմ, եթեր ստանալու դեպքում իրենց ռադիոալիքը ունենալու է հասարակական ուղղվածություն եւ հագեցված է լինելու լրատվական բլոկներով, որոնց պատրաստման առաքելությունը իրականացնելու է «Այբ-ֆե» գործակալությունը: Ու բնական է, որ լրատվական հատվածը ունենալու է «Լսեք մեզ՝ ճանաչեք ձեզ» խորագիրը: Ըստ հիմնադիրների՝ իրենք արդեն ունեն տեխնիկական գրեթե բոլոր միջոցները: Անձնակազմը, որը սպասարկելու է ռադիոեթերը, բաղկացած է պրոֆեսիոնալներից, որոնց համար որեւէ բարդություն չի ներկայացնի թե՛ տեխնիկական, թե՛ բովանդակային առումներով  որակյալ եթերի ապահովումը: Ընկերության հիմնադիրները նշեցին, որ իրենք չեն վերահեռարձակելու որեւէ օտարերկրյա ռադիոկայանի հաղորդումներ, բայց ունեն հետաքրքիր պայմանավորվածություններ համագործակցության վերաբերյալ:

Ի դեպ, Ս.Դանիելյանը մեկնելու էր Ուկրաինա՝ այնտեղ տեղի ունենալիք նախագահական ընտրություններում դիտորդական առաքելություն իրականացնելու նպատակով, բայց մրցութային այս անցուդարձը ստիպել է նրան մնալ ՀՀ-ում: Հավանաբար, բնական է հնչում հետեւյալ հարցը՝ ակնհայտ է, որ մերժվելու են եթեր ստանալու այն բոլոր հայտերը, որոնց հետ ինչ որ առնչություն ունի «Ա1+»-ի ղեկավարը: Արդյո՞ք ավելի նպատակահարմար չէ հայտը ներկայացնել չճանաչված որեւէ մեկի անունից, ապա,  մրցույթում հաղթելուց հետո, իրականացնել տվյալ ընկերության հիմնադիրների փոփոխություն: «Ես, իհարկե, չեմ հասկանում այն թշնամությունը, որ ունի կոնկրետ իմ հանդեպ Ամալյանը... Ինչու պետք է թաքնվեմ, ով վախենում է՝ թող նա թաքցնի իր անունը»,-մեր հարցին ի պատասխան ասաց Մեսրոպ Մովսիսյանը: Նա նաեւ հայտնեց, որ անպայման մասնակցելու է հեռուստահաճախականությունների՝ «Սուպեր-սիստեմ» եւ «AATV» համակարգերի համար հայտարարվելիք մրցույթներին:

Այդուհանդերձ, «Էմ Էս Էքսփլորեր»-ի ներկայացրած մրցութային առաջարկը, եթեր ստանալուց հետո անելիքները եւ մյուս մանրամասները այժմ այնքան էլ էական չեն: Էականն այն է, թե ինչ պատրվակով է մերժվելու այդ առաջարկը: Եթե չկա քաղաքական որոշում «Էմ Էս Էքսփլորեր»-ին ռադիոեթեր տրամադրելու մասին, ապա ՀՌԱՀ-ը ձեռքից բաց չի թողնի իշխանությանը զեկուցել նոր՝ հերթական հաղթանակի մասին: Բայց զեկուցելու գործընթացը ներկայումս ՀՀ-ում բոլորովին այլ տեսք ունի՝ հանձնաժողովը կկանգնի ետեւի թաթիկների վրա, պոչիկը ջանասիրաբար թափ կտա, իշխանությունն էլ կհասկանա այս ժեստը ու հանձնաժողովին կնետի նրան հասանելիք հերթական ոսկորը: Ի վերջո, դա է այս հանձնաժողովի միակ գործառույթը, որն էլ իրականացվում է լավագույնս:

Հայկ Գեւորգյան